Read Tunen Yɔhánɛsɛ 7 Bible Online

Yɔhánɛsɛ 7 - Tunen bible

Yɔhánɛsɛ 7

¹Əlimə yɛ nɔ́yɛ́, Yə́susu a bálaka a lɔɔkɔ ɔ misí mikimə yɛ Kalɛ́lɛa, a sa hikiə ɔbɛ́káŋála ɔ Yútɛa bɔkɔasɛ́á, Bɛyútɛnɛ bá ka báá bá ndɔ siə ɔ ɔwayɛ́ ɔwɔ́nɔ.

²Ɛŋganda ɔ Bɛyútɛnɛ yɛ bɛanda yɛ́ ka báá hoóyi.

³Bənínyə́ bá Yə́susu bá ná wɛɛ́ya lɛ́na bá sɛ́á: «Hɔalɛ́na, káka ɔ bɔnɔŋɔ bɔ́ Yútɛa ɔkɛaka ɔwá, báwɔ́á bɔkɔ́nɛna bəə́bu tɔ́na, bá bɛkɔa siəkínə ɔbɛ́á ɔ ndɔ kɛa.

⁴Ábá ɔ ndɔ siə ɔwá bá aŋɔ́á manyá, ɔ lɛ bitimə. Ɔ ndɔ bɛkɔa bɛŋɛ́ŋa kɛa, ɛlɔ́áyɛ́ nɔ́yɛ́, fámálana ɔ ətíə́ yɛ bɛndɔ bəkimə.»

⁵Ɔ taká, ata báyɛ́á bənínyə́ bɛ́múɛ́tɛ́ bá sa níə́búə́ nɛkɔmba tálɛ́na ɔ ɔwayɛ́.

⁶Mba, a ná bəə́bu lɛ́na a sɛ́á: «Yámɛ́á ikúílí yɛ́ nana ndáfama. Ɛlɔ́áyɛ́ ənú, ata ɔ́ uyə́níə́ ikúílí yɛ́ lɛa yɛɛsɛ.

⁷Bɛndɔ bá yɛ́ɛ́yɛ́ misí bá sa ósó uwənú ɔbánya. Mba ɔwámɛ, bá ndɔ mɛaŋɔ́á bánya bɔkɔasɛ́á, mɛ ndɔ fə́mə́ləniə ɔwá bɛkɔa ɔbɛ́á bá ndɔ kɛa, bɛ́ lɛa bɛbɛ́á.

⁸Uwənú, nɔ́ ákáná ɔ ɛŋganda. Ɔwámɛ, mɛ sɔ́ ŋɔ ákána ɔ yɛ́ɛ́yɛ́ ɛŋganda bɔkɔasɛ́á, ɛlɔ́áyɛ́ ámɛ, ikúílí yɛ́ nana ndáfama.»

⁹Ɛnaka a bəə́bu lɛná nɔ́yɛ́, a ná tíkə́nə́ ɔ Kalɛ́lɛa.

¹⁰Mba, ɛnaka báyɛ́á bənínyə́ bá ákáná ɔ ɛŋganda, Yə́susu a ná tíkə́ ayɛ́ ákáná ɔ inditiə, bá lɛ wɛɛ́ya sínə.

¹¹Ɔ ikúílí yɛ́ ɛŋganda, bisə́lúkú bɛ́ Bɛyútɛnɛ bá ná botólíə́ á Yə́susu ɔ usiə, bá bataka bá sɛ́á: «Hə́níə́ a lɛ́á əə́?»

¹²Ɔ ətíə́ yɛ ilúkunə, bɛndɔ bá ka báá bá ndɔ tə́ŋə́niə mɔŋɛ́ŋa ɔ ɔwayɛ́ ɛsalɛ, bɔ́mɔtɛ́ bá laaka bá sɛ́á: «A lɛa mɔndɔ muɛsɛ». Bə́ní bá sɛ́á: «Bóo! A ndɔ bɛndɔ nənəsiə.»

¹³Mba ata mɔndɔ a sa ósó ɔhɔ́ɔ́ nióni nɛŋɛ́ŋa ɔ ɔwayɛ́ ɛsalɛ bɔkɔasɛ́á, bá ndɔ bíə́búə́ bisə́lúkú kɔ́lɔ́ma.

¹⁴Ɛnaka ɛŋganda yɛ́ fínə́ ɔ ətíə́, Yə́susu a ná ákáná ɔ Tɛ́mbɛlɛ, a ná botólíə́ ɔ bɛndɔ uwukúniə.

¹⁵Bɛyútɛnɛ bá ka báá ə́lə́mə́nə́tɔ, bá sɛ́á: «Nəníə́ wɔ́ɔwɔ mɔndɔ a lɛ́á na ɛmanya yɛŋɛ́ŋa náana, ɔwayɛ́ ɔwá bá sa úkúniə əə́?»

¹⁶Yə́susu a sɛ́á: «Bɛ́ámɛ́á bilə́líə́ bɛ́ lɛ ndɔ húlínə na mɛaŋɔ́á, mba, na wɛ́ɛ́yɛ́ ɔwá a ná mɛaŋɔ́á lɔma.

¹⁷Ábá mɔndɔ a ndɔ siə uhikiə wɔ́ Huɛlɛ́ ɔbɛ́kɛna, a ŋɔ manya ábá bɛ́ámɛ́á bilə́líə́ bɛ́ ndɔ húlínə na Huɛlɛ́, ataná, bɛ́ ndɔ húlínə na mɛaŋɔ́á bɛ́muɛ́tɛ́.

¹⁸Ikúílí mɔndɔ a ndɔ hɔ́ɔ, ábá bɛ́áyɛ́á bɛtambá bɛ́ ndɔ húlínə na wɛɛ́ya bɛ́múɛ́tɛ́, tɔ́áyɛ́á tuúmə tɔ́ wɛɛ́ya bɛ́múɛ́tɛ́ a ndɔ siə. Mba, ábá mɔndɔ a ndɔ tuúmə tɔ́ wɛ́ɛ́yɛ́ siə ɔwá a ná wɛɛ́ya lɔ́má, a ndɔ hɔ́ɔ́ taká, a lɛ ndɔ kanja.

¹⁹Baánɛ, tátá á Mósisi a ná bənú umbə́ndə́ índíə́ əə́? Mba ata ɔmɔtɛ́ ɔ uwənú ətíə́, a lɛ ndɔ umbə́ndə́ bɛ́kɛna, ɛlɔ́áyɛ́ yatɛ́ nɔ ndɔ siə ɔwámɛ ɔwɔnɛ́na əə́?»

²⁰Ilúkunə yɛ́ bɛndɔ bá ná wɛɛ́ya bíhíə́níníə́ bá sɛ́á: «Ɔ báka na umbúínyi mɔbɛ́á. Ɛ́yánɛ́ a ndɔ siə ɔwáwɔ ɔwɔ́nɔ əə́?»

²¹Yə́susu a sɛ́á: «Bɔkɔa bɔ́mɔtɛ́ mɛ́ ná kɛ́áka, mba bənú bəkimə nɔ lɛa ə́lə́mə́nə́tɔ.

²²Mósisi a ka bənú manɛna ɔwá nɔ baná balɛ́mɛndɔ́ ándáka, nɔ́yɛ́, ata ɔ buɔsɛ́ bɔ́ Sábatɛ nɔ ndɔ luminə ɔ uwəbú ɔwanda. Nɔ́yɛ́, muandana wɔ́ sa botoliniə na wɛɛ́ya, mba, na bíə́súə́ bisə́kínə́.

²³Nɔ lɛ ndɔ umbə́ndə́ wɔ́ Mósisi nɔkɔ ikúílí ɔyɛ́á nɔ ndɔ mɔná mɛlɛ́mɛndɔ́ ánda ɔ buɔsɛ́ bɔ́ Sábatɛ. Mba, ɛlɔ́áyɛ́ yatɛ́ nɔ́ ná mɛaŋɔ́á líŋə́kínə́ bɔkɔasɛ́á, mɛ ka mɔndɔ niŋəsiə wɛɛ́ya mukimə ɔ buɔsɛ́ bɔ́ Sábatɛ əə́?

²⁴Nɔ lɛ kə́lə́síə́ ɔwɔŋgɔkɔnɔ bɔ́ɛ́yɛ́ ɔbɔ́á bɔ́ ndɔ sinənə na məə́sə, mba, nɔ́ kə́lə́sə́kíə́ ɔ taká.»

²⁵Bɔ́mɔtɛ́ bɛndɔ bá Yəlúsalɛma bá sɛ́á: «Tátá ɔ́ mɔndɔ wɔ́ɔwɔ bá ndɔ siə ɔ ɔwɔ́nɔ əə́?

²⁶Ɔ́ wɛɛ́ya wɔ́ɔwɔ, a ndɔ hɔ́ɔ́ ɔ nɛnáka, bá lɛ wɛɛ́ya lɛ́na ata bɔkɔa. Baánɛ, bíə́súə́ bisə́lúkú bɛ́ ndɔ manya muɛsɛ ɔwá wɛɛ́ya á lɛ́á Mɛ́sia əə́?

²⁷Mba wɔ́ɔwɔ mɔndɔ, tɔ ndɔ ɛbɔ́ka manya ɔyɛ́á a nɔ́ húlínə. Ɛnáká Mɛ́sia á ndáfámá, ata mɔndɔ a sɔ́ ŋɔ manya ɛbɔ́ka ɔyɛ́á a ŋɔ húlínə.»

²⁸Ɔ yɛ́ɛ́yɛ́ ikúílí, Yə́susu a ka báá uwukúniə ɔ Tɛ́mbɛlɛ, a ná yə́mə́ a sɛ́á: «Nɔ ndɔ mɛaŋɔ́á manya əə́? Nɔ ndɔ manya ɔhá mɛ nɔ́ húlínə əə́? Ɔ taká, mɛ sa ndasá na wə́míə́ uhikiə, mba, wɛ́ɛ́yɛ́ ɔwá a ná mɛaŋɔ́á lɔ́má, a lɛa taká. Ɔwayɛ́, nɔ lɛ ndɔ wɛɛ́ya manya.

²⁹Mba ɔwámɛ, mɛ ndɔ wɛɛ́ya manya bɔkɔasɛ́á, mɛ nɔ́ húlínə ɔwayɛ́ busíə́, wɛɛ́ya á ná mɛaŋɔ́á lɔ́ma.»

³⁰Nɔ́yɛ́, bɛndɔ bá ka siəkə ɔ ɔwayɛ́ ɔhalɛna, mba, ata mɔndɔ a sa ósó ɔwayɛ́ ɔ mɔkátá ɔtála bɔkɔasɛ́á, yáyɛ́á ikúílí yɛ́ sa bá yɛ́ nɔ́ ɛ́nyána.

³¹Ɔ ətíə́ yɛ ilúkunə, bɛndɔ bəəŋí bá ka níə́búə́ nɛkɔmba tálɛ́na ɔ ɔwayɛ́. Bá laaka bá sɛ́á: «Baánɛ, ɛnáká Mɛ́sia á ndáfámá, a ŋɔ tɔŋgɛtɛ́nɛ́á tɔ́ yələ́mənə tɔŋɛ́ŋa kɛaka yáyɛ́ná wɔ́ɔwɔ mɔndɔ əə́?»

³²Ɛnaka Bɛfalísia bá tulúləlúlə tɔ́ ilúkunə ɔ́kɔ́ ɛlɔ́áyɛ́ Yə́susu, bisə́lúkú bɛ́ bətitiəmahánɛna na Bɛfalísia bá ná bɔkɔfɔnɛa bá Tɛ́mbɛlɛ lɔ́má ɔ ɔwayɛ́ ɔkahalɛ́na.

³³Yə́susu a sɛ́á: «Mɛ lɛa tɔ́na na bənú ɛlɔ́áyɛ́ tɛ́tɛ́á yɛ́ ikúílí, əlimə yɛ nɔ́yɛ́, mɛ ŋɔ ákána á wɛ́ɛ́yɛ́ busíə́ ɔwá a ná mɛaŋɔ́á lɔma.

³⁴Nɔ́ ŋɔ mɛaŋɔ́á siəkə, mba, nɔ sa ndá mɛaŋɔ́á bɔ́ŋɔ́ bɔkɔasɛ́á, nɔ sa ósó ɔndasá ɔ ɛbɔ́ka ɔyɛ́á mɛ ŋɔ bámɛnɛna.»

³⁵Ɛlɔ́áyɛ́ nɔ́yɛ́, Bɛyútɛnɛ bá ná lúmə́ ɔ ɔbɛ́bata bəə́bu na bəə́bu bá sɛ́á: «Hə́níə́ a ŋɔ ákána ɔkɛaka ɔwá tɔ lɛ wɛɛ́ya bɔ́ŋɔ əə́? A ŋɔ ákána á Bɛyútɛnɛ busíə́ ɔbá bá lɛ́á sámbánátɔ́ ətíə́ yɛ bɛndɔ bá Kɛlɛ́kɛ əə́? A ŋɔ Bɛkɛlɛ́kɛ úkúnəkiə əə́?

³⁶Nəníə́ bɛ́tána bɛtambá bɛ́ ndɔ siə ɔlaa ɔbɛ́á a sɛ́á: “Nɔ ŋɔ mɛaŋɔ́á siəkə, nɔ sa ndá mɛaŋɔ́á bɔŋɔ. Nɔ sa ósó ɔndasá ɔ ɛbɔ́ka ɔyɛ́á mɛ ŋɔ bámɛnɛna əə́?”»

³⁷Hinó hínítifə́ hɛ́ ɛŋganda hɛ́ ka bá hinó hɛŋɛ́ŋa ɔ ɔyáyɛ́na. Yə́susu a ná hɔalɛ́na, a ná yə́mə́ a sɛ́á: «Ábá mɔndɔ a báka na nimótí, á sɔ́nɔ́ na mɛaŋɔ́á, á ndányaa.

³⁸Wɛ́ɛ́yɛ́ ɔwá a ŋɔ nɛkɔmba tálɛ́na ɔ ɔwámɛ, tɔyábálá tɔ́ mənífə́ má buɔmɔ́ má ŋɔ njɛa ɔ ɔwayɛ́ mɔlɛ́má, ɛ́sɛ́á Mətilə má ndɔ laa».

³⁹A ka bá a ndɔ hɛ́na nɔ́yɛ́ ɔwɔŋgɔkɔnɔ Umbúínyi Mɔnaŋanaŋa ɔwá bááyɛ́ bá ŋɔ kusənə ɔbá bá ŋɔ nɛkɔmba tálɛ́ná ɔ ɔwayɛ́. Ɔ yɛ́táyɛ́ ikúílí, Huɛlɛ́ a sa bá a nɔ́ Umbúínyi índiə bɔkɔasɛ́á, a sa bá a nɔ́ Yə́susu úmə́siə.

⁴⁰Əlimə yɛ bɛtambá bɛ́ Yə́susu, bɔ́mɔtɛ́ bɛndɔ ɔ ətíə́ yɛ iloŋo bá sɛ́á: «Wɔ́ɔwɔ mɔndɔ a lɛa taká Mɔhɛ́nátɔtányɛ́.»

⁴¹Bɔ́mɔtɛ́ bá sɛ́á: «Wɛɛ́ya á lɛ́á Mɛ́sia.» Bə́ní bá sɛ́á: «Mɛ́sia a óso uhúlínə ɔ Kalɛ́lɛa əə́?»

⁴²Mətilə má ndɔ laa má sɛ́á: «Ɔ ɛndɛkɛ Ndə́witi á Mɛ́sia a ŋɔ húlínə, ɔ Bɛ́tɛlɛhɛ́mɛ, á hitikə hɛ́ Ndə́witi.»

⁴³Ɛlɔ́áyɛ́ nɔ́yɛ́, kɛsalɛ́á yɛ́ ná fínə́ ətíə́ yɛ iloŋo ɛlɔ́áyɛ́ Yə́susu.

⁴⁴Uwəbú ətíə́, bɔ́mɔtɛ́ bɛndɔ bá ka siəkə ɔ ɔwayɛ́ ɔhalɛna, mba, ata mɔndɔ a sa wɛɛ́ya mɔkátá tála.

⁴⁵Bɔkɔfɔnɛa bá ná ndahíáná ɔ busíə́ bɔ́ bisə́lúkú bɛ́ bətitiəmahánɛna na Bɛfalísia. Báaba bá ná bəə́bu batá bá sɛ́á: «Ɛlɔ́áyɛ́ yatɛ́ nɔ sá Yə́susu húlə́nə əə́? »

⁴⁶Bɔkɔfɔnɛa bá sɛ́á: «Ata mɔndɔ a sa ndá hɔ́ɔ́ ɛ́sɛ́á wɛɛ́ya!»

⁴⁷Bɛfalísia bá ná bəə́bu batá bá sɛ́á: «Bənú tɔ́na nɔ ná bɛ́níása ɔwá a bənú nímbə́kə́ əə́?

⁴⁸Ata Mɔfalísia mbá ata mukúkə ɔmɔtɛ́ a ná nɛ́áyɛ́á nɛkɔmba tálɛ́na ɔ ɔwayɛ́ əə́?

⁴⁹Ɔ́maná ɔ bááyɛ́ bɛndɔ ɔbá bá lɛ ndɔ umbə́ndə́ wɔ́ Mósisi manya, bá ná nɛkɔmba tálɛ́na ɔ ɔwayɛ́, indimisi na bəə́bu.»

⁵⁰Nikɔtɛ́mɛ, wɔmɔtɛ́ ɔ ətíə́ yɛ Bɛfalísia, wɛ́ɛ́yɛ́ ɔwá a ná ndá Yə́susu kɔ́ána ubusíə́ bɔ́ ikúílí, a ná bəə́bu lɛ́na a sɛ́á:

⁵¹«Wə́súə́ umbə́ndə́ wɔ́ óso ɔ mɔndɔ hɔkɛna ɛŋaná ɔwɔ́kɔ ata ɔmanya yatɛ́ a ná kɛ́áka əə́?»

⁵²Bá ná wɛɛ́ya bɛ́kámɔ́sɔ́ná bá sɛ́á: «Aŋɔá tɔ́na ɔ lɛa wa Kalɛ́lɛa əə́? Síə́kə́ muɛsɛ ɔ Mətilə, ɔ ŋɔ bɔ́ŋɔ ɔwá ata mɔhɛ́nátɔtányɛ́ ɔmɔtɛ́ a sa ndá húlínə ɔ Kalɛ́lɛa.»

⁵³Əlimə yɛ nɔ́yɛ́, mɔndɔ tɛ́á a ná híánáka ɔ ɔwayɛ́ ɔmbɛ́la.