Read Tunen Yɔhánɛsɛ 5 Bible Online

Yɔhánɛsɛ 5 - Tunen bible

Yɔhánɛsɛ 5

¹Əlimə yɛ nɔ́yɛ́, ɛŋganda yɛ Bɛyútɛnɛ yɛ́ ka báá, ɔ́ muítə Yə́susu a ná ákánɛ́ná ɔ Yəlúsalɛma.

²Ɔ yɛ́táyɛ́ bətínə́, hindoŋó hɛ́ ka báá hoóyi na nifínínə́ nɛ́ ɛndɔ́mbá; hɛ́ ka bá na bɛanda bɛ́lánɔ, bá ndɔ hítə́yí hindoŋó ɛ́lɛnɛna na nihókí nɛ́ Hɛ́bɛlɛ bá sɛ́á: «Bɛsáta.»

³Ɔ yɛ́táyɛ́ ɛbɔ́ka iloŋo miəŋí yɛ́ bɛnákɛnákɛ bá ka báá sianákɛ́nátɔ; bəndímə́ndímə, bɛkátá, bɛáta, bá ka báá ɔtáta ɔwá mənífə́ má bínyúkə́lə.

⁴Ɔ taká, ɔ yɛ́mɔtɛ́ ikúílí, áŋgɛlɛ yɛ Isə́lúkú a ka bá a ndɔ tukinə ɔ hindoŋó, a mənífə́ nyukələ, ikúílí mənífə́ má ná bínyúkə́lə, mɔnákɛnákɛ ɔwá a ná taŋá ɔ ufínə ɔ hindoŋó, ata yatɛ́ mɔɔ́mbɔ wɔ́ wɛɛ́ya lɛ́á, a niŋə.

⁵Ɔ uwəbú ətíə́ ɛnákɛnákɛ a ka báá bɛ́nɔ́kɔ́kɔ́tɔ́, a nɔ́ kɛaka moómo álálɔ́ má tuɔŋɔ na tɔ́námanɛ́.

⁶Ikúílí Yə́susu a ná wɛɛ́ya yámá síánátɔ́ ɔ misí, a ná ɔ́kɔ́ ɔwá a nɔ́ mɔŋaka ɛ́sɛ́á a lɛ́á náátɔ, a ná wɛɛ́ya batá a sɛ́á: «Ɔ ndɔ siə uniŋə əə́?»

⁷Ɛnákɛnákɛ a sɛ́á: «Á Isə́lúkú, mɛ lɛ bá na mɔndɔ ɔwá a mɛaŋɔ́á lósíə́ ɔ hindoŋó ikúílí mənífə́ má ná bínyúkə́lə; mba, ikúílí mɛ sɛ́á mɛ fínə́, muinə́muinə́ a taŋa ɔlɔɔ.»

⁸Yə́susu a sɛ́á: «Hɔalɛ́na, túáná yáwɔ́á ɛkaálɛa, kɛndáka.»

⁹Ɔ umisíúmə́ wɛ́ɛ́yɛ́ mɔndɔ a ná niŋə, a ná yáyɛ́á ɛkaálɛa tuana, a ná botólíə́ ɔ ɔkɛnda. Nɔ́yɛ́ yɛ́ ka bɛ́tɔ́mbáka ɔ hinó hɛ́ Sábatɛ.

¹⁰Ɛlɔ́áyɛ́ nɔ́yɛ́, bisə́lúkú bɛ́ Bɛyútɛnɛ bá ná wɛ́ɛ́yɛ́ lɛ́na ɔwá bá ná níŋə́síə́ bá sɛ́á: «Ɔ lɛ bá na kuənjə ɔ yáwɔ́á ɛkaálɛa ɔtúána ɔ hinó hɛ́ Sábatɛ.»

¹¹A ná bəə́bu bíhíə́níníə́ a sɛ́á: «Wɛ́ɛ́yɛ́ ɔwá a ná mɛaŋɔ́á níŋə́síə́, a ná mɛaŋɔ́á lɛ́na a sɛ́á: “Túáná yáwɔ́á ɛkaálɛa, kɛndáka.”»

¹²Bá ná wɛɛ́ya batá bá sɛ́á: «Ɛ́yánɛ́ mɔ́táyɛ́ a ná aŋɔ́á lɛ́na a sɛ́á: “Túáná yáwɔ́á ɛkaálɛa kɛndáka əə́?”»

¹³Mba, wɛ́ɛ́yɛ́ ɔwá a ná iniŋəsiə kusə́nə, a sa bá a ndɔ mɔndɔ manya ɔwá a ná wɛɛ́ya niŋə́síə́ bɔkɔasɛ́á, Yə́susu a ka nyɔ́áka ɔ ətíə́ yɛ ilúkunə ɔyɛ́á yɛ́ ná báá ɔ yɛ́táyɛ́ ɛbɔ́ka.

¹⁴Əlimə yɛ nɔ́yɛ́, Yə́susu a ná ká wɛɛ́ya kɔ́ána ɔ níə́lətíə́ nɛ́ Tɛ́mbɛlɛ, a ná wɛɛ́ya lɛ́na a sɛ́á: «Isíŋáka ɔ́ aŋɔ́á wɛ́ɛ́yɛ́ niŋə́tɔ, ɔ lɛ tíkə́ bɔbɛ́á kɛa tɔ́na ɔkɛaka ɔwá, bɔkɔa buinə́buinə́ bɔ́ lɛ tíkə́ nda aŋɔ́á fámɛ́ná ɔ ɔyáyɛ́na.»

¹⁵Wɛ́ɛ́yɛ́ mɔndɔ a ná ká bisə́lúkú bɛ́ Bɛyútɛnɛ lɛ́na ɔwá, á Yə́susu a ná wɛɛ́ya niŋə́síə́.

¹⁶Ɔ́ ɛlɔ́áyɛ́ nɔ́yɛ́ Bɛyútɛnɛ bá ná báá bá ndɔ Yə́susu bɔ́áŋɛna bɔkɔasɛ́á, a ka bɔ́táyɛ́ bɔkɔa kɛaka ɔ hinó hɛ́ Sábatɛ.

¹⁷Mba, a ná bəə́bu bíhíə́níníə́ a sɛ́á: «Yamɛ́á Isə́ a nabáka ɔ buolí, mɛaŋɔ́á tɔ́na mɛ lɛa ɔ buolí.»

¹⁸Ɔwɔŋgɔkɔnɔ na bɛ́táyɛ́ bɛtambá, bisə́lúkú bɛ́ Bɛyútɛnɛ bá ka báá bá ndɔ siə ɔ ɔwayɛ́ ɔwɔ́nɔ. Tátá ɔ́maná bɔkɔasɛ́á a ka umbə́ndə́ wɔ́ Sábatɛ nɔkɔ, mba tɔ́na, a ka bá a ndɔ laa ɔwá, Huɛlɛ́ a lɛa yayɛ́á Isə́, nɔ́yɛ́ a bíkə́təkiə hɔ́ánánátɔ́ na Huɛlɛ́.

¹⁹Yə́susu a ná yɛ́ɛ́yɛ́ ikúílí bəə́bu lɛ́na a sɛ́á: «Ɛ́ɛ! Ɔ taká, mɛ ndɔ bənú nɔ́yɛ́ lɛna, Mɔná a sa ósó ɔ bɔkɔa ɔkɛa na wɛɛ́ya bɛ́múɛ́tɛ́, mba, a ndɔ kɛa yatɛ́ ɔyɛ́á a ndɔ sinə ɛ́sɛ́á Isə́ a ndɔ kɛa. Bikimə ɔbɛ́á Isə́ a ndɔ kɛa, Mɔná ayɛ́ kɛaka hɔ́ánánátɔ.

²⁰Ɔ taká, Isə́ a ndɔ Mɔná hikiə, a ndɔ wɛɛ́ya ínə́niə bikimə ɔbɛ́á a ndɔ kɛa, a ŋɔ wɛɛ́ya biolí bɛŋɛ́ŋa ínə́kiniə yáyɛ́ná bɛ́ɛbɛ ɔkɛaka ɔwá mbá nɔ ŋɔ ə́lə́mənə.

²¹Ɔ taká, ɛ́sɛ́á Isə́ a ndɔ bəwə́nú huŋuəsiə, a bəə́bu buɔmɔ́ índiəkinə tɔ́na, nɔ́yɛ́, Mɔná a ndɔ buɔmɔ́ índiə ɔ wɛ́ɛ́yɛ́ ɔwá a ndɔ hikiə.

²²Isə́ a lɛ ndɔ kə́lə́siə ata mɔndɔ, mba, a ka nɛmanɛna nikimə nɛ́ ukə́lə́siə índiə á Mɔná,

²³ɔkɛaka ɔwá bəkimə bá Mɔná bə́tə́kíə́ ɛ́sɛ́á bá ndɔ Isə́ bə́tiə. Ata ɛ́yánɛ́ ɔwá a lɛ ndɔ Mɔná bə́tiə, a lɛ ndɔ Isə́ bə́tiə ɔwá a ná Mɔná lɔma.»

²⁴«Ɔ taká, mɛ ndɔ bənú nɔ́yɛ́ lɛna: Ata ɛ́yánɛ́ ɔwá a ndɔ yámɛ́á ɛtambá ɔ́kɔ mbá a ndɔ nɛkɔmba tálɛ́na ɔ wɛ́ɛ́yɛ́ ɔwá a ná mɛaŋɔ́á lɔ́má, a báka na buɔmɔ́ bɔ́ ikúílíə́kimə, bá sɔ́ ŋɔ wɛɛ́ya kə́lə́siə, a ná fámá ɔ nyɛmbɛ́ ɔ wákaka ɔ buɔmɔ́.

²⁵Ɔ taká, mɛ ndɔ bənú nɔ́yɛ́ lɛna: Ikúíli yɛ́ lɛa ɔ ɔsákɔna, yɛ́ nɔ́ ndafámá isíŋáka ɔyɛ́á bəwə́nú bá ŋɔ nióni nɛ́ Mɔná wa Huɛlɛ́ ɔ́kɔ́kɛna, bááyɛ́ tɔ́na ɔbá bá ŋɔ nɛɛ́ta ɔ́kɔ́kɛna, bá ŋɔ nɔɔmɔkɔ.

²⁶Ɔ taká, ɛ́sɛ́á Isə́ a lɛ́á hɛnyɔ́nyɔ hɛ́ buɔmɔ́, nɔyɛ́ a ná Mɔná iŋgínə́ índíə́ yɛ ɔbáá hɛnyɔ́nyɔ hɛ́ buɔmɔ́.

²⁷A ka Mɔná iŋgínə́ índiə yɛ ukə́lə́siə bɔkɔasɛ́á a lɛa Mɔná wa Mɔndɔ.

²⁸Nɔ lɛ ə́lə́mə́nə bɔ́ányɛ bɔkɔasɛ́á, ikúílí yɛ́ lɛa ɔ ɔsákɔna ɔyɛ́á bááyɛ́ bəkimə ɔbá bá lɛ́á sianákɛ́nátɔ́ ɔ minyə́, bá ŋɔ nɛ́áyɛ́á nióni ɔ́kɔ́kɛna.

²⁹Əlimə yɛ nɔ́yɛ́, bá ŋɔ fámáka ɔ uwəbú minyə́. Bááyɛ́ ɔbá bá ná buɛsɛ kɛ́áka, bá ŋɔ hɔŋɔakɛa ɛlɔ́áyɛ́ buɔmɔ́, mba, bááyɛ́ ɔbá bá ná bɔbɛ́á kɛ́áka, bá ŋɔ hɔŋɔakɛa ɛlɔ́áyɛ́ bikə́lə́síníə́.

³⁰Ɔwámɛ, ata bɔkɔa mɛ sá ósó ɔkɛa na mɛaŋɔ́á bɛ́múɛ́tɛ́. Mɛ ndɔ kə́lə́siə ɔwɔŋgɔkɔnɔ yatɛ́ ɔyɛ́á mɛ ndɔ ɔ́kɔ, bɛ́ámɛ́á bikə́lə́síníə́ bɛ́ lɛa tɛ́nɛ́mátɔ́ bɔkɔasɛ́á, mɛ lɛ ndɔ siə ɔkɛa yatɛ́ ɔyɛ́á mɛ ndɔ hikiə, mba, uhikiə wɔ́ wɛ́ɛ́yɛ́ ɔwá a ná mɛaŋɔ́á lɔma.»

³¹«Ábá mɛ ndɔ imbóŋi híə́niə ɛlɔ́áyɛ́ mɛaŋɔ́á bɛ́múɛ́tɛ́, yatɛ́ ɔyɛ́á mɛ ndɔ laa, yɛ́ lɛa ndəmə.

³²Mba, mɔndɔ muinə́muinə́ á lɛ́á wamɛ́á mumbóŋímboŋi, mɛ ndɔ manya ɔwá imbóŋi ɔyɛ́á a ndɔ híə́niə ɛlɔ́áyɛ́ ámɛ, yɛ́ lɛa taká.

³³Uwənú, nɔ ná bɛndɔ lɔ́má á Yɔhánɛsɛ busíə́, a ná láá yatɛ́ ɔyɛ́á yɛ́ lɛ́á taká ɛlɔ́áyɛ́ ámɛ.

³⁴Ɔwámɛ, tátá mɔndɔ a ná hɔ́ánáná ɔbáá wamɛ́á mumbóŋímboŋi, mba, mɛ ndɔ nɔ́yɛ́ laa ɔkɛaka ɔwá Huɛlɛ́ a bənú núə́kə́níə́.

³⁵Yɔhánɛsɛ a ka bá ɛ́sɛ́á itiəkətiəkə ɔyɛ́á bá nɔ́ tiə, ɔyɛ́á yɛ́ ndɔ nɔɔma. Nɔ ka luminə ɔ ubílə́nə tɛ́tɛ́á yɛ ikúílí ɔ ɔwayɛ́ isəmú.

³⁶Mba ɔwámɛ, mɛ báka na imbóŋi yɛŋɛ́ŋa ɔyɛ́á yɛ́ lɛ́á yáyɛ́ná yɛ Yɔhánɛsɛ: Ɔ taká, yɛ́táyɛ́ imbóŋi, ɔ́ biolí ɔbɛ́á Isə́ a ná mɛaŋɔ́á índíə́ ɔ ɔwá mɛ nyɔ́ɔ́kɔ, biolí ɔbɛ́á mɛ ndɔ nyɔɔ bɛ́ ndɔ mɛaŋɔ́á imbóŋi híə́niniə, bɛ́ ndɔ ínə́niə ɔwá, á Isə́ a ná mɛaŋɔ́á lɔma.

³⁷Isə́ ɔwá a ná mɛaŋɔ́á lɔ́má, wɛɛ́ya bɛ́múɛ́tɛ́ á lɛ́á wamɛ́á mumbóŋímboŋi. Mba, nɔ sa ndá nɛ́áyɛ́á nióni ɔ́kɔ́, ata bɔ́áyɛ́á busíə́ nɔ lɛ boóko nɔ ná sínə.

³⁸Nɔ lɛ ndɔ nɛkɔmba tálɛ́na ɔ wɛ́ɛ́yɛ́ ɔwá Isə́ a ná lɔ́má bɔkɔasɛ́á, nɔ lɛ ndɔ bɛ́áyɛ́á bɛtambá tə́tə́niə ɔ uwənú mɛlɛ́má.

³⁹Nɔ ndɔ Mətilə ɔ́kɔ́na hoóyi hoóyi, nɔ fɛkaka ɔwá ɔ ɔmɔ́tɔ́yɛ́ ɛkasɛ nɔ́ buɔmɔ́ bɔ́ ikúílíə́kimə kusə́nə. Ɔ́ maáta má ndɔ mɛaŋɔ́á imbóŋi híə́niniə.

⁴⁰Mba, nɔ lɛ ndɔ hikiə ɔ ɔwámɛ ɔwɔŋgɔ ɔkɛaka ɔwá, nɔ buɔmɔ́ bɔ́ ikúílíə́kimə kusə́nə.»

⁴¹«Mɛ lɛ ndɔ tuúmə tɔ́ bɛndɔ siə,

⁴²mba, mɛ ndɔ bənú manya, mɛ ndɔ manya ɔwá nɔ lɛ ndɔ Huɛlɛ́ hikiə.

⁴³Ɔwámɛ, mɛ ka ndasá ɔ niínyə nɛ́ yamɛ́á Isə́, mba, nɔ lɛ ndɔ hikiə ɔwámɛ ɔkáha. Ábá mɔndɔ muinə́muinə́ a ná ndasá ɔ ɔwayɛ́ niínyə, nɔ ŋɔ wɛɛ́ya káha.

⁴⁴Nɔ ndɔ hikiə ɔ tuúmə uwíndiənə bənú na bənú, mba, nɔ lɛ ndɔ tuúmə siə ɔtɔ́á tɔ́ ndɔ húlínə na Huɛlɛ́ bíbúə́. Nəníə́ nə́ə ɛ́kɛ nɔ óso ulumininə əə́?

⁴⁵Nɔ lɛ fɛká ɔwá, mɛaŋɔ́á mɛ ŋɔ bənú sɔ́mɛna á yamɛ́á Isə́ busíə́. Á Mósisi, a ŋɔ bənú sɔ́mɛna, ɔwayɛ́ ɔwá nɔ ná níə́núə́ nɛkɔmba talɛna.

⁴⁶Ɔ taká, ata nɔ lumininə ɔ yatɛ́ ɔyɛ́á Mósisi a ná tílə́kə, há níə́núə́ nɛkɔmba nɛ́ lɛa tálɛ́nátɔ́ ɔ ɔwámɛ bɔkɔasɛ́á, a ka hɔ́kɛna ɔ Mətilə ɛlɔ́áyɛ́ ámɛ.

⁴⁷Mba ɛ́sɛ́á nɔ lɛ ndɔ lumininə ɔ Mətilə má Mósisi, nəníə́ nɔ ŋɔ bɛ́ámɛ́á bɛtambá lumininə əə́?»