Read Tunen Bɛnyɛná 11 Bible Online

Bɛnyɛná 11 - Tunen bible

Bɛnyɛná 11

¹Basɔ́másɔma na bənísə́ ɔbá bá ná bámɛ́nɛ́na ɔ Yútɛa bá ná ɔ́kɔ́kɛ́na ɔwá, bááyɛ́ ɔbá bá lɛ bá Bɛyútɛnɛ bá ka Ɛtambá yɛ́ Huɛlɛ́ ɔ́kɔ́kɛna bá ná luminə tɔ́na.

²Ɛnaka Bíə́lə a ndáhíáná ɔ Yəlúsalɛma, bəlumininə bá Bɛyútɛnɛ bá ná lúmə́ ɔ ɔwayɛ́ ɔkɛ́kɛ́lɛna bá sɛ́á:

³«Nəníə́ ɔ ná kábɛ́látá na bɛndɔ ɔbá bá lɛ bá Bɛyútɛnɛ, ɔ ná nɛ́áká tɔ́na na bəə́bu əə́?»

⁴Nɔ́yɛ́, Bíə́lə a ná bəə́bu nɛŋɔ́nákɛ́ná tə́lə́ŋu yatɛ́ yikimə ɔyɛ́á yɛ́ ná bɛtɔmbaka, a sɛ́á:

⁵«Mɛ ka báá ɔ mabɛ́kálɛ́na ɔ bətínə́ yɛ Yobə́, mɛ ná bɔ́mɔtɛ́ bɔɔ́la yámá ɔ binónó bɔ́ nɔ́ húlínə ɔ ɔmbáŋá, bɔ́ ndɔ ndasá ɔwámɛ busíə́, ɛnya yɛ nɛbata nɛŋɛ́ŋa tiŋə́tɔ́ ɔ bɛsalɛ bínisə.

⁶Mɛ ná məə́sə tálá muɛsɛ, mɛ ná mɛnyama yɛ́ makɔlɔ́ ə́nisə yámá ɔ nuúmə́, yɛ́ ɛmbɔ́ma, mɛnyama ɔyɛ́á yɛ́ ndɔ hələ, na tunoní.

⁷Mɛ ná yɛ́ɛ́yɛ́ ikúílí nióni nɛ́ mɔndɔ ɔ́kɔ́ nɛ́ sɛ́á: “Á Bíə́lə, hɔalɛ́na, ɔ́nɔ, nɛ́áka!”

⁸Mɛ ná bíhíə́níníə́ mɛ sɛ́á: “Haa! Á Isə́lúkú bóo bɔkɔasɛ́á, ata bɔɔ́la bɔ́ ikiní mbá ata bɔ́ məhilə́, bɔ́ lɛ boóko ufínə ɔ ɔwámɛ munuə.”

⁹Mɛ ná manyɔ́ nɛ́ɛ́yɛ́ nióni ɔ́kɔ ɔ nɔɔ́mɛná nɛ́ sɛ́á: “Ɔ lɛ híə́nə́síə́ məhilə́ yatɛ́ ɔyɛ́á Huɛlɛ́ a ná nəŋə́síə́!”

¹⁰Bɔ́ɛ́yɛ́ bɔkɔa bɔ́ ka híánɔlɔna bikúílí bɛ́lálɔ́, əlimə yɛ ikúílí, bikimə bɛ́ ná tilə́ ɔ ɔmbáŋá.

¹¹Ɔ umisíúmə́, bɛndɔ bálálɔ́ bá ná ndáfámá ɔ miímə ɔyɛ́á tɔ ná bámɛ́nɛ́na, wɔmɔtɛ́ mɔndɔ wa Sɛsalɛ́ a ná bəə́bu lɔ́má ɔkɛaka ɔwá, a ndá mɛaŋɔ́á ɛ́lɛ́ákɛ́na.

¹²Umbúínyi Mɔnaŋanaŋa wɔ́ ná mɛaŋɔ́á lɛ́ná ɔwá mɛ ákáná na bəə́bu ɛŋaná ubíyə́bə. Bənísə́ bálɛ́ndálɔ ɔbá bá ná mɛaŋɔ́á ɔ́ŋgɔ́kɔ, bá ná ká mɛaŋɔ́á tíkə́ ɔ Sɛsalɛ́, tɔ ná fínə́ ɔ miímə yɛ Kɔlɔnɛ́yɛ.

¹³Kɔlɔnɛ́yɛ a ná bəsú nɛŋɔ́nákɛ́ná nəníə́ a ná áŋgɛlɛ siəkínə́ tɛ́nɛ́mátɔ́ ɔ ɔwayɛ́ miímə, a sɛ́á: “Lɔ́má bɛndɔ ɔ bətínə́ yɛ Yobə́, bá ká Símono ɛ́lɛ́ákɛ́na ɔwá bá ndɔ ɛ́lɛnɛna á Bíə́lə.

¹⁴A ŋɔ aŋɔ́á bɛtambá lakɛna ɔbɛ́á bɛ́ ŋɔ aŋɔ́á nibínuəniə húlə́ninə na nɛ́áwɔ́á nikúlə nikimə.”

¹⁵Mɛ ná botoliə ɔhɔ́ɔ́, Umbúínyi Mɔnaŋanaŋa wɔ́ ná bəə́bu kɔ́ɛ́na, hɔ́ánánátɔ́ ɛ́sɛ́á wɔ́ ná əsú kɔ́ɛ́na ɔ ikúílí yíbúsíə́.

¹⁶Mɛ ná bɛ́kɔ́lɔ́mɔ́ná yatɛ́ ɔyɛ́á Isə́lúkú a ná mɛaŋɔ́á lɛ́na, a sɛ́á: “Yɔhánɛsɛ a ka nɛsɔa índiəkinənə na mənífə́, mba uwənú, nɛsɔa ɔnɛ́á nɔ ŋɔ kusənə, ɔ́ Umbúínyi Mɔnaŋanaŋa.”

¹⁷Nɔ́yɛ́, Huɛlɛ́ a ka bəə́bu niəbə índiə hɔ́ánánátɔ́ ɛ́sɛ́á nɛ́ɛ́yɛ́ ɔnɛ́á tɔ́ ná əsú kúsə́nə ɔ ikúílí ɔyɛ́á tɔ ná níə́súə́ nɛkɔmba tálɛ́ná á Isə́lúkú á Yə́susu Kilísitusu. Mɛaŋɔ́á ɛ́yánɛ́ ɛ́kɛ mɛ Huɛlɛ́ kotiə ɔwá a lɛ nɔ́yɛ́ kɛ́á əə́?»

¹⁸Ɛnaka bɛndɔ bəkimə bá bɛtambá bɛ́ Bíə́lə ɔ́kɔ́, bá ná nə́yə́níə́ yə́ə́bu, bá Huɛlɛ́ nyamaka bá sɛ́á: «Yɛ́ lɛa taká nɔ́yɛ́ ɔwá, Huɛlɛ́ a ná bááyɛ́ ɛnɔ́mɛ kunínə ɔbá bá lɛ bá Bɛyútɛnɛ ɔkɛaka ɔwá, bá mɔlɛ́má kɔ́ŋɔ́ná, bá tiísi yɛ buɔmɔ́ bɔ́ ikúílíə́kimə kúsə́nə tɔ́na.»

¹⁹Ɛnaka bá Itiənə ɔ́nɔ́kɔ́, bá ná botólíə́ ɔ bəlumininə utəkəsə, nɔ́yɛ́, uwəbú, bá ná sámbáná ɔ mɔnɔŋɔ mənə́mənə́, bɔ́mɔtɛ́ ɔ uwəbú ətíə́ bá ná ákáka ɔ bɔnɔŋɔ bɔ́ Finisíə́, bɔ́ Síbili na ɔ bətínə́ yɛ Aŋatiɔ́sɛ, mba, ɔ́maná ɔ Bɛyútɛnɛ bá ná báá bá ndɔ ɛtambá yɛ́ Huɛlɛ́ nɔŋɔnɛna.

²⁰Nɔ́yɛ́, bɔ́mɔtɛ́ bəlumininə bá bɔnɔŋɔ bɔ́ Síbili na bɔ́ Silɛ́nɛ bá ná ákáná ɔ Aŋatiɔ́sɛ, bá ná bəə́bu hɔ́kɛ́na, bá ná Imbə́nú Yɛɛsɛ yɛ Yə́susu Kilísitusu nɔŋɔ́nákɛ́na ɔ báyɛ́ ɔbá bá lɛ bá Bɛyútɛnɛ.

²¹Huɛlɛ́ a ná bəə́bu óníníə́ ɔ nindínə́ ɔnɛ́á, ɔmbana muiŋí wɔ́ bɛndɔ bá ná mɔlɛ́má kɔŋɔna, bá ná níə́búə́ nɛkɔmba tálɛ́ná á Isə́lúkú a Yə́susu.

²²Bɛláŋa bɛ́ ilúkunə yɛ́ Yəlúsalɛma bá ná yɛ́ɛ́yɛ́ imbə́nú ɔ́kɔ, nɔ́yɛ́, bá ná Banábasɛ lɔ́má ɔ bətínə́ yɛ́ Aŋatiɔ́sɛ.

²³Ɛnaka a káfámá umə́, a ná siəkínə́ ɛ́sɛ́á Huɛlɛ́ a ná bəlumininə sana, nɛhɔnɔ nɛ́ ná wɛɛ́ya itíə́, a ná bəkimə makɛ́nda índíə́ ɔwá, bá bɛ́ɔ́lɔ́kɔ́kɛ́na á Isə́lúkú a Yə́susu.

²⁴Ɔ taká, Banábasɛ a ka báá mɔndɔ muɛsɛ, úndúə́tɔ́ na Umbúínyi Mɔnaŋanaŋa na ilumininə. Ɔmbana muiŋí wɔ́ bɛndɔ bá ná bɛ́tɔ́á á Isə́lúkú.

²⁵Banábasɛ a ná yɛ́ɛ́yɛ́ ikúílí ákáná ɔ bətínə́ yɛ Tálɛsɛ ɔkɛaka ɔwá a ká Sáwolo ɛta.

²⁶Ɛnaka a wɛɛ́ya bɔ́ŋɔ́, a ná ndá wɛɛ́ya híánáná ɔ Aŋatiɔ́sɛ. Bá ná túmbíə́ iŋgində́ hiɔŋɔ hikimə ɔ buolí ətíə́ yɛ yɛ́táyɛ́ ilúkunə, bá ɔmbana muiŋí wɔ́ bɛndɔ úkúnəkiə. Háha ɔ bətínə́ yɛ Aŋatiɔ́sɛ a bá ná bəlumininə lúmə́ ɔ ɔwɛ́lɛnɛna ɔ ikúílí yíbúsíə́ «bikilísitənə.»

²⁷Ɔ yɛ́táyɛ́ ikúílí bɔhɛ́nátɔtányɛ́ bá ná lɔɔ́kɔ ɔ Yəlúsalɛma ɔ wákaka ɔ bətínə́ yɛ Aŋatiɔ́sɛ.

²⁸Wɔmɔtɛ́ ɔ uwəbú ətíə́, nɛ́áyɛ́á niínyə á Akabúsu, a ná botólíə́ ɔnɔŋɔna ɔwá, ɛkasɛ mətíli má bálá ɔ misí ɔbánɔ́ mikimə. Ɔ taká, má ka bála ɔ ikúílí ɔyɛ́á Kolóto a ná bámɛ́nɛ́ná káyɛsa.

²⁹Bəlumininə ɔbá bá ná ɛtambá yɛ́ Akabúsu ɔ́kɔ́, bá ná ihə́ŋiə ɛtá ɔwá, mɔɛ́ta tɛ́á a ná hɔ́ánána ɔ məndunə́ uwíndiə ɛ́sɛ́á bɛ́áyɛ́á bɛhámbálɛ́ ɔkɛaka ɔwá, bá bənísə́ ɔ́lɔ́ ɔbá bá lɛ́á ɔ bɔnɔŋɔ bɔ́ Yútɛa.

³⁰Ɔ́ nɔ́yɛ́ bá ná kɛ́áka, bá ná məndunə́ lɔ́mɛ́ná ɔ bɛkámɔ bɛ́ ilúkunə ɔ makátá má Banábasɛ na Sáwolo.