Read Tunen Bɛnyɛná 15 Bible Online

Bɛnyɛná 15 - Tunen bible

Bɛnyɛná 15

¹Bɔ́mɔtɛ́ bɛndɔ bá ná húlínə́ ɔ Yútɛa ɔ wákaka ɔ Aŋatiɔ́sɛ, bá ná botólíə́ ɔ bənísə́ ɔ bilə́líə́ bɛbɛ́á uwukúniə, bá sɛ́á: «Ábá nɔ sá lumínə ɔwá bá bənú ándá ɛ́sɛ́á umbə́ndə́ wɔ́ Mósisi wɔ́ ndɔ laa, Huɛlɛ́ a sá ósó ɔ uwənú unuəniə.»

²Mitə́ŋí na ɛyɛka yɛ́ ɛsáká yɛ́ ná kɔ́á ɔ ətíə́ yɛ Báwolo, Banábasɛ na bátáyɛ́ bɛndɔ. Yɛ́ ná bəə́bu yáyɛ́ná ɔ usúmbə́niə. Nɔ́yɛ́, bá ná ihə́ŋiə ɛtá ɔwá Báwolo na Banábasɛ na bɔ́mɔtɛ́ bɛndɔ bá Aŋatiɔ́sɛ, bá báláka ɔ Yəlúsalɛma ɔkɛaka ɔwá bá yɛ́ɛ́yɛ́ ɛsáká bɛ́lɛ́na ɔ busíə́ bɔ́ basɔ́másɔma na bɛkámɔ bɛ́ ilúkunə.

³Ilúkunə yɛ́ bəlumininə bá ná bəə́bu bɛkánábá índíə́ ɛlɔ́áyɛ́ mɔkɛnda. Bá ná nɛkɛ́tɛ nɛ́ misí yɛ Finisíə́ bíásɛ́ná na nɛ́ Samália, bá húlə́ nɔŋɔnaka ɛ́sɛ́á bááyɛ́ ɔbá bá lɛ bá Bɛyútɛnɛ bá ná níə́búə́ nɛkɔmba tálɛ́ná á Isə́lúkú. Yɛ́ɛ́yɛ́ imbə́nú yɛ́ ná bənísə́ bəkimə nɛhɔnɔ itíə́síə́.

⁴Ɛnaka bá káfámá ɔ Yəlúsalɛma, ilúkunə yɛ́ bəlumininə, basɔ́másɔma na bɛkámɔ bá ná bəə́bu kaha. Báwolo na Banábasɛ bá ná bəə́bu nɔŋɔ́nákɛ́ná bɛkɔa bikimə ɔbɛ́á Huɛlɛ́ a ná kɛáka ɔ tɔ́mbákɛna na bəə́bu.

⁵Bɛ́mɔtɛ́ bɛláŋa bɛ́ bɛndɔ bá Bɛfalísia ɔbá bá ná híáná bəlumininə, bá ná bísúmbə́níə́, bá sɛ́á: «Bəlumininə ɔbá bá lɛ bá Bɛyútɛnɛ bá ná hɔ́ánána ɔbɛ́ánda, bá umbə́ndə́ wɔ́ Mósisi tə́tə́kə́níə́ tɔ́na.»

⁶Ɛnaka bá hɔ́ɔ́kɔ́ nɔ́yɛ́, Basɔ́másɔma na bɛkámɔ bá ná kɔtáláná ɔkɛaka ɔwá bá yɛ́ɛ́yɛ́ ɛyɛka yɛ́ ɛsáká síə́kínə.

⁷Əlimə yɛ mitə́ŋí mɛŋɛ́ŋa, Bíə́lə a ná ɛtambá ɛ́ta, a sɛ́á: «Á bənísə́, nɔ ndɔ nɔ́yɛ́ manya muɛsɛ ɔwá Huɛlɛ́ a ka mɛaŋɔ́á tɛ́fa buɔnɔ́ ɔ uwənú ətíə́ ɔkɛaka ɔwá, mɛ Imbə́nú Yɛɛsɛ nɔŋɔ́nákɛ́na ɔ bááyɛ́ ɔbá bá lɛ bá Bɛyútɛnɛ, bá yɛɛ́ta ɔ́kɔ́kɛ́na, bá lumínínə́ tɔ́na.

⁸Huɛlɛ́ a ndɔ mɔlɛ́má wɔ́ mɔsá manya, ɔkɛaka ɔ sɛ́á á ínə́níə́ ɔwá a ndɔ bəə́bu káha ɛ́sɛ́á báyɛ́á bɛndɔ, a ka bəə́bu Umbúínyi Mɔnaŋanaŋa índiə tɔ́na ɛ́sɛ́á a ná əsú índíə́.

⁹A sa nifəŋə háá na bəsú na bəə́bu, a ná yə́búə́ mɛlɛ́má nə́ŋə́síə́ tɔ́na bɔkɔasɛ́á bá ka lumininə á Yə́susu.

¹⁰Mba isíŋáka nə́ə, ɛlɔ́áyɛ́ yatɛ́ nɔ ndɔ kɛa ɔwá Huɛlɛ́ a liŋə́ əə́? Ɛlɔ́áyɛ́ yatɛ́ nɔ ndɔ siə ɔ bəlumininə ɔ malɔmɔ́ utúə́niə ɔmá, ata bíə́súə́ bisə́kínə́ mbá ata bəsú bɛ́muɛ́tɛ́ tɔ́ sa ósó ɔtúána əə́?

¹¹Ɔ nifəŋə, tɔ ndɔ luminə ɔwá, ɔ tɔ́mbákɛna na mɔlɛ́má muɛsɛ wɔ́ yəsúə́ Isə́lúkú á Yə́susu, á Huɛlɛ́ a ná bəsú núə́kə́níə́ hɔ́ánánátɔ́ ɛ́sɛ́á bəə́bu.»

¹²Ɛnaka Bíə́lə a hɔ́ɔ́kɔ́ nɔ́yɛ́, nɛmɔndɔ nikimə nɛ́ ná náyá yə́ə́bu, bá ná məlúə́ básɛ́á ɔkɛaka ɔwá bá Banábasɛ na Báwolo ɔ́kɔ́kɛ́na. Bá ná bəə́bu tɔŋgɛtɛ́nɛ́á na bisə́mə́tə́ nɛŋɔ́nákɛ́na ɔbɛ́á Huɛlɛ́ a ná kɛ́áka ɔ tɔ́mbákɛna na bəə́bu ɔ ətíə́ yɛ bááyɛ́ ɔbá bá lɛ bá Bɛyútɛnɛ.

¹³Ɛnaka bá hɔ́á ɔ ɔhɔ́ɔ́, Yákɔbɔ a ná ɛtambá ɛ́tá a sɛ́á: «Á bənísə́, nɔ́ mɛaŋɔ́á ɔkɔ́kɛ́ná muɛsɛ.

¹⁴Símono a ná bəsú nɔ́ŋɔ́nákɛ́na ɛ́sɛ́á ɔ nɛbalɛ́ná nɛ́ Imbə́nú Yɛɛsɛ, Huɛlɛ́ a ka bááyɛ́ sókóbokiə tɔ́na ɔbá bá lɛ bá Bɛyútɛnɛ, a ka bɔ́mɔtɛ́ tɛ́fa tɔ́na uwəbú ətíə́ ɔkɛaka ɔwá bá bámɛ́nɛ́ná báyɛ.

¹⁵Yɛ́ɛ́yɛ́ ɛyɔŋɔlɛ yɛ́ ndɔ hɔ́ánana na yatɛ́ ɔyɛ́á bɔhɛ́nátɔtányɛ́ bá ná hɔ́ɔ́kɔ́ ɔ Mətilə, bá ka hɔ́ɔ́kɔ bá sɛ́á:

¹⁶“Bɔ́mɔtɛ́ buɔsɛ́, mɛ ŋɔ ndahiana, mɛ ŋɔ miímə yɛ Ndə́witi falabaka ɔyɛ́á yɛ́ ná nɔkɛ́nɔ́kɛ́á, mɛ ŋɔ bɛ́áyɛ́á bɛtɛ́bɛ́ huələkiniə ɔkɛaka ɔwá, yɛ́ híáná ɛ́sɛ́á yɛ́ ná bámɛ́nɛ́na.

¹⁷Nɔ́yɛ́, mɔsá mukimə ɔwá wɔ́ ná tíkə́nə́, wɔ́ ŋɔ mɛaŋɔ́á siəkə. Ɔ́ niɔŋɔ́ sɛ́á, mɔnɔŋɔ mənə́mənə́ ɔmá mɛ́ ná ɛ́lɛ́ákɛ́na ɔkɛaka ɔwá má bámɛ́nɛ́ná máámɛ. Nɔ́yɛ́ á Isə́lúkú a ndɔ fə́mə́ləniə, a ndɔ kɛa yatɛ́ ɔyɛ́á a ná bílíhə́níə́.

¹⁸A ka kɛaka ɔwá bɛndɔ bá bɛ́táyɛ́ bɛkɔa manyá ɔ hata yɛ ikúílí.”

¹⁹Yákɔbɔ a ná kɔndá ɔwá, ɛlɔ́áyɛ́ nɔ́yɛ́, mɛ ndɔ ámɛ fɛka mɛ sɛ́á bá sá hɔ́ánana ɔ undumbú ɔháá ətíə́ yɛ bááyɛ́ ɔbá bá lɛ bá Bɛyútɛnɛ, ɔbá bá ndɔ níə́búə́ nɛkɔmba tálɛ́ná á Huɛlɛ́.

²⁰Mba, tɔ́ bəə́bu tilə́kínə, tɔ bəə́bu kotíə́ ɔwá, bá lɛ mɛnyama nɛ́á ɔyɛ́á bá ná hánɛ́na ɔ bisíə́kí, bá lɛ niŋə ɔ nɛbambɛa, bá lɛ mɛnyama nɛ́á ɔyɛ́á bá sá sɛkala, ata manɔ́ŋɔ́ má mɛnyama.

²¹Tɔ́ bəə́bu tilə́kínə́ nɔ́yɛ́ bɔkɔasɛ́á, ɔ hata yɛ ikúílí, abáka bɛndɔ bá umbə́ndə́ wɔ́ Mósisi yəmbələkəniə ɔ bətínə́ bəkimə, bá muítə fanaka tɔ́na ɔ məə́bə má mabɛ́kálɛ́na ɔ hinó hɛ́ Sábatɛ tɛ́á.»

²²Nɔ́yɛ́, basɔ́másɔma, bɛkámɔ na ilúkunə yɛ́ Huɛlɛ́ yikimə, bá ná ihə́ŋiə ɛtá ɔwá, bá bɛndɔ tɛ́fá ɔ uwəbú ətíə́ ɔbá bá ŋɔ lɔ́ma iŋgində́ na Báwolo na Banábasɛ ɔ Aŋatiɔ́sɛ. Bá ná Yútu, ɔwá bá ndɔ ɛ́lɛnɛna tɔ́na Balasábasɛ, na Sílasɛ tɛfa, bɛndɔ baŋɛ́ŋa ɔbá bənísə́ bá ndɔ bə́tiə.

²³Bá ka tiləkə náana ɔ hiəfulə ɔhɛ́á bá ná bəə́bu túmbíə́ bá sɛ́á: «Uwəsú ɔ bə́núə́ bənísə́ á basɔ́másɔma na bɛkámɔ, tɔ ndɔ bənú məbíhóloniə lɔ́mɛ́na, uwənú ɔ bə́súə́ bənísə́ ɔbá bá nɔ lɛ bá Bɛyútɛnɛ, bááyɛ́ ɔbá bá lɛ́á ɔ bətínə́ yɛ Aŋatiɔ́sɛ, na bááyɛ́ bá nɛkɛ́tɛ nɛ́ misí yɛ Sília na yɛ Silisíə́.

²⁴Tɔ ka ɔ́kɔ́kɛna ɔwá, bɔ́mɔtɛ́ bɛndɔ ɔ uwəsú ətíə́ bá ka ndáfáma ɔ uwənú busíə́, bá ná bənú ndúmbúlə́lə, bá ná bənú hɛtányɛ́ kátá na bíə́búə́ bɛtambá. Tátá bəsú tɔ́ ná bəə́bu lɔma.

²⁵Nɔ́yɛ́, tɔ ná ihə́ŋiə ɛtá na mɔlɛ́má úmotí ɔkɛaka ɔwá, tɔ bɛndɔ tɛfa, tɔ bənú lɔ́mɛ́ná iŋgində́ na Báwolo na Banábasɛ ɔ bə́súə́ bənísə́ bá uhikiə.

²⁶Báwolo na Banábasɛ, ɔ́ bɛndɔ ɔbá bá ná lúmínə ɔ uwínə ɛlɔ́áyɛ́ buolí bɔ́ yəsúə́ Isə́lúkú á Yə́susu Kilísitusu.

²⁷Tɔ ná Yútu na Sílasɛ lɔ́má uwənú busíə́, bəə́bu bɛ́múɛ́tɛ́ bá ŋɔ bənú lakɛna na wə́búə́ munuə yatɛ́ ɔyɛ́á tɔ́ ná tilə́kə ɔ híihi hiəfulə.

²⁸Ɔ taká, Umbúínyi Mɔnaŋanaŋa wɔ́ ná kɛ́áka ɔwá tɔ ihə́ŋiə ɛtá ɔkɛaka ɔ sɛ́á tɔ lɛ bənú bɔlɔmɔ́ túə́níə́, úhúlíə́ ɔ bɛ́ɛbɛ bɛkɔa ɔbɛ́á bɛ́ lɛ́á na mɔsɛ́ŋɛ́:

²⁹Nɔ lɛ mɛnyama nɛ́á ɔyɛ́á bá ná hánɛ́na ɔ bisíə́kí, nɔ lɛ manɔ́ŋɔ́ nɛa, nɔ lɛ mɛnyama nɛ́á ɔyɛ́á bá sa sɛkala, nɔ lɛ niŋə́ ɔ nɛbambɛa. Ábá nɔ ná bɛ́ɛ́yɛ́ bikimə bítə́tə́níə́, muɛsɛ nɔ́yɛ́. Tɔ ná bənú bíhólíə́!»

³⁰Ɛnaka bá tilə́kə́ nɔ́yɛ́, Banábasɛ na Báwolo bá ná hiəfulə ákáná, bá ná káfámá ɔ Aŋatiɔ́sɛ. Bá ná bəlumininə bəkimə kɔtála, bá ná bəə́bu hiəfulə túmbíə́.

³¹Bá ná hiítə fanáka, bəkimə bá ka báá ɔ nɛhɔnɔ nɛ́ makɛ́nda má hítə́yí hiəfulə.

³²Ɛ́sɛ́á Yútu na Sílasɛ bá ná báá bɔhɛ́nátɔtányɛ́, bá ná bənísə́ hɔ́kɛ́na ikúílí yɛtatánɛ, ɛlɔ́áyɛ́ uwəbú ɔ makɛ́nda uwíndiə, na uwəbú uwoníniə ətíə́ yɛ ilumininə.

³³Bá ná tɛ́tɛ́á yɛ ikúílí túmbíə́ umə́, əlimə yɛ nɔ́yɛ́, bənísə́ bá ná bəə́bu bíkókíə́ ɔkɛaka ɔwá bá kɛndáká ɔ bumbə́nú, bá káhíáná ɔ busíə́ bɔ́ bááyɛ́ ɔbá bá ná bəə́bu lɔma. [

³⁴Mba, Sílasɛ a ná ihə́ŋiə ɛtá ɔwá a ayɛ́ tíkə́nə́ ɔmɔ́tɔ́yɛ́].

³⁵Ɔ yɛ́ɛ́yɛ́ ikúílí, Báwolo na Banábasɛ bá ná əbú tíkə́nə́ ɔ Aŋatiɔ́sɛ na bɔ́mɔtɛ́ bənísə́ bəəŋí, bá Ɛtambá yɛ́ Isə́lúkú nɔŋɔnaka, bá úkúnəkiə tɔ́na.

³⁶Əlimə yɛ ikúílí, Báwolo a ná Banábasɛ lɛ́na a sɛ́á: «Tɔ́ tilə́, tɔ́ ká bənísə́ síə́línə ɔ bətínə́ na bətínə́ tɛ́á ɔhá tɔ ná bəə́bu ɛtambá yɛ́ Isə́lúkú nɔ́ŋɔ́nákɛ́na ɔkɛaka ɔwá, tɔ́ siəkínə́ ɛ́sɛ́á bá lɛ́á.»

³⁷Banábasɛ a ka siəkə á Yɔhánɛsɛ, ɔwá bá ndɔ ɛ́lɛnɛna á Mə́líkusu ɔ ɔwakánana na bəə́bu.

³⁸Mba, Báwolo a ná sáŋɔ́ná bɔkɔasɛ́á, Mə́líkusu a ka bəə́bu tíkə ɔ nɛkɛ́tɛ nɛ́ misí yɛ Bamafilíə́, a ná ákáná ɛŋaná buolí ɔhɔ́nala ɔbɔ́á bá ná bɔ́tólíə́.

³⁹Báwolo na Banábasɛ bá ka tə́ŋə́kəniə mɔŋɛ́ŋa ɔ bɔ́táyɛ́ bɔkɔa, bá ná sə́mbə́nə́níə́. Banábasɛ a ná Mə́líkusu bísúə́línə, bá ná lánjɛ ɛtá ɔ wákaka ɔ bɔnɔŋɔ bɔ́ Síbili.

⁴⁰Báwolo a ná Sílasɛ tɛfa, bənísə́ bá ná bɛ́kálákɛ́na ɛlɔ́áyɛ́ uwəbú ɔhánɛna á Isə́lúkú yɛ mɔlɛ́má muɛsɛ, bá ná ákana.

⁴¹Ɛnaka bá ákáná, Báwolo a ka bá a ndɔ a húlə́ bəlumininə óníniə ɔ bilúkunə bɛ́ bəlumininə tɛ́á ɔ tɔ́mbáka ɔ nɛkɛ́tɛ nɛ́ misí yɛ Silíə́ na yɛ Silisíə́.