Read Tunen Bɛnyɛná 10 Bible Online

Bɛnyɛná 10 - Tunen bible

Bɛnyɛná 10

¹Wɔmɔtɛ́ mɔndɔ a ka bá ɔ bɔnɔŋɔ bɔ́ Sɛsalɛ́, nɛ́áyɛ́á niínyə á Kɔlɔnɛ́yɛ, a ka bá mɔkɔfɔnɛa mɔŋɛ́ŋa ɔ mɔlɔ́ŋɔ́ wɔ́ ɛbɔ́ɛ́yɛa yɛ́ banɔabilə́ wɔ́ Lɔ́ma, bá ɛ́lɛakɛnɛna bá sɛ́á: «Banɔabilə́ bá Itália.»

²Na nɛ́áyɛ́á nikúlə nikimə, a ka báá a na yɔkɛ́nana, a Huɛlɛ́ kɔ́lɔ́maka, a tɔsɔ́kánɔ́ tɔ́ ilúkunə yɛ́ Bɛyútɛnɛ hə́lə́bəkiə, a Huɛlɛ́ bɛ́kálákɛna ikúílí tɛ́á.

³Bɔ́mɔtɛ́ buɔsɛ́, hoóyi na ɛŋgɛ́ŋɛ́ ɛ́lálɔ́ yɛ́ əlimə yɛ kɔɔsɔ, yɛmɔtɛ́ áŋgɛlɛ yɛ Huɛlɛ́ a ná wɛɛ́ya bínə́níə́ ɔ binónó, a ná tíbíníə́ muɛsɛ, áŋgɛlɛ a ná fínə́ ɔ ɔwayɛ́ miímə, a ná wɛɛ́ya ɛ́lɛ́na, a sɛ́á: «Á Kɔlɔnɛ́yɛ!»

⁴Kɔlɔnɛ́yɛ a ná wɛɛ́ya məə́sə tala, na bɔkɔ́lɔ́ma bukimə, a sɛ́á: «Á Isə́lúkú, yatɛ́ əə́?» Áŋgɛlɛ a sɛ́á: «Huɛlɛ́ a ná wə́wúə́ uŋgə́lə́kí káhá na máwɔ́á mahánɛna ɔmá ɔ ndɔ kɛa ɔ tɔtɔyɔ́nɔ́, a sɔ́ ŋɔ aŋɔ́á fəliə.

⁵Isíŋáka, lɔ́má bɛndɔ ɔ Yobə́ ɔkɛaka ɔwá bá wɔmɔtɛ́ mɔndɔ hulənə, nɛ́áyɛ́á niínyə á Símono, wə́yíə́ mɔlɔ́ŋɛ́ná, á Bíə́lə.

⁶A ndɔ tuənə tɔ́na ɔ ɔmbɛ́la wɔ́ wɔmɔtɛ́ mɔndɔ, nɛ́áyɛ́á niínyə tɔ́na á Símono, mɔnyɔɔbɛɔfɔ, wə́yíə́ ɔmbɛ́la wɔ́ lɛa ɔ ɛsɛ́lɛ́ yɛ́ nɔmɔ́.»

⁷Ikúílí áŋgɛlɛ a ná ákáná ɔyɛ́á yɛ́ nɔ́ húlə ɔ ɔwayɛ́ ɔhɛ́na, Kɔlɔnɛ́yɛ a ná báyɛ́á bɛndɔ ɛ́lɛ́ná báfandɛ́ na wɔmɔtɛ́ mɔkɔfɔnɛa wa mɔlɛ́má muɛsɛ, a ka báá mɔŋákátɔ́ ɔ ɔwayɛ́ nɛmanɛna.

⁸A ná bəə́bu bɛkɔa bikimə nɛŋɔ́nákɛ́ná ɔbɛ́á bɛ́ ná bɛtɔmbaka, əlimə yɛ nɔ́yɛ́, a ná bəə́bu lɔ́má ɔ Yobə́.

⁹Ɔ ɔyáyáka, ɛnakaka bəə́bu ɔ ɛnɔ́mɛ hoóyi na Yobə́, yɛ́ ka báá hoóyi na kɔɔsɔ, Bíə́lə a ná báláka ɔ nɔáta nɛ́ miímə ɔmbáŋá ɔ mabɛ́kálɛ́na.

¹⁰Nɔ́yɛ́, mɛtaná yɛ́ ná wɛɛ́ya itíə́, a ka siəkə ɔ ɔnɛ́á. Ɛnaka bá tuə́nə ɔ bɛ́labɔ́nɛ́á ɔtábɔ́na, a ná kɔ́á ɔ binónó.

¹¹A ná nɔɔ́mɛná yámá úbúnə́tɔ, bɔɔ́la bɔ́ húlə́kinə umə́ ɛ́sɛ́á ɛnya yɛ ɛŋáŋáláŋá yɛ́ nɛbata itíə́tɔ́ ɔ məbə́ŋú ə́nisə, nɛ́ ná ndátálɛ́má ɔ misí.

¹²Mɛnyama mikimə yɛ́ makɔlɔ́ ə́nisə, yííyí ɔyɛ́á yɛ́ ná báá yɛ́ ndɔ hələ ɔ misí, yííyí tɔ́na ɔyɛ́á yɛ́ ná báá yɛ́ ndɔ hululuə ɔ ɔmbáŋá, yɛ́ ka bákɔna mikimə ɔ nuúmə́.

¹³Nɛ́mɔtɛ́ nióni nɛ́ ná wɛɛ́ya lɛ́na nɛ́ sɛ́á: «Á Bíə́lə, hɔalɛ́na, ɔ́nɔ, nɛ́áka tɔ́ná!»

¹⁴Mba, Bíə́lə a ná wɛɛ́ya bíhíə́níníə́ a sɛ́á: «Bóo! Á Isə́lúkú, mɛ lɛ boóko ɔ bɔɔ́la bɔ́ ikiní ɔnɛ́á ata bɔ́ tífílə́kə́tɔ.»

¹⁵A ná manyɔ́ nióni ɔ́kɔ ɔ bikúílí bɛ́fandɛ́ nɛ́ sɛ́á: «Yatɛ́ ɔyɛ́á Huɛlɛ́ a ná nəŋə́síə́, ɔ sá hɔ́ánana ufə́mə́ləniə ɔwá yɛ́ báka tífílə́kə́tɔ!»

¹⁶Nɛ́ɛ́yɛ́ nióni nɛ́ ka bɛ́kɛaka bikúílí bɛ́lálɔ́, əlimə yɛ nɔ́yɛ́, ɔ umisíúmə́ yɛ́ɛ́yɛ́ ɛŋáŋáláŋá yɛ́ bɔɔ́la bɔ́ ná tilə́ ɔ nɔɔ́mɛná.

¹⁷Bíə́lə a ná bɛ́ɔ́kɔ́lɛ́ná ɔ binífúnínə́ nɛ́ bɛ́ɛ́yɛ́ binónó ɔ ɔbɛ́bata ɔbɛ́á a nɔ siəkinə, a lɛ kafámá ɔ ɔmanya. Ɔ umisíúmə́, bɛndɔ ɔbá Kɔlɔnɛ́yɛ a ná lɔ́má, ɔbá bá ndɔ húlə́ miímə yɛ Símono siə, bá ná ndáfámá ɔ ɔwayɛ́ busíə́ bɔ́ hɛkɔ́kɛ.

¹⁸Bá ɛ́lɛakɛna, bá bataka nióni nɛŋɛ́ŋa ɔkɛaka ɔwá, bá manyá ábá á Símono ɔwá bá ndɔ ɛ́lɛnɛna Bíə́lə, a ndɔ tuənə ɔ yɛ́táyɛ́ miímə.

¹⁹Bíə́lə a ka báá tátɛ́átɔ́ ɔ mabɛ́kɔ́lɔmɔna má bɛ́áyɛ́á binónó, mba, Umbúínyi Mɔnaŋanaŋa wɔ́ sɛ́á: «Ɔ́ bɛndɔ bálálɔ́ bááyɛ́ bá ndɔ aŋɔ́á siə.

²⁰Hɔalɛ́ná, lɔɔ́kɔ́ tɔfá na bəə́bu ɔ mɔndɔ́ŋɔ́ ɛŋaná unə́ŋə́liniə bɔkɔasɛ́á, mɛaŋɔ́á mɛ ná bəə́bu lɔma.»

²¹Nɔ́yɛ́ Bíə́lə a ná lɔɔ́kɔ a báyɛ́ bɛndɔ busíə́, a sɛ́á: «Mɛaŋɔ́á mɛ lɛ́á wɛ́ɛ́yɛ́ ɔwá nɔ ndɔ siə. Ɛlɔ́áyɛ́ yatɛ́ nɔ ná ndá háha sɛ́ná ɔ ɔwámɛ usiə əə́?»

²²Bá sɛ́á: «Á Kɔlɔnɛ́yɛ á mɔkɔfɔnɛa mɔŋɛ́ŋa ɔ mɔlɔ́ŋɔ́ wɔ́ ɛbɔ́ɛ́yɛa yɛ́ banɔabilə́ a ná bəsú lɔma. Mɔndɔ wataká, ɔwá a ndɔ Huɛlɛ́ kɔ́lɔ́ma, Bɛyútɛnɛ bikimə bɛ́ bɔnɔŋɔ bá ndɔ hɛ́na muɛsɛ ɔ ɔwayɛ́ ɛlɔ́á. Yɛmɔtɛ́ áŋgɛlɛ yɛ Huɛlɛ́ a ná wɛɛ́ya lɛ́na ɔwá, bá aŋɔ́á húlə́nə́ ɔ ɔwáyɛ́ busíə́ ɔkɛaka ɔwá, a ɔkɔ́kɛ́ná yatɛ́ ɔyɛ́á ɔ ndɔ wɛɛ́ya lakɛna.»

²³Nɔyɛ́, Bíə́lə a ná bəə́bu kaha, a ná bəə́bu bɛsianɛ́ná ínə́níə́. Ɔ ɔyáyáka, a ná mɔkɛnda ɛtá na bəə́bu, bɔ́mɔtɛ́ bənísə́ bá Yobə́ bá ná ká bəə́bu tikə.

²⁴Ɔ hinó ɔhɛ́á hɛ́ ná ɔ́ŋgɔ́nɔ, a ná káfámá ɔ bɔnɔŋɔ bɔ́ Sɛsalɛ́. Kɔlɔnɛ́yɛ ɔwayɛ́, a ka bá a ndɔ bəə́bu táta, na bɛláŋa bɛ́ nɛ́áyɛ́á nikúlə, na bɛŋgɔ́áyɛ́ bɛ́ mɔlɛ́má tɔ́na ɔbá a ná ɛ́lɛ́ákɛ́na.

²⁵Ɔ ikúílí ɔyɛ́á Bíə́lə a ná ndáfámá, Kɔlɔnɛ́yɛ a ná ndásá ɔ ɔwayɛ́ nɛnyáná, a ná kiníə́ ɛlɔ́áyɛ́ ɔwayɛ́ ɔ hibə́təniə uhíə́niniə.

²⁶Mba, Bíə́lə a sɛ́á: «Hɔalɛ́na! Mɛaŋɔ́á mɔndɔ tɔ́na ɛ́sɛ́á aŋɔ́á, a ná wɛɛ́ya itíə́ ɔ mɔkátá, a ná wɛɛ́ya huəlíníə́.»

²⁷Wɛɛ́ya ɔ ɛŋgamɔ́ nɔ́yɛ́ na Kɔlɔnɛ́yɛ, a ná fínə́ ɔ miímə, a ná bɛndɔ kɔ́áná bəəŋí kɔtákánátɔ.

²⁸A sɛ́á: «Nɔ ndɔ manya muɛsɛ ɔwá, ikiní yɛŋɛ́ŋa ɔ Bɛyútɛnɛ ɔ ufínə ɔmbɛ́la wɔ́ wɛ́ɛ́yɛ́ ɔwá a lɛ bá Mɔyútɛnɛ, ata ɔ ukindəniə iŋgində́ na wɛɛ́ya. Mba, Huɛlɛ́ a ná mɛaŋɔ́á ínə́níə́ ɔwá, mɛ lɛ mɔndɔ sinə́ ɛ́sɛ́á a lɛa bítífílə́kə́tɔ́, ataná mɛ́ wɛɛ́ya bítə́tə́kə́níə́.

²⁹Ɔ́ ɛlɔ́áyɛ́ nɔ́yɛ́ mɛ sa mɔlɔ́á nata ɔ ikúílí ɔyɛ́á nɔ́ ná mɛaŋɔ́á ɛ́lɛ́ákɛ́na. Mba isíŋáka, mɛ ndɔ siə ɔmanya ɛlɔ́áyɛ́ yatɛ́ nɔ́ ná mɛaŋɔ́á ɛ́lɛ́ákɛ́nɛ́na.»

³⁰Kɔlɔnɛ́yɛ a sɛ́á: «Á álálɔ́ niɔfɛ́nɛ, mɛ ka báá ɔ mabɛ́kálɛ́na ɔ yɛ́tana ikúílí, ɔ ɛŋgɛ́ŋɛ́ ɛ́lálɔ́ yɛ́ əlimə yɛ kɔɔsɔ. Ɔ umisíúmə́, mɛ ná mɔndɔ yámá ɔwámɛ busíə́ na bɛlɛŋa laŋɔlaŋɔ,

³¹a sɛ́á: “Á Kɔlɔnɛ́yɛ, Huɛlɛ́ a ná máwɔ́á mabɛ́kálɛ́na ɔ́kɔ́kɛ́na, a sa fəlíə́ tɔ́na ɔwá ɔ ka tɔtɔyɔ́nɔ́ ɔ́lɔ́kɛna.”

³²A ná mɛaŋɔ́á lɛ́na tɔ́na a sɛ́á: “Lɔ́má bɛndɔ ɔ Yobə́ ɔkɛaka ɔwá bá Símono húlə́nə́ ɔwá bá ndɔ ɛ́lɛnɛna tɔ́na á Bíə́lə. A ndɔ tuənə á Símono miímə á mɔnyɔɔbɛɔfɔ, wə́yíə́ ɔmbɛ́la wɔ́ lɛa ɔ tanɛ́ yɛ nɔmɔ́.”

³³Mɛ ná bɛndɔ lɔ́má ɔ umisíúmə́ ɔkɛaka ɔwá bá ndá aŋɔ́á ɛ́lɛ́ákɛ́na, muɛsɛ nɔ́yɛ́ ɛ́sɛ́á ɔ ná ndáfama. Isíŋáka, ɔ́ bəsú báaba á Huɛlɛ́ busíə́ ɔkɛaka ɔwá, tɔ ɔ́kɔ́kɛ́na yatɛ́ yikimə ɔyɛ́á Isə́lúkú a ná aŋɔ́á mánɛ́ná ɔwá ɔ bəsú lákɛ́na.»

³⁴Nɔ́yɛ́, Bíə́lə a ná ɛtambá ɛ́tá, a sɛ́á: «Isíŋáka, mɛ ná manyá taká ɔwá, Huɛlɛ́ a lɛ ndɔ nifəŋə háá ətíə́ yɛ bɛndɔ:

³⁵Ɔ mɔnɔŋɔ ɔbánɔ́ məkimə, ata ɛ́yánɛ́ mɔndɔ ɔwá a ndɔ wɛɛ́ya bə́tiə na nɛkɔmba nikimə, ɔwá a ndɔ kɛa yatɛ́ ɔyɛ́á yɛ́ lɛ́á taká, a lɛa muɛsɛ á Huɛlɛ́ busíə́.

³⁶Huɛlɛ́ a ka yáyɛ́á ɛtambá lɔ́mɛ́na ɔ bɛndɔ bá Ísilahɛ́lɛ. Ɔ́ Imbə́nú Yɛɛsɛ ɔkɛaka ɔwá tɔ bá ɔ bumbə́nú ɔ tɔ́mbákɛna na Yə́susu Kilísitusu, ɔwayɛ́ ɔwá a lɛ́á Isə́lúkú yɛ bɛndɔ bəkimə.»

³⁷«Nɔ ndɔ manya yatɛ́ ɔyɛ́á yɛ́ ná taŋá ɔ ɔbɛ́kɛa ɔ Kalɛ́lɛa, ɔ bɔnɔŋɔ bɔ́ Yútɛa tɔ́na ɔ ikúílí ɔyɛ́á Yɔhánɛsɛ a ná húlə́ nɔŋɔnaka, a ná nɛsɔa índíə́kínə́nə.

³⁸Nɔ ndɔ manya nəníə́ Huɛlɛ́ a ná Umbúínyi Mɔnaŋanaŋa na injiŋə indíə́ á Yə́susu wa Násalɛtɛ. Nɔ ndɔ manya tɔ́na nəníə́ Yə́susu a ná kɛ́ndáka ɔ bɔnɔŋɔ, a húlə́ buɛsɛ kɛaka, a bááyɛ́ niŋəsəkiə tɔ́na ɔbá bá ná báá bɛɔlɛ́ bɛ́ isə́lúkú yɛ imbúinyi mɛbɛ́á bɔkɔasɛ́á, Huɛlɛ́ a ka bá na wɛɛ́ya.»

³⁹«Uwəsú ɔ báaba, bəsú tɔ́ lɛ́á bəmbóŋímboŋi bá bɛ́ɛ́yɛ́ bɛkɔa ɔbɛ́á a ná kɛ́áka ɔ bɔnɔŋɔ bɔ́ Bɛyútɛnɛ ɔkafámáká ɔ Yəlúsalɛma. Bá ka wɛɛ́ya ɔ́nɔ́kɔ, bá ná wɛɛ́ya ɔ́mɔ́kɛ́na ɔ ɔmbásá.

⁴⁰Mba, Huɛlɛ́ a ka wɛɛ́ya huŋuəsiə əlimə yɛ tunó tɔ́lálɔ́, a ná kɛ́áka ɔwá a bífə́mə́lə́níə́,

⁴¹tátá ɔ ilúkunə yikimə, mba, ɔ uwəsú ɔbá Huɛlɛ́ a ná táŋá ɔ ɔtɛ́fa ɛ́sɛ́á bəmbóŋímboŋi. Əlimə yɛ nɛ́áyɛ́á nɛhɔŋɔa ɔ ətíə́ yɛ bəwə́nú, tɔ ka nɛ́áka, tɔ ná nyákɛ́ná na wɛɛ́ya.

⁴²A ka bəsú manɛna ɔwá tɔ bɛndɔ bəkimə nɔŋɔ́nákɛ́na, tɔ́ mənyə́síə́ tɔ sɛ́á ɔ ɔwayɛ́ Huɛlɛ́ a ná tínímíə́ ɛ́sɛ́á mukə́lə́siə wa bɔɔmɔ́ na bəwə́nú.

⁴³Bɔhɛ́nátɔtányɛ́ bəkimə bá ka hɔ́kɛna ɔwayɛ́ ɛlɔ́á bá sɛ́á: “Ata ɛ́yánɛ́ ɔwá a ŋɔ nɛ́áyɛ́á nɛkɔmba tálɛ́na ɔ ɔwayɛ́, Huɛlɛ́ a ŋɔ wɛɛ́ya máyɛ́á mabɛ́á niasɛna.”»

⁴⁴Bíə́lə a ka báá a ndɔ bɛ́ɛ́yɛ́ bɛyɔŋɔlɛ nífúnə tɔ́na, Umbúínyi Mɔnaŋanaŋa wɔ́ na kɔ́ɛ́na ɔ báyɛ́ bəkimə ɔbá bá ná báá bá ndɔ yáyɛ́á Ɛtambá ɔ́kɔ.

⁴⁵Bəlumininə bá Bɛyútɛnɛ ɔbá bá ná ndásákɔ́ná na Bíə́lə bá ná ə́lə́mə́nə, bá ná siəkínə́ ɔwá, Umbúínyi Mɔnaŋanaŋa ɔwá Huɛlɛ́ a ndɔ índiənə, wɔ́ ná bááyɛ́ áyɛ́ná tɔ́na ɔbá bá lɛ bá Bɛyútɛnɛ.

⁴⁶Ɔ taká, bá ka bəə́bu ɔ́kɔ́kɛna bá ndɔ hɔ́ɔ́ na mohókí mənə́mənə́, bá bɔŋɛ́ŋa bɔ́ Huɛlɛ́ nyamaka. Nɔ́yɛ́, Bíə́lə a sɛ́á:

⁴⁷«Mɔndɔ a óso ukotiə ɔwá bá lɛ báaba bɛndɔ nɛsɔa índíə́ na mənífə́ ɔbá bá ná Umbúínyi Mɔnaŋanaŋa kusə́nə́ hɔ́ánánátɔ́ ɛ́sɛ́á bəsú əə́?»

⁴⁸A ná iŋgínə́ índíə́ ɔwá bá bəə́bu nɛsɔa índíə́kínə ɔ niínyə nɛ́ Yə́susu Kilísitusu. Bá ná wɛɛ́ya batá ɔwá a tɛ́tɛ́á yɛ tunó túmbíə́ na bəə́bu.