Read Tunen Yɔhánɛsɛ 8 Bible Online

Yɔhánɛsɛ 8 - Tunen bible

Yɔhánɛsɛ 8

¹Ɛnaka bɛndɔ bá sə́mbə́nə́níə́, Yə́susu a ná ákáná ɔ ɔmáá wɔ́ malɛ́á má Olífia.

²Ɔyáyáka, ɔ ɛsɔ́mbalɛ́, a ná híánáka ɔ Tɛ́mbɛlɛ, bɛndɔ bəkimə bá ná tɔ́mbálɛ́la ɔ ɔwayɛ́ ɛmɛ́ŋɛ́, a ná tuə́nə ɔ misí, a ná botólíə́ ɔ uwəbú uwukúniə.

³Ikúílí a ná báá ɔ uwəbú uwukúniə, bamanyumbə́ndə́ na Bɛfalísia, bá ná muəndú wa mɔndɔ húlə́nə́ ɔwá bá ná kɔ́ána a lɛa ɔsiana na mɛlɛ́mɛndɔ́ minə́minə́. Bá ná wɛɛ́ya sámbɛ́á ɔ ətíə́ yɛ bɛndɔ bəkimə.

⁴Bá ná Yə́susu lɛná bá sɛ́á: «Á Mulə́liə, tɔ ná wɔ́ɔwɔ muəndú kɔ́áná a ndɔ siana na mɛlɛ́mɛndɔ́ minə́minə́.

⁵Mósisi a ka bəsú iŋgínə́ índiə ɔ ɔwayɛ́ umbə́ndə́ ɔwá tɔ yɛ́ɛyɛ ɛnya yɛ muəndú ɔ́nɔ́kɔ́ na miɔkɔ. Mba ɔwáwɔ, nəníə́ ɔ ndɔ aŋɔ́á laa əə́?»

⁶Bá ka nɔ́yɛ́ laa ɔkɛaka ɔwá mbá bá hɛkɔma yámá hɛ́ ɔwayɛ́ ɔsɔ́mɛna. Mba, Yə́susu a ná kutímínə, a ná botólíə́ ɔ misí ɔŋgɔala na híə́yíə́ hɛnɔnɔ́.

⁷Ɛ́sɛ́á bamanyumbə́ndə́ na Bɛfalísia bá ná ɛ́mbɛ́nɛ́na ɔwayɛ́ ɔ ɛmbataka ɔbata, á bɔ́kɔ́nɔ́á, a sɛ́á: «Mɔndɔ ɔwá a ndɔ manya a sɛ́á a sa ndá bɔbɛ́á kɛa, á taŋá ɔ ɔwayɛ́ ulúmə na muɔkɔ.»

⁸Ɛnaka a hɔ́á ɔhɔ́ɔ, a ná kutímínə, a ná híáná ɔ misí ɔŋgɔala na híə́yíə́ hɛnɔnɔ́.

⁹Ikúílí bá ná bɛ́táyɛ́ bɛtambá ɔ́kɔ́, bá ná botólíə́ ɔ ubísúə́ ɔmɔtɛ́ ɔmɔtɛ́ ɔ lúmə́kə ɔ bɛnatákɛ. Yə́susu a ná tíkə́nə́ bíbúə́, wɛ́ɛ́yɛ́ muəndú tɛ́nɛ́mátɔ́ ɔwayɛ́ busíə́.

¹⁰Yə́susu á bɔ́kɔ́nɔ́á, a sɛ́á: «Ata mɔndɔ a sá aŋɔ́á hɔkɛna əə́?»

¹¹Muəndú a sɛ́á: «Ata mɔndɔ á Isə́lúkú.» Mba, Yə́susu a sɛ́á: «Ata mɛaŋɔ́á tɔ́na, mɛ sɔ́ ŋɔ aŋɔ́á hɔkɛna. Ɔ óso ɔwakána, ɔ lúmə́kə isíŋáka ɔ lɛ bɔbɛ́á kɛ́á tɔ́na.»

¹²Yə́susu a ná manyɔ́ ilúkunə ɛtambá lɛna a sɛ́á: «Mɛaŋɔ́á mɛ lɛ́á isəmú yɛ́ misí. Wɛ́ɛ́yɛ́ ɔwá a ndɔ mɛaŋɔ́á ɔŋgɔ, a sa nda kɛ́ndá ɔ ibínə́binə nuúmə́, a ŋɔ bá na isəmú ɔyɛ́á yɛ́ ndɔ ákánana ɔ buɔmɔ́.»

¹³Mba, Bɛfalísia bá sɛ́á: «Ɔ ndɔ imbóŋi bíndiə aŋɔ́á bɛ́múɛ́tɛ́, yawɔ́á imbóŋi yɛ́ lɛ bá hɔ́ánánátɔ.»

¹⁴Yə́susu a sɛ́á: «Ata nɔ́yɛ́ ɛ́sɛ́á mɛ ndɔ imbóŋi bíndiə mɛaŋɔ́á bɛ́múɛ́tɛ́, yamɛ́á imbóŋi yɛ lɛa hɔ́ánánátɔ́ bɔkɔasɛ́á, mɛ ndɔ manya hə́níə́ mɛ ná hulinə, hə́níə́ mɛ ndɔ ákána. Mba uwənú, nɔ lɛ ndɔ manya hə́níə́ mɛ ná húlínə́ ata hə́níə́ mɛ nɔ́ ákána.

¹⁵Uwənú, nɔ ndɔ kə́lə́siə ɛ́sɛ́á ɔbáá wɔ́ bɛndɔ, ɔwámɛ, mɛ lɛ ndɔ kə́lə́siə ata mɔndɔ,

¹⁶mba, ábá mɛ ndɔ kə́lə́siə, bɛ́ámɛ́á bikə́lə́síníə́ bɛ́ lɛa hɔ́ánánátɔ́ bɔkɔasɛ́á, mɛ lɛ bá mɛaŋɔ́á bíbúə́. Isə́ ɔwá a ná mɛaŋɔ́á lɔ́má, a lɛa na mɛaŋɔ́á.

¹⁷Ɔ uwənú umbə́ndə́, yɛ́ lɛa tilə́kə́tɔ́ yɛ́ sɛ́á: “Imbóŋi yɛ bɛndɔ báfandɛ́ yɛ́ booko taká.”

¹⁸Mɛ ndɔ yamɛ́á imbóŋi bíndiə na mɛaŋɔ́á bɛ́múɛ́tɛ́, Isə́ ɔwá a ná mɛaŋɔ́á lɔ́má, a ndɔ imbóŋi índiə ɛlɔ́áyɛ́ ámɛ.»

¹⁹Bá ná wɛɛ́ya batá bá sɛ́á: «Hə́níə́ yawɔ́á Isə́ a lɛ́á əə́?» A sɛ́á: «Ata ɔwámɛ mbá ata á yamɛ́á Isə́, nɔ lɛ ndɔ manya. Ata nɔ báá nɔ ndɔ mɛaŋɔ́á manya, há nɔ ndɔ yamɛ́á Isə́ manya tɔ́na.»

²⁰A ka bɛ́ɛ́yɛ́ bɛtambá laaka ikúílí a ná bá a ndɔ ínə́niə ɔ Tɛ́mbɛlɛ, ɔ ɛbɔ́ka ɔyɛ́á bikoó bɛ́ mahánɛna bɛ́ ná bámɛ́nɛ́na. Ata mɔndɔ a sa wɛɛ́ya halɛna bɔkɔasɛ́á, yayɛ́á ikúílí yɛ́ sa bá yɛ́ nɔ́ ndafama.

²¹Yə́susu a ná kɔndá ɔ uwəbú ɔlɛna a sɛ́á: «Ɔwámɛ, mɛ ŋɔ ákána, nɔ ŋɔ mɛaŋɔ́á siəkə, mba, nɔ ŋɔ wə́kuninə ɔ uwənú bɔbɛ́á. Nɔ sa ósó ɔwakána ɔ ɛbɔ́ka ɔyɛ́á mɛ lɛ́á ɔ ɔwákaka.»

²²Bɛyútɛnɛ bá ná yɛ́ɛ́yɛ́ ikúílí bɛ́láá bá sɛ́á: «A ŋɔ bɛ́ɔ́nɔ ɔbánɔ́ wɛɛ́ya bɛ́múɛ́tɛ́, ɛ́sɛ́á a sɛ́á: “Nɔ sa ósó ɔndasá ɔ ɛbɔ́ka ɔyɛ́á mɛ ndɔ ákána əə́? ”»

²³A ná bəə́bu bíhíə́níníə́ a sɛ́á: «Nɔ lɛa bɛndɔ bá háha ɔ matá, mba ɔwámɛ, mɛ lɛa wa ɔmbáŋá. Nɔ lɛa bá yɛ́ɛyɛ misí, ɔwámɛ, mɛ lɛ bá wa yɛ́ɛyɛ misí.

²⁴Ɔ́ ɛlɔ́áyɛ́ nɔ́yɛ́ mɛ ná bənú lɛ́na ɔwá nɔ ŋɔ wə́kuninə ɔ uwənú mabɛ́á. Ɔ taká, ábá nɔ sa luminə ɔwá mɛaŋɔ́á mɛ́ lɛ́á wɛ́ɛ́yɛ́ ɔwá mɛ lɛ́á, nɔ ŋɔ wə́kuninə ɔ uwənú mabɛ́á.»

²⁵Bɛyútɛnɛ bá ná wɛɛ́ya batá bá sɛ́á: «Baánɛ, aŋɔ́á ɛ́yánɛ́ əə́?» Yə́susu a sɛ́á: «Mɛ lɛa wɛ́ɛ́yɛ́ ɔwá mɛ ná bənú lɛ́na ɔ ulúmə́kə ɔ nibotólíníə́.

²⁶Mɛ báka na bɛkɔa biəŋí bɛ́ ɔlaa ata bɛ́ ɔhɛ́na ɔ uwənú ɛsalɛ. Mba, wɛ́ɛ́yɛ́ ɔwá a ná mɛaŋɔ́á lɔ́má, a lɛa taká. Yatɛ́ ɔyɛ́á mɛ ná ɔ́kɔ́kɛ́na ɔ ɔwayɛ́ ɛmɛ́ŋɛ́, yɛɛ́ta mɛ ndɔ fə́mə́ləniə ɔ bɛndɔ bá misí.»

²⁷Bá sa bá bá nɔ́ ɔ́kɔ ɔwá a ndɔ bə́əbu hɛ́na ɛlɔ́áyɛ́ Isə́.

²⁸A ná bə́əbu yɛ́ɛ́yɛ́ ikúílí lɛ́na a sɛ́á: «Ɛnáká nɔ Mɔná wa mɔndɔ bə́líə́, nɔ ŋɔ manya ɔwá mɛ lɛa wɛ́ɛ́yɛ́ ɔwá mɛ lɛ́á, mɛ lɛ ndɔ kɛa ata bɔkɔa na mɛaŋɔ́á bɛ́múɛ́tɛ́, mba, mɛ ndɔ hɛ́na ɔbánɔ́ yatɛ́ ɔyɛ́á yamɛ́á Isə́ a ná mɛaŋɔ́á úkúnə́kíə́.

²⁹Wɛ́ɛ́yɛ́ ɔwá a ná mɛaŋɔ́á lɔ́má, a lɛa na mɛaŋɔ́á. A sa mɛaŋɔ́á niasa bíbúə́ bɔkɔasɛ́á, mɛ ndɔ kɛa bikúílí bikimə yatɛ́ ɔyɛ́á a ndɔ hikiə.»

³⁰Ɛ́sɛ́á a ná báá a ndɔ hɔ́ɔ́ nɔ́yɛ́, bɛndɔ bəəŋí bá ná nɛkɔmba tálɛ́ná ɔ ɔwayɛ́.

³¹Əlimə yɛ nɔ́yɛ́, Yə́susu a ná Bɛyútɛnɛ lɛ́na ɔbá bá ná nɛkɔmba tálɛ́ná ɔ ɔwáyɛ́ a sɛ́á: «Ábá nɔ ndɔ ɔ́kɛ́na ɔ ɔwámɛ bɛtambá, nɔ lɛa taká bámɛ́á bɔkɔ́nɛna.

³²Nɔ́yɛ́ nɔ ŋɔ taká manya, taká yɛ́ ŋɔ bənú híə́niə bukuənjə.»

³³Bá ná wɛɛ́ya bíhíə́níníə́ bá sɛ́á: «Bəsú bá nikúlə nɛ́ Ábɛlaháma, ata mɔndɔ a sa bəsú ɛta ɔ bɔtɛká, nəníə́ ɔ ósó uwəsú ɔlɛna ɔwá tɔ ŋɔ híána bukuənjə əə́? »

³⁴A ná bəə́bu bɛ́kámɔ́sɔ́na a sɛ́á: «Ɛ́ɛ! Ɔ taká, mɛ ndɔ bənú nɔ́yɛ́ lɛna, mɔndɔ mukimə ɔwá a ndɔ mabɛ́á kɛa, a lɛa yɔlɛ́ yɛ́ bɔbɛ́á.

³⁵Yɔlɛ́ a lɛ bá bikúílí bikimə wa nikúlə, mba mɔná, ɔwayɛ́, a lɛa bikúílí bikimə ɔ ətíə́ yɛ nikúlə.

³⁶Ábá Mɔná a ná bənú bukuənjə índíə́, nɔ ŋɔ bámɛnɛna taká na bukuənjə.

³⁷Ɛ́ɛ! Mɛ ndɔ manya ɔwá nɔ lɛa ɛndɛkɛ Ábɛlaháma, mba, nɔ ndɔ siə ɔwámɛ ɔwɔ́nɔ bɔkɔasɛ́á, nɔ lɛ ndɔ bɛ́ámɛ́á bɛtambá luminə.

³⁸Ɔwámɛ, mɛ ndɔ laa yatɛ́ ɔyɛ́á yamɛ́á Isə́ a ná mɛaŋɔ́á ínə́kíníə́. Mba uwənú, nɔ ndɔ kɛa yatɛ́ ɔyɛ́á yənúə́ isə́ a ná bənú lákɛ́na.»

³⁹Mba, bá sɛ́á: «Ɔ́ yəsúə́ isə́ á Ábɛlaháma.» A sɛ́á: «Ata nɔ bá baná bá Ábɛlaháma, há nɔ ndɔ bɛkɔa kɛa ɛ́sɛ́á wɛɛ́ya.

⁴⁰Ɔwámɛ, mɛ ka bənú taká lakɛna ɔyɛ́á Huɛlɛ́ a ná mɛaŋɔ́á ínə́kíníə́. Mba isíŋáka, nɔ ndɔ siə ɔwámɛ ɔwɔ́nɔ, Ábɛlaháma a sa nɔ́yɛ́ bɛ́kɛna.

⁴¹Uwənú, nɔ ndɔ bɛkɔa kɛa ɛ́sɛ́á yənúə́ isə́.» Bá ná wɛɛ́ya bíhíə́níníə́ bá sɛ́á: «Tɔ lɛ bá baná bá níə́lətíə́, tɔ báka ɔbánɔ́ na isə́ ɛ́mɔtɛ́, á Huɛlɛ́.»

⁴²Yə́susu a sɛ́á: «Ata Huɛlɛ́ a bá taká yənúə́ Isə́, há nɔ ndɔ mɛaŋɔ́á hikiə. Ɔ taká, á Huɛlɛ́ a ná mɛaŋɔ́á lɔma, mɛ lɛa háha tɔ́na ɛlɔ́áyɛ́ ayɛ́. Mɛ sa ndasá na mɛaŋɔ́á bɛ́múɛ́tɛ́, wɛɛ́ya a ná mɛaŋɔ́á lɔma.

⁴³Ɛlɔ́áyɛ́ yatɛ́ nɔ lɛ ndɔ ɔ́kɔ yatɛ́ ɔyɛ́á mɛ ndɔ laa əə́? Ɔ́ bɔkɔasɛ́á nɔ sa ósó ɔ bɛ́ámɛ́á bɛtambá ɔwɔ́kɔ əə́?

⁴⁴Yənúə́ isə́, á Mɔsakata, nɔ ndɔ siə ɔkɛa ɛ́sɛ́á yənúə́ isə́ a ndɔ hikiə. Ɔ ulúmə́kə ɔ bibotólíníə́, wɛɛ́ya muɔnɔ́bɛndɔ. Á sa ndə́tuənə ɔ taká nuúmə́ bɔkɔasɛ́á, taká yɛ́ lɛ bá na wɛɛ́ya. Ikúílí a ndɔ hɔ́ɔ́, a hɔ́ɔ́kɔ há bɛkanja. Ɔ taká, a lɛa mɔkanjakanja, a kɛaka ɛ́sɛ́á wə́yíə́ ɔbáá, a lɛa isə́ yɛ bɛkanja.

⁴⁵Mba ɔwámɛ, mɛ ndɔ hɔ́ɔ́ á taká, ɔ́ ɛlɔ́áyɛ́ nɔ́yɛ́ nɔ lɛ ndɔ bɛ́ámɛ́á bɛtambá lumininə.

⁴⁶Ɛ́yánɛ́ ɔ uwənú ətíə́ a óso uwinə́niə ɔwá mɛ ka bɔbɛ́á kɛaka əə́? Ábá mɛ ndɔ hɔ́ɔ́ á taká, ɛlɔ́áyɛ́ yatɛ́ nɔ lɛ ndɔ bɛ́ámɛ́á bɛtambá lumininə əə́?

⁴⁷Wɛ́ɛ́yɛ́ ɔwá a lɛ́á wa Huɛlɛ́, a ndɔ bɛtambá bɛ́ Huɛlɛ́ ɔ́kɔ. Mba uwənú, nɔ lɛ ndɔ mɛaŋɔ́á ɔ́kɛ́na bɔkɔasɛ́á, nɔ lɛ bámɛ́nɛ́ná bá Huɛlɛ́.»

⁴⁸Bɛyútɛnɛ bá ná Yə́susu bíhíə́níníə́ bá sɛ́á: «Tɔ lɛ bá hɔ́ánánátɔ́ ɔwáwɔ ɔlɛna ɔwá ɔ lɛa mɔndɔ wa Samália, ɔ lɛa tɔ́na na umbúínyi mɔbɛ́á əə́?»

⁴⁹A ná bɛ́kámɔ́sɔ́na a sɛ́á: «Bóo! Mɛ lɛ bá na umbúínyi mɔbɛ́á, mba, mɛ ndɔ yamɛ́á Isə́ bə́tiə. Uwənú, nɔ lɛ ndɔ mɛaŋɔ́á bə́tiə.

⁵⁰Mɛ lɛ ndɔ tuúmə siə tɔ́ mɛaŋɔ́á bɛ́múɛ́tɛ́, mba, mɔndɔ a báka ɔwá a ndɔ tɔɛ́ta siə. Wɛ́ya a ndɔ kə́lə́siə.

⁵¹Ɛ́ɛ! Ɔ taká, mɛ ndɔ bənú nɔ́yɛ́ lɛna, ábá mɔndɔ a ndɔ bɛ́ámɛ́á bɛtambá ɔ́kɛ́na, a sa ndá wəə.»

⁵²Nɔ́yɛ́, Bɛyútɛnɛ bá sɛ́á: «Isíŋáka, tɔ ná manyá ɔwá, ɔ lɛa na umbúínyi mɔbɛ́á. Ábɛlaháma a ka wə́ə́, bɔhɛ́nátɔtányɛ́ tɔ́na bá ka wə́kunə, mba ɔwáwɔ, ɔ ndɔ laa ɔ sɛ́á: “Ábá mɔndɔ a ndɔ bɛ́ámɛ́á bɛtambá ɔ́kɛ́na a sa ndə́wəə.”

⁵³Yəsúə́ isə́ á Ábɛlaháma a ka wə́ə́, baánɛ, ɔ óso ɔbáá mɔŋɛ́ŋa yáyɛ́na wɛɛ́ya əə́? Bɔhɛ́nátɔtányɛ́ tɔ́na bá ka wə́kunə, ɔwáwɔ bɛ́múɛ́tɛ́ aŋɔ́á ɛ́yánɛ́ əə́?»

⁵⁴Yə́susu a sɛ́á: «Mɛ lɛ ndɔ tɔ́ámɛ́á tuúmə siə na mɛaŋɔ́á bɛ́múɛ́tɛ́. Yɛ́ sá bá nɔ́yɛ́, tɔ́ámɛ́á tuúmə tɔ́ lɛa ndəmə. Á yamɛ́á Isə́ a ndɔ mɛaŋɔ́á úmə́siə. Ɔwayɛ́ ɔwá nɔ ndɔ laa ɔwá, a lɛa yənúə́ Huɛlɛ́.

⁵⁵Mba, nɔ lɛ ndɔ wɛɛ́ya manya. Ɔwámɛ, mɛ ndɔ wɛɛ́ya manya. Ábá mɛ ná láá ɔwá mɛ lɛ ndɔ wɛɛ́ya manya, há mɛ lɛa mɔkanjakanja ɛ́sɛ́á bənú. Mba mɛ ndɔ wɛɛ́ya manya, mɛ ndɔ ɔ́kɛ́na ɔ ɔwayɛ́ ɛtambá.

⁵⁶Yənúə́ isə́ á Ábɛlaháma a ka bá ɔ nɛhɔnɔ, a ka báá na ɛnánɛna ɔ hinó usinə ɔhɛ́á mɛ ŋɔ ndafama. A ka hiítə siəkinə, a ka báá úndúə́tɔ́ na nɛhɔnɔ.»

⁵⁷Mba, Bɛyútɛnɛ bá sɛ́á: «Ɔ nana kafámá ɔ moómo álánɔ má tuɔŋɔ, ɔ ndɔ laa ɔ sɛ́á ɔ ka Ábɛlaháma siəkinə əə́?»

⁵⁸A ná bəə́bu bíhíə́níníə́ a sɛ́á: «Ɛ́ɛ! Ɔ taká, mɛ ndɔ bənú nɔ́yɛ́ lɛna, ubusíə́ ɔbɔ́á bá Ábɛlaháma bíə́nə́, Mɛ báka.»

⁵⁹Ɛnaka bá ɔ́kɔ́ nɔ́yɛ́, bá ná miɔkɔ bátáká ɔkɛaka ɔwá bá wɛɛ́ya luməkə, mba, a ná nyɔ́á mbasɛ́á, a ná fámá ɔ Tɛ́mbɛlɛ.