Read Tunen Yɔhánɛsɛ 4 Bible Online

Yɔhánɛsɛ 4 - Tunen bible

Yɔhánɛsɛ 4

¹Bɛfalísia bá ka ɔ́kɔ́kɛna ɔwá Yə́susu a ndɔ bɔkɔ́nɛna úkúniə bəəŋí, a ndɔ bɛndɔ nɛsɔa índiə bəəŋí yáyɛ́ná Yɔhánɛsɛ.

²Ɔ taká, Yə́susu wɛɛ́ya bɛ́múɛ́tɛ́ a sa mɔndɔ nɛsɔa índiə, báyɛ́á bɔkɔ́nɛna bá ná báá bá ndɔ nɛsɔa índiənə.

³Ikúílí a ná ɔ́kɔ́ yatɛ́ ɔyɛ́á bá ndɔ laa, a ná hɔalɛ́na ɔ Yútɛa, a ná híánáka ɔ Kalɛ́lɛa.

⁴Ɔ wákaka umə́ yɛ́ ka báá ɔwá a tɔ́mbɛ́ná ɔ Samália.

⁵A ná káfámá ɔ yɛ́mɔtɛ́ bətínə́ yɛ Samália hoóyi na ɛtɔbɔtɔ́bɔ́ ɔyɛ́á Yákɔbɔ a ná índíə́ á wayɛ́á mɔná á Yɔ́sɛbɛ; bá yɛ́táyɛ́ bətínə́ ɛ́lɛakɛnɛna bá sɛ́á: «Sikálɛ».

⁶Ɔmɔ́tɔ́yɛ́ hɛfɛa hɛ́ mənífə́ hɛ́ Yákɔbɔ hɛ́ lɛ́á. Tɔmbɔ́tɔ́ na mɔkɛnda ɔ makɔlɔ́, Yə́susu a ná sə́tuənə ɔ ɛmɛ́ŋɛ́ yɛ hɛfɛa. Yɛ́ ka báá hoóyi na kɔɔsɔ.

⁷Muəndú ɔmɔtɛ́ wa bɔnɔŋɔ bɔ́ Samália a ná ndásá ɔ mənífə́ ɔtɔ́ka; Yə́susu a ná wɛɛ́ya batá a sɛ́á: «Tɔ́kɔ́lɛ, nyə́síə́ mɛaŋɔ́á.»

⁸Ɔ taká, báyɛ́á bɔkɔ́nɛna bá ka ákána ɔ bətínə́ ɔ bɛ́labɔ́nɛ́á ɔwɔ́ndɔ.

⁹Muəndú wa Samália a ná Yə́susu lɛ́na a sɛ́á: «Mba nəníə́ ɔwáwɔ á mɔndɛkɛ Yútɛnɛ ɛ́kɛ ɔ óso ɔwámɛ ɔbata ɔwá mɛ aŋɔ́á mənífə́ índíə́, ɔwámɛ ɔwá mɛ lɛ́á wa Samália əə́?» Ɔ taká, abáka Bɛyútɛnɛ na bɛndɔ bá Samália bá lɛ ɔ́kɔnɔ.

¹⁰Yə́susu a sɛ́á: «Ata ɔ bá ɔ ndɔ niəbə nɛ́ Huɛlɛ́ manya, wɛ́ɛ́yɛ́ ɔwá a ndɔ aŋɔ́á mənífə́ bata, há aŋɔ́á ɔbánɔ́ ɔ ná wɛɛ́ya mənífə́ kɔ́ŋɛ́na ɔkɛaka ɔwá, a aŋɔ́á mənífə́ má buɔmɔ́ índíə́.»

¹¹Muəndú a sɛ́á: «Á ifəyí, ɔ lɛ bá na ɛtɔ́kɛ́ná, hɛfɛa hɛ́ lɛa hɛtatánɛ tɔ́na. Hə́níə́ ɔ ndɔ mátáyɛ́ mənífə́ ɛ́takɛna əə́?

¹²Yəsúə́ isə́kínə́ á Yákɔbɔ a ka bəsú híihi hɛfɛa hɛ́ mənífə́ tíkínə; wɛɛ́ya bɛ́múɛ́tɛ́, a ka mənífə́ má hítə́nə hɛfɛa nyááka, báyɛ́á baná na bɛ́áyɛ́á bilúkə́ bá ka nyááka tɔ́na. Ɔ ndɔ fɛka ɔwá, ɔ lɛa mɔŋɛ́ŋa yáyɛ́ná wɛɛ́ya əə́?»

¹³Yə́susu a sɛ́á: «Ata ɛ́yánɛ́ ɔwá a ndɔ máama mənífə́ nyáá, a ŋɔ bá tɔ́na na nuiyí.

¹⁴Mba, wɔ́ɔwɔ ɔwá a ŋɔ mənífə́ nyáá ɔmá mɛ ŋɔ wɛɛ́ya índiə, a sa ndábá na nuiyí, mənífə́ ɔmá mɛ ŋɔ wɛɛ́ya índiə, má ŋɔ híána ɛlɔ́áyɛ́ ayɛ́ hɛyábálá ɔhɛ́á buɔmɔ́ bɔ́ ikúílíə́kimə bɔ́ ndɔ njɛa.»

¹⁵Muəndú a sɛ́á: «Á Ifəyí, tɔ́kɔ́lɛ, índíə́ mɛaŋɔ́á mátáyɛ́ mənífə́ ɔkɛaka ɔwá, nuiyí nɛ́ lɛ mɛaŋɔ́á nɔɛ́ná tɔ́na. Mɛ lɛ ndahíáná ɔ mənífə́ ɔndatɔ́ká háha.»

¹⁶Yə́susu a sɛ́á: «Káka yawɔ́á ibə́ ɛ́tá, húlə́nə́ wɛɛ́ya háha.»

¹⁷Muəndú a sɛ́á: «Mɛ lɛ bá lɔ́nɔ́tɔ.» A ná wɛɛ́ya bɛ́kámɔ́sɔ́ná a sɛ́á: «Ɔ ndɔ hɔ́ɔ taká na ɔlaa ɔwá, ɔ lɛ bá na ibə́.

¹⁸Ɔ taká, ɔ ka báá na bibə́ bɛ́lánɔ, mɔndɔ ɔwá nɔ ndɔ niŋə isíŋáka, a lɛ bá yawɔ́á ibə́. Ɔ lɛ ndɔ kanja.»

¹⁹Ikúílí a ná hɔ́lɔ́ nɔ́yɛ́, muəndú wa Samália a ná wɛɛ́ya lɛ́na a sɛ́á: «Á ifəyí, mɛ ndɔ sinə ɔwá ɔ lɛa mɔhɛ́nátɔtányɛ́.

²⁰Bíə́súə́ bisə́kínə́ bɛ́ Samália bá ka Huɛlɛ́ lúbúnəkə ɔ wúuwu ɔmáá ɔmbáŋá. Mba, uwənú á Bɛyútɛnɛ nɔ sɛ́á ɔ́maná ɔ Yəlúsalɛma bá ná hɔ́ánána á Huɛlɛ́ ulúbúnə.»

²¹Yə́susu a sɛ́á: «Á Məmíə́, manyá ɔwá, ikúílí yɛ́ lɛa ɔ ɔsákɔna ɔyɛ́á tátá ɔ wúuwu ɔmáá, tátá ɔ Yəlúsalɛma nɔ ŋɔ báá nɔ ndɔ Isə́ lúbúnə.

²²Uwənú á bɛndɔ bá Samália nɔ ndɔ Huɛlɛ́ lúbúnə nɔ lɛ wɛɛ́ya manya; uwəsú á Bɛyútɛnɛ, tɔ ndɔ wɛɛ́ya lúbúnə, tɔ ndɔ wɛɛ́ya manya bɔkɔasɛ́á, nibínúə́niə nɛ́ ndɔ húlínə na Bɛyútɛnɛ.

²³Mba, ikúílí yɛ́ lɛa ɔ ɔsákɔna, yɛ́ lɛa ndafámatɔ́ ɔyɛ́á, bəlúbúnə bá taká bá ŋɔ Isə́ lúbúnəkə ɔwɔŋgɔkɔnɔ umbúínyi na taká; nɔ́yɛ́ yɛ́ lɛ́á bəlúbúnə ɔbá Isə́ a ndɔ siə.

²⁴Huɛlɛ́ a lɛa Umbúínyi; ɛlɔ́áyɛ́ nɔ́yɛ́, ɔbá bá ndɔ wɛɛ́ya lúbúnə, bá ná hɔ́ánána ɔwayɛ́ ulúbúnə ɔwɔŋgɔkɔnɔ na umbúínyi na taká.»

²⁵Muəndú a sɛ́á: «Mɛ ndɔ manya ɔwá, Mɛ́sia a lɛa ɔ ɔsákɔna ɔwá bá ndɔ ɛ́lɛnɛna bá sɛ́á, á Kilísitusu. Ikúílí a ŋɔ ndafámá, a ŋɔ bəsú nífúnəkinə bɛkɔa bikimə.»

²⁶Yə́susu a sɛ́á: «Ɔwámɛ ɔwá mɛ ndɔ aŋɔ́á hɛ́na, mɛaŋɔ́á mɛ lɛ́á wɛɛ́ya.»

²⁷Ɔ umisíúmə́ bɔkɔ́nɛna bá ná ndáfáma, bá ka báá ə́lə́mə́nə́tɔ́ ɔ usinə Yə́susu a ndɔ hɔ́ɔ na muəndú. Mba, ata ɔmɔtɛ́ ɔ uwəbú ətíə́ a sa óso ɔ ɔwayɛ́ ɔbata a sɛ́á: «Yatɛ́ ɔ ndɔ wɛɛ́ya bata əə́? Ataná, ɛlɔ́áyɛ́ yatɛ́ ɔ ndɔ hɔ́ɔ́ na wɛɛ́ya əə́?»

²⁸Əlimə yɛ nɔ́yɛ́, muəndú a ná híə́yíə́ hisíní hɛ́ mənífə́ tíkə́ ɔmɔ́tɔ́yɛ́, a ná tilə́ ɔ bətínə́, a ná bɛndɔ lakɛ́na a sɛ́á:

²⁹«Nɔ́ sɔ́nɔ, nɔ́ ndá mɔndɔ siəlínə ɔwá a ná mɛaŋɔ́á bɔ́ámɛ́á buɔmɔ́ bukimə lakɛ́na. Yɛ́ sá ósó ɔbáá ɔwá a lɛa Mɛ́sia əə́?»

³⁰Bɛndɔ bá ná fə́mə́kə́níə́ ɔ bətínə́, bá ná ákáka á Yə́susu busíə́.

³¹Ɔ yɛ́táyɛ́ ikúílí, bɔkɔ́nɛna bá ná wɛɛ́ya bɛ́tɔ́kɔ́lɔ́kɛ́ná bá sɛ́á: «Á Mulə́liə sɔ́nɔ ɔnɛ́á.»

³²Mba, a sɛ́á: «Mɛ báka na bɛ́labɔ́nɛ́á ɔbɛ́á nɔ lɛ ndɔ manya.»

³³Bɔkɔ́nɛna bá bɛ́bataka bá sɛ́á: «Baánɛ, wɔmɔtɛ́ mɔndɔ a ná tíkə́ nda háha wɛɛ́ya afɛ́na ɔbánɔ́ əə́?»

³⁴A sɛ́á: «Bɛ́ámɛ́á bɛ́labɔ́nɛ́á bɛ́ lɛa ɔ ɔwɔkɛ́na wɔ́ wɛ́ɛ́yɛ́ ɔwá a ná mɛaŋɔ́á lɔ́má na bɔ́áyɛ́á bɔsɔ́ma uwundúsiniə.

³⁵Uwənú, bənú bɛ́múɛ́tɛ́ tátá abáka nɔ bɛ́laka nɔ sɛ́á “məhuə má nɔ́ bəsú tíkə́nə miilí ínisə əə́?” Mba ɔwámɛ, mɛ ndɔ bənú lɛna mɛ sɛ́á: “Nɔ́ məə́sə bɔkɔna, nɔ́ bɛtɔbɔtɔ́bɔ́ síə́línə; bɛlɔŋɔ́tɛ́ bɛ́ lɛa ɔ́nɔ́kɛ́nátɔ́ ɛlɔ́áyɛ́ məhuə!

³⁶Wɛ́ɛ́yɛ́ ɔwá a ndɔ huə, a lɛa na wə́yíə́ mɔsábɔ́náná kusə́nə́tɔ, a ndɔ məfumə́ kɔta ɛlɔ́áyɛ́ buɔmɔ́ bɔ́ ikúílíə́kimə; nɔ́yɛ́, na mɔsɛla na muhuə bá ndɔ bílə́nə iŋgində́.”

³⁷Ɔ taká, ɔŋana wɔ́ ndɔ laa wɔ́ sɛ́á: “Mɔsɛla nɔ́yɛ́, muhuə nɔ́yɛ́.”

³⁸Ɔwámɛ, mɛ ná bənú lɔ́má ɔ məhuə ɔ ɛbɔ́ka ɔyɛ́á nɔ sa ɛmɔ́kɛ́ nyáá, bɔ́mɔtɛ́ bá ka ɛmɔ́kɛ́ nyááka, mba uwənú, nɔ ndɔ mɔsɛ́ŋɛ́ kusinə ɔ uwəbú buolí.»

³⁹Bɛndɔ bəəŋí bá yɛ́ɛ́yɛ́ bətínə́ bá ná nɛkɔmba tálɛ́na á Yə́susu bɔkɔasɛ́á, muəndú a ka bəə́bu lɛna a sɛ́á: «A ka mɛaŋɔ́á lakɛna bɛkɔa bikimə ɔbɛ́á mɛ ná kɛ́áka.»

⁴⁰Ɛlɔ́áyɛ́ nɔ́yɛ́, ikúílí bɛndɔ bá Samália bá ná ndáfámá ɔwayɛ́ busíə́, bá ná wɛɛ́ya bɛ́tɔ́kɔ́lɔ́kɛ́na ɔwá a túə́nə́ na bəə́bu. A ka kɛaka ɔmɔ́tɔ́yɛ́ tunó tɔ́fandɛ́.

⁴¹Bɛndɔ bəəŋí bá ka bɛ́kɔnda ɔ uwəbú nɛkɔmba ɔ ɔtálɛ́na á Yə́susu ɛlɔ́áyɛ́ yáyɛ́á ɛtambá.

⁴²Bá ná muəndú lɛ́ná bá sɛ́á: «Tátá ɔ́maná ɛlɔ́áyɛ́ bɛ́áwɔ́á bɛtambá tɔ́ ná nɛkɔmba tálɛ́ná ɔ ɔwayɛ́, tɔ ná wɛɛ́ya ɔ́kɔ́kɛ́ná bəsú bɛ́múɛ́tɛ́, tɔ ndɔ manya ɔwá, wɛɛ́ya taká a ŋɔ bɛndɔ bá misí nuəkəniə.»

⁴³Ɛnaka Yə́susu á túmbíə́ tunó tɔ́fandɛ́ ɔ yɛ́táyɛ́ ɛbɔ́ka, a ná hɔalɛ́na, a ná ákáná ɔ Kalɛ́lɛa.

⁴⁴A ka laa wɛɛ́ya bɛ́múɛ́tɛ́ a sɛ́á: «Abáka bá lɛ mɔhɛ́nátɔtányɛ́ lúbúnə́ ɔ ɔwáyɛ́ bɔnɔŋɔ.»

⁴⁵Ata nɔ́yɛ́, a ná káfámá ɔ Kalɛ́lɛa, bátáyɛ́ bɛndɔ bá ná wɛɛ́ya káhá muɛsɛ bɔkɔasɛ́á, bəə́bu tɔ́na bá ka báá ɔ ɛŋganda ɔ Yəlúsalɛma, bá ka siəkínə yatɛ́ ɔyɛ́á a ná kɛ́áka ɔmɔ́tɔ́yɛ́.

⁴⁶Umə́, a ná ndahíáná ɔ Kána ɔ nɛkɛ́tɛ nɛ́ misí yɛ Kalɛ́lɛa ɔ ɛbɔ́ka ɔyɛ́á a ná mənífə́ híə́nə́síə́ məluku. Mɔkɔfɔnɛa mɔŋɛ́ŋa wa munəni a ka báá ɔmɔ́tɔ́yɛ́ ɔ Kafalanahúmu ɔwá wayɛ́á mɔná a ná bá náátɔ.

⁴⁷A ná ɔ́kɔ́kɛ́ná bá ndɔ hɔ́ɔ́ ɔwá, Yə́susu a nɔ́ ndafámá ɔ Kalɛ́lɛa ɔ húlə́kinə ɔ Yútɛa, a ná ákana, a ná ká wɛɛ́ya nibə; a ná wɛɛ́ya bɛ́tɔ́kɔ́lɔ́kɛ́na ɔwá a ákáná ɔ Kafalanahúmu ɛlɔ́áyɛ́ wayɛ́á mɔná ɔ uniŋəsiə ɔwá a ná báá hoóyi ɔ uwə́kunə.

⁴⁸Yə́susu a sɛ́á: «Ábá nɔ sa tɔŋgɛtɛ́nɛ́á tɔ́ yələ́mənə na bisə́mə́tə́ sinə nɔ sa ósó ulumininə.»

⁴⁹Mɔkɔfɔnɛa mɔŋɛ́ŋa a sɛ́á: «Á Isə́lúkú, sɔ́nɔ ɔwámɛ ɔmbɛ́la ubusíə́ ɔbɔ́á wamɛ́á mɔná a wəə.»

⁵⁰Yə́susu a sɛ́á: «Káka, wawɔ́á mɔná a lɛa ɔ buɔmɔ́.» Wɛ́ɛ́yɛ́ mɔndɔ a ná lumínínə ɔ yatɛ́ ɔyɛ́á Yə́susu a ná wɛɛ́ya lɛ́na, a ná ákana.

⁵¹Ɛ́sɛ́á a ná báá ɔ ɛnɔ́mɛ yɛ́ ɔ uwúluəkə, a ná báyɛ́á bɔnyɛna ɛ́nyánána, bá ná wɛɛ́ya lɛná bá sɛ́á: «Wawɔ́á mɔná a lɛa muɔmɔ́.»

⁵²Mɔkɔfɔnɛa mɔŋɛ́ŋa a ná bəə́bu batá a sɛ́á: «Ɔ́ uyə́níə́ ikúílí a ná niŋə́ əə́?» Bá sɛ́á: «Naánɛkɔla ɔ ɔŋgɛ́ŋɛ́ úmotí wɔ́ əlimə yɛ kɔɔsɔ.»

⁵³Isə́ a ná manya ɔwá, ɔ́ yɛ́táyɛ́ ikúílí Yə́susu a ná wɛɛ́ya lɛ́na a sɛ́á: «Wawɔ́á mɔná a lɛa muɔmɔ́.» Nɔ́yɛ́, wɛɛ́ya na nɛ́áyɛ́á nikúlə nikimə bá ná níə́búə́ nɛkɔmba tálɛ́ná ɔ ɔwayɛ́.

⁵⁴Ɔ́ tɔŋgɛtɛ́nɛ́á tɔ́ yələ́mənə tɔ́ ná úndúsíníə́ tɔ́fandɛ́ ɔtɔ́á Yə́susu a ná kɛ́áka. Nɔ́yɛ́ yɛ́ ka bɛ́tɔ́mbáka ɛnaka a ndáfámá ɔ Kalɛ́lɛa ɔ húlə́kinə ɔ Yútɛa.