Read Tunen Bɛnyɛná 17 Bible Online

Bɛnyɛná 17 - Tunen bible

Bɛnyɛná 17

¹Báwolo na Sílasɛ bá ná tɔ́mbɛ́ná ɔ bətínə́ yɛ Amafibolísi na yɛ Aboloníə́, bá ná káfámá ɔ bətínə́ yɛ Tɛsalɔnɛ́ka, miímə yɛ mabɛ́kálɛ́na yɛ Bɛyútɛnɛ yɛ́ ka bámɛnɛna ɔmɔ́tɔ́yɛ́.

²Báwolo a ná ákáná umə́ ɛ́sɛ́á a ná báá na ihílí ɔ bɛbɔ́ka bikimə ɔhá a ná báá a ndɔ tɔ́mbɛ́na, a ka fínə umə́ ɔ Bɛsábatɛ bɛ́lálɔ́ bikimə ɔbɛ́á bɛ́ ná ɔ́ŋgɔ́nɔ, bá ɛtambá yɛ́ Huɛlɛ́ tə́ŋə́kəniə na bɛndɔ bá ɔmɔ́tɔ́yɛ́ ɔwɔŋgɔkɔnɔ na Mətilə Manaŋanaŋa.

³A bəə́bu bɛkɔa nífúnəkinə ɔ ɛsalɛ yɛ́ Mɛ́sia, a bəə́bu lakɛna ɔwá, Ɛtambá yɛ́ Huɛlɛ́ yɛ́ ndɔ laa ɔwá, Mɛ́sia a ka hɔ́ánana ɛmɔ́kɛ́ ɔnyáá, á wə́ə́, əlimə yɛ ikúílí, Huɛlɛ́ a wɛɛ́ya huŋuəsiə ɔ ətíə́ yɛ bəwə́nú. A ná bəə́bu lɛná tɔ́na a sɛ́á: «Yɛ́ɛ́yɛ́ Mɛ́sia, á Yə́susu ɔwá mɛ ndɔ bənú yayɛ́á imbə́nú nɔŋɔnɛna.»

⁴Nɛ́mɔtɛ́ nioko nɛ́ Bɛyútɛnɛ ɔbá bá ná báá ɔ miímə, bɔ́mɔtɛ́ bɛndɔ bá Kɛlɛ́kɛ ɔbá bá ná báá bá ndɔ Huɛlɛ́ lúbúnə, na bɔ́mɔtɛ́ bəəndú baŋɛ́ŋa bá ná nɔ́yɛ́ ɔ́kɔ́kɛ́na, bá ná lumínə, bá ná híáná á Báwolo na Sílasɛ əlimə.

⁵Mba, bɛ́mɔtɛ́ Bɛyútɛnɛ, bá ná busə́kə ɔkɔ, bá ná bɛ́mɔtɛ́ biəndə́ndíkə kɔtáka ɔbá bá ná báá ɔ mɔndɔ́ŋɔ́, bá ná undumbú háá ɔ bətínə́. Bá ná ká Báwolo na Sílasɛ siə́kə á Yásɔnɔ ɔmbɛ́la ɔkɛaka ɔwá, bá bəə́bu halɛ́na, bá bəə́bu ákánána ɔ ətíə́ yɛ bɛndɔ.

⁶Mba, bá sa bəə́bu kɔana, bá ná Yásɔnɔ na bɔ́mɔtɛ́ bənísə́ ákánána ɔ busíə́ bɔ́ bamanɛna bá bətínə́, bá ná botólíə́ ɔ uyə́mə bá sɛ́á: «Bɛndɔ ɔbá bá ndɔ misí mikimə tuŋulə, bá lɛa háha!

⁷Yásɔnɔ a ka bəə́bu káha ɔ ɔwayɛ́ ɔmbɛ́la, na wɛ́ya na bááyɛ́ bɛndɔ bəkimə bá ndɔ laa ɔwá, munəni muinə́muinə́ a báka, nɛ́áyɛ́á niínyə á Yə́susu, nɔ́yɛ́, bá ndɔ niŋə nifəŋə na imbə́ndə́ yɛ́ káyɛsa yɛ Lɔ́ma.»

⁸Bɛ́ɛ́yɛ́ bɛtambá bɛ́ ná ilúkunə yikimə na bamanɛna bá bətínə́ bɔkɔ́lɔ́ma itíə́síə́.

⁹Yásɔnɔ na bɛndɔ ɔbá bá ná hálɛ́ákɛ́na, bá ná bɛ́ɔ́ndɔ́kɔ́ na mɔnɛ́á á bamanɛna busíə́ ɔkɛaka ɔwá bá bəə́bu niása.

¹⁰Ɛnaka bulúə́ bɔ́ kɔ́á, bənísə́ bá ná Báwolo na Sílasɛ ə́kə́nə́síə́ ɔ bətínə́ yɛ Bələ́ə, ɛnaka bá káfámá umə́, bá ná ákáná ɔ miímə yɛ mabɛ́kálɛ́na yɛ Bɛyútɛnɛ.

¹¹Bɛyútɛnɛ bá yɛ́ɛ́yɛ́ bətínə́ bá ka báá na malɔŋa maasɛ yáyɛ́na bá Tɛsalɔnɛ́ka. Bá ka ɛtambá yɛ́ Huɛlɛ́ káha na uhikiə mukimə. Bá Mətilə ɔ́kɔ́naka buɔsɛ́ tɛ́á ɔkɛaka ɔwá mbá bá manyá ɛ́bá bɛtambá bɛ́ Báwolo bɛ́ lɛa taká.

¹²Bɛndɔ bəəŋí bá ná híáná bəlumininə, ɔ uwəbú ətíə́, Bɛkɛlɛ́kɛ na bəəndú baŋɛ́ŋa, na ɔmbana muiŋí wɔ́ balɛ́mɛndɔ́.

¹³Mba, ɛnaka Bɛyútɛnɛ bá Tɛsalɔnɛ́ka bá ɔ́kɔ́kɛ́ná ɔwá, Báwolo a ndɔ ɛtambá yɛ́ Huɛlɛ́ nɔŋɔna ɔ Bələ́ə tɔ́na, bá ná ndásá ɔ yɛ́táyɛ́ bətínə́, bá bəə́bu lɛ́háka ɔkɛaka ɔwá, bá undumbú háá ɔ ətíə́ yɛ bɛndɔ.

¹⁴Ɛnaka bənísə́ bá siəkínə́ nɔ́yɛ́, ɔ umisíúmə́, bá ná Báwolo ə́kə́nə́síə́ ɔ ɛsalɛ yɛ́ nuíyi nɛ́ ɛsɛ́lɛ́ ɛ́mɔtɛ́, mba, Sílasɛ na Timotíó bá ná əbú tíkə́nə́ ɔ Bələ́ə.

¹⁵Bááyɛ́ ɔbá bá ákáná á Báwolo ukətíkə́, bá ná ákáná na wɛɛ́ya ɔkafámáká ɔ bətínə́ yɛ Atɛ́nɛ, əlimə yɛ nɔ́yɛ́ bá ná tilə́ ɔ Bələ́ə, na imbə́nú ɔyɛ́á Báwolo a ná lɔ́má ɔwá, Sílasɛ na Timotíó bá ndá wɛɛ́ya kɔ́áná tɔfá.

¹⁶Ikúílí yikimə ɔyɛ́á Báwolo a na bá a ndɔ Sílasɛ na Timotíó táta, a ná bɛ́káŋáláka ɔ bətínə́, a ná bililí síə́kínə́ biəŋí, wə́yíə́ mɔlɛ́má wɔ́ sa bá yə́ə́bu.

¹⁷A ná fínə́ ɔ miímə yɛ mabɛ́kálɛ́na, a tə́ŋə́kəniə na Bɛyútɛnɛ, na bááyɛ́ ɔbá bá lɛ bá Bɛyútɛnɛ. Buɔsɛ́ tɛ́á tɔ́na a ka bá a ndɔ tə́ŋə́niə na bááyɛ́ ɔbá a ná bá a ndɔ ɛ́nyánana ɔ nɛnáka.

¹⁸Bamanya ɔbá bá ndɔ bɛkɔa tə́ŋə́niə na ɛfɛka yɛ Ə́bikúlu, bɔ́mɔtɛ́ na yɛ Sɛnɔ́ŋɔ,[18] bá ka báá bá ndɔ tə́ŋə́niə tɔ́na na Báwolo. Bɔ́mɔtɛ́ bá sɛ́á: «Yatɛ́ wɔ́ɔwɔ mukókókoko a ndɔ siə ɔlaa əə́?» Ɛnaka bə́ə́ní bá ɔ́kɔ́kɛna nəníə́ Báwolo a ndɔ Imbə́nú Yɛɛsɛ yɛ Yə́susu nɔŋɔna, a hɔ́kɛna tɔ́na ɔ ɛsalɛ yɛ́ nɛhɔŋɔa nɛ́ bəwə́nú, bá laaka bá sɛ́á: «Yɛ́ óso ɔbáá ɔwá a lɛa mɔndɔ ɔwá a ndɔ bɛkɔa bɛ́ bɛhuɛlɛ́ binə́binə́ nɔŋɔna.»

¹⁹Bá ná Báwolo ákánána ɔ ɛbɔ́ka ɔyɛ́á abáka bá kɔtakana ɛlɔ́áyɛ́ bɛsáká bɛ́ bətínə́ utə́ŋə́niə ɔ ɔmáá ɔmbáŋá, ɔwá bá ndɔ ɛ́lɛnɛna bá sɛ́á: Ayɛlɔbásɛ. Bá ná wɛɛ́ya batá bá sɛ́á: «Baánɛ tɔ óso ɔ bɛ́ɛ́yɛ́ binə́níníə́ bɛɔ́sɔ ɔmanya ɔbɛ́á ɔ ndɔ bəsú hɛ́na əə́?

²⁰Ɔ taká, ɔ ndɔ bəsú bɛkɔa bɛɔ́sɔ hɛ́na, tɔ ndɔ siə ɔmanya yatɛ́ nɔ́yɛ́ yɛ́ ndɔ siə ɔlaa.»

²¹Bɛndɔ bá Atɛ́nɛ na bəkiníə́nú bəkimə ɔbá bá ná báá uwəbú ətíə́ bá yə́búə́ ikúílí túmbə́kiə ɔbánɔ́ ɔ bɛkɔa bɛɔ́sɔ ɔhɛ́na, na binə́binə́ ɔwɔ́kɔ.

²²Báwolo a ná tɛ́nɛ́má ɔ busíə́ bɔ́ nindúmə́ nɛ́ bamanya, a sɛ́á: «Á bɛndɔ bá Atɛ́nɛ, mɛ ndɔ sinə ɔwá, nɔ lɛa bɛndɔ ɔbá bá ndɔ bíə́búə́ bɛhuɛlɛ́ lúbúnə ɔ məndínə́ ɔbánɔ́ məkimə.

²³Ɔ taká, ikúílí ɔyɛ́á mɛ́ ná bɛ́káŋáláka ɔ uwənú bətínə́, mɛ ka bíə́núə́ bɛbɔ́ka siəkinə ɔbɛ́á abáka nɔ kɔtakana ɛlɔ́áyɛ́ bɛnamá uwíndiə ɔ uwənú bɛhuɛlɛ́. Mɛ ka yɛ́mɔtɛ́ ɛbɔ́ka siəkinə ɔyɛ́á bá ná tílə́kə bá sɛ́á: “Ɔ huɛlɛ́ ɔyɛ́á bá lɛ ndɔ manya.” Nɔ́yɛ́, á Huɛlɛ́ ɔyɛ́á nɔ ndɔ lúbúnə ɛŋaná ɔwayɛ́ ɔmanya, ɔ ɔwayɛ́, mɛ́ nɔ ndasá ɔ uwənú ɔnɔŋɔnɛna.

²⁴Ɔ́ yɛ́ɛ́yɛ́ Huɛlɛ́ ɔwá a ná bɔɛ́na bɔ́tá na bikimə ɔbɛ́á bɛ́ lɛ́á umə́, wɛɛ́ya a lɛ́á Isə́lúkú yɛ nɔɔ́mɛná na misí, a lɛ ndɔ tuənə ɔ bɛtɛ́mbɛlɛ ɔbɛ́á makátá má bɛndɔ bá ná fálábáka.

²⁵A lɛ bá na bɔkɔa ɔbɔ́á a ndɔ sɔ́ka ɔ nindínə́ ɔnɛ́á bá wɛɛ́ya kamɛ́la, wɛɛ́ya a ndɔ bɛkɔa bikimə índiə ɔ mɔndɔ, mulúkúlúku na buɔmɔ́.»

²⁶«A ka bɛndɔ bá mɔnɔŋɔ məkimə tábɔ́naka ɔ tɔ́mbákɛna na mɔndɔ ɔmɔtɛ́, a ná bəə́bu tuənə́kíníə́ ɔ misí mikimə, a ná bikúílí na mambándá tínímə́kíə́ ɔhá bɛndɔ bá ná hɔ́ánána utuənə.

²⁷Huɛlɛ́ a ka nɔ́yɛ́ kɛaka ɔkɛaka ɔwá bɛndɔ bá wɛɛ́ya siə́kə, ɔ yɛ́mɔtɛ́ ikúílí ata ɔ bunə́kə́lənə bá ndɔ wɛɛ́ya siə, bá óso ɔ ɔwayɛ́ ɔbɔ́ŋɔ. Ɔ taká, Huɛlɛ́ a lɛ bá hata na mɔɛ́ta tɛ́á.

²⁸Ɔ taká, ɔ tɔ́mbákɛna na wɛɛ́ya tɔ ndɔ niŋə, tɔ ndɔ bínyukə, ɔ tɔ́mbákɛna na wɛɛ́ya tɔ́na tɔ́ nɔ́yɛ́ lɛ́á. Ɔ́maná ɛ́sɛ́á bɔ́mɔtɛ́ bə́núə́ bɛndɔ bá ná fə́mə́lə́níə́ bá sɛ́á: “Bəsú tɔ́na tɔ lɛa báyɛ́á baná.”»

²⁹«Nɔ́yɛ́, ɛ́sɛ́á ikúílí tɔ́ əsú lɛ́á báyɛ́á baná, tɔ lɛ fɛká tɔ sɛ́á Huɛlɛ́ a báka ɛ́sɛ́á ililí yɛ́ kóolo, yɛ́ mɔnɛ́á ata yɛ́ muɔkɔ ɔyɛ́á mɔndɔ a ná mɔ́mɔ́láká na yayɛ́á ɛmanya.

³⁰Ɔ nɛbalɛ́ná, bɛndɔ bá sa bá bá ndɔ Huɛlɛ́ manya, mba, a lɛ ndɔ bəə́bu kə́lə́siə ɛlɔ́áyɛ́ nɔ́yɛ́; isíŋáka, ɔ bɛbɔ́ka ɔbánɔ́ bikimə, a ndɔ bəə́bu bəkimə ɛ́lɛna ɔ mɔlɛ́má ɔkɔ́ŋɔ́na.

³¹Ɔ taká, a ka hinó tínímiə hímotí ɔhɛ́á a ŋɔ bɛndɔ bá misí kə́lə́səkiə na taká, a ka mɔndɔ tɛ́fa ɔmɔtɛ́ ɛlɔ́áyɛ́ mítə́yí mikə́lə́kí, a ka kɛaka muití a hɔŋɔ́á ətíə́ yɛ bəwə́nú ɛlɔ́áyɛ́ uwinə́niə ɔwá wɛɛ́ya a lɛ́á mukə́lə́siə.»

³²Ɛnaka bɛndɔ bá ɔ́kɔ́ ɔwá Báwolo a ndɔ hɛ́na ɛlɔ́áyɛ́ nɛhɔŋɔa nɛ́ bəwə́nú, bɔ́mɔtɛ́ bá ná lúmə́ ɔ ɔwayɛ́ ufə́nínə, bənə́bənə́ bá sɛ́á: «Tɔ́ ŋɔ bɔ́ɛ́yɛ́ bɔkɔa ɔ́kɔ́kɛna buɔsɛ́ buinə́buinə́!»

³³Ɛlɔ́áyɛ́ nɔ́yɛ́, Báwolo a ná bəə́bu tikə, a ná ákana.

³⁴Mba, nɛ́mɔtɛ́ nioko nɛ́ bɛndɔ bá ná lumínínə, bá ná bɛ́látá na wɛɛ́ya. Tənísi á ɛláŋa yɛ́ nindúmə́ nɛ́ Ayɛlɔbásɛ na wɔmɔtɛ́ muəndú, nɛ́áyɛ́á niínyə á Tamalísi, na bɔ́mɔtɛ́ tɔ́na bá ka bákɔna ɔ uwəbú ətíə́.