Read Tunen Bɛnyɛná 16 Bible Online

Bɛnyɛná 16 - Tunen bible

Bɛnyɛná 16

¹Báwolo a ná káfámá ɔ bətínə́ yɛ Tɛ́lɛbɛ əlimə yɛ nɔ́yɛ́, a ná ákáná ɔ yɛ Lísitili. Mulumininə a ka báá ɔmɔ́tɔ́yɛ́, nɛ́áyɛ́á niínyə á Timotíó. Yayɛ́á inyə́ a ka báá milóní yɛ Yútɛnɛ ɔwá a ná híáná mulumininə, isə́ mɔkɛlɛ́kɛ.

²Indumə yɛ Timotíó yɛ́ tɔ́mbáka ɔ ətíə́ yɛ bənísə́ bá Lísitili na Ikɔniɔ́mɔ.

³Báwolo a ka hikəkiə ɔ ɔwayɛ́ ɔwɛta ɛ́sɛ́á yáyɛ́á ikindəniə, a ná wɛɛ́ya ɛta, a ná wɛɛ́ya andá ɔkɛaka ɔwá Bɛyútɛnɛ ɔbá bá ná báá ɔ nɛ́táyɛ́ nɛkɛ́tɛ nɛ́ misí, bá lɛ wɛɛ́ya konobo. Ɔ taká, bɛndɔ bəkimə bá ka báá bá ndɔ manya ɔwá yayɛ́á isə́ mɔkɛlɛ́kɛ.

⁴Bá ná mɔkɛnda ɛta, ɔ bətínə́ bəkimə ɔhá bá ná tɔ́mbɛ́na, Báwolo na Sílasɛ bá bəə́bu bihə́ŋiə lakɛna ɔbɛ́á basɔ́másɔma na bɛkámɔ bá ná ɛ́tá ɔ Yəlúsalɛma, bá bəə́bu lakɛna ɔwá bá bɛɛ́ta bɛ́kɛ́ákɛ́na.

⁵Ilumininə yɛ́ bilúkunə bɛ́ bəlumininə yɛ́ ɔ́nɔ́kɛna, ɔmbana tɔ́na wɔ́ áyaka buɔsɛ́ na buɔsɛ́ tɛ́á.

⁶Báwolo a ka siəkə ɔ Ɛtambá yɛ́ Huɛlɛ́ ɔnɔŋɔna ɔ nɛkɛ́tɛ nɛ́ misí yɛ Ásia, mba, Umbúínyi Mɔnaŋanaŋa wɔ́ ná kotíə́, bá ná tɔ́mbɛ́ná ɔ nɛkɛ́tɛ nɛ́ Filinjíə́ na nɛ́ Kalatíə́ ɔ wákaka.

⁷Ɛnaka bá káfámá hoóyi na nɛkɛ́tɛ nɛ́ misí yɛ Misíə́, bá ka siəkə ɔ tɔ́mbɛ́na ɔ nɛkɛ́tɛ nɛ́ Bitiníə́, mba, Umbúínyi wɔ́ Yə́susu wɔ́ ná bəə́bu kotíə́ tɔ́na.

⁸Nɔ́yɛ́ bá ná nɛkɛ́tɛ nɛ́ Misíə́ bíásɛ́na, bá ná ákáná ɔ bətínə́ yɛ Tɔlɔwásɛ.

⁹Bɔ́mɔtɛ́ bulúə́, Báwolo a ná wɔmɔtɛ́ mɔndɔ wa Masɛtɔánɛ ɛ́ná ɔ binónó tɛ́nɛ́mátɔ́, a ndɔ wɛɛ́ya bɛ́tɔ́kɔ́lɛna a sɛ́á: «Tɔ́kɔ́lɛ, tɔ́mbɛ́na ɔ Masɛtɔánɛ, sɔ́nɔ ɔ́ ndá bəsú kámɛ́la.»

¹⁰Ɔ umisíúmə́, əlimə yɛ binónó bɛ́ Báwolo, tɔ ka siəkinə ɔwá Huɛlɛ́ a ná hikə́kíə́ a sɛ́á tɔ ákáná ɔ nɛkɛ́tɛ nɛ́ misí yɛ Masɛtɔánɛ, tɔ́ húlə́ Imbə́nú Yɛɛsɛ nɔŋɔna umə́. Tɔ ná bɛ́tábɔ́náka ɔ ɔwákaka.

¹¹Tɔ ná lánjɛ ɛtá ɔ Tɔlɔwásɛ, umə́, tɔ ná ákáná ikúílí ɛ́mɔtɛ́ ɔ bətínə́ yɛ Samɔtalásɛ, əlimə yɛ nɔ́yɛ́, ɔ ɔyáyáka tɔ ná káfámá ɔ bətínə́ yɛ Nɛabolísi.

¹²Bəsú ɔmɔ́tɔ́yɛ́, tɔ ná mɔkɛnda ɛtá, tɔ ná ákáná ɔ Filíbia, á bətínə́ mɛŋɛ́ŋa yɛ nɛkɛ́tɛ nɛ́ misí yɛ Masɛtɔánɛ ɔyɛ́á yɛ́ lɛ́á tɔ́na ɔ nɛmanɛna nɛ́ Lɔ́ma. Tɔ ná tɛ́tɛ́á yɛ tunó túmbíə́ ɔ mɛ́táyɛ́ bətínə́.

¹³Ɔ buɔsɛ́ bɔ́ Sábatɛ, tɔ ná fámá ɔ bətínə́, tɔ ná ákáná ɔ ɛsɛ́lɛ́ yɛ́ nuíyi, tɔ fɛkaka ɔwá ɛkasɛ tɔ́ ɛbɔ́ka yɛ́ mabɛ́kálɛ́na bɔŋɔ, tɔ ná bəəndú kɔ́áná kɔtálánátɔ́, tɔ ná tuə́nə umə́ ɔ misí, tɔ ná botólíə́ ɔ uwəbú ɔhɛ́na.

¹⁴Wɔmɔtɛ́ muəndú a ka báá ɔmɔ́tɔ́yɛ́ nɛ́áyɛ́á niínyə á Lítia, wa bətínə́ yɛ Tiatíli, a sa bá milóní yɛ Yútɛnɛ, mba, a Huɛlɛ́ lúbúnəkə. A ka bá a ndɔ nyuŋgə́ kɛa yɛ mabata manyɔakánɔ́ má mukunə́ mɔŋɛ́ŋa. A ɔ́kɔ́kɛna yatɛ́ ɔyɛ́á tɔ́ ndɔ laa, Isə́lúkú a ka wə́yíə́ mɔlɛ́má úbúnə, a ka bá bɛ́ɔ́lɔ́kɔ́kɛ́nátɔ́ ɔ yatɛ́ ɔyɛ́á Báwolo a ná báá a ndɔ laa.

¹⁵A ná nɛsɔa kusə́nə na yayɛ́á miímə mikimə. A ná bəsú ɛ́lɛ́ákɛ́na, a sɛ́á: «Ábá nɔ ná funúnə ɔwá mɛ ndɔ lumininə taká á Isə́lúkú, nɔ́ ndə́túə́nə́kínə ɔ ɔwámɛ ɔmbɛ́la.» A ná ɛ́mbɛ́nɛ́na, tɔ ná lumínə.

¹⁶Bɔ́mɔtɛ́ buɔsɛ́, tɔ ka báá ɔ ɔwákaka ɔ ɛbɔ́ka yɛ́ mabɛ́kálɛ́na, ɛnjɔ́hɔkɛ yɛ́ mɔnyɛna ɔ muəndú a ná ndáfámá ɔ uwəsú nɛnyáná, a ka báá na umbúínyi mɔbɛ́á, a bɛ́tɔ́ŋɔnaka ɛmbɔmɔ, a bɛkɔa bɛ́ ɔsákɔna fə́mə́lə́kə́níə́, a bɛ́áyɛ́á bisə́lúkú məndunə́ húlə́kəninə ɔ tɔ́mbákɛna bɛ́áyɛ́á bimənyí.

¹⁷A ná botólíə́ ɔ uwəsú ɔwɔŋgɔ, na Báwolo na bəsú, a yə́mə́kə a sɛ́á: «Báaba bɛndɔ bá lɛa bɔnyɛna bá Huɛlɛ́ yɛ ɔmɔ́lɔ́mɔ́kɔndɔ oo! Bá ndɔ bənú ɛnɔ́mɛ ínə́niə ɔyɛ́á yɛ́ ndɔ bənú ákánana ɔ nibínuəniə.»

¹⁸A ka nɔ́yɛ́ híánɔlɔkɔna tunó tuəŋí, ɛnaka ɛmbáta yɛ́ híkə́, Báwolo a ná busə́kə ɔkɔ, a ná bɛkɔŋɔna, a ná umbúínyi mɔbɛ́á kándálɛ́na a sɛ́á: «Ɔ niínyə nɛ́ Yə́susu Kilísitusu, mɛ ndɔ aŋɔ́á manɛna, fáma á wɛ́ɛ́yɛ́ muəndú mɛɛ́lɔ!» Ɔ umísíúmə́, umbúínyi mɔbɛ́á wɔ́ ná fámá á wɛ́ɛ́yɛ́ muəndú mɛɛ́lɔ.

¹⁹Ɛnaka bɛ́áyɛ́á bisə́lúkú bá yámá ɔwá, bá sɔ́ ŋɔ məndunə́ kusənə tɔ́na ɔwayɛ́ əlimə, bá ná Báwolo na Sílasɛ biɔnjɛ́na, bá ná bəə́bu ákánána ɔ ɛnakanáká ɔ busíə́ bɔ́ bamanɛna.

²⁰Bá ná bəə́bu ɛtá ɔ bəkə́lə́siə bá Lɔ́ma, bá sɛ́á: «Báaba bɛndɔ bá lɛa Bɛyútɛnɛ, bá nɔ́ nda undumbú háá ɔ uwəsú bətínə́.

²¹Bá ndɔ bɛnɛ́ma bɛɔ́sɔ úkúniə ɔbɛ́á wə́súə́ umbə́ndə́ wɔ́ lɛ ndɔ luminə, uwəsú á bɛndɔ bá Lɔ́ma, tɔ lɛ ndɔ siə ɔ bɛɛ́ta uluminə mbá ata ɔ bɛɛ́ta ɔbɛ́kɛna.»

²²Iloŋo yikimə bá ná botólíə́ á Báwolo na Banábasɛ ɔbánya, bəkə́lə́siə bá ná manɛ́na ɔwá bá bɛlɛŋa húlə́kíə́ ɔbɛ́á bɛ́ ná báá ɔ uwəbú mɛɛ́lɔ, bá ná iŋgínə́ índíə́ ɔwá bá bəə́bu hɔ́ányáká muɛsɛ muɛsɛ.

²³Ɛnaka bá bəə́bu hɔ́ányáka, bá ná bəə́bu háá ɔ ɛbɔka, bá ná mɔtáta iŋgínə́ índíə́ ɔwá a bəə́bu tátáká muɛsɛ.

²⁴Ikúílí mɔtáta a ná yɛ́ɛ́yɛ́ iŋgínə́ kúsə́nə, a ná ká bəə́bu kuiyíníə́ ɔ nihíkíli nɛ́ miímə yɛ ɛbɔka, a ná makɔlɔ́ hɔ́kákɛ́na.

²⁵Hoóyi na kɔɔsɔ yɛ nəbulúə́, Báwolo na Sílasɛ bá ka báá ɔ mabɛ́kálɛ́na, bá maŋana ósóko ɛlɔ́áyɛ́ Huɛlɛ́ ɔnyama, bɔsɔ́kɔ́ bɛndɔ bá ɛbɔka bɔ́ ɔ́kɔ́kɛna.

²⁶Ɔ umisíúmə́, misí yɛ́ ná ndandɛ́málá na iŋgínə́ yikimə, ɔ nindínə́ ɔnɛ́á bɛtɛ́kɛ́ná bɛ́ miímə yɛ ɛbɔka bɛ́ ná bínyúkə́lə. Tɔ́kɔ́kɛ tukimə tɔ́ ná bíkúnə́kə, mɛsáŋa mikimə yɛ́ bɛndɔ bá ɛbɔka yɛ́ ná sɔ́tɔ́nɔ́ákɛ́á.

²⁷Mɔtáta a ná ndáhɔ́nyɔ́á, ɛnaka a yámá ɔwá tɔkɔ́kɛ tɔ́ miímə yɛ ɛbɔka tɔ́ ná bíkúnəkə, a ka bá a ndɔ fɛka a sɛ́á bɛndɔ bá ɛbɔka bá ná tɛbákɛ́na, a ná wə́yíə́ mɔkɔ́átá sɔ́hɔ́ ɔkɛaka ɔwá a bɛɔnɔ.

²⁸Mba, Báwolo a ná yə́mə́ na iŋgínə́ yikimə a sɛ́á: «Ɔ lɛ bɛ́ɔ́nɔ́ bɔ́ányɛ, tɔ báka bəsú bəkimə háha.»

²⁹Nɔ́yɛ́, mɔtáta a ná batá ɔwá bá wɛɛ́ya isəmú húlə́nínə, bá ná hulənə, a ná fínə́ tɔfá ɔ ɛbɔka nuúmə́, a kílíməkə na bɔkɔ́lɔ́ma bukimə, a ná kɔɛ́ná ɔ makɔlɔ́ má Báwolo na Sílasɛ.

³⁰Əlimə yɛ nɔ́yɛ́, a ná bəə́bu fə́míə́, a sɛ́á: «Á bifəyí, yatɛ́ mɛ́ ámɛ kɛ́áka mbá bá mɛaŋɔ́á núə́kə́níə́ əə́?»

³¹Bá ná wɛɛ́ya bɛ́kámɔ́sɔ́ná bá sɛ́á: «Lumínínə ɔbánɔ́ á Isə́lúkú á Yə́susu, nɔ́yɛ́, Huɛlɛ́ a ŋɔ aŋɔ́á nuəkəniə na yáwɔ́á miímə mikimə.»

³²Bá ná wɛɛ́ya ɛtambá yɛ́ Isə́lúkú nɔ́ŋɔ́nákɛ́ná na bááyɛ́ bəkimə ɔbá bá ná bá ɔ ɔwayɛ́ miímə.

³³Ɔmɔ́tɔ́yɛ́ nəbulúə́, mɔtáta a ná bəə́bu ɛtá ɔkɛaka ɔwá a bíə́búə́ bikuəli sɔáka. Báwolo na Banábasɛ bá ná wɛɛ́ya nɛsɔa índíə́ ɛŋaná unə́ŋə́liniə na bááyɛ́ bəkimə ɔbá bá lɛ́á ɔ ɔwayɛ́ miímə.

³⁴A ná Báwolo na Sílasɛ bálákáná ɔwayɛ́ ɔmbɛ́la, a ná bəə́bu afɛ́na. Na wɛɛ́ya na nɛ́áyɛ́á nikúlə nikimə, bá ka báá ɔ nɛhɔnɔ bɔkɔasɛ́á, bá ná níə́búə́ nɛkɔmba tálɛ́ná á Huɛlɛ́.

³⁵Ɛnaka ɔyáá wɔ́ yáá, bəkə́lə́siə bá ɛndɛkɛ Lɔ́ma bá ná bɛndɔ lɔ́má ɔkɛaka ɔwá bá mɔtáta lɛná, á bəə́bu niása.

³⁶Mɔtáta a ná ndá Báwolo lɛ́na a sɛ́á: «Bəkə́lə́siə bá ná mɛaŋɔ́á iŋgínə́ índíə́ ɔwá mɛ bənú níása. Isíŋáka nɔ óso ɔfáma, nɔ́ ákáná ɔ bumbə́nú nuúmə́.»

³⁷Mba, Báwolo a ná báyɛ́ bɛndɔ lɛ́na a sɛ́á: «Bá ná bəsú hɔ́ányáka ɔ nɛnáka ɛŋaná uwəsú ukə́lə́siə, mbá nɔ́yɛ́ tɔ́ lɛ́á bifəyí bɛ́ Lɔ́ma! Əlimə yɛ nɔ́yɛ́ bá ná bəsú ə́mbínə ɔ ɛbɔka. Mba, isíŋáka bá ndɔ siə ɔ uwəsú ufə́miə ɔ inditiə əə́? Ɛ́bá nɔ́yɛ́ bóo! Bá sɔ́nɔ́ bəə́bu bɛ́múɛ́tɛ́ bá ndá bəsú sɔ́tɔ́náka!»

³⁸Bɛndɔ bá ná ká bɛ́ɛ́yɛ́ bɛtambá nɛ́ŋɔ́nákɛ́ná ɔ bəkə́lə́siə bá Lɔ́ma, ɛnaka bá ɔ́kɔ́ ɔwá, Báwolo na Sílasɛ bá lɛa bifəyí bɛ́ Lɔ́ma, bɔkɔ́lɔ́ma bɔ́ ná bəə́bu itíə́.

³⁹Bá ná ndá bəə́bu nɛniasɛna batá, əlimə yɛ nɔ́yɛ́, bá ná bəə́bu fə́míə́ ɔ ɛbɔka, bá ná bəə́bu bɛ́tɔ́kɔ́lɔ́kɛ́na ɔwá bá hɛ́kɛ́á ɔ uwəbú bətínə́.

⁴⁰Ɛnaka bá fámá ɔ ɛbɔka, bá ná ákáná á Lítia ɔmbɛ́la. Bá ná bənísə́ kɔ́tála, bá ná bəə́bu makɛ́nda índíə́kínə, əlimə yɛ nɔ́yɛ́, bá ná híánáka.