Read Tunen Yɔhánɛsɛ 3 Bible Online

Yɔhánɛsɛ 3 - Tunen bible

Yɔhánɛsɛ 3

¹Mɔndɔ a ka bá ɔmɔtɛ́, nɛ́áyɛ́á niínyə á Nikɔtɛ́mɛ, a ka bá yɛ́mɔtɛ́ ifəyí yɛ́ Bɛyútɛnɛ.

²A ka ndá Yə́susu kɔana nəbulúə́, a ná wɛɛ́ya lɛ́na a sɛ́á: «Á Muinə́niə, tɔ ndɔ manya ɔwá Huɛlɛ́ a ka aŋɔ́á lɔ́ma ɛlɔ́áyɛ́ uwəsú uwukúniə bɔkɔasɛ́á, ata mɔndɔ a sa ósó ɔ tɔŋgɛtɛ́nɛ́á tɔ́ yələ́mənə ɔkɛa ábá Huɛlɛ́ a lɛ bá na wɛɛ́ya.»

³Yə́susu a sɛ́á: «Ɛ́ɛ! Ɔ taká, mɛ ndɔ aŋɔ́á lɛna, ata mɔndɔ a sa ósó ɔ Nɛmanɛna nɛ́ Huɛlɛ́ usinə ábá a sá manyɔ́ bíbíə́nə.»

⁴Nikɔtɛ́mɛ a ná wɛɛ́ya batá a sɛ́á: «Nəníə́ ɛkámɔ yɛ́ mɔndɔ a ósó manyɔ́ ubíbíə́nə əə́? A ná ósó ɔhíána ɔ tɔna tɔ́ yayɛ́á inyə́ mbá a bíbíə́nə́ bikúílí bɛ́fandɛ́ əə́?»

⁵A ná wɛɛ́ya bíhíə́níníə́ a sɛ́á: «Ɛ́ɛ! Ɔ taká, mɛ ndɔ aŋɔ́á lɛna: Ábá mɔndɔ a sá bíbíə́nə na mənífə́ na Umbúínyi, a sa ósó ufínə ɔ Nɛmanɛna nɛ́ Huɛlɛ́.

⁶Yatɛ́ ɔyɛ́á yɛ́ ná bíbíə́nə́ na mɔsá, yɛ́ lɛa yɛ́ mɔsá, yatɛ́ ɔyɛ́á yɛ́ ná bíbíə́nə́ na Umbúínyi Mɔnaŋanaŋa, yɛ́ lɛa yɛ́ umbúínyi.

⁷Ɔ lɛ ə́lə́mə́nə́ bɔkɔasɛ́á mɛ ná aŋɔ́á lɛ́ná mɛ sɛ́á: “Nɔ ná hɔ́ánána ubíbíə́nə muɔ́sɔ.”

⁸Umbúínyi wɔ́ ndɔ húkə ɔ ɛbɔ́ka ɔyɛ́á wɔ́ ndɔ hikiə, ɔ ndɔ mənyukəki ɔ́kɔ ɔmá wɔ́ ndɔ kɛa, mba, ɔ lɛ ndɔ manya hə́níə́ wɔ́ ndɔ húlínə ata hə́níə́ wɔ́ ndɔ ákána. Nɔ́yɛ́ yɛ́ lɛ́á ɛlɔ́áyɛ́ wɛ́ɛ́yɛ́ ɔwá a lɛ́á bíbíə́nə́tɔ́ na Umbúínyi Mɔnaŋanaŋa.»

⁹Nikɔtɛ́mɛ a sɛ́á: «Nəníə́ ɛ́kɛ nɔ́yɛ́ yɛ́ bɛ́kɛaka əə́?»

¹⁰Yə́susu a sɛ́á: «Ɔwáwɔ ɔwá ɔ lɛ́á bɛ́mányánátɔ́ ɛ́sɛ́á mulə́liə ɔ Ísilahɛ́lɛ, ɔ lɛ ndɔ bɛ́táyɛ́ bɛkɔa manya!

¹¹Ɛ́ɛ! Ɔ taká, mɛ ndɔ aŋɔ́á lɛna, nɔ́yɛ́ yɛ́ lɛa taká, tɔ ndɔ hɔ́ɔ́ yatɛ́ ɔyɛ́á tɔ ndɔ manya, tɔ lɛa bəmbóŋímboŋi ɔ bɛkɔa ɔbɛ́á tɔ ná síə́kínə, mba, nɔ lɛ ndɔ yəsúə́ imbóŋi luminə.

¹²Ábá nɔ lɛ ndɔ bɛkɔa bɛ́ misí luminə ikúílí ɔyɛ́á mɛ ndɔ bənú hɛ́na, nəníə́ nɔ ŋɔ luminə ikúílí mɛ ŋɔ bənú bɛkɔa bɛ́ nɔɔ́mɛná hɔ́kɛna əə́?

¹³Ata mɔndɔ a lɛ boóko ɔbála ɔ nɔɔ́mɛná úhúlíə́ á Mɔná wa mɔndɔ ɔwá a ná túkínə́ ɔ nɔɔ́mɛná.

¹⁴Hɔ́ánánátɔ́ ɛ́sɛ́á Mósisi a ná miáhɔ yɛ ilə́ŋú húə́líníə́ na ɔmbánjɛ ɔ mándaŋɛ́á, nɔ́yɛ́ bá ná hɔ́ánána ɔ Mɔná wa mɔndɔ uhuəliniə.

¹⁵Nɔ́yɛ́, ata ɛ́yánɛ́ ɔwá a ŋɔ nɛ́áyɛ́á nɛkɔmba tálɛ́na ɔ ɔwayɛ́, a ŋɔ buɔmɔ́ bɔ́ ikúílíə́kimə kusənə.

¹⁶Ɔ taká, Huɛlɛ́ a ka misí hikəkiə ɛmbáta ɔ nindínə́ ɔnɛ́á, a ná wɛɛ́ya yáyɛ́á yohí yɛ́ Mɔná índíə́ ɔkɛaka ɔwá, ata ɛ́yánɛ́ ɔwá a ná nɛ́áyɛ́á nɛkɔmba tálɛ́ná ɔ ɔwayɛ́, a sa ndə́niminə, mba, a ŋɔ bá na buɔmɔ́ bɔ́ ikúílíə́kimə.

¹⁷Tɔ́ ákáná usinə, Huɛlɛ́ a sa wayɛ́á Mɔná lɔ́ma ɔ misí ɛlɔ́áyɛ́ misí ukə́lə́siə, mba, ɔ tɔ́mbákɛna na wɛɛ́ya, á misí nuəkə́níə́.

¹⁸Wɛ́ɛ́yɛ́ ɔwá a ndɔ nɛ́áyɛ́á nɛkɔmba tálɛ́na ɔ ɔwayɛ́, bá sɔ́ ŋɔ wɛɛ́ya kə́lə́siə, ɔwá a lɛ ndɔ nɛ́áyɛ́á nɛkɔmba tálɛ́na ɔ ɔwayɛ́, bá lɛa buɔnɔ́ wɛɛ́ya kə́lə́sə́kíə́tɔ́ bɔkɔasɛ́á, a sa nɛkɔmba tálɛ́ná ɔ niínyə nɛ́ yohí yɛ́ Mɔná wa Huɛlɛ́.

¹⁹Náana, bɛndɔ bá lɛ́á bɛ́hɔ́kákɛ́nátɔ: Isəmú yɛ́ ka ndásá ɔ misí, mba, bɛndɔ bá ka hikəkiə á ibínə́binə yáyɛ́ná isəmú bɔkɔasɛ́á, bíə́búə́ bɛnyɛná bɛ́ lɛa bɛbɛ́á.

²⁰Ɔ taká, ata ɛ́yánɛ́ ɔwá a ndɔ bɔbɛ́á kɛa, a ndɔ isəmú bánya, a lɛ ndɔ ndasá ɔ isəmú ɔkɛaka ɔwá, bá bɛ́áyɛ́á bɛnyɛná bɛbɛ́á funúnə.

²¹Mba, wɛ́ɛ́yɛ́ ɔwá a ndɔ taká ɔ́kɛ́na, a ndɔ ndasá ɔ isəmú ɔkɛaka ɔwá, bá síə́kínə́ muɛsɛ yatɛ́ ɔyɛ́á a ndɔ kɛa, bá síə́kínə́ tɔ́na ɔwá a ndɔ Huɛlɛ́ ɔ́kɛ́na.»

²²Əlimə yɛ nɔ́yɛ́, Yə́susu na báyɛ́á bɔkɔ́nɛna bá ná ákáná ɔ misí yɛ Yútɛa. A ná tuə́nə ɔmɔ́tɔ́yɛ́ tɛ́tɛ́á yɛ ikúílí na bəə́bu, a ná nɛsɔa índíə́kínə.

²³Ɔ bɔnɔŋɔ bɔ́ Ɛnɔ́ŋɔ hoóyi na Salími, Yɔhánɛsɛ a ka bá a ndɔ nɛsɔa índiənə tɔ́na bɔkɔasɛ́á, mənífə́ má ka báá məəŋí ɔmɔ́tɔ́yɛ́. Bɛndɔ bá ndasákɔ́ná ɔ ɔwayɛ́ busíə́, a bəə́bu nɛsɔa índiəkinə.

²⁴Ɔ taká, bá sa bá bá nɔ́ Yɔhánɛsɛ háá ɔ ɛbɔka.

²⁵Mba, bɔ́mɔtɛ́ bɔkɔ́nɛna bá Yɔhánɛsɛ bá ná lúmə́ ɔ utə́ŋə́niə na yɛ́mɔtɛ́ Yútɛnɛ ɔ ɛsalɛ yɛ́ nibínə́ŋəsiə ɛ́sɛ́á yə́búə́ ɛnɛ́ma.

²⁶Bá ná ákáná á Yɔhánɛsɛ busíə́ bá sɛ́á: «Á Mulə́liə, wɛ́ɛ́yɛ́ mɔndɔ ɔwá nɔ ndɔ báá ɔ yííní ɛsalɛ yɛ́ Yúlútɛnɛ, wɛ́ɛ́yɛ́ ɔwá ɔ ná yayɛ́á imbóŋi índíə́kínə, isíŋáka a ndɔ nɛsɔa índiənə wɛɛ́ya tɔ́na, bɛndɔ bəkimə bá ndɔ ə́kə́nəniə ɔwayɛ́ busíə́!»

²⁷Yɔhánɛsɛ a ná bəə́bu bíhíə́níníə́ a sɛ́á: «Mɔndɔ a sa ósó ukusənə ata yatɛ́, ábá Huɛlɛ́ a sá wɛɛ́ya índiə.

²⁸Bənú bɛ́múɛ́tɛ́, nɔ lɛa bámɛ́á bəmbóŋímboŋi, ɔwámɛ, mɛ ka laa mɛ sɛ́á: “Tátá mɛaŋɔ́á mɛ lɛ́á Mɛ́sia, mba, ɔ ɔwámɛ á Huɛlɛ́ a ná táŋá ɔlɔ́ma na wɛɛ́ya.”

²⁹Á muití muəndú, wɛɛ́ya a lɛ́á ibə́; mba, ɛŋgɔ́áyɛ́ yɛ ibə́ yɛ́ lɛ bá taká ɔ ɔwayɛ́ ɛmɛ́ŋɛ́, a ndɔ wɛɛ́ya ɔ́kɔ. A lɛa na nɛhɔnɔ nɛŋɛ́ŋa ikúílí a ndɔ nióni nɛ́ ibə́ ɔ́kɔ. Nɛ́táyɛ́ nɛhɔnɔ ɔ́ nɛ́ámɛ, isíŋáka nɛ́ lɛa úndúə́tɔ.

³⁰Ɔwayɛ́, a ná hɔ́ánána á ɔ́mbɔ́kɔ; ɔwámɛ, mɛ ámɛ nyɔhɛna.»

³¹«Wɛ́ɛ́yɛ́ ɔwá a ndɔ húlínə ɔ ɔmbáŋá, a lɛa ɔ mɔlɔ́á wɔ́ bikimə. Wɛ́ɛ́yɛ́ ɔwá a lɛ́á wa misí, a lɛa wa misí, a ndɔ hɔ́ɔ́ á bɛkɔa bɛ́ misí. Wɛ́ɛ́yɛ́ ɔwá a ndɔ húlínə ɔ nɔɔ́mɛná, [a lɛa ɔ mɔlɔ́á wɔ́ bəkimə].

³²A ndɔ imbóŋi índiə ɔ bɛkɔa ɔbɛ́á a ná síə́kínə, a ná ɔ́kɔ́kɛ́na tɔ́na, mba, ata mɔndɔ a lɛ ndɔ yayɛ́á imbóŋi luminə.

³³Wɛ́ɛ́yɛ́ ɔwá a ndɔ yayɛ́á imbóŋi luminə, a ndɔ ɛ́mbɛ́nɛna ɔwá Huɛlɛ́ a ndɔ hɔ́ɔ́ taká.

³⁴Wɛ́ɛ́yɛ́ ɔwá Huɛlɛ́ a ná lɔ́má, a ndɔ hɔ́ɔ́ á bɛtambá bɛ́ Huɛlɛ́ bɔkɔasɛ́á, Huɛlɛ́ a ndɔ wɛɛ́ya wə́yíə́ Umbúínyi Mɔnaŋanaŋa índiə hɔ́ánánátɔ.

³⁵Isə́ a ndɔ Mɔná hikiə, a ka bikimə índiə ɔ ɔwayɛ́ makátá.

³⁶Wɛ́ɛ́yɛ́ ɔwá a ndɔ nɛkɔmba tálɛ́na á Mɔná, a báka na buɔmɔ́ bɔ́ ikúílíə́kimə, wɛ́ɛ́yɛ́ ɔwá a ná kinə́ ɔwayɛ́ nɛkɔmba ɔ ɔtálɛ́na á Mɔná, a sa ndá buɔmɔ́ kúsə́nə, mba, hilóbi ɔhɛ́á Huɛlɛ́ a ŋɔ kɔ́ndáka, hɛ́ ŋɔ báá na wɛɛ́ya.»