Read Tunen Yɔhánɛsɛ 18 Bible Online

Yɔhánɛsɛ 18 - Tunen bible

Yɔhánɛsɛ 18

¹Əlimə yɛ mabɛ́kálɛ́na, Yə́susu a ná hɔalɛ́na, a ná ákáná na báyɛ́á bɔkɔ́nɛna, bá ná bíásɛ́na ɔ yííní tanɛ́ yɛ hɛbɛ́lakanɛmbɔŋɔ hɛ́ Sɛtɛlɔ́ŋɔ, yɛ́mɔtɛ́ ɛtɔbɔtɔ́bɔ́ yɛ́ ka báá ɔmɔ́tɔ́yɛ́, a ná fínə́ na báyɛ́á bɔkɔ́nɛna.

²Yútasɛ á mɔsɛma wa Yə́susu, a ka bá a ndɔ yɛ́táyɛ́ ɛbɔ́ka manya muɛsɛ bɔkɔasɛ́á, ɔ yɛ́mɔtɛ́ ikúílí, Yə́susu na báyɛ́á bɔkɔ́nɛna bá lɛ kɔtakana ɔmɔ́tɔ́yɛ́.

³Ɔ yɛ́ɛ́yɛ́ ikúílí, Yútasɛ a ná ilúkunə yɛ́ bɔkɔfɔnɛa bá Lɔ́ma ɛtá na batáta ɔbá bisə́lúkú bɛ́ bətitiəmahánɛna na Bɛfalísia bá ná lɔma, bá ná ákáka umə́, na bikúlúmə́ bɛ́ bilə́, ɛmbɛ́hɛ́, na bitiəkətiəkə.

⁴Yə́susu a manyaka bikimə ɔbɛ́á ɛkasɛ bɛ́ ndá wɛɛ́ya fámɛ́ná, a ná bɛ́nyálɛ́la, a ná bəə́bu batá a sɛ́á: «Ɔwanɛ́ nɔ ndɔ siə əə́?»

⁵Bá sɛ́á: «Á Yə́susu, á mɔndɔ wa Násalɛtɛ.» Yə́susu a sɛ́á: «Ɔ́ mɛaŋɔ́á wɔ́ɔwɔ.» Yútasɛ á mɔsɛma wa Yə́susu, a ka báá ɔ ilúkunə na bəə́bu.

⁶Ɛnaka Yə́susu á bəə́bu lɛ́na a sɛ́á: «Ɔ́ mɛaŋɔ́á wɔ́ɔwɔ.» Bá ná híáná na əlimə, bá ná sukúnúə́ ɔ misí.

⁷Yə́susu a ná híánɔ́lɔ́na ɔ uwəbú ɔbata a sɛ́á: «Ɔwanɛ́ nɔ ndɔ siə əə́?» Bá sɛ́á: «Á Yə́susu, á mɔndɔ wa Násalɛtɛ.»

⁸Yə́susu a sɛ́á: «Mɛ ná bənú lɛ́ná buɔnɔ́ ɔwá ɔ́ mɛaŋɔ́á wɔ́ɔwɔ. Ábá ɔwámɛ nɔ ndɔ siə, nɔ́ báaba niása bá ákáka.»

⁹Á nɔ́yɛ́ yáyɛ́á ɛtambá yɛ́ ná bíúndúsíníə́ ɔyɛ́á a ná láá a sɛ́á: «Á Isə́, bəkimə ɔbá ɔ ná mɛaŋɔ́á índíə́ ata ɔmɔtɛ́ a sa nímínə.»

¹⁰Nɔ́yɛ́ Símono Bíə́lə ɔwá a ná báá na mɔkɔ́átá ɔ ɔwayɛ́ ɛbákálá, a ná muítə sɔhɔ, a ná mulúə́ wɔ́ ɛsalɛ yɛ́ bɛnɔ́mɛ wɔ́ mɔnyɛna wa isə́lúkú yɛ bətitiəmahánɛna fala. Niínyə nɛ́ mɔ́táyɛ́ mɔnyɛna á Málákusu.

¹¹Mba, Yə́susu a ná Bíə́lə lɛ́na a sɛ́á: «Híə́níə́ wə́wúə́ mɔkɔ́átá ɔ ɛbákálá. Ɔ ndɔ fɛka ɔwá mɛ ndɔ kinəkə ɔ ɛmɔ́kɛ́ ɔnyáá ɔyɛ́á yamɛ́á Isə́ a ná mɛaŋɔ́á índíə́ əə́?»

¹²Ilúkunə yɛ́ bɔkɔfɔnɛa bá Lɔ́ma, wəbúə́ mɔmanɛna na batáta bá Bɛyútɛnɛ, bá ná Yə́susu halɛ́na, bá ná wɛɛ́ya makátá ɔ́lɔ́kɔ́kɔ́ na mikolí.

¹³Bá ná taŋá a Yə́susu ɔ ɔwakánana á Ána busíə́ bɔkɔasɛ́á, a ka báá mukinə́ wa Kayífi ɔwá a ná báá Mutitiəmahánɛna Mɔŋɛ́ŋa ɔ hítə́yí hiɔŋɔ.

¹⁴Ɔ́ mɛ́táyɛ́ Kayífi ɛ́mɔtɛ́ a ná bisə́lúkú bɛ́ Bɛyútɛnɛ məlíhə́ní índíə́ a sɛ́á: «Yɛ́ lɛa na mɔsɛ́ŋɛ́ ɔwá mɔndɔ ɔmɔtɛ́ á wínə́ ɛlɔ́áyɛ́ bɔnɔŋɔ bukimə.»

¹⁵Símono Bíə́lə na wɔmɔtɛ́ mɔkɔ́nɛna bá ná Yə́susu ɔŋgɔ. Mutitiəmahánɛna Mɔŋɛ́ŋa a ka bá a ndɔ mɔ́táyɛ́ mɔkɔ́nɛna manya muɛsɛ. Ɔ́ ɛlɔ́áyɛ́ nɔ́yɛ́ a ná fínə́ na Yə́susu ɔ niə́lətíə́ nɛ́ mɔkákɔ ɔ ɔmbɛ́la wɔ́ Mutitiəmahánɛna Mɔŋɛ́ŋa,

¹⁶mba, Bíə́lə a sa áyɛ́ fínə, a ná tíkə́nə́ ɔ busíə́ bɔ́ hɛkɔ́kɛ. Wɛ́ɛ́yɛ́ mɔkɔ́nɛna ɔwá Mutitiəmahánɛna Mɔŋɛ́ŋa a ná bá a ndɔ manya, a ná fama, a ná káhɔ́ɔ́kɔ́ na muəndú ɔwá a ná báá ɔ hɛkɔ́kɛ ɔtáta. Mba, bá ná Bíə́lə fíníə́.

¹⁷Ɔ yɛ́táyɛ́ ikúílí, mɔnyɛna muəndú ɔwá a ná báá ɔ hɛkɔ́kɛ ɔtáta, a ná Bíə́lə batá a sɛ́á: «Aŋɔ́á tɔ́na ɔ lɛ bá mɔkɔ́nɛna wa wɛ́ɛ́yɛ́ mɔndɔ əə́?» A sɛ́á: «Bóo! Mɛ lɛ bá wayɛ́á mɔkɔ́nɛna.»

¹⁸Ɛ́sɛ́á nikə nɛ́ ná báá, bɔnyɛna na batáta bá ka hiwə kɔtaka ɛlɔ́áyɛ́ ɔwɔsɔ́bɔ, Bíə́lə a ka báá ɔ ɔwɔsɔ́bɔ na bəə́bu.

¹⁹Mutitiəmahánɛna Mɔŋɛ́ŋa a ná botólíə́ á Yə́susu ɔ ɔnjɔnɔ ɛsalɛ yɛ́ báyɛ́á bɔkɔ́nɛna na bɛ́áyɛ́á binə́níníə́.

²⁰Yə́susu a sɛ́á: «Mɛ ka bɛndɔ bəkimə hɔ́kɛna ɔ mianyɔ́, ikúílí tɛ́á mɛ úkúnəkiə ɔ məə́bə má mabɛ́kálɛ́na, ɔ Tɛ́mbɛlɛ ɔhá Bɛyútɛnɛ bikimə bá ndɔ kɔtana, ata bɔkɔa bɔ́mɔtɛ́ mɛ sa laa ɔ inditiə.

²¹Ɛlɔ́áyɛ́ yatɛ́ ɔ ndɔ mɛaŋɔ́á njɔnɛna əə́? Batáka ɔ bááyɛ́ ɔbá bá ná ɔ́kɔ́kɛ́ná yatɛ́ ɔyɛ́á mɛ ná bəə́bu hɔ́kɛ́na, bəə́bu bá ndɔ manya muɛsɛ yatɛ́ ɔyɛ́á mɛ ná lááka.»

²²Ɛnaka Yə́susu a hɔ́lɔ́ nɔ́yɛ́, wɔmɔtɛ́ mɔtáta ɔwá a ná bá ɔmɔ́tɔ́yɛ́, a ná wɛɛ́ya sáná na ɔmɔ́lɛ́, a sɛ́á: «Á nɔ́yɛ́ ɔ ndɔ Mutitiəmahánɛna Mɔŋɛ́ŋa bíhíə́niniə əə́?»

²³Yə́susu a sɛ́á: «Ábá mɛ ná hɔ́lɔ́ mɔbɛ́á, ínə́níə́ mɛaŋɔ́á yatɛ́ ɔyɛ́á yɛ́ lɛ́á yɛbɛ́á: Mba, ábá mɛ ná hɔ́lɔ́ taká, ɛlɔ́áyɛ́ yatɛ́ ɔ ndɔ mɛaŋɔ́á súbínə əə́?»

²⁴Əlimə yɛ nɔ́yɛ́, Ána a ná Yə́susu lɔ́má makátá ɔ́lɔ́kɔ́kɔ́tɔ́ á Kayífi á Mutitiəmahánɛna Mɔŋɛ́ŋa.

²⁵Ɔ yɛ́táyɛ́ ikúílí, Símono Bíə́lə a ka báá ɔmɔ́tɔ́yɛ́ ɔ ɔwɔsɔ́bɔ. Bá ná wɛɛ́ya batá bá sɛ́á: «Aŋɔ́á tɔ́na ɔ lɛ bá wɔmɔtɛ́ mɔkɔ́nɛna wa wɛ́ɛ́yɛ́ mɔndɔ əə́?» A ná saŋɔna, a sɛ́á: «Bóo! Mɛ lɛ bá wayɛ́á mɔkɔ́nɛna.»

²⁶Wɔmɔtɛ́ mɔnyɛna wa Mutitiəmahánɛna mɔŋɛ́ŋa a ka báá ɔmɔ́tɔ́yɛ́, a ka báá nikúlə nɛ́ wɛ́ɛ́yɛ́ mɔndɔ ɔwá Bíə́lə a ná mulúə́ fala, a ná wɛɛ́ya lɛ́na a sɛ́á: «Tátá ɔwáwɔ mɛ ná siəkínə ɔ ɛtɔbɔtɔ́bɔ́ na Yə́susu əə́?»

²⁷Mba, Bíə́lə a ná manyɔ́ wɛɛ́ya bɛ́sáŋɔna, ɔ umisíúmə́, miɔkɔ́ yɛ́ ná lɔ́ŋɔ́ kokóóko!

²⁸Ɔ yɛ́ɛ́yɛ́ ikúílí, bá ná Yə́susu hɔalɛ́nána á Kayífi busíə́, bá ná wɛɛ́ya ákánáná ɔ bituənínə́ bɛ́ mɔmanɛna, yɛ́ ka báá ɛsɔ́mbalɛ́. Mba, bisə́lúkú bɛ́ Bɛyútɛnɛ bá sa fínə ɔ bituənínə́ bɛ́ mɔmanɛna ɔkɛaka ɔwá, bá lɛ bítífílə́ ubusíə́ bɔ́ nɛnɛ́á nɛ́ Básɛ́ka.

²⁹Ɛlɔ́áyɛ́ nɔ́yɛ́, mɔmanɛna Bilátɛ a ná ká bəə́bu kɔ́ána ɔ niə́lətíə́, a sɛ́á: «Ɔ yatɛ́ nɔ ndɔ wɔ́ɔwɔ mɔndɔ sɔ́mɛnɛna əə́?»

³⁰Bá sɛ́á: «Ata wɔ́ɔwɔ mɔndɔ a lɛ bɔbɛ́á kɛa, há tɔ sá aŋɔ́á wɛɛ́ya húlə́ninə.»

³¹Nɔ́yɛ́ Bilátɛ a sɛ́á: «Bənú bɛ́múɛ́tɛ́ nɔ́ wɛɛ́ya ɛta, nɔ́ wɛɛ́ya kə́lə́sə́kíə́ ɛ́sɛ́á wə́núə́ umbə́ndə́ wɔ́ ndɔ laa.» Bɛyútɛnɛ bá sɛ́á: «Tɔ lɛ bá na iŋgínə́ yɛ mɔndɔ ɔ ɔwɔ́nɔ.»

³²Nɔ́yɛ́ yɛ́ ka bɛ́kɛaka ɔkɛaka ɔ sɛ́á ɛtambá ɔyɛ́á Yə́susu a ná láá, yɛ́ bíúndúsíníə́ ɔ uwinə́niə yatɛ́ nindínə́ nɛ́ nyɛmbɛ́ a ŋɔ wínə.

³³Bilátɛ a ná tilə́ ɔ ɔwáyɛ́ bituənínə́. Á ná Yə́susu ɛ́lɛ́na, a ná wɛɛ́ya batá a sɛ́á: «Aŋɔ́á ɔ lɛ́á munəni wa Bɛyútɛnɛ əə́?»

³⁴Yə́susu a sɛ́á: «Ɛlɔ́áyɛ́ yatɛ́ ɔ ndɔ nɔ́yɛ́ batɛna, aŋɔ́á bɛ́múɛ́tɛ́ ɔ́ ná nɔ́yɛ́ bɛ́kɔ́lɔ́mɔ́kɔ́na ataná, bɔ́mɔtɛ́ bɛndɔ bá ná aŋɔ́á nɔ́yɛ́ lɛ́na ɛlɔ́áyɛ́ ámɛ əə́?»

³⁵Bilátɛ a sɛ́á: «Haa! Mɛ lɛ bá Mɔyútɛnɛ. Bɔ́áwɔ́á bɔnɔŋɔ na bisə́lúkú bɛ́ bətitiəmahánɛna bá ná aŋɔ́á sɛmɛ́na ɔ ɔwámɛ. Yatɛ́ ɔ ná kɛ́áka əə́?»

³⁶Yə́susu a sɛ́á: «Nɛ́ámɛ́á nɛmanɛna nɛ́ lɛ bá nɛ́ yɛ́ɛyɛ misí. Ata nɛ́ámɛ́á nɛmanɛna nɛ́ bámɛnɛna nɛ́ yɛ́ɛyɛ misí, há bámɛ́á bɔnyɛna bá ná nɔ́áka ɛlɔ́áyɛ́ ámɛ ɔkɛaka ɔwá, bá lɛ mɛaŋɔ́á sɛ́mɛ́na ɔ Bɛyútɛnɛ. Mba, ɔ taká, nɛ́ámɛ́á nɛmanɛna nɛ́ lɛ bá isíŋáka háha.»

³⁷Nɔ́yɛ́, Bilátɛ a ná wɛɛ́ya batá a sɛ́á: «Aŋɔ́á ɔ́ lɛ́á taká munəni əə́?» Yə́susu a sɛ́á: «Aŋɔ́á ɔ ndɔ laa ɔwá mɛ lɛa munəni. Mɛ ka bíbíə́nə, mɛ ná ndásá ɔ misí ɔ imbóŋi yɛ taká ufə́mə́ləniə. Ata ɛ́yánɛ́ ɔwá a lɛ́á wa taká, a ndɔ nɛ́ámɛ́á nióni ɔ́kɔ.»

³⁸Bilátɛ a sɛ́á: «Yatɛ́ yɛ́ lɛ́á taká əə́?» Əlimə yɛ bɛ́ɛ́yɛ́ bɛtambá, a ná manyɔ́ fáma ɔ nɛnyáná na Bɛyútɛnɛ, a sɛ́á: «Ɛ́sɛ́á wə́míə́ usinə, mɛ lɛ ndɔ hɛkɔma bɔ́ŋɔ ata hímotí ɔhɛ́á hɛ́ ndɔ wɛɛ́ya hɔkɛna.

³⁹Mba, ɛ́sɛ́á yə́núə́ ɛnɛ́ma yɛ́ booko ɔwá Básɛ́ka tɛ́á, mɛ bənú mɔndɔ wa ɛbɔka niasɛna ɔmɔtɛ́, nɔ ndɔ siə ɔwá mɛ bənú munəni wa Bɛyútɛnɛ niasɛ́na əə́?»

⁴⁰Bɛndɔ bəkimə bá ná yə́mə́níə́ bá sɛ́á: «Bóo! Táta ɔwáyɛ́, mba á Balábasɛ!» Mba nɔ́yɛ́, Balábasɛ a ka bá mucəŋə.