Read Tunen Bɛnyɛná 13 Bible Online

Bɛnyɛná 13 - Tunen bible

Bɛnyɛná 13

¹Bɔhɛ́nátɔtányɛ́ na bələ́liə bá ka bákɔna ɔ ətíə́ yɛ ilúkunə yɛ́ Huɛlɛ́ ɔ bətínə́ yɛ Aŋatiɔ́sɛ: Banábasɛ, Simɛyɔ́ŋɔ, wə́yíə́ mɔlɔ́ŋɛ́ná á Mufítiti na Lusíusu á mɔndɔ wa bətínə́ yɛ Silɛ́nɛ, Manahɛ́nɛ á ikindəniə yɛ́ bɔlɔ́matɔ́ yɛ́ Əlóto, á mɔmanɛna ɔ misí yɛ Kalɛ́lɛa, na Sáwulu.

²Bɔ́mɔtɛ́ buɔsɛ́, ɛnaka bá kɔtákána á Isə́lúkú ɔ ɔnyama, bá ikiní yɛ́ ɔnɛ́á bɛ́kɛakɛna tɔ́na ɛlɔ́áyɛ́ Huɛlɛ́, Umbúínyi Mɔnaŋanaŋa wɔ́ ná bəə́bu lɛ́na wɔ́ sɛ́á: «Nɔ́ Banábasɛ na Sáwulu bákɛ́á ɛlɔ́áyɛ́ buolí ɔbɔ́á ɛkasɛ mɛ bəə́bu índíə́.»

³Nɔ́yɛ́, əlimə yɛ ikiní yɛ́ ɔnɛ́á na mabɛ́kálɛ́na, bá ná bəə́bu makátá tálákɛ́na, bá ná bəə́bu niása ɔwá bá ákana.

⁴Ɛ́sɛ́á Umbúínyi Mɔnaŋanaŋa wɔ́ ná Banábasɛ na Sáwulu lɔ́má, bá ná ákáná ɔ Səlusíə́. Ɔ ɔmɔ́tɔ́yɛ́ bá ná lánjɛ ɛtɛ́na ɔ ɔwákaka ɔ iloóló yɛ́ misí yɛ́ Cíbili.

⁵Ɛnaka bá káfámá umə́, bá ná ákáná ɔ bətínə́ yɛ Salamíni, bá ná lúmə́ ɔ ɛtambá yɛ́ Huɛlɛ́ ɔnɔŋɔna ɔ məə́bə má mabɛ́kálɛ́na má Bɛyútɛnɛ. Yɔhánɛsɛ á Mə́líkusu a ka báá na bəə́bu ɛ́sɛ́á wəbúə́ muɔ́lɔ.

⁶Bá ná iloóló yɛ́ misí bíásɛ́ná yikimə ɔkafámáká ɔ bətínə́ yɛ Bafɔ́sɔ. Bá ná yɛmɔtɛ́ ɛmɔ́ɛ́nɛ́ ɛ́nyánána ɔmɔ́tɔ́yɛ́, nɛ́áyɛ́á niínyə á Balayə́susu, a ka báá mɔyútɛnɛ, a bɛ́laka a sɛ́á wɛɛ́ya mɔhɛ́nátɔtányɛ́.

⁷Bá ka báá bá ndɔ manya muɛsɛ ɔwá Sɛlɛyúsu Báwulusu, á mɔmanɛna wa yɛ́táyɛ́ iloóló, a ka bá tɔ́na mɔndɔ wa ɛmanya. Mɔ́táyɛ́ mɔmanɛna a ná Banábasɛ ɛ́lɛ́ákɛ́ná na Sáwulu bɔkɔasɛ́á, a ka bá na ilókí ɔ ɛtambá yɛ́ Huɛlɛ́ ɔwɔ́kɔ.

⁸Ɛnaka bá káfámá, bá ná lúmə́ á mɔmanɛna uwukúniə, Ɛlimásɛ, ɔ́ niɔŋɔ́ mɔlɛmba na nihókí nɛ́ kɛlɛ́kɛ, a ná bəə́bu bísúmbə́níə́, a ka siəkə ɔwá mɔmanɛna a lɛ Yə́susu lumínínə.

⁹Nɔ́yɛ́, Umbúínyi Mɔnaŋanaŋa wɔ́ ná fínə́ ɔ mɔlɛ́má wɔ́ Sáwulu ɔwá bá ndɔ ɛ́lɛnɛna tɔ́na bá sɛ́á á Báwolo, a ná wɛɛ́ya məə́sə tala,

¹⁰a ná wɛɛ́ya lɛ́na a sɛ́á: «Ɔwáwɔ́ á mɔná wa sátana, á mɔndɔ wa úndúə́tɔ́ na maŋgɛ́lɛ́ na macaŋa, á mubəniə wa yatɛ́ ɔyɛ́á yɛ́ lɛ́á taká, maánɛ́á ɔ ŋɔ súkə ɔ mɛanɔ yɛ́ Isə́lúkú ukuəsiə əə́?

¹¹Isíŋáka, ɔ́kɔ́kɛ́ná muɛsɛ: Ɛkasɛ Isə́lúkú a aŋɔ́á sɔ́kɔ́tɛ́á, ɔ ndɔ híánaka mundímə́ndímə, ɔ ikúílí tɛ́tɛ́á ɔ sɔ́ ŋɔ isəmú yɛ́ hiɔtɔ́tɔ́ sinə tɔ́na.» Ɔ umisíúmə́, məə́sə má Ɛlimásɛ má ná bíníbə, a siəkinə há ibínə́binə, a bɛ́kɔ́ŋɔ́naka bɛsalɛ bikimə ɔ mɔndɔ usiə ɔwá a wɛɛ́ya itíə́ ɔ mɔkátá.

¹²Ɛnaka mɔmanɛna a siəkínə́ yatɛ́ ɔyɛ́á yɛ́ ná bɛ́kɛ́áka, a ná lumínínə́ á Yə́susu, bilə́líə́ ɔbɛ́á a ná ɔ́kɔ́kɛ́na ɔwɔŋgɔkɔnɔ na Isə́lúkú bɛ́ ná wɛɛ́ya fínə́ ɔ mɔlɛ́má.

¹³Báwolo na bɛ́áyɛ́á bikindəniə bá ná hɔalɛ́na ɔ Bafɔ́sɔ ɔ lánjɛ, bá ná káfámá ɔ bətínə́ yɛ Bɛlɛyɛ́ ɔ misí yɛ Bamafilíə́. Yɔhánɛsɛ á Mə́líkusu, a ná bəə́bu tíkə́ ɔmɔ́tɔ́yɛ́, a ná tilə́ ɔ Yəlúsalɛma.

¹⁴Báwolo na Banábasɛ bá ná ɛnɔ́mɛ ɛtá ɔ makɔlɔ́ ɔ wákaka ɔ Aŋatiɔ́sɛ ɔ bɔnɔŋɔ bɔ́ Bisitíə́. Ɔ hinó hɛ́ Sábatɛ, bá ná fínə́ ɔ miímə yɛ mabɛ́kálɛ́na yɛ Bɛyútɛnɛ, bá ná tuə́nə.

¹⁵Bá ná yɛ́mɔtɛ́ ɛkɛ́tɛ yɛ́ hiəfulə hɛ́ Mósisi na hɛ́ bɔhɛ́nátɔtányɛ́ fánáka, bá ná hɔa. Əlimə yɛ mafana, bisə́lúkú bɛ́ miímə yɛ mabɛ́kálɛ́na bá ná bəə́bu mɔndɔ lɔ́mɛ́ná ɔkɛaka ɔwá a bəə́bu batá a sɛ́á: «Á bənísə́, ábá nɔ lɛa na bɛtambá bɛ́ makɛ́nda ɔ ɔlɛna ɔ ilúkunə, nɔ́ hɔ́lɔ́ isíŋáka.»

¹⁶Báwolo a ná tɛnɛma, a ná ilúkunə nə́yíə́ na mɔkátá, a sɛ́á: «Á bɛndɔ bá Ísilahɛ́lɛ na uwənú ɔbá nɔ lɛ bá bá Ísilahɛ́lɛ, ɔbá nɔ́ ndɔ Huɛlɛ́ lúbúnə, nɔ́ mɛaŋɔ́á ɔ́kɔ́kɛ́na muɛsɛ muɛsɛ!

¹⁷Yəsúə́ Huɛlɛ́ yɛ ilúkunə yɛ́ Ísilahɛ́lɛ a ka bíə́súə́ bisə́kínə́ tɛ́fa, a ná kɛ́áka ɔwá bá bunə́kə ɔ ikúílí ɔyɛ́á bá ná bámɛ́nɛ́ná ɔ ɛsɔ ɔ bɔnɔŋɔ bɔ́ Ikíbíto, əlimə yɛ nɔ́yɛ́, a ná bəə́bu fə́mə́kíə́ ɔ bɔ́táyɛ́ bɔnɔŋɔ na iŋgínə́ yɛ wə́yíə́ mɔkátá.

¹⁸A ná bəə́bu níə́kíə́ ɔ makɔ́tákɛ hoóyi na moómo ə́nisə má tuɔŋɔ.[16]

¹⁹Ɛnaka bá káfámá ɔ bɔnɔŋɔ bɔ́ Kánahána, a ná nímə́síə́ tutikə tɔ́lɛ́ndɔ́lɔ́mɔnɔ, a ná yəbúə́ misí áfákɛ́na ɔ ɔwayɛ́ ilúkunə, yɛ́ ná híáná yəbu.

²⁰Ubusíə́ ɔbɔ́á bɛ́ɛ́yɛ́ bɛkɔa bɛ́ bɛ́kɛ́áka, bá ka kɛaka hoóyi na bɛbɔ́ɛ́yɛa bínisə na moómo álánɔ má tuɔŋɔ ɔ bɔnɔŋɔ bɔ́ Ikíbíto. Əlimə yɛ nɔ́yɛ́, Huɛlɛ́ a ná bəə́bu bəkə́lə́siə índíə́ ɔkɛaka ɔwá bá bəə́bu kɛndákána ɔkafámáká ɔ ikúílí yɛ́ mɔhɛ́nátɔtányɛ́ á Sámuɛlɛ.

²¹Bá ná yɛ́ɛ́yɛ́ ikúílí munəni batá, Huɛlɛ́ a ná bəə́bú Sáwulu índíə́ á mɔná wa Kísi, mɔndɔ wa hitikə hɛ́ Bɛ́nyámɛna, a ka bəə́bu manakɛna moómo ə́nisə má tuɔŋɔ.

²²Əlimə yɛ nɔ́yɛ́, Huɛlɛ́ a ná wɛɛ́ya tukíníə́ ɔ yɔkɔ́ yɛ́ nɛmanɛna, a ná Ndə́witi tuəníníə́, wɔ́ɔwɔ a ná híáná wəbúə́ munəni. Huɛlɛ́ a ka hɔ́ɔ́kɔ ɔwɔŋgɔkɔnɔ yɛ́ɛ́yɛ́ Ndə́witi a sɛ́á: “Mɛ ka Ndə́witi a mɔná wa Yɛsɛ́ bɔ́ŋɔ ɛ́sɛ́á mɔndɔ ɔwá wə́míə́ mɔlɛ́má wɔ́ ná híkə́kíə́, a ŋɔ úndúsiniə bikimə ɔbɛ́á mɛ ndɔ siə ɔwá a kɛ́áka.”

²³Nɔ́yɛ́, Huɛlɛ́ a ka mɔndɔ índiə ɔ bɛndɔ bá Ísilahɛ́lɛ, a ná húlínə́ ɔ ɛndɛkɛ Ndə́witi ɔkɛaka ɔwá a bámɛ́nɛ́ná wəbúə́ Munuəniə ɛ́sɛ́á a ná bílíhə́níə́, mɔ́táyɛ́ mɔndɔ á Yə́susu.

²⁴Ubusíə́ ɔbɔ́á a ndáfámá, Yɔhánɛsɛ a ka ilúkunə yɛ́ Ísilahɛ́lɛ lɛna ɔwá, bá mɛlɛ́má kɔŋɔna, bá nɛsɔa kusə́nə.

²⁵Ɔ ikúílí ɔyɛ́á yɔhánɛsɛ a ná bá ɔ nisúki nɛ́ bɔ́áyɛ́á buolí, a ka bɛndɔ bata a sɛ́á: “Nɔ ndɔ ənú fɛka nɔ sɛ́á mɛaŋɔ́á ɛ́yánɛ́ əə́? Mɛ lɛa bá wɛ́ɛ́yɛ́ ɔwá nɔ ndɔ táta. Nɔ́ ɔ́kɔ́kɛ́na muɛsɛ, a báka ɔ ɔsákɔna ɔwámɛ əlimə, mɛ lɛ bá hɔ́ánánátɔ́ ɔ mikolí yɛ́ bɛ́áyɛ́á bɛtafɛ́ná uhumbulə.”»

²⁶Báwolo a ná láá tɔ́na a sɛ́á: «Á bənísə́, uwənú á ɛndɛkɛ Ábɛlaháma ata uwənú ɔbá nɔ ndɔ Huɛlɛ́ yɛ bɛndɔ bá Ísilahɛ́lɛ lúbúnə, ɛlɔ́áyɛ́ əsú á Huɛlɛ́ a ná yɛ́ɛyɛ imbə́nú lɔ́mɛ́ná ɔyɛ́á yɛ́ ndɔ bɛndɔ ákánana ɔ nibínuəniə.

²⁷Mba, bɛndɔ bá Yəlúsalɛma na bíə́búə́ bisə́lúkú bá sa Yə́susu sinə ɛ́sɛ́á Munuəniə, bá sa bɛtambá bɛ́ bɔhɛ́nátɔtányɛ́ ɔ́kɔ ɔbɛ́á bá ná báá bá ndɔ fana ɔ Sábatɛ tɛ́á. Mba, bá ka bɛ́táyɛ́ bɛtambá úndúsiniə ɛnaka bá kɛ́áka ɔwá bá Yə́susu ɔnɔkɔ.

²⁸Ata nɔ́yɛ́ ɛ́sɛ́á bá sa hifílí bɔ́ŋɔ hɛ́ ɔwayɛ́ ɔhɔkɛna ɔ nyɛmbɛ́, bá ka Bilátɛ bata ɔwá a wɛɛ́ya ónósíə́.

²⁹Ɛnaka bá úndúsíníə́ yatɛ́ yikimə ɔyɛ́á Mətilə má ná nɔŋɔ́náka ɔ ɔwayɛ́ ɛsalɛ, bá ná wɛɛ́ya tukíníə́ ɔ ɔmbásá, bá ná wɛɛ́ya bɛ́lɛ́na ɔ munyə́ nuúmə́.

³⁰Mba, Huɛlɛ́ a ka wɛɛ́ya huŋuəsiə ɔ ətíə́ yɛ bəwə́nú.

³¹A ka bínə́niə mɔɔsɛ́ məəŋí ɔ bááyɛ́ ɔbá bá ná kɛ́ndáká na wɛɛ́ya, ɔ botolokiə ɔ Kalɛ́lɛa ɔkafámáká ɔ Yəlúsalɛma, bəə́bu bá ndɔ bɛndɔ bá Isilahɛlɛ lɛna isíŋáka ɛ́yánɛ́ a lɛ́á Yə́susu.

³²Bəsú tɔ́na, tɔ nɔ́ ndasá uwənú busíə́ ɛlɔ́áyɛ́ uwənú ɔ yɛ́tána Imbə́nú Yɛɛsɛ yɛ Huɛlɛ́ ɔnɔŋɔnɛna ɔyɛ́á yɛ́ ndɔ laa ɔwá, yatɛ́ ɔyɛ́á Huɛlɛ́ a ná bílíhə́níə́ ɔ uwəsú bisə́kúlúlúnə́,

³³a ná yɛɛ́ta úndúsíníə́ isíŋáka ɛlɔ́áyɛ́ əsú ɔbá tɔ́ lɛ́á yɛ́táyɛ́ ɛndɛkɛ. A ka nɔ́yɛ́ úndúsiniə ɔ botolokiə ɔ ikúílí Huɛlɛ́ a ná Yə́susu huŋúə́síə́ ɔ ətíə́ yɛ bəwə́nú. Bá ka bɔ́táyɛ́ bɔkɔa tiləkə ɔ hiəfulə hɛ́ tumboŋo tɔ́ ná úndúsíníə́ tɔ́fandɛ́ bá sɛ́á: “Aŋɔ́á ɔ lɛ́á wamɛ́á mɔná, ɔ botolokiə niɔfɛ́nɛ mɛaŋɔ́á mɛ lɛ́á yáwɔ́á Isə́.”

³⁴Huɛlɛ́ a ka nɔŋɔnaka a sɛ́á a ŋɔ wɛɛ́ya huŋuəsiə ɔ ətíə́ yɛ bəwə́nú ɔkɛaka ɔwá, a lɛ híáná ɛfɔnɔ́kɛ. A ka nɔ́yɛ́ fə́mə́ləniə a sɛ́á: “Mɛ ŋɔ bənú bɛsɔ́nɔ índiə ɔbɛ́á mɛ ná Ndə́witi bílíhə́níə́. Tiísi yɛ bɛsɔ́nɔ ɔbɛ́á bɛ́ ndɔ húlínə na mɛaŋɔ́á.”

³⁵Ɔ́ ɛlɔ́áyɛ́ nɔ́yɛ́ Ndə́witi a ná hɔ́ɔ́kɔ́ ɔ Mətilə ɔ yɛ́mɔtɛ́ ɛsalɛ a sɛ́á: “Huɛlɛ́ a sa ndá níása ɔwá mɛɛ́lɔ yɛ wawɔ́á mɔndɔ ɔwá a lɛ́á wayɛ́ yɛ́ fɔnɔ́kɔ ɔ munyə́.”

³⁶Munəni á Ndə́witi ɔwayɛ́, a ka kɛaka yatɛ́ yikimə ɔyɛ́á Huɛlɛ́ a ndɔ hikiə ɔ ɔwayɛ́ ikúílí, a ná wə́yíə́ mɔanɔ úndúsíníə́, əlimə yɛ nɔ́yɛ́ a ná wəə. Bá ka wɛɛ́ya nyəə ɔ ɛmɛ́ŋɛ́ yɛ bɛ́áyɛ́á bisə́, a ná fɔnɔ́kɔ.

³⁷Mba, mɔndɔ ɔwá Huɛlɛ́ a ná huŋúə́síə́ a sa fɔnɔ.

³⁸Á bənísə́, nɔ́ ndɔ manyá ɔwá, yatɛ́ ɔyɛ́á tɔ ndɔ bənú lɛna ɔwá, Huɛlɛ́ a ŋɔ bɛndɔ mə́búə́ mabɛ́á niasɛna, ɔ tɔ́mbákɛna na Yə́susu a ŋɔ nɔ́yɛ́ kɛaka. Umbə́ndə́ wɔ́ Mósisi wɔ́ sa óso ɔkɛa ɔwá, bɔbɛ́á bɔ́ mɔndɔ bɔ́ hɔ́á ɔ káfámá ɔwá Huɛlɛ́ a wɛɛ́ya siəkínə́ tɛ́nɛ́mátɔ́.

³⁹Wɛ́ɛ́yɛ́ ɔwá a ŋɔ lumininə á Yə́susu, Huɛlɛ́ a ŋɔ wɛɛ́ya sɔ́ŋɔ́na ɔ bɔbɛ́á.

⁴⁰Nɔ́yɛ́, nɔ manyaka nə́ə, yatɛ́ ɔyɛ́á bɔhɛ́nátɔtányɛ́ bá ná tílə́kə, yɛ́ óso uwənú ɔ ndafamɛna, bá ka hɔ́ɔ́kɔ bá sɛ́á:

⁴¹“Siəkínə́nu, uwənú á bɛndɔ ɔbá nɔ ndɔ Huɛlɛ́ yomosiə, nɔ ŋɔ báá ə́lə́mə́nə́tɔ, nɔ ŋɔ wə́kunə. Ɔ taká, ɛkasɛ mɛ bɔkɔa kɛ́áka ɔ uwənú ikúílí ɔbɔ́á, ábá nɔ sá bɔɛ́ta sinə, ata mɔndɔ a ndɔ bənú bɔɛ́ta lɛna nɔ sa ndá lúmínə!”»

⁴²Ɛnaka Báwolo na Banábasɛ bá fámá ɔ miímə yɛ mabɛ́kálɛ́na, bá ná bəə́bu bɛ́tɔ́kɔ́lɔ́kɛ́na ɔwá, bá manyɔ́ ndáhíáná ɔ hinó hɛ́ Sábatɛ ɔhɛ́á hɛ́ lɛ́á ɔ ɔsákɔna, bá ná bəə́bu hɔ́kɛ́ná nɔ́yɛ́ tɔ́na.

⁴³Ikúílí ilúkunə yɛ́ ná fámáká ɔ miímə yɛ mabɛ́kálɛ́na, Bɛyútɛnɛ biəŋí na báaba ɔbá bá ná bɛ́kɔ́ŋɔ́ná ɔ ilumininə yɛ́ Bɛyútɛnɛ, bá ná Báwolo na Banábasɛ ɔŋgɔ. Bá bəə́bu hɔ́kɛna, bá bəə́bu makɛ́nda índiəkinə ɔkɛaka ɔwá, bá bámɛ́nɛ́ná bɛ́ɔ́lɔ́kɛ́nátɔ́ á Huɛlɛ́, Huɛlɛ́ tɔ́na á bəə́bu wə́yíə́ mɔlɛ́má muɛsɛ ínə́níə́.

⁴⁴Ɔ hinó hɛ́ Sábatɛ ɔhɛ́á hɛ́ ná ɔ́ŋgɔ́nɔ, bɛndɔ bá bətínə́ mikimə bá ka báá kɔtákánátɔ́ ɔ Ɛtambá yɛ́ Huɛlɛ́ ɔwɔ́kɔ.

⁴⁵Ɛnaka Bɛyútɛnɛ bá bɛndɔ yámá bəəŋí, bá ná Báwolo na Banábasɛ busə́kə ɔkɛna, bá ná ɛtambá yɛ́ Báwolo bɛsaŋɔna, bá ná botólíə́ ɔ ɔwayɛ́ ɔkɔ́ba.

⁴⁶Na yɛmɛ́nɛna yikimə, Báwolo na Banábasɛ bá ná bəə́bu lɛná bá sɛ́á: «Yɛ́ lɛa ɔwá, há tɔ́ ka taŋá uwənú ɔ Ɛtambá yɛ́ Huɛlɛ́ ɔnɔŋɔnɛna uwənú ɔbá nɔ lɛ́á Bɛyútɛnɛ, ɛ́sɛ́á nɔ ná yɛɛ́ta bɛ́sáŋɔ́ná, nɔ ndɔ bísinə ɔwá, nɔ lɛ báá hɔ́ánánátɔ́ ɔ buɔmɔ́ bɔ́ ikúílíə́kimə ukusənə. Oo! Uwəsú, tɔ nɔ́ əsú bɛ́kɔ́ŋɔ́na ɔ bááyɛ́ ɔnɔŋɔnɛna ɔbá bá lɛ bá Bɛyútɛnɛ.»

⁴⁷Ɔ́ Umbə́ndə́ ɔwá Isə́lúkú a ná bəsú índíə́ wúuwu, wɔ́ sɛ́á: «Mɛ ka aŋɔ́á híə́nəsiə isəmú ɔkɛaka ɔwá yɛ́ nɔmáka ɔ mɔnɔŋɔ məkimə ɔkɛaka ɔwá, ɔ tɔ́mbákɛna na aŋɔ́á, nibínuəniə nɛ́ káfámá ɔ tɔlɛ́ŋɛ́ tukimə tɔ́ misí.»

⁴⁸Ɛnaka bááyɛ́ ɔbá bá lɛ bá Bɛyútɛnɛ bá nɔ́yɛ́ ɔ́kɔ́kɛ́na, nɛhɔnɔ nɛ́ ná bəə́bu itíə́, bá ná lúmə́ á Isə́lúkú ɔ tuúmə uhíə́niniə ɛlɔ́áyɛ́ yɛ́táyɛ́ Ɛtambá. Bəkimə ɔbá Huɛlɛ́ a ná tábɔ́náka ɛlɔ́áyɛ́ buɔmɔ́ bɔ́ ikúílíə́kimə, bá ná híáná bəlumininə.

⁴⁹Nɔ́yɛ́, Ɛtambá yɛ́ Isə́lúkú yɛ́ ná yambána ɔ nɛ́táyɛ́ nɛkɛ́tɛ nikimə nɛ́ misí.

⁵⁰Mba, Bɛyútɛnɛ bá ná bəəndú baŋɛ́ŋa bísúə́línə ɔbá bá ná bɛ́kɔ́ŋɔ́ná ɔ uwəbú ilumininə, na bɛnatákɛ bɛ́ bətínə́, bá ná Báwolo na Banábasɛ babáka ɔkɛaka ɔwá, bá bəə́bu bɔbɛ́á kɛ́áka, bá ná bəə́bu kúbə́kə́ ɔ uwəbú bɔnɔŋɔ.

⁵¹Uwəbú, bá ná umbunə́ wɔ́ mə́búə́ makɔlɔ́ kútə́lə,[17] bá ná ákáná ɔ bɔnɔŋɔ bɔ́ Ikɔniɔ́mɔ.

⁵²Nɔ́yɛ́, bəlumininə bá Aŋatiɔ́sɛ bá ka báá undúə́tɔ́ na Umbúínyi Mɔnaŋanaŋa, bá ka bá ɔ nɛhɔnɔ.