Read Tunen Yɔhánɛsɛ 16 Bible Online

Yɔhánɛsɛ 16 - Tunen bible

Yɔhánɛsɛ 16

¹«Mɛ ná bənú bɛ́ɛ́yɛ́ bikimə lakɛ́na ɔkɛaka ɔwá nɔ lɛ kɔ́á ɔ mɔkɔ́lɛna.

²Bá ŋɔ bənú buləkə ɔ məə́bə má mabɛ́kálɛ́na má Bɛyútɛnɛ. Mba, ikúílí yɛ́ lɛa ɔ ɔsákɔna, wɛ́ɛ́yɛ́ ɔwá a ŋɔ kɛaka ɔwá nɔ wə́ə́, a ŋɔ fɛka ɔwá nɛhánɛna a ndɔ Huɛlɛ́ índiə.

³Bá ŋɔ kɛaka nɔ́yɛ́ bɔkɔasɛ́á, ata Isə́, ata ɔwámɛ bá sa manya.»

⁴«Mba, mɛ ná bənú bɛ́ɛ́yɛ́ bɛkɔa lakɛ́na ɔkɛaka ɔwá ɛnáká ikúílí yɛ́ ndáfámá, nɔ́ bɛ́kɔ́lɔ́mɔ́na ɔwá mɛ ka bənú bɛɛ́ta lakɛna.» «Mɛ sa bənú bɛ́ɛ́yɛ́ lɛna ubusíə́ bɔ́ ikúílí bɔkɔasɛ́á mɛ ka báá na bənú.

⁵Isíŋáka, mɛ nɔ́ ákána ɔ busíə́ bɔ́ wɛ́ɛ́yɛ́ ɔwá a ná mɛaŋɔ́á lɔma, mba, ata ɔmɔtɛ́ uwənú ətíə́ a lɛ ndɔ mɛaŋɔ́á bata a sɛ́á: “Hə́níə́ ɔ nɔ́ ákána əə́?”

⁶Mba, busə́kə bɔ́ bənú báka ɔ mɔlɛ́má bɔkɔasɛ́á, mɛ ná bənú nɔ́yɛ́ hɔ́kɛ́na.

⁷Ata nɔ́yɛ́, taká mɛ ná bənú lɛ́na: Yɛ́ lɛa mɔsɛ́ŋɛ́ ɛlɔ́áyɛ́ ənú ɔwá mɛ ákana, ɔ taká, ábá mɛ sá ákána, Mɔkamɛla a sɔ́ ŋɔ ndasá na bənú, mba, ábá mɛ ná ákáná, mɛ ŋɔ bənú wɛɛ́ya lɔ́mɛ́na.

⁸Ɛnáká a ndáfáma, a ŋɔ bɛndɔ bá yɛ́ɛ́yɛ́ misí ínə́niə ɔwɔŋgɔkɔnɔ bɔbɛ́á, bɛkɔa bɛ́ taká, na bikə́lə́síníə́ bɛ́ Huɛlɛ́.

⁹Ɛsalɛ yɛ́ bɔbɛ́á bɔkɔasɛ́á, bá lɛ ndɔ níə́búə́ nɛkɔmba tálɛ́na ɔ ɔwámɛ.

¹⁰Ɛsalɛ yɛ́ bɛkɔa bɛ́ taká bɔkɔasɛ́á, mɛ nɔ́ ákána á Isə́ busíə́, nɔ sa ndá mɛaŋɔ́á sínə́ tɔ́na.

¹¹Ɛsalɛ yɛ́ bikə́lə́síníə́ bɔkɔasɛ́á, Huɛlɛ́ a ka isə́lúkú yɛ yɛ́ɛyɛ misí kə́lə́səkiə.

¹²Mɛ báka tɔ́na na bɛkɔa biəŋí ɔ uwənú ɔlɛna, mba, nɔ sɔ́ ŋɔ óso ɔ bɛɛ́ta uwisíbiniə isíŋáka.

¹³Ɛnáká Umbúínyi wɔ́ taká wɔ́ ndáfámá, wɔ́ ŋɔ kɛaka ɔwá nɔ taká mikimə manya. Ɔ taká, a sɔ́ ŋɔ bá a ndɔ hɛ́na na yayɛ́á iŋgínə́, mba, a ŋɔ bənú lakɛna yatɛ́ yikimə ɔyɛ́á a ŋɔ ɔ́kɔ́kɛna, a ŋɔ bənú mənyəsiə yatɛ́ ɔyɛ́á yɛ́ ná hɔ́ánána ɔndafama.

¹⁴A ŋɔ tɔ́ámɛ́á tuúmə fə́mə́ləniə bɔkɔasɛ́á, yatɛ́ ɔyɛ́á yɛ́ lɛ́á yámɛ, a ŋɔ kusənə, a ŋɔ bənú nɛŋɔnakɛna.

¹⁵Bikimə ɔbɛ́á yamɛ́á Isə́ a lɛ́á itíə́nə́tɔ́ bɛ́ lɛa bɛ́ámɛ. Ɔ́ ɛlɔ́áyɛ́ nɔ́yɛ́ mɛ ná bənú lɛ́na ɔwá: A ŋɔ bənú nɛŋɔnakɛna yatɛ́ ɔyɛ́á a ndɔ kusənə ɔ tɔ́mbákɛna na mɛaŋɔ́á.»

¹⁶«Ɔ ikúílí tɛ́tɛ́á tɔ́na, nɔ sɔ́ ŋɔ mɛaŋɔ́á sinə, mba, tɛ́tɛ́á yɛ́ ikúílí tɔ́na, nɔ ŋɔ mɛaŋɔ́á manyɔ́ siəkinə.»

¹⁷Nɔ́yɛ́, bɔ́mɔtɛ́ báyɛ́á bɔkɔ́nɛna bá ná lúmə́ ɔ ɔlaa bəə́bu na bəə́bu bá sɛ́á: «Yatɛ́ a ná síə́kə ɔ uwəsú ɔlɛna a sɛ́á: “Ɔ ikúílí tɛ́tɛ́á, nɔ sɔ́ ŋɔ mɛaŋɔ́á sinə tɔ́na. Mba tɛ́tɛ́á yɛ ikúílí, nɔ ŋɔ mɛaŋɔ́á siəkinə tɔ́na bɔkɔasɛ́á, mɛ nɔ́ ákána á Isə́ busíə́ əə́?”

¹⁸Yatɛ́ yɛ́ɛ́yɛ́ “tɛ́tɛ́á yɛ́ ikúílí” yɛ́ ndɔ siə ɔlaa əə́? Tɔ lɛ ndɔ ɔ́kɔ muɛsɛ yatɛ́ a ndɔ siə ɔlaa.»

¹⁹Ɛnaka Yə́susu a manyá ɔwá bá ndɔ siə ɔ ɔwayɛ́ ɛmbataka ɔbata, a ná bəə́bu lɛ́na a sɛ́á: «Nɔ ndɔ nuúmə́ yɛ yamɛ́á ɛtambá siə ɔmanya ɔyɛ́á mɛ ná láá mɛ sɛ́á: “Ɔ ikúílí tɛ́tɛ́á, nɔ sɔ́ ŋɔ mɛaŋɔ́á sinə tɔ́na, mba tɛ́tɛ́á yɛ ikúílí, nɔ ŋɔ mɛaŋɔ́á siəkinə.”

²⁰Ɛ́ɛ! Ɔ taká, mɛ ndɔ bənú nɔ́yɛ́ lɛna, nɔ ŋɔ báá ɔ malɛlá ikúílí ɔyɛ́á bɛndɔ bá misí bá ŋɔ bílə́nə́kə́, nɔ ŋɔ báá ɔ məsə́kə, mba, mə́núə́ məsə́kə má ŋɔ bɛ́kɔ́ŋɔ́na ɔ nɛhɔnɔ.

²¹Ikúílí muəndú a lɛ́á ɔ ubíə́nəkə abáka a báá ɔ məsə́kə bɔkɔasɛ́á, yáyɛ́á ikúílí yɛ́ məsə́kə yɛ́ ná ndáfama. Mba ikúílí a ná bíə́nə́, a lɛ ndɔ məsə́kə bɛ́kɔ́lɔmɔna tɔ́na, a lɛa wɛɛ́ya mukimə ɔ nɛhɔnɔ bɔkɔasɛ́á a ná mɔná biənə.

²²Nɔ́yɛ́ nɔ lɛ́á isíŋáka ɔ məsə́kə, mba mɛ ŋɔ bənú manyɔ́ siəkinə. Nɔ́yɛ́ wə́núə́ mɔlɛ́má wɔ́ ŋɔ bílə́nə́kə, ata mɔndɔ a sa ndá nɛ́táyɛ́ nɛhɔnɔ ɔlɔ.

²³Ɔ bɔ́táyɛ́ buɔsɛ́, nɔ sa ndá mɛaŋɔ́á bátá ata bɔkɔa. Ɛ́ɛ! Ɔ taká, mɛ ndɔ bənú nɔ́yɛ́ lɛna, bikimə ɔbɛ́á nɔ ŋɔ Isə́ bata ɔ ɔwámɛ niínyə, a ŋɔ bənú índiə.

²⁴Ɔ ndafámáká isíŋáka, ata bɔkɔa nɔ nana batá ɔ ɔwámɛ niínyə. Nɔ́ batá, nɔ ŋɔ kusənə ɔkɛaka ɔwá, níə́núə́ nɛhɔnɔ nɛ́ báá úndúə́tɔ.»

²⁵«Bɛ́ɛ́yɛ́ bikimə mɛ ná bənú hɔ́kɛ́ná ɔ tɔ́mbákɛna na ɛŋana. Mba, ikúílí yɛ́ lɛa ɔ ɔsákɔna, mɛ sa ndá bənú hɛ́ná tɔ́na ɔ məŋgətí, mɛ ŋɔ bənú bɛkɔa bɛ́ Isə́ hɔ́kɛna ɔ mianyɔ́.

²⁶Ɔ bɔ́táyɛ́ buɔsɛ́ nɔ ŋɔ yamɛ́á Isə́ bɔkɔa bata ɔ ɔwámɛ niínyə, mba, mɛ lɛ ndɔ bənú lɛna ɔwá mɛ ŋɔ Isə́ bɛ́tɔ́kɔ́lɔkɛna ɛlɔ́áyɛ́ ənú.

²⁷Ɔ taká, Isə́ bɛ́múɛ́tɛ́ a ndɔ bənú hikiə bɔkɔasɛ́á, nɔ ka mɛaŋɔ́á hikəkiə, nɔ ka luminə ɔwá mɛ ka húlínə na Huɛlɛ́.

²⁸Mɛ ka húlínə na Isə́, mɛ ná ndásá ɔ misí. Isíŋáka, mɛ nɔ́ misí tíkə, mɛ nɔ́ híánaka á Isə́ busíə́.»

²⁹Báyɛ́á bɔkɔ́nɛna bá sɛ́á: «Ə́yə́ə́, isíŋáka ɔ ndɔ hɔ́ɔ́ ɔ mianyɔ́, ɔ lɛ ndɔ hɛ́na tɔ́na ɔ məŋgətí.

³⁰Tɔ ndɔ manya isíŋáka ɔwá ɔ ndɔ manya bɛkɔa bikimə, ɔ lɛ bá na ilókí ɔwá mɔndɔ a aŋɔ́á bɔkɔa bata. Ɔ́ ɛlɔ́áyɛ́ nɔ́yɛ́ tɔ ndɔ luminə ɔwá ɔ ka húlínə na Huɛlɛ́.»

³¹Yə́susu a sɛ́á: «Isíŋáka nɔ ndɔ lumininə əə́?

³²Ɛ́ɛ! Ikúílí yɛ́ lɛa ɔ ɔsákɔna, yɛ́ nɔ ndafámá ɔwá nɔ ŋɔ sámbána bɛátɛ bikimə, hɛfɔmbɔ tɛ́á na mɔlɔ́á, nɔ ŋɔ mɛaŋɔ́á tíkə bíbúə́. Mba, mɛ lɛ bá mɛaŋɔ́á bíbúə́ bɔkɔasɛ́á Isə́ a lɛa na mɛaŋɔ́á.

³³Mɛ ná bənú lakɛ́ná nɔ́yɛ́ ɔkɛaka ɔwá, nɔ bumbə́nú kúsə́nə ɔ tɔ́mbákɛna na mɛaŋɔ́á. Nɔ ŋɔ məsə́kə siəkinə ɔ misí, mba, nɔ báá na makɛ́nda! Ɔwámɛ mɛ ná misí nɔ́ba.»