Read Tunen Yɔhánɛsɛ 17 Bible Online

Yɔhánɛsɛ 17 - Tunen bible

Yɔhánɛsɛ 17

¹Ikúílí Yə́susu a ná bɛ́ɛ́yɛ́ bɛtambá hɔ́á ɔ ɔlaa, a ná məə́sə bə́líə́ ɔ ɔmbáŋá, a sɛ́á: «Á Ába, ikúílí yɛ́ nɔ́ ndafama, úmə́síə́ wawɔ́á Mɔná ɔkɛaka ɔwá, wawɔ́á Mɔná á aŋɔ́á úmə́kíə́,

²ɔ ka wɛɛ́ya iŋgínə́ índiə ɔsɛ́á a mɔsá mukimə manákɛ́na ɔkɛaka ɔwá, ɔ bááyɛ́ bəkimə ɔbá ɔ ná wɛɛ́ya índíə́, á bəə́bu buɔmɔ́ bɔ́ ikúílíə́kimə índíə́.

³Buɔmɔ́ bɔ́ ikúílíə́kimə bɔ́ báka ɔwá, bá aŋɔ́á mánya, ɔwáwɔ á Huɛlɛ́ bíbúə́ yɛ taká, na Yə́susu Kilísitusu ɔ ɔmanya ɔwá ɔ́ ná lɔma.

⁴Mɛ ná aŋɔ́á úmə́kíə́ ɔ misí, mɛ ná hɔ́á ɔkɛa yatɛ́ ɔ ná mɛaŋɔ́á batá ɔ sɛ́á mɛ kɛ́áka.

⁵Isíŋáka nə́ə, á Ába, índíə́ mɛaŋɔ́á tuúmə ɔwáwɔ ɛmɛ́ŋɛ́ ɔtɔ́á tɔ́ ná mɛaŋɔ́á bámɛ́nɛ́ná ɔ ɔwáwɔ ɛmɛ́ŋɛ́ ubusíə́ ɔbɔ́á ɔ misí kə́tíə́.»

⁶«Bɛndɔ ɔbá ɔ ná ɛtá ɔ misí ɔkɛaka ɔwá ɔ mɛaŋɔ́á bəə́bu índíə́, mɛ ka kɛaka ɔwá bá aŋɔ́á mánya, bá lɛa báwɔ, ɔ ka mɛaŋɔ́á bəə́bú índiə. Bá ka yáwɔ́á ɛtambá bə́təkiə.

⁷Bá ndɔ manya isíŋáka ɔwá, bikimə ɔbɛ́á ɔ ná mɛaŋɔ́á índíə́ bɛ́ ndɔ húlínə na aŋɔ́á,

⁸mɛ ka bəə́bu lɛna yatɛ́ ɔyɛ́á ɔ ná mɛaŋɔ́á lákɛ́na, bá ná bɛ́táyɛ́ bɛtambá tə́tə́níə́ ɔ uwəbú mɛlɛ́má. Bá ná manyá taká taká ɔwá, mɛ ka húlínə́ na aŋɔ́á, bá ná lumínə ɔwá aŋɔ́á ɔ ná mɛaŋɔ́á lɔma.»

⁹«Mɛ ndɔ aŋɔ́á bɛ́kálɛ́na ɛlɔ́áyɛ́ əbú, mɛ lɛ ndɔ bɛ́kálɛ́na ɛlɔ́áyɛ́ bɛndɔ bá misí, mba, ɛlɔ́áyɛ́ bááyɛ́ ɔbá ɔ ná mɛaŋɔ́á índíə́, bɔkɔasɛ́á bá lɛa báwɔ.

¹⁰Bikimə tɔ́na ɔbɛ́á bɛ́ lɛ́á bɛ́ámɛ bɛ́ lɛa bɛ́áwɔ, bikimə ɔbɛ́á bɛ́ lɛ́á bɛ́áwɔ bɛ́ lɛa bɛ́ámɛ, tɔ́ámɛ́á tuúmə tɔ́ ndɔ bínə́niə ɔ uwəbú.

¹¹Mɛ lɛ bá tɔ́na ɔ misí, mba uwəbú, bá lɛa ɔ misí, ɔwámɛ mɛ lɛa ɔsákɔna na aŋɔ́á. Á Isə́ Mɛnaŋanaŋa, tə́tə́kə́níə́ bámɛ́á bɔkɔ́nɛna na yawɔ́á iŋgínə́ ɔyɛ́á ɔ ná mɛaŋɔ́á índíə́ ɔkɛaka ɔwá, bá bámɛ́nɛ́ná mɔndɔ ɔmɔtɛ́ ɛ́sɛ́á na mɛaŋɔ́á na aŋɔ́á tɔ lɛ́á mɔndɔ ɔmɔtɛ́.

¹²Ikúílí ɔyɛ́á mɛ ná báá na bəə́bu, mɛ ka bá mɛ ndɔ bəə́bu tə́tə́niə ɔ tɔ́mbákɛna na nɛ́áwɔ́á niínyə ɔnɛ́á ɔ ná mɛaŋɔ́á índíə́, mɛ ná bəə́bu hóyókíə́, ata ɔmɔtɛ́ ɔ uwəbú ətíə́ a sa nímínə, úhúlíə́ á mɔná wa bunímə́ ɔkɛaka ɔwá, Mətilə má bíúndúsíníə́.

¹³Isíŋáka mɛ lɛa ɔ ɔsákɔna ɔwáwɔ busíə́, mɛ ndɔ bɛ́ɛ́yɛ́ bɛtambá laa ɔ misí ɔkɛaka ɔwá, bá bámɛ́nɛ́ná ɔ nɛhɔnɔ nuúmə́ ɛ́sɛ́á mɛ lɛ́á undúə́tɔ́ na nɛhɔnɔ.

¹⁴Mɛ ná bəə́bu yáwɔ́á ɛtambá índíə́, bɛndɔ bá misí bá ná bəə́bu kóyókíə́ bɔkɔasɛ́á, bá lɛ bá bá misí ɛ́sɛ́á mɛ lɛ bá wa misí.

¹⁵Mɛ lɛ ndɔ aŋɔ́á bata ɔwá ɔ bəə́bu húlíə́ ɔ misí, mba, ɔ́ bəə́bu tə́tə́kə́níə́ hata na Mɔbɛ́á.

¹⁶Bá lɛ bá bá misí ɛ́sɛ́á mɛ lɛ bá wa misí.

¹⁷Kɛ́áka ɔwá bá bámɛ́nɛ́ná bíndíə́tɔ́ ɔ ɔwáwɔ ɔ tɔ́mbákɛna na yáwɔ́á taká, yáwɔ́á ɛtambá yɛ́ lɛa taká.

¹⁸Hɔ́ánánátɔ́ ɛ́sɛ́á ɔ ná mɛaŋɔ́á lɔ́má ɔ misí, mɛaŋɔ́á tɔ́na mɛ ndɔ bəə́bu lɔ́ma ɔ misí.

¹⁹Mɛaŋɔ́á mukimə mɛ ndɔ bíndiə ɔ ɔwáwɔ ɛlɔ́áyɛ́ əbú ɔkɛaka ɔwá, bəə́bu tɔ́na bá bámɛ́nɛ́ná taká na aŋɔ́á.»

²⁰«Tátá ɛlɔ́áyɛ́ əbú bíbúə́ mɛ ndɔ bɛ́kálɛ́na, mba, ɛlɔ́áyɛ́ bááyɛ́ ɔbá bá ŋɔ níə́búə́ nɛkɔmba tálɛ́na ɔ ɔwámɛ nyɔnɔ na bíə́búə́ bɛtambá.

²¹Mɛ ndɔ bɛ́kálɛ́na ɔwá, bəkimə bá bámɛ́nɛ́ná mɔndɔ ɔmɔtɛ́. Á Ába, ɛ́sɛ́á ɔ lɛ́á tɔanátɔ́ na mɛaŋɔ́á na aŋɔ́á, bá bámɛ́nɛ́ná tɔanátɔ́ na bəsú. Bá bámɛ́nɛ́na mɔndɔ ɔmɔtɛ́ ɔkɛaka ɔwá, bɛndɔ bá misí bá lumínə bá sɛ́á ɔ ná mɛaŋɔ́á lɔma.

²²Ɛlɔ́áyɛ́ ámɛ, mɛ ná bəə́bu tuúmə índíə́ ɔtɔ́á ɔ ná mɛaŋɔ́á índíə́ ɔkɛaka ɔwá, bá bámɛ́nɛ́ná mɔndɔ ɔmɔtɛ́ ɛ́sɛ́á tɔ́ əsú lɛ́á mɔndɔ ɔmɔtɛ́.

²³Mɛ ndɔ niŋə ɔ uwəbú nuúmə́, ɔ ndɔ niŋə ɔ ɔwámɛ nuúmə́ ɔkɛaka ɔwá, bá bámɛ́nɛ́ná ɔ nɛtɔana nɛ́ hɔ́ánánátɔ́, bɛndɔ bá misí tɔ́na bá manyá bá sɛ́á ɔ ka mɛaŋɔ́á lɔma, ɔ ndɔ bəə́bu hikiə tɔ́na ɛ́sɛ́á ɔ ndɔ mɛaŋɔ́á hikiə.

²⁴Á Ába, mɛ ndɔ hikiə ɔwá, ɔ ɛbɔ́ka ɔyɛ́á mɛ ŋɔ bámɛnɛna, bááyɛ́ ɔbá ɔ ná mɛaŋɔ́á índíə́ bá bámɛ́nɛ́ná na mɛaŋɔ́á ɔkɛaka ɔwá, bá tɔ́ámɛ́á tuúmə lə́mbə́kíə́ ɔtɔ́á ɔ ná mɛaŋɔ́á índíə́, ɔ taká, ɔ ka mɛaŋɔ́á hikəkiə ubusíə́ bɔ́ nɛbɔ́tɛ́ná nɛ́ misí.

²⁵Á Isə́ yɛ taká, bɛndɔ bá misí bá sa aŋɔ́á manya, mba ɔwámɛ, mɛ ka aŋɔ́á manya, bááyɛ́ ɔbá ɔ ná mɛaŋɔ́á índíə́ bá ka manya ɔwá ɔ ka mɛaŋɔ́á lɔ́ma.

²⁶Mɛ ka bəə́bu nɛ́áwɔ́á niínyə mənyəsiə, mɛ ŋɔ manyɔ́ bəə́bu nɛɛ́ta mənyəsiə ɔkɛaka ɔwá, nibo ɔnɛ́á ɔ ná mɛaŋɔ́á hikə́kíə́ nɛ́ bámɛ́nɛ́ná ɔ uwəbú nuúmə́, mɛaŋɔ́á tɔ́na, mɛ bámɛ́nɛ́ná ɔ uwəbú nuúmə́.»