Read Tunen Yɔhánɛsɛ 21 Bible Online

Yɔhánɛsɛ 21 - Tunen bible

Yɔhánɛsɛ 21

¹Əlimə yɛ tɛ́tɛ́á yɛ tunó, Yə́susu a ka manyɔ́ bínə́niə ɔ bɔkɔ́nɛna ɔ ɛsɛ́lɛ́ yɛ́ nɛɛ́ŋɛa nɛ́ Tibɛliátɛ. Náana a ná bəə́bu bínə́níə́.

²Símono Bíə́lə, Tɔ́masɛ ɔwá bá ndɔ ɛ́lɛnɛna bá sɛ́á: «Ɔmbɔ́ásalɛ́,» Natanahɛ́lɛ wa bətínə́ yɛ Kána ɔ Kalɛ́lɛa á baná bá Sɛbɛtɛ́ na bɔ́mɔtɛ́ bɔkɔ́nɛna báfandɛ́ bá ka bákɔna iŋgində́.

³Símono Bíə́lə a ná bəə́bu lɛ́na a sɛ́á: «Mɛ nɔ́ ákána ɔ mɔnɔ́fɔ.» Bá sɛ́á: «Tɔ ndɔ ákaka na aŋɔ́á.» Bá ná ə́kə́nə́níə́, bá ná fínə́ ɔ isóyí nuúmə́. Mba ɔ bɔ́táyɛ́ bulúə́, bá sa halɛna ata hiɔfɔ́ hímotí.

⁴A ka bá a nɔ́ yáá, Yə́susu a ka báá tɛ́nɛ́mátɔ́ ɔmɔ́tɔ́yɛ́ ɔ ɛsɛ́lɛ́ yɛ́ nɛɛ́ŋɛa, mba, bɔkɔ́nɛna bá lɛ manyá bá sɛ́á wɛɛ́ya.

⁵A ná bəə́bu lɛ́na a sɛ́á: «Nəníə́ ənú a bámɛ́á baná, nɔ ná hɔ́yɛ́ tuɔfɔ́ hálɛ́ákɛ́na əə́?» Bá sɛ́á: «Bóo!»

⁶A sɛ́á: «Nɔ́ nibúnjə́ əmbínə ɔ mɔkátá wɔ́ bɛnɔ́mɛ wɔ́ isóyí, nɔ ndɔ halɛakɛna.» Bá ná nɛɛ́ta əmbínə, tuɔfɔ́ tɔ́ ka báá úndúə́tɔ́ ɔ nibúnjə́ ɔ nindínə́ ɔnɛ́á bá sa ósó ɔ nɛɛ́ta usúə́.

⁷Ɔ yɛ́ɛ́yɛ́ ikúílí, mɔkɔ́nɛna ɔwá Yə́susu a ná bá a ndɔ hikiə, a ná Bíə́lə lɛ́na a sɛ́á: «Á Isə́lúkú!» Ɛnaka á ɔ́kɔ́ ɔwá á Isə́lúkú, Símono Bíə́lə a ná bɔlɛŋa bíə́mbínə ɔ mɛɛ́lɔ bɔkɔasɛ́á, a ka báá mɔsámbɔ, a ná bíə́mbínə ɔ nuíyi.

⁸Bááyɛ́ bɔkɔ́nɛna bɔ́mɔtɛ́ bá ná isóyí nukəkə, bá ná nibúnjə́ súə́kə́ úndúə́tɔ́ na tuɔfɔ́, bá sa bá hata na ɛsɛ́lɛ́, yɛ́ ka báá hoóyi na ɛbɔ́ɛ́yɛa ná niómo nɛ́ amaná.

⁹Ɛnaka bá ndáfámá ɔ ɛsɛ́lɛ́, bá ná mɔná nɛsanákɛ́ yámá tuɔfɔ́ tálátɔ́ ɔ ɔmbáŋá na bɛbɛlɛ́tɛ.

¹⁰Yə́susu a ná bəə́bu lɛ́na a sɛ́á: «Nɔ́ tuɔfɔ́ húlə́nə́ nə́ə ɔtɔ́á nɔ nɔ́ húlə ɔ ɔhalɛna.»

¹¹Nɔ́yɛ́, Símono Bíə́lə a ná manyɔ́ fínə ɔ isóyí, a ná nibúnjə́ súə́kə́ ɔ ɛsɛ́lɛ́ úndúə́tɔ́ na ɛbɔ́ɛ́yɛa na moómo álánɔ má tuɔfɔ́ tɔŋɛ́ŋa na tɔ́lálɔ́, ata nɔ́yɛ́ ɛ́sɛ́á tɔ́ ná báá tuəŋí, nibúnjə́ nɛ́ sa salɛa.

¹²Yə́susu a sɛ́á: «Nɔ́ sɔ́nɔ ɔnɛ́á.» Ata mɔkɔ́nɛna ɔmɔtɛ́ a sa óso ɔwayɛ́ ɔbata a sɛ́á: «Baánɛ, aŋɔá ɛ́yánɛ́ əə́?» Bá ka manya bá sɛ́á á Isə́lúkú.

¹³Nɔ́yɛ́, Yə́susu á tɔ́mbálɛ́la ɔ ɛmɛ́ŋɛ́ yɛ nɛsanákɛ́, a ná hiɔfɔ́ ɛ́tá na bɛlɛ́tɛ, a ná bəə́bu índíə́, bá ná nɛaka.

¹⁴Ɔ́ bikúílí bɛ́lálɔ́ bɛ́ɛbɛ ɛ́sɛ́á Yə́susu a nɔ́ bínə́niə ɔ ɔwayɛ́ bɔkɔ́nɛna əlimə yɛ nɛ́áyɛ́á nɛhɔŋɔa ɔ ətíə́ yɛ bəwə́nú.

¹⁵Əlimə yɛ nɛnɛ́á, Yə́susu a ná Símono Bíə́lə lɛ́na a sɛ́á: «Á Símono, á mɔná wa Yɔhánɛsɛ, ɔ ndɔ mɛaŋɔ́á hikiə yáyɛ́ná báaba əə́?» A ná wɛɛ́ya bíhíə́níníə́ a sɛ́á: «Ɛ́ɛ! Á Isə́lúkú, ɔ ndɔ manya ɔwá mɛ ndɔ aŋɔ́á hikiə» Yə́susu a sɛ́á: «Tə́tə́kə́níə́ bámɛ́á banándɔ́mbá.»

¹⁶Ɔ bikúílí bɛ́fandɛ́, a sɛ́á: «Á Símono, á mɔná wa Yɔhánɛsɛ, ɔ ndɔ mɛaŋɔ́á hikiə əə́?» A sɛ́á: «Ɛ́ɛ! Á Isə́lúkú, ɔ ndɔ manya ɔwá mɛ ndɔ aŋɔ́á hikiə.» Yə́susu a sɛ́á: «Bámɛ́nɛ́ná mɔkɛndana wa yə́míə́ ɛndɔ́mbá.»

¹⁷Ɔ bikúílí bɛ́lálɔ́, Yə́susu a sɛ́á: «Á Símono, á mɔná wa Yɔhánɛsɛ, ɔ ndɔ mɛaŋɔ́á hikiə əə́?» Bíə́lə a ná busə́kə ɔ́kɔ́ bɔkɔasɛ́á, a nɔ́ wɛɛ́ya batɛna ɔ bikúílí bɛ́lálɔ́ ábá a ndɔ wɛɛ́ya hikiə. A ná wɛɛ́ya bíhíə́níníə́ a sɛ́á: «Á Isə́lúkú, ɔ ndɔ manya bɛkɔa bikimə, ɔ ndɔ manya ɔwá mɛ ndɔ aŋɔ́á hikiə.» Yə́susu a sɛ́á: «Tə́tə́kə́níə́ yə́míə́ ɛndɔ́mbá.

¹⁸Ɛ́ɛ! Ɔ taká mɛ ndɔ aŋɔ́á nɔ́yɛ́ lɛna, ikúílí ɔ ná báá ɛnjɔ́hɔkɛ, aŋɔ́á bɛ́múɛ́tɛ́ ɔ ná bá ɔ ndɔ híə́wúə́ hiŋgóli bítiŋə, ɔ ka bá ɔ ndɔ ákána ɔ ɛbɔ́ka ɔyɛ́á ɔ ndɔ hikiə, mba, ɛnáká ɔ yɔ́kɔ́bɔ́nɔ, ɔ ŋɔ makátá nandɛa mbá mɔndɔ muinə́muinə́ a aŋɔ́á hiŋgóli tiŋə, a aŋɔ́á ákánána ɔ ɛbɔ́ka ɔyɛ́á ɔ sɔ́ ŋɔ hikiə.»

¹⁹Yə́susu a ka hɔ́ɔ́kɔ nɔ́yɛ́ ɛlɔ́áyɛ́ nindínə́ nɛ́ nyɛmbɛ́ uwinə́niə ɔnɛ́á Bíə́lə a ŋɔ tuúmə tɔ́ Huɛlɛ́ fə́mə́ləniə. Əlimə yɛ yɛ́ɛ́yɛ́ ɛtambá, a ná wɛɛ́ya lɛ́na a sɛ́á: «Ɔŋgɔ́kɔ́ mɛaŋɔ́á.»

²⁰Bíə́lə á hiamɛ́la, a ná mɔkɔ́nɛna yámá uwəbú əlimə ɔwá Yə́susu a ná bá a ndɔ hikiə, wɛ́ɛ́yɛ́ ɔwá a ná Yə́susu bə́sə́líníə́ ɔ hɛtɔkɔ ikúílí yɛ́ nɛnɛ́á, a ná wɛɛ́ya batá a sɛ́á: «Á Isə́lúkú, ɛ́yánɛ́ mɔ́táyɛ́ ɔwá ɛkasɛ á aŋɔ́á sɛ́má əə́?»

²¹Ɛnaka Bíə́lə á wɛɛ́ya məə́sə tálá, a ná Yə́susu batá a sɛ́á: «Á Isə́lúkú, mba ɔwayɛ́, yatɛ́ yɛ́ ŋɔ nda wɛɛ́ya fámɛ́ná əə́?»

²²Yə́susu a sɛ́á: «Yatɛ́ yɛ́ ndɔ aŋɔ́á sinə ábá mɛ ndɔ hikiə ɔwá a nɔmɔ́kɔ́ ɔkafámáká ɔ ikúílí ɔyɛ́á mɛ ŋɔ ndahíáná əə́? Ɔwáwɔ, ɔŋgɔ́kɔ́ mɛaŋɔ́á ɔbánɔ́.»

²³Nɔ́yɛ́, imbə́nú yɛ́ ná yambáná ɔ ətíə́ yɛ bəlumininə bəkimə ɔwá, Yə́susu a ná láá a sɛ́á wɛ́ɛ́yɛ́ mɔkɔ́nɛna a sa ndə́wəə. Ɔ taká, Yə́susu a sa Bíə́lə lɛna ɔwá wɛ́ɛ́yɛ́ mɔkɔ́nɛna a sa ndə́wəə, mba a ka laa a sɛ́á: «Yatɛ́ yɛ́ ndɔ aŋɔ́á sinə ábá mɛ ndɔ hikiə ɔwá a nɔmɔ́kɔ ɔkafámáká ɔ ikúílí ɔyɛ́á mɛ ŋɔ ndahíáná əə́?»

²⁴Ɔ́ mɔ́táyɛ́ mɔkɔ́nɛna a ndɔ imbóŋi índiə yɛ bɛ́táyɛ́ bɛkɔa, a ná bɛɛ́ta tilə́kə, tɔ ndɔ manya ɔwá yayɛ́á imbóŋi yɛ́ lɛa taká.

²⁵Yə́susu a ka manyɔ́ bɛ́mɔtɛ́ bɛkɔa kɛaka biəŋí. Ata bá bɛɛ́ta tiləkə bɔ́mɔtɛ́ əlimə yɛ búíní, mɛ ndɔ fɛka ɔwá, tuəfulə ɔtɔ́á bá ŋɔ tiləkə, nɛbɛ́lɛ́nɛ́ná nɛ́ sa ósó ɔ ɔwɛ́nɛa ɔ misí mikimə.