Read Tunen Bɛnyɛná 18 Bible Online

Bɛnyɛná 18 - Tunen bible

Bɛnyɛná 18

¹Əlimə yɛ nɔ́yɛ́, Báwolo a ná hɔalɛ́na ɔ Atɛ́nɛ, a ná ákáná ɔ bətínə́ yɛ Kɔlɛ́ŋɛ́tɛ.

²Umə́, a ná wɔmɔtɛ́ mɔyútɛnɛ ɛ́nyánána, nɛ́áyɛ́á niínyə á Akílasɛ, á ibíə́nəkənə yɛ́ nɛkɛ́tɛ nɛ́ misí yɛ Bɔ́ŋɔ ɔwá a nɔ́ húlə ɔ ɔndahíáná ɔ Italíə́ na wayɛ́á muəndú á Bilisília bɔkɔasɛ́á, káyɛsa á Kolóto a ka manɛna ɔwá, Bɛyútɛnɛ bikimə bá hɔalákɛ́na ɔ Lɔ́ma. Báwolo a ná nɛŋgɔ́áyɛ́ tɔ́á na bəə́bu.

³Ɛ́sɛ́á bá ná báá tɔ́na na ɛnya yɛ buolí ɛ́mɔtɛ́, bá ka bámɛnɛna batábɔ́ná bɛanda, a ná túə́nə́kínə́ na bəə́bu, bá nyɔɔkɔ iŋgində́.

⁴Ɔ hinó hɛ́ Sábatɛ tɛ́á, Báwolo a ka bá a ndɔ fínə ɔ miímə yɛ mabɛ́kálɛ́na, bá ŋgamaka na Bɛyútɛnɛ na Bɛkɛlɛ́kɛ, a siəkə ɔwá bá əbú lumínínə́ tɔna á Yə́susu.

⁵Ikúílí Sílasɛ na Timotíó bá ná húlínə́ ɔ Masɛtɔánɛ á Báwolo ɔ ndakɔána, a ná bɛ́hánɛ́ná wɛɛ́ya mukimə ɔ nɛnɔŋɔna nɛ́ Ɛtambá yɛ́ Huɛlɛ́ ɔ Bɛyútɛnɛ busíə́ ɔwá, á Yə́susu a lɛ́á Mɛ́sia.

⁶Mba, Bɛyútɛnɛ bá lɛ ɔ́kɔ́nɔ́ na wɛɛ́ya, bá wɛɛ́ya kɔ́báka. Nɔ́yɛ́, Báwolo a ná umbunə́ wɔ́ bɛ́áyɛ́á bɛlɛŋa yukúlə́lə, a ná bəə́bu lɛ́na a sɛ́á: «Ábá nɔ lɛa nímínə́tɔ́, híə́núə́ hɛkɔma. Nɔ́yɛ́ yɛ́ lɛ ndɔ mɛaŋɔ́á sinə. Ɔ botolokiə isíŋáka, ɛkasɛ mɛ ákáná ɔ Imbə́nú Yɛɛsɛ ɔnɔŋɔnɛna ɔ bááyɛ́ ɔbá bá lɛ bá Bɛyútɛnɛ.»

⁷Báwolo a ná hɛ́kɛ́á ɔ miímə yɛ mabɛ́kálɛ́na, a ná ákáná ɔ ɔmbɛ́la wɔ́ wɔmɔtɛ́ mɔndɔ, nɛ́áyɛ́á niínyə á Titiyusu Yusútusu, mɔndɔ ɔwá a ndɔ Huɛlɛ́ lúbúnə, yayɛ́á miímə yɛ́ ka báá hoóyi na yɛ mabɛ́kálɛ́na.

⁸Kilisibúsu, á isə́lúkú yɛ yɛ́táyɛ́ miímə yɛ mabɛ́kálɛ́na na bɛndɔ bəkimə bá yayɛ́á miímə, bá ná níə́búə́ nɛkɔmba tálɛ́ná á Isə́lúkú. Bɛndɔ bá Kɔlɛ́ŋɛ́tɛ bəəŋí ɔbá bá ná bɛtambá bɛ́ Báwolo ɔ́kɔ́kɛ́na, bá ná híáná bəlumininə, bá ná nɛsɔa kusə́nə.

⁹Bɔ́mɔtɛ́ bulúə́, Isə́lúkú a ná Báwolo bínə́níə́ ɔ binónó, a sɛ́á: «Ɔ lɛ kɔlɔma, hɔ́kɛ́na ikúílí tɛ́á ɔ ɔwámɛ ɛlɔ́á! Ɔ lɛ munuə fátá bɔ́ányɛ!

¹⁰Mɛ lɛa na aŋɔ́á, ata mɔndɔ a sa ósó ɔwáwɔ ɔ mɔkátá ɔtála ɔ ɔwáwɔ ɔ bɔbɛ́á ɔkɛa, ɔ taká, ɔmbana muiŋí wɔ́ bɛndɔ wɔ́ lɛa ɔwámɛ əlimə ɔ yɛ́ɛ́yɛ́ bətínə́.»

¹¹Báwolo a ná tuənə́kínə hiɔŋɔ na ɛsalɛ ɔ Kɔlɛ́ŋɛ́tɛ, a bɛndɔ bəkimə ɛtambá yɛ́ Huɛlɛ́ úkúnəkiə.

¹²Báwolo a ka báá tɔ́na umə́ ikúílí ɔyɛ́á Káliɔ́ŋɔ a ná bámɛ́nɛ́ná mɔmanɛna ɔ nɛ́táyɛ́ nɛkɛ́tɛ nɛ́ misí yɛ Akáyɛ, Bɛyútɛnɛ bá ná munuə tɔa, bá ná wɛɛ́ya halɛ́na, bá ná wɛɛ́ya ákánána ɔ bikə́lə́síníə́,

¹³bá sɛ́á: «Wɔ́ɔwɔ mɔndɔ a ndɔ bɛndɔ nímbə ɔwá bá Huɛlɛ́ lúbúnə́kə́ nindínə́ ninə́ninə́, nifəŋə ɛ́sɛ́á wə́súə́ umbə́ndə́ wɔ́ ndɔ bata.»

¹⁴Báwolo a ka bá a sɛ́á a bɛ́kámɔ́sɔ́na, Káliɔ́ŋɔ a ná wɛɛ́ya ɛtambá sɔ́mbá ɔ munuə, a ná Bɛyútɛnɛ lɛ́na a sɛ́á: «Ata yɛ́ báá ɔwá, a ná mɔndɔ ɔ́nɔ́kɔ́ mbá ata hímotí hɛkɔma hɛŋɛ́ŋa, uwənú á Bɛyútɛnɛ, há ɛkasɛ mɛ ikúílí ɛ́tá ɔ uwənú ɔwɔ́kɔ.

¹⁵Mba, ɛ́sɛ́á yɛ́ lɛ́á mitə́ŋí ɔwɔŋgɔkɔnɔ na bɛtambá, məə́nyə na wə́núə́ umbə́ndə́, nɔ́yɛ́ yɛ́ ndɔ bənú sinə. Mɛ ná sáŋɔ́ná ɔ ɔbáá mukə́lə́siə wa yɛ́ɛ́yɛ́ ɛnya yɛ bɛsáká.»

¹⁶Ɛnaka á hɔ́lɔ́ nɔ́yɛ́, a ná bəə́bu bulə́kə ɔ miímə yɛ bikə́lə́síníə́.

¹⁷Nɔ́yɛ́, bəə́bu bəkimə bá ná famaka, bá ná Sɔsɔtɛ́nɛ á isə́lúkú yɛ miímə yɛ mabɛ́kálɛ́na biɔnjɛ́na, bá ná wɛɛ́ya hɔ́ányáká muɛsɛ muɛsɛ ɔ niə́lətíə́ nɛ́ miímə yɛ bəkə́lə́siə, mba, Káliɔ́ŋɔ a ná bəə́bu indímə́ sana.

¹⁸Ɛnaka bɛ́ɛ́yɛ́ bɛkɔa bɛ́ bɛ́tɔ́máká, Báwolo a ná manyɔ́ tuənə ikúílí yɛtatánɛ ɔ Kɔlɛ́ŋɛ́tɛ. A ná nɛkaka hákɛ́ná na Huɛlɛ́, a ná bənísə́ bíkókíə́ ɔ kahíánáka ɔ bɔnɔŋɔ bɔ́ Sília, na wɛɛ́ya na Akílasɛ na Bilisikíli bá ná káfámá ɔ Saŋakɛlɛ́á, Báwolo a ná mɔlɔ́á bɛ́kɛ́sáká ɛlɔ́áyɛ́ nɛ́ɛ́yɛ́ nɛkaka uwundúsiniə ɔnɛ́á a ná hákɛ́ná na Huɛlɛ́. Əlimə yɛ nɔ́yɛ́ bá ná fínə́ ɔ lánjɛ ɔ ɔwákaka.

¹⁹Bá ná káfámá ɔ bətínə́ yɛ Ɛfɛ́sɛ, ɔmɔ́tɔ́yɛ́ á Báwolo a ná Bilisília tíkə́ na Akílasɛ. A ná fínə́ ɔ miímə yɛ mabɛ́kálɛ́na, a ná lúmə́ ɔ utə́ŋə́niə na Bɛyútɛnɛ.

²⁰Bá ná batá ɔwá a túə́nə́ ikúílí yɛtatánɛ na bəə́bu, mba, a ná saŋɔna.

²¹Báwolo a ná bəə́bu tikə, a sɛ́á: «Ábá Huɛlɛ́ a ná bə́tíə́, mɛ ŋɔ ndahíáná uwənú busíə́ ikúílí yinə́yinə́.» Ɛnaka á hɔ́ɔ́kɔ́ nɔ́yɛ́, a ná lánjɛ ɛtá ɔ ɔhɛ́kɛakɛa ɔ Ɛfɛ́sɛ.

²²Ɛnaka lánjɛ yɛ́ káfámá ɔ Sɛsalɛ́, Báwolo a ná tukínə, a ná ákáná ɔ Yəlúsalɛma ɔ bɛláŋa bɛ́ ilúkunə yɛ́ bəlumininə ɔ kəbíhólíə́, əlimə yɛ nɔ́yɛ́ a ná tɔ́mbá ɔ Aŋatiɔ́sɛ.

²³A ná tɛ́tɛ́á yɛ ikúílí túmbíə́ ɔ mɛ́táyɛ́ bətínə́, a ná ákana. A ná tɔ́mbɛ́ná ɔ bətínə́ bá nɛkɛ́tɛ nɛ́ misí yɛ Kalátɛ na Filinjíə́, a húlə́ ilumininə yɛ́ bɔkɔ́nɛna bəkimə ónókiniə.

²⁴Wɔmɔtɛ́ mɔyútɛnɛ, nɛ́áyɛ́á niínyə á Abolóso, a ka bíbíə́nə ɔ Alɛkɛsandilíə́, a ná ndáfámá ɔ Ɛfɛ́sɛ, a hɔ́ɔ́kɔ muɛsɛ, a tuəfulə tɔnaŋanaŋa fanaka tɔ́na muɛsɛ.

²⁵Bá ka wɛɛ́ya úkúnəkiə nəníə́ á ɛnɔ́mɛ yɛ́ Isə́lúkú yɛ́ lɛ́á, a ná lumínə́ na mɔlɛ́má mukimə, a bɛndɔ bɛkɔa lakɛna hɔ́ánánátɔ ɔbɛ́á bɛ́ ndɔ Yə́susu sinə. Mba, a sulu manyaka á bɛkɔa ɔbɛ́á Yɔhánɛsɛ a ná ínə́kíníə́ ɔ ɛsalɛ yɛ́ nɛsɔa.

²⁶Ɛ́sɛ́á a ná báá ɔ Ɛfɛ́sɛ, a ná fínə́ ɔ miímə yɛ mabɛ́kálɛ́na, a ná lumə́ ɔ ɔhɔ́ɔ́ na yɔnɛ́nɛna yikimə. Ɛnaka Bilisikíli na Akílasɛ bá ɔ́kɔ́kɛ́ná a ndɔ hɔ́ɔ́, bá ná wɛɛ́ya ɛtá ɔ uwəbú ɔmbɛ́la ɔkɛaka ɔwá, bá wɛɛ́ya nífúnə́kínə́ muɛsɛ muɛsɛ nəníə́ á ɛnɔ́mɛ yɛ́ Huɛlɛ́ yɛ́ lɛ́á.

²⁷Əlimə yɛ nɔ́yɛ́, Abolóso a ka báá na ilókí ɔwá á ákáná ɔ nɛkɛ́tɛ nɛ́ misí yɛ Akáyɛ. Bənísə́ bá ná nɔ́yɛ́ wɛɛ́ya óníníə́, bá ná bəlumininə bá yɛ́táyɛ́ ɛbɔ́ka hiəfulə tilə́kínə ɔkɛaka ɔwá, bá wɛɛ́ya káhá muɛsɛ. Ɛnaka a káfámá, Huɛlɛ́ a ka báá na mɔlɛ́má muɛsɛ ɛlɔ́áyɛ́ ayɛ́, a ka báá mɔsɛ́ŋɛ́ ɛlɔ́áyɛ́ bááyɛ́ ɔbá bá ná lúmínínə́ á Yə́susu.

²⁸Ɔ taká, bɛ́áyɛ́á bɛtambá bɛ́ ka báá bɛ́ ndɔ bɛndɔ ɔ́lɔ ɔ nindínə́ ɔnɛ́á, ikúílí bá ndɔ tə́ŋə́niə na Bɛyútɛnɛ, a bəə́bu lakɛna a sɛ́á bá lɛ bá ɔ ɛnɔ́mɛ yɛ́ tɛ́nɛ́mátɔ́ ɔ tɔ́mbákɛna na Mətilə ɔwá, á Yə́susu a lɛ́á Mɛ́sia.