Read Tunen Yɔhánɛsɛ 2 Bible Online

Yɔhánɛsɛ 2 - Tunen bible

Yɔhánɛsɛ 2

¹Əlimə yɛ tunó tɔ́fandɛ́, ɛŋganda yɛ nɛbɛ́lɛna yɛ́ ka báá ɔ bətínə́ yɛ Kána, ɔ Kalɛ́lɛa. Inyə́ yɛ Yə́susu a ka báá umə́.

²Bá ka Yə́susu ɛ́lɛakɛna na báyɛ́á bɔkɔ́nɛna.

³Ɛ́sɛ́á məluku má ná hɔ́á, yáyɛ́á inyə́ a ná wɛɛ́ya lɛ́na a sɛ́á: «Bá lɛ bá tɔ́na na məluku.»

⁴Mba a ná wɛɛ́ya bíhíə́níníə́ a sɛ́á: «Á Ámá yatɛ́ yɛ́ lɛ́á na mɛaŋɔ́á na aŋɔ́á əə́? Yámɛ́á ikúílí yɛ́ nana ndáfama.»

⁵Inyə́ a ná bɔnyɛna lɛ́na a sɛ́á: «Nɔ́ kɛ́áká ata yatɛ́ ɔyɛ́á a ndɔ bənú lakɛna.»

⁶Bɛbɔmbɔ bɛ́lɛ́ndálɔ bɛ́ ka báá ɔmɔ́tɔ́yɛ́ tábɔ́nákátɔ́ na miɔkɔ ɔbɛ́á abáka Bɛyútɛnɛ bá mənífə́ bɛ́kɛakɛna ɛlɔ́áyɛ́ nibínə́ŋəsiə ɛ́sɛ́á yə́búə́ ɛnɛ́ma. Ɛbɔmbɔ ɛ́mɔtɛ́ yɛ́ ɛ́taka ɛbɔ́ɛ́yɛa yɛ́ bilíta.

⁷Yə́susu a ná bɔnyɛna lɛ́na a sɛ́á: «Nɔ́ mənífə́ úndúsə́kíə́ ɔ bɛbɔmbɔ.» Bá ná bɛɛ́ta úndúsə́kíə́ ɔ mabɛbɛ.

⁸A ná bəə́bu lɛ́na a sɛ́á: «Nɔ mənífə́ tɔ́ká isíŋáka, nɔ kíndíə́ á isə́lúkú yɛ ɛŋganda.» Bá ná kɛ́áká nɔ́yɛ́.

⁹Isə́lúkú yɛ ɛŋganda a ná mənífə́ ɔ́kɔ́lɛ́na ɔmá má ná híáná məluku. A sa bá a ndɔ manya hə́níə́ mátáyɛ́ məluku má ná hulinə. Mba, bɔnyɛna bá əbú nɔ́yɛ́ manyaka. A ná muití nɛbɛ́lɛna ɛ́lɛ́ákɛ́na,

¹⁰a ná wɛɛ́ya lɛ́na a sɛ́á: «Abáka bɛndɔ bá taŋa ɔ bɔsɔ́kɔ́ uwíndiə á məluku maasɛ, ikúílí bá ná híólóko, a tíkə́ mɔ́mɔtɛ́ fə́miə ɔmá má lɛ sulú báá maasɛ. Mba ɔwáwɔ, ɔ ná məluku maasɛ tə́tə́níə́ ɔ ndafámáká isíŋáka!»

¹¹Nɔ́yɛ́ yɛ́ ná báá nɛbalɛ́ná nɛ́ tɔŋgɛtɛ́nɛ́á tɔ́ yələ́mənə ɔtɔ́á Yə́susu a ná kɛ́áka ɔ Kána, ɔ bətínə́ yɛ Kalɛ́lɛa. A ka tɔ́áyɛ́á tuúmə fə́mə́ləniə, báyɛ́á bɔkɔ́nɛna bá ná níə́búə́ nɛkɔmba tálɛ́ná ɔ ɔwáyɛ́.

¹²Əlimə yɛ nɔ́yɛ́, Yə́susu a ná ákáná ɔ bətínə́ yɛ Kafalanahúmu na yayɛ́á inyə́, báyɛ́á bənínyə́ na báyɛ́á bɔkɔ́nɛna. Bá ná tuənə́kínə ɔmɔ́tɔ́yɛ́ tɛ́tɛ́á yɛ tunó.

¹³Ɛ́sɛ́á ɛŋganda yɛ Básɛ́ka ɔ Bɛyútɛnɛ yɛ́ ná báá hoóyi, Yə́susu a ná ákáná ɔ Yəlúsalɛma.

¹⁴A ná bɛndɔ kɔ́ána ɔ Tɛ́mbɛlɛ nuúmə́ bá ndɔ bɛfɔŋɔ lúə́, ɛndɔ́mbá na tubúbə́. A ná bəsə́njíə́ mɔnɛ́á kɔ́áná tɔ́na tuənə́kínə́tɔ.

¹⁵Əlimə yɛ nɔ́yɛ́, a ná ɔŋɔ́ányɛ́ tábɔ́náká na mikolí, a ná bəə́bu bəkimə kúbə́kə́ ɔ Tɛ́mbɛlɛ na yə́búə́ ɛndɔ́mbá, na bíə́búə́ bɛfɔŋɔ. A ná mɔnɛ́á má bəsə́njíə́ sasáka ɔ misí, a bíə́búə́ bɛtáka nyɛkakɛna.

¹⁶A ná bəlúə́ tubúbə́ lɛ́na a sɛ́á: «Nɔ́ bɛ́ɛ́yɛ́ bɛɛ́la hɛ́kɛ́ákɛ́á háha! Nɔ lɛ miímə yɛ yamɛ́á Isə́ híə́nə́síə́ miímə yɛ nyuŋgə́.»

¹⁷Bɔkɔ́nɛna bá ná bɛtambá bɛ́ Mətilə bɛ́kɔ́lɔ́mɔ́na ɔbɛ́á bɛ́ ndɔ laa bɛ́ sɛ́á: «Mɛ ndɔ yawɔ́á miímə hikiə mɔŋɛ́ŋa, nɛ́táyɛ́ nibo nɛ́ ndɔ mɛaŋɔ́á nyúɛ́nɛna ɛmbáta.»

¹⁸Ɔ yɛ́ɛ́yɛ́ ikúílí, Bɛyútɛnɛ bá ná wɛɛ́ya batá bá sɛ́á: «Yatɛ́ hɛŋgɛtɛ́nɛ́á hɛ́ yələ́mənə ɔ ndɔ bəsú ínə́kiniə ɔ kɛaka ɔwá mbá tɔ manyá tɔ sɛ́á ɔ lɛa na iŋgínə́ yɛ bɛndɔ ɔ ukúbə əə́?»

¹⁹Yə́susu a sɛ́á: «Nɔ́ yɛ́ɛ́yɛ́ Tɛ́mbɛlɛ katáka, ɔ tunó tɔ́lálɔ́, mɛ ŋɔ mɛɛ́ta huələkiniə.»

²⁰Bá ná wɛɛ́ya bíhíə́níníə́ bá sɛ́á: «Bá ka kɛaka moómo ə́nisə má tuɔŋɔ na tɔ́lɛ́ndálɔ ɔ yɛ́ɛ́yɛ́ Tɛ́mbɛlɛ ɔfalaba, ɔwáwɔ, ɔ tunó tɔ́lálɔ́ mbá ɔ́ mɛɛ́ta huələ́kíníə́ əə́?»

²¹Mba, á Tɛ́mbɛlɛ ɔyɛ́á Yə́susu a ná bá a ndɔ hɛ́na, ɔ́ yayɛ́á mɛɛ́lɔ.

²²Ikúílí a ná hɔ́ŋɔ́á ɔ ətíə́ yɛ bəwə́nú, báyɛ́á bɔkɔ́nɛna bá ná bɛ́kɔ́lɔ́mɔ́ná yatɛ́ ɔyɛ́á a ná bəə́bu hɔ́kɛ́na; bá ná lumínínə ɔ Mətilə na ɛtambá ɔyɛ́á a ná laa.

²³Ikúílí Yə́susu a ná báá ɔ Yəlúsalɛma ɔ ɛŋganda yɛ Básɛ́ka, bɛndɔ bəəŋí bá ka níə́búə́ nɛkɔmba tálɛ́na ɔ ɔwayɛ́, ɔwɔŋgɔkɔnɔ na tɔŋgɛtɛ́nɛ́á tɔ́ yələ́mənə ɔtɔ́á bá ná síə́kínə́ a ndɔ kɛa.

²⁴Mba, a sa bá na nɛkɔmba na bəə́bu bɔkɔasɛ́á, a ka bá a ndɔ bəə́bu bəkimə manya muɛsɛ.

²⁵A sa bá a ndɔ siə tɔ́na ɔwá, bá wɛɛ́ya ɔbáá wɔ́ mɔndɔ tɛ́á lakɛ́ná bɔkɔasɛ́á, a ka bá a ndɔ ɛfɛka yɛ́ mɔndɔ tɛ́á manya.