Read Tunen Bɛnyɛná 12 Bible Online

Bɛnyɛná 12 - Tunen bible

Bɛnyɛná 12

¹Ɔ yɛ́táyɛ́ ikúílí, munəni á Əlóto a ná botólíə́ ɔ bɛ́mɔtɛ́ bɛláŋa bɛ́ ilúkunə utəkəsə.

²A ná kɛ́áka bá ná Yákɔbɔ, á munínyə́ wa Yɔhánɛsɛ ɔ́nɔ́kɔ́ na mɔkɔ́átá.

³Ɛnaka a siəkínə́ a sɛ́á Bɛyútɛnɛ bá ná nɔ́yɛ́ híkə́kíə́, a ná kɛ́áka bá ná Bíə́lə halɛ́na, yɛ́ ka báá ɔ ikúílí yɛ́ tunó ɔtɔ́á bá lɛ bɛbɛlɛ́tɛ ɛŋaná mətəkí nɛ́áka, ɔ nɛbɛ́tábɔ́na nɛ́ ɛŋganda yɛ Básɛ́ka.

⁴Ɛnaka bá Bíə́lə halɛ́ná nɔ́yɛ́, Əlóto a ná wɛɛ́ya háá ɔ ɛbɔka, a ná məndúmə́ má bɔkɔfɔnɛa bɛ́lɛ́ná ə́nisə, nindúmə́ tɛ́á na bɔkɔfɔnɛa bə́nisə ɔkɛaka ɔwá bá wɛɛ́ya tə́tə́níə́, nɛɛ́ta tɛ́á ɔ ɔwayɛ́ ikúílí. A ka bá a ndɔ bɛ́kɔ́lɔmɔna ɔwá mbá a ŋɔ wɛɛ́ya kə́lə́səkiə ɔ nɛnáka əlimə yɛ ɛŋganda yɛ Básɛ́ka.

⁵Bíə́lə nɔ́yɛ́ ɔ ɛbɔka, ilúkunə yɛ́ bəlumininə bá Huɛlɛ́ bɛ́kálákɛna na iŋgínə́ yikimə ɔwayɛ́ ɛlɔ́á.

⁶Əlóto a ka bá ɔwá mbá a wɛɛ́ya kə́lə́sə́kíə́ ɔ nɛnáka, ɔ bɔ́táyɛ́ bulúə́, Bíə́lə a ka báá ɔ hinó ɔ ətíə́ yɛ bɔkɔfɔnɛa báfandɛ́. A ka báá ɔ́lɔ́kɔ́kɔ́tɔ́ na mɛsáŋa ífəndí, batáta bá ka báá ɔ buolí ɔ hɛkɔ́kɛ hɛ́ miímə yɛ ɛbɔka.

⁷Áŋgɛlɛ yɛ Isə́lúkú a ná fámáláná həmə́tu, isəmú yɛ́ ná úndúə́ ɔ ɛbɔka nuúmə́. Áŋgɛlɛ a ná Bíə́lə itíə́lə ɔ ɛsalɛ ɛ́mɔtɛ́, a ná wɛɛ́ya hunyíə́, a sɛ́á: «Hɔalɛ́ná tɔfá.» Mɛsáŋa yɛ́ ná tuŋúnúə́ ɔ ɔwayɛ́ makátá.

⁸Əlimə yɛ nɔ́yɛ́, áŋgɛlɛ a ná wɛɛ́ya lɛná tɔ́na a sɛ́á: «Bɛ́háá bɔ́wɔ́á bɔlɛŋa na, bɛtafɛ́ná.» Bíə́lə a ná wɛɛ́ya ɔkɛna, áŋgɛlɛ a ná kɔndá a sɛ́á: «Bíə́mbínə́ nɛ́áwɔ́á nilókiə, ɔ́ŋgɔ́kɔ́ mɛaŋɔ́á.»

⁹Bíə́lə a ná áŋgɛlɛ ɔŋgɔ́kɔ, bá ná fámá ɔ miímə yɛ ɛbɔka. A lɛ manyá ɔwá, yatɛ́ ɔyɛ́á áŋgɛlɛ a ndɔ kɛa yɛ́ lɛa taká, mba, a fɛkaka a sɛ́á binónó.

¹⁰Bá ná nindúmə́ níbúsíə́ nɛ́ batáta bíásɛ́na, bá ná nɛ́ ɔwɔŋgɔkɔnɔ bíásɛ́na, bá ná káfámá ɔ hɛkɔ́kɛ hɛ́ ilə́ŋú ɔhɛ́á hɛ́ ndɔ índiə ɔ bətínə́. Hííyí hɛkɔ́kɛ hɛ́ ná bíkúnə́ hiítə bɛ́múɛ́tɛ́ uwəbú busíə́, bá ná fama. Bá ná mɔkɛnda ɛtá ɔ mɔndɔ́ŋɔ́, ɔ umisíúmə́, áŋgɛlɛ a ná wɛɛ́ya tikə.

¹¹Nɔ́yɛ́ Bíə́lə a ná manyá yatɛ́ ɔyɛ́á yɛ́ ná ndá wɛɛ́ya famɛna, a sɛ́á: «Isíŋáka, mɛ ná manya ɔwá, Isə́lúkú a ná yayɛ́á áŋgɛlɛ lɔ́má ɔkɛaka ɔwá, a mɛaŋɔ́á hútúnə ɔ makátá má Əlóto, na yatɛ́ yɛbɛ́á yikimə ɔyɛ́á ilúkunə yɛ́ Bɛyútɛnɛ bá ná fɛkáká ɛlɔ́áyɛ́ ámɛ.»

¹²Ɛnaka Bíə́lə á bínúnə́ ɔ yatɛ́ ɔyɛ́á yɛ́ ná ndá wɛɛ́ya fámɛ́ná, a ná ákáná á Malɛ́á ɔmbɛ́la á inyə́ yɛ Yɔhánɛsɛ ɔwá bá ndɔ ɛ́lɛnɛna á Mə́líkusu. Bɛndɔ bəəŋí bá ka báá kɔtákánátɔ́ umə́ ɔ mabɛ́kálɛ́na.

¹³Bíə́lə a ná kitə́lə ɔ nikí nɛ́ mɔkákɔ, mɔnyɛna ɔ muəndú ɔmɔtɛ́ nɛ́áyɛ́á niínyə á Lóto a ná bɛ́kámɔ́sɔ́na ɔkɛaka ɔwá a ndá hɛkɔ́kɛ kúnə.

¹⁴A ná nióni nɛ́ Bíə́lə manyá, na nɛhɔnɔ ɔ mɔlɛ́má, a ná fəlíə́ ɔ hɛkɔ́kɛ ukunə, a ná tilə́ mɔtɛbɛna ɔ kətúmbə́lə́níə́ ɔwá, Bíə́lə a lɛa hɔ́yɛ́ ɔ busíə́ bɔ́ hɛkɔ́kɛ.

¹⁵Bɛndɔ bá sɛ́á: «Ɔ lɛa tɔtɔ́átɔ!» Mba, a ná ɛ́mɛ́nɛ́na ɔwá, taká, á Bíə́lə. Bá ná yɛ́ɛ́yɛ́ ikúílí láá bá sɛ́á: «Yayɛ́á ɛtɔŋɔna.»

¹⁶Bíə́lə a ná ákánána ɔ busíə́ ukitə ɔ nikí. Ɔ nitifə́, bá ná nɛɛ́ta kúnə, bá ná Bíə́lə yama, bá ná ə́lə́mə́nə.

¹⁷Bíə́lə a ná fínə́, a ná bəə́bu nə́yíə́ na mɔkátá, a ná bəə́bu nɔŋɔ́nákɛ́ná nəníə́ á Isə́lúkú a ná wɛɛ́ya fə́míə́ ɔ ɛbɔka. Ɛnaka a hɔ́á ɔ ɔhɔ́ɔ́, a ná batá ɔwá bá ká nɔ́yɛ́ nɔ́ŋɔ́nákɛ́na á Yákɔbɔ na bənísə́ bənə́bənə́. Əlimə yɛ nɔ́yɛ́, a ná ákáná ɛbɔ́ka yinə́yinə́.

¹⁸Ɛnaka ɔyáá wɔ́ yáá, bɔkɔfɔnɛa bá ná bínúnə́ ɔwá Bíə́lə a lɛ baá, bəə́bu bíndúmbúlə́lə́tɔ́, bá bɛ́bátaka bá sɛ́á: «Yatɛ́ yɛ́ ná ndá Bíə́lə fámɛ́ná əə́?»

¹⁹Ikúílí Əlóto a ná ɔ́kɔ́ nɔ́yɛ́ a ná bɛndɔ lɔ́má ɔwá bá húlə́ wɛɛ́ya siəkə, mba, bá lɛ wɛɛ́ya bɔŋɔ. A ná bɛndɔ lɔ́má ɔwá bá bɔkɔfɔnɛa tíbə́kíníə́ muɛsɛ muɛsɛ, a ná iŋgínə́ índíə́ ɔwá bá bəə́bu ɔnɔkɔ. Əlimə yɛ nɔ́yɛ́, a ná hɔalɛ́na ɔ misí yɛ Yútɛa, a ná tilə́ ɔ bətínə́ yɛ Sɛsalɛ́, a ná tɛ́tɛ́á yɛ ikúílí túmbíə́ umə́.

²⁰Əlóto a ná bɛndɔ bá Tíli na Sítono busə́kə ɔ́kɛ́ná ɔ ɔyáyɛ́na. Bááyɛ́ bɛndɔ bá ná munuə tɔ́á ɔwá bá ákáná ɔwayɛ́ busíə́, bá ná Balasútusu á mukúkə wa munəni hɔ́kɛ́na ɔkɛaka ɔwá á bəə́bu ɔlɔ, bá ná yɛ́ɛ́yɛ́ ikúílí ə́kə́nə́níə́ á Əlóto busíə́ ɔkɛaka ɔwá, bá bumbə́nú tɔ́á bɔkɔasɛ́á, bíə́búə́ bɛhámbálɛ́ bɛ́ ka bá bɛ́ ndɔ húlínə á munəni misí.

²¹Ɔ hinó ɔhɛ́á bá ná bílíhə́níə́, Əlóto a ná maŋgɔmba má bunəni lɛŋábáka, a ná tuə́nə́ ɔ ɔwayɛ́ hikómo, a ná botólíə́ ɔ uwəbú ɔhɛ́na.

²²Ikúílí a ná bá a ndɔ hɔ́ɔ́, bɛndɔ bá bɔnɔŋɔ bá ná yə́mə́níə́ nióni nɛŋɛ́ŋa bá sɛ́á: «Tátá mɔndɔ a ndɔ hɔ́ɔ́, yɛmɔtɛ́ huɛlɛ́.»

²³Mba ɔ umisíúmə́, yɛmɔtɛ́ áŋgɛlɛ yɛ Isə́lúkú a ná Əlóto mɔɔ́mbɔ lúmə́ bɔkɔasɛ́á, tuúmə ɔtɔ́á bá ná wɛɛ́ya híə́níníə́, a sa Huɛlɛ́ tɔ́táyɛ́ tuúmə híə́niniə, bɛɛtɛ bɛ́ ná wɛɛ́ya niakɛ́na, a ná wəə.

²⁴Nɔ́yɛ́, ɛtambá yɛ́ Huɛlɛ́ yɛ́ ná yambána ɔ ɔyáyɛ́na. Bɛndɔ bəəŋí bá ná híáná bəlumininə.

²⁵Ɛnaka Banábasɛ na Sáwolo bá búə́búə́ bɔsɔ́ma úndúsíníə́ ɔ Yəlúsalɛma, bá ná Yɔhánɛsɛ ɔwá bá ndɔ ɛ́lɛnɛna á Mə́líkusu ákánána ɔ Aŋatiɔ́sɛ.