Read Tunen Bɛnyɛná 19 Bible Online

Bɛnyɛná 19 - Tunen bible

Bɛnyɛná 19

¹Ikúílí Abolóso a ná báá ɔ Kɔlɛ́ŋɛ́tɛ, Báwolo a ná bíásɛ́na ɔ ɛmáá yɛ́ nɛkɛ́tɛ nɛ́ misí yɛ Ásia, ɔ ɔwákaka ɔ Ɛfɛ́sɛ, ɛnaka á káfámá, a ná bɔ́mɔtɛ́ bəlumininə nibə́ umə́.

²A ná bəə́bu batá a sɛ́á: «Baánɛ, nɔ ka Umbúínyi Mɔnaŋanaŋa kusənə ɔ ikúílí ɔyɛ́á nɔ́ ná lúmínínə əə́?» Bá sɛ́á: «Tɔ lɛ boóko tɔ ná əsú ɔ́kɔ́ bá ndɔ hɛ́na ɛlɔ́áyɛ́ Umbúínyi Mɔnaŋanaŋa.»

³Báwolo a ná bəə́bu batá a sɛ́á: «Ɔ́ uníə́níə́ nindínə́ nɛ́ nɛsɔa nɔ́ ná kúsə́nə́ əə́?» Bá sɛ́á: «Nɛsɔa ɔnɛ́á Yɔhánɛsɛ a ná bəsú índíə́.»

⁴Báwolo a sɛ́á: «Yɔhánɛsɛ a ka nɛsɔa índiəkinə ɔ bááyɛ́ ɔbá bá bá ná lúmínə ɔ mɔlɛ́má ɔkɔ́ŋɔ́na, a ka ilúkunə yɛ́ Ísilahɛ́lɛ lakɛna ɔwá, bá níə́búə́ nɛkɔmba tálɛ́ná ɔ wɛ́ɛ́yɛ́ ɔwá a lɛ́á ɔ ɔsákɔna ɔwayɛ́ əlimə, ɔ́ niɔŋɔ́ sɛ́á á Yə́susu.»

⁵Ɛnaka bá bɛ́ɛ́yɛ́ bɛtambá ɔ́kɔ́kɛ́na, bá ná nɛsɔa kusə́nə ɔ niínyə nɛ́ Isə́lúkú á Yə́susu.

⁶Báwolo a ná bəə́bu makátá tálákɛ́na, Huɛlɛ́ a ná bəə́bu húə́ na Umbúínyi Mɔnaŋanaŋa, bá ná lúmə́ ɔ mohókí mənə́mənə́ ɔ ɔhɔ́ɔ́, bá hɔ́ɔ́kɔ yatɛ́ ɔyɛ́á Huɛlɛ́ a ná bəə́bu batá ɔwá bá hɔɔkɔ.

⁷Ɔmbana wɔ́ bááyɛ́ bɛndɔ wɔ́ ka bá hoóyi na niómo na báfandɛ́.

⁸Báwolo ɔ bətínə́ yɛ Ɛfɛ́sɛ, a ka bá a ndɔ ákána ikúílí tɛ́á ɔ miímə yɛ mabɛ́kálɛ́na, ɔ miilí ɛ́lálɔ́ ɔyɛ́á a ná túmbíə́ umə́, a ka bá a ndɔ ɛtambá ɛta, a hɔ́ɔ́kɔ tɔ́ná na bufəyí bukimə, a hɔ́ɔ́kɔ ɔ ɛsalɛ yɛ́ Nɛmanɛna nɛ́ Huɛlɛ́, a bɛ́ɔ́kɔlɔkɛna ɔ báyɛ́ uyóyiə ɔwá, bá lumínə́ yatɛ́ ɔyɛ́á a ndɔ laa.

⁹Mba, bɔ́mɔtɛ́ bá ná mɔlɔ́á nata, bá ná kinə́ ɔ ulumininə, bá ɛnɔ́mɛ yɛ́ Yə́susu hɔ́kɛna mɔbɛ́á ɔ busíə́ bɔ́ bɛndɔ. Báwolo a ná bəə́bu tikə, a ná ákáná na bəlumininə ɔ isukúlu nuúmə́ yɛ́ wɔmɔtɛ́ mɔndɔ, nɛ́áyɛ́á niínyə á Tilánusu, buɔsɛ́ tɛ́á bá bəə́bu ɛtambá yɛ́ Yə́susu úkúnəkiə.

¹⁰A ka kɛaka nɔ́yɛ́ ɔkafámáká tuɔŋɔ tɔ́fandɛ́ ɔ nindínə́ ɔnɛ́á, bɛndɔ bəkimə ɔbá bá ná bákɔ́na ɔ nɛkɛ́tɛ nɛ́ misí yɛ Ásia, Bɛyútɛnɛ, bááyɛ́ ɔbá bá lɛ bá Bɛyútɛnɛ, bá ka Ɛtambá yɛ́ Isə́lúkú ɔ́kɔ́kɛna.

¹¹Ikúílí Báwolo a na bá a ndɔ bɛndɔ úkúniə, Huɛlɛ́ a ka bá a ndɔ bisə́mə́tə́ bɛ́ yələ́mənə kɛa ɔ tɔ́mbákɛna na máyɛ́á makátá.

¹²Nɔ́yɛ́, bá bɛnákɛnákɛ mabata na bɛwáŋgɛsa tálákɛna ɔbɛ́á bɛ́ ná yayɛ́á mɛɛ́lɔ itíə́kə, bɛndɔ bá niŋəkə, bááyɛ́ ɔbá imbúínyi mɛbɛ́á yɛ́ ná bá yɛ́ ndɔ yíbiə, bá niŋəkə tɔ́na.

¹³Bɔ́mɔtɛ́ bɛndɔ bá Bɛyútɛnɛ bá kɛndaka ɛbɔ́ka na ɛbɔ́ka tɛ́á, bá bɛ́ɔ́kɔ́lɔkɛna ɔ niínyə nɛ́ Isə́lúkú á Yə́susu ɔbɛ́kɛna ɔkɛaka ɔwá, bá imbúínyi mɛbɛ́á bulə́kə ɔ bɛnákɛnákɛ, bá bəə́bu lakɛna bá sɛ́á: «Mɛ ndɔ bənú manɛna, ɔ niínyə nɛ́ yɛ́ɛ́yɛ́ Yə́susu ɔyɛ́á Báwolo a ndɔ nɔŋɔna, fámákánɔ ɔ mɛɛ́lɔ yɛ báaba bɛndɔ!»

¹⁴Wɔmɔtɛ́ Mɔyútɛnɛ, nɛ́áyɛ́á niínyə á Cɛ́fa, a ka bá mutitiəmahánɛna mɔŋɛ́ŋa, báyɛ́á baná Bálɛ́ndɔ́lɔ́mɔnɔ, bá əbú nɔ́yɛ́ bɛ́kɛakɛna tɔ́na.

¹⁵Mba, hinó hímotí, umbúínyi mɔbɛ́á wɔ́ ná bəə́bu bɛ́kámɔ́sɔ́ná wɔ́ sɛ́á: «Mɛ ndɔ Yə́susu manya, mɛ ndɔ manya tɔ́na ɛ́yánɛ́ a lɛ́á Báwolo, uwənú, bənú banɛ́ əə́?»

¹⁶Mɔndɔ ɔwá a ná báá na umbúínyi mɔbɛ́á a ná bəə́bu biɔnjɛ́na, a ka báá na iŋgínə́ yáyɛ́ná bəə́bu bəkimə, a ná bəə́bu súbə́kə́ muɛsɛ muɛsɛ, a ná bəə́bu úmúísə́kíə́ ɔ nindínə́ ɔnɛ́á bá ná sámbáná ɔ ɔmbɛ́la mɔsámbɔ.

¹⁷Bɛndɔ bəkimə bá bɔnɔŋɔ bɔ́ Ɛfɛ́sɛ, Bɛyútɛnɛ na bááyɛ́ ɔbá bá lɛ bá Bɛyútɛnɛ, bá ná bɔ́ɛ́yɛ́ bɔkɔa ɔ́kɔ́kɛ́na, bɔkɔ́lɔ́ma bɔŋɛ́ŋa bɔ́ ná bəə́bu itíə́, bá ná botólíə́ á Isə́lúkú a Yə́susu ubə́tiə ɔ ɔyáyɛ́na.

¹⁸Bɛndɔ bəəŋí ɔbá bá ná lúmínínə, bá mə́búə́ mabɛ́á bɛ́mɛ́nakɛna ɔmá bá ná kɛ́áká nióni nɛŋɛ́ŋa ɔ busíə́ bɔ́ bɛndɔ.

¹⁹Bɛndɔ bəəŋí ɔbá bá ná báá bá ndɔ mabɔ́á kɛa, bá ná túə́búə́ tuəfulə tɔ́ mabɔ́á húlə́kə́nə, bá ná tɔɛ́ta titə́kíə́ ɔ nɛnáka. Bá ná mukunə́ wɔ́ tɔ́táyɛ́ tuəfulə fanáka, wɔ́ ka báá moómo álánɔ má tukóló tɔ́ bɛcácɔ́ bɛ́ mɔnɛ́á.[19]

²⁰Nɔ́yɛ́, injiŋə yɛ Isə́lúkú yɛ́ ka bá yɛ́ ndɔ kɛa ɔwá Ɛtambá yɛ́ Huɛlɛ́ yɛ́ áyáka ɔ bɛbɔ́ka bikimə, yɛ́ bɛkɔa bɛŋɛ́ŋa kɛaka tɔ́na.

²¹Əlimə yɛ bɛ́ɛ́yɛ́ bɛyɔŋɔlɛ, Báwolo a ná ihə́ŋiə ɛta, a ná tɔ́mbɛ́ná ɔ nɛkɛ́tɛ nɛ́ misí yɛ Masɛtɔánɛ na yɛ Akáyɛ ɔ ɔwákaka ɔ Yəlúsalɛma, a ná bɛ́láá a sɛ́á: «Ikúílí mɛ ŋɔ kafámá umə́, mɛ ŋɔ sə́kəhúlə́ ɔ Lɔ́ma.»

²²Nɔ́yɛ́, a ná Timotíó na Ɛlasɛ́tɛ ɔ báyɛ́á bɔɔ́lɔ buəkíníə́ ɔ Masɛtɔánɛ, mba, wɛɛ́ya bɛ́múɛ́tɛ́, a ná tíkə́ tɛ́tɛ́á yɛ ikúílí túmbiə ɔ misí yɛ Ásia.

²³Ɔ yɛ́táyɛ́ ikúílí, undumbú wɔ́ ná fínə́ ɔ ɔyáyɛ́na ɔ bɔnɔŋɔ bɔ́ Ɛfɛ́sɛ ɛlɔ́áyɛ́ ɛnɔ́mɛ yɛ́ Isə́lúkú.

²⁴Wɔmɔtɛ́ mɔndɔ a ka báá ɔmɔ́tɔ́yɛ́, mulúnə́ tubilə, nɛ́áyɛ́á niínyə á Tə́mə́tiliúsu, a ka ililí tábɔ́naka na mɔnɛ́á hɔ́ákátɔ́ ɔ tɛ́mbɛlɛ yɛ yɛmɔtɛ́ huɛlɛ́ ɔ muəndú, bá wɛɛ́ya ɛ́lɛakɛnɛna á Alɛtɛmísi, na wɛɛ́ya na bəlúnə, bá bɛcácɔ́ kusəkənə biəŋí ɔ tɔ́mbákɛna na bɔ́táyɛ́ buolí.

²⁵A ná bəlúnə bəkimə na bááyɛ́ ɔbá bá ndɔ tɔkɔakɔ́á tábɔ́na ɔ ɛbɔ́ka ɛ́mɔtɛ́, a ná bəə́bu lɛ́na a sɛ́á: «Á bɛ́ámɛ́á bɛŋgɔ́áyɛ́, nɔ ndɔ manya muɛsɛ ɔwá, níə́súə́ niniŋə nikimə nɛ́ lɛa ɔ tɔ́mbákɛna na bɔ́táná buolí.

²⁶Mba, nɔ ndɔ sinə, nɔ ka ɔ́kɔ́kɛna tɔ́na yatɛ́ ɔyɛ́á wɛ́ɛ́yɛ́ mɔndɔ ɔwá bá ndɔ ɛ́lɛnɛna á Báwolo, a ndɔ laa. A ndɔ fə́mə́ləniə a sɛ́á bɛhuɛlɛ́ ɔbɛ́á bɛndɔ bá ndɔ mɔ́mɔ́la, bɛ́ lɛ bá bɛhuɛlɛ́, a ka kɛaka ɔwá bɛndɔ bəəŋí bá lumínə́ yatɛ́ ɔyɛ́á a ndɔ laa háha ɔ bətínə́ yɛ Ɛfɛ́sɛ na ɔ nɛkɛ́tɛ nɛ́ misí yɛ Ásia.

²⁷Nɔ́yɛ́ yɛ́ óso ɔ tɔkɔma tuəŋí uhúlə́ninə ɔ uwəsú buolí, yɛ kɛaka tɔ́na ɔwá, tɛ́mbɛlɛ yɛ huɛlɛ́ mɛŋɛ́ŋa á Alɛtɛmísi yɛ́ híáná bɔɔ́la bɔ́ ndəmə. Nɔ́yɛ́ bɛndɔ bá sɔ́ ŋɔ wɛɛ́ya bə́tiə tɔ́na ɔ nɛkɛ́tɛ nɛ́ Ásia na ɔ misí ɔbánɔ́ mikimə.»

²⁸Ɛnaka bááyɛ́ bɛndɔ bá nɔ́yɛ́ ɔ́kɔ́kɛ́na, hilóbi hɛ́ ná bəə́bu tuana, bá ná lúmə́ ɔ uyə́mə mɔŋɛ́ŋa bá sɛ́á: «Á Alɛtɛmísi a lɛ́á huɛlɛ́ mɛŋɛ́ŋa ɔ bətínə́ yɛ Ɛfɛ́sɛ.»

²⁹Undumbú wɔ́ ná fínə́ ɔ bətínə́ mikimə, iloŋo bá ná Kayíúsu na Alisitakɛ biɔnjɛ́na á bibíə́nəkənə bɛ́ Masɛtɔánɛ, bá lɛa tɔ́na bikindəniə bɛ́ Báwolo, bá ná bəə́bu ákánána ɔ miímə yɛ hiŋgəyə́.

³⁰Ɛnaka Báwolo á ɔ́kɔ́ nɔ́yɛ́, a ka hikəkiə ɔwá á fámálána ɔ nɛnáka, mba, bəlumininə bá ná wɛɛ́ya sáŋɔ́nɛ́na.

³¹Bɔ́mɔtɛ́ bɔnyɛna baŋɛ́ŋa bá nɛmanɛna ɔ nɛkɛ́tɛ nɛ́ Ásia ɔbá bá ná báá bɛ́áyɛ́á bɛŋgɔ́áyɛ́, bá ná wɛɛ́ya məlíhə́ní lɔ́mɛ́ná tɔ́na ɔkɛaka ɔwá a lɛ ákáná ɔ hítə́yí hiŋgəyə́.

³²Ɔ yɛ́ɛ́yɛ́ ikúílí, kɛsalɛ́á yɛ́ ná fínə́ ɔ uwəbú ətíə́, báaba bá hɔ́kɛna ɔ bɔ́ɔbɔ á bɔkɔa, bə́ə́ní bá əbú hɔ́kɛna ɔ buinə́buinə́. Nioko niəŋí ɔ uwəbú ətíə́ bá lɛ manyá ɛlɔ́áyɛ́ yatɛ́ bá ná kɔtákánɛ́na.

³³Bɔ́mɔtɛ́ Bɛyútɛnɛ bá ná Alɛkɛsándɛlɛ́ nyɛkɛ́na ɔ busíə́, bá ná wɛɛ́ya nífúnə́kínə́ yatɛ́ ɔyɛ́á yɛ́ ndɔ bɛ́tɔ́mba. Alɛkɛsándɛlɛ́ a ná mɔkátá húə́líníə́ ɔkɛaka ɔwá á hɔ́ɔ́kɔ́ ɔ busíə́ bɔ́ ilúkunə. Nɔ́yɛ́ a ka siəkə ɔwá a bínífúnə́ ɔ uwəbú ɛlɔ́á.

³⁴Mba, ɛnaka bɛndɔ bá núnə́ ɔwá a ka báá Mɔyútɛnɛ, bəkimə bá ná yə́mə́níə́, bá ná túmbíə́ hoóyi na bɛháwa bɛ́fandɛ́ bá ndɔ yə́mə bá sɛ́á: «Á Alɛtɛmíti á lɛ́á huɛlɛ́ mɛŋɛ́ŋa yɛ bɛndɔ bá Ɛfɛ́sɛ!»

³⁵Ɔ tifəkə, mutilə wa yɛ́táyɛ́ bətínə́ a ná ilúkunə nə́yíə́, a sɛ́á: «Uwənú á bɛndɔ bá Ɛfɛ́sɛ, ɛ́yánɛ́ a lɛ ndɔ manya ɔwá, bətínə́ yɛ Ɛfɛ́sɛ yɛ́ lɛ́á mutə́tə́níə́ wa tɛ́mbɛlɛ yɛ Alɛtɛmíti na yáyɛ́á ililí ɔyɛ́á yɛ́ ná húlínə́ ɔ ɔmbáŋá əə́?

³⁶Ata mɔndɔ a sa ósó ɔlaa nifəŋə, ɛlɔ́áyɛ́ nɔ́yɛ́, nɔ ná hɔ́ánána utuənə yə́ə́bu, nɔ lɛ bɛkɔa kɛ́á ɛŋaná ubílúmíniə.

³⁷Ɔ taká, nɔ ná bɛndɔ húlə́nə́ háha ɔbá bá sa óbo ɔ tɛ́mbɛlɛ mbá ata yəsúə́ huɛlɛ́ ɔkɔ́ba.

³⁸Ábá Tə́mə́tiliúsu na bɛ́áyɛ́á bɛŋgɔ́áyɛ́ bá ndɔ siə ɔ mɔndɔ ɔsɔ́mɛna, tunó tɔ́ báka ɛlɔ́áyɛ́ bɛkɔa usúmbə́niə, bəkə́lə́siə bá báka tɔ́na, nɔ́ ákáná nɔ́ kásɔ́mɛ́nána uwəbú busíə́.

³⁹Ábá nɔ lɛa na bɔkɔa buinə́buinə́ bɔ́ ɔbata, bá ŋɔ bɔɛ́ta siəkinə ɔ busíə́ bɔ́ ilúkunə ɔyɛ́á bá ná tínímíə́.

⁴⁰Ɔ taká, bá óso uwəsú ɔsɔ́mɛna ɛlɔ́áyɛ́ mətuŋulə ɔmá má ná tɔ́mbáká niɔfɛ́nɛ, ábá bá ná bəsú batá yatɛ́ ɔyɛ́á yɛ́ ná bɛ́tɔ́máká ɛlɔ́áyɛ́ nɛ́ɛnɛ nɛkɔta, tɔ bá na bɔkɔa bɔ́ ɔlaa.» 41 Ɛnaka mutilə a hɔ́ɔ́kɔ́ nɔ́yɛ́, a ná batá ɔwá bɛndɔ bá úlúə́kə.