Read Tunen Bɛnyɛná 20 Bible Online

Bɛnyɛná 20 - Tunen bible

Bɛnyɛná 20

¹Ɛnaka mətuŋulə má hɔ́á, Báwolo a ná bəlumininə kɔtála, a ná bəə́bu óníníə́. Əlimə yɛ nɔ́yɛ́, a ná bəə́bu bíkókíə́ a ná ɛnɔ́mɛ ɛtá ɔ wákaka ɔ nɛkɛ́tɛ nɛ́ misí yɛ Masɛtɔánɛ.

²Ɛnaka á nɛ́táyɛ́ nɛkɛ́tɛ bíásɛ́na, a kɛndaka, a húlə́ bəlumininə ónókiniə ikúílí yɛtatánɛ, a ná káfámá ɔ bɔnɔŋɔ bɔ́ Kɛlɛ́sɛ.

³A ka kɛaka umə́ tuɔŋɔ tɔ́lálɔ́. A ka hikəkiə ɔ lánjɛ ɔwɛta ɔ kɛaka ɔwá a ákáná ɔ nɛkɛ́tɛ nɛ́ Sília, mba, a ná ɔ́kɔ́ ɔwá Bɛyútɛnɛ bá ná wɛɛ́ya hɛtɔkɔ hɔ́kɛ́na ɛlɔ́áyɛ́ ɔwayɛ́ ɔwɔ́nɔ, a ná ihə́ŋiə ɛtá ɔwá a tɔ́mbɛ́ná ɔ Masɛtɔánɛ ɔ kahíánáka.

⁴Ɔ́ bɛndɔ báaba ɔbá bá ná báá bá ndɔ kindəniə: Sobátoloso, á munínyə́ wa Bililuhúsu, mɔndɔ wa bətínə́ yɛ Bələ́ə, Alisitalákɛ na Səkúndusu bɛndɔ bá Tɛsalonɛ́ka, Kayíúsu, mɔndɔ wa Tɛ́lɛbɛ, Timotíó, Tisíki na Tolofíni, á bɛndɔ bá nɛkɛ́tɛ nɛ́ misí yɛ Ásia.

⁵Yɛ́ɛ́yɛ́ ilúkunə yɛ́ bɛndɔ bá əbú buəkínə, bá ná ká bəsú tátáká ɔ Tolowásɛ.

⁶Uwəsú, tɔ ka ɛŋganda yɛ bɛbɛlɛ́tɛ ɛŋaná mətəkí túmbiə ubusíə́ ɔbɔ́á tɔ lánjɛ ɛtá ɔ hɔalakɛna ɔ Filíbia mbá tɔ ákana. Əlimə yɛ tunó tɔ́lánɔ, tɔ ná ká bəə́bu kɔ́ána ɔ Tolowásɛ, tɔ ka túmbíə́ umə́ tunó tɔ́lɛ́ndɔ́lɔ́mɔnɔ.

⁷Ɔ hinó híbúsíə́ hɛ́ nitə́, tɔ ka báá tɔanátɔ́ ɛlɔ́áyɛ́ bɛlɛ́tɛ ɔbɛ́sána ɛ́sɛ́á Yə́susu a ná laa, yɛ́ ka báá ɔwá Báwolo a tilə́ ɔ ɔyáyáka, a ná botólíə́ ɔ bɛndɔ ɔhɛ́na, ɛŋgamɔ́ yɛ́ ná mɔŋáka ɔkafámáká ɔ kɔɔsɔ yɛ nəbulúə́.

⁸Bitiəkətiəkə bɛ́ ka báá biəŋí ɔ ikuíti ɔyɛ́á tɔ ná bámɛ́nɛ́ná kɔtákánátɔ́ ɔ ɛndɛ́ka ɔmbáŋá.

⁹Mɔná bɛnɔ́kɔ́ a ka báá tálɛ́mátɔ́ ɔ nɛfɛma nɛ́ itúbə́, nɛ́áyɛ́á niínyə á Əwutíki, ɛ́sɛ́á Báwolo a ná bá a ndɔ ɔhɔ́ɔ́ ákánana ɔ busíə́, a ná bíndə́ŋúnə́ ɔ hinó, na hinó hikimə, a ná káfálɛ́á ɔ ɛndɛ́ka ɛ́lálɔ́, a ná ndákɔ́á ɔ misí. Ɛnaka bá wɛɛ́ya huəlíníə́, a ka báá a nɔ́ tánána.

¹⁰Báwolo a ná yɛ́ɛ́yɛ́ ikúílí lɔɔ́kɔ, a ná tɛbálɛ́na ɔ ɔwayɛ́ ɛmɛ́ŋɛ́, a ná kutímínə, a ná wɛɛ́ya tuana, a sɛ́á: «Hɛtányɛ́ hɛ́ lɛ bənú kátɛ́á! A lɛa muɔmɔ́!»

¹¹Báwolo a ná híánáka ɔ ɛndɛ́ka ɔmbáŋá, a ná bɛlɛ́tɛ bɛ́sáká ɛ́sɛ́á Yə́susu a ná laa, a ná áfáka, tɔ ná nɛ́áká, a ná ɛŋgamɔ́ ákánáná ɔ busíə́ ɔkafámáká ɔ ɛsɔ́mbalɛ́, əlimə yɛ nɔ́yɛ́, a ná ákana.

¹²Bá ná mɔná bɛnɔ́kɔ́ ɛ́ta, a ka báá muɔmɔ́, nɔ́yɛ́ yɛ́ ka báá mokokoliniə maŋɛ́ŋa isímə ɛlɔ́áyɛ́ bɛndɔ bəkimə.

¹³Báwolo a ka ayɛ́ hikəkíə ɔtɔ́mbɛ́na ɔ mɔndɔ́ŋɔ́ ɔwákaka ɔ bətínə́ yɛ Asóso, tɔ ná əsú lánjɛ ɛta, tɔ ná buəkínə ɔkɛaka ɔwá, a ndá bəsú kɔ́ána mbá tɔ ákana.

¹⁴Ɛnaka a ndá bəsú kɔ́ána ɔ Asóso, tɔ ná wɛɛ́ya ɛtá ɔ uwəsú lánjɛ ɔkɛaka ɔwá tɔ ə́kə́nə́níə́ ɔ bətínə́ yɛ Mitilɛ́nɛ.

¹⁵Tɔ ná hɔalɛ́na umə́, tɔ ná káfámá ɔyáyáka ɔ ɛsalɛ yɛ́ Siyó. Ɔ buɔsɛ́ ɔbɔ́á bɔ́ ná ɔ́ŋgɔ́nɔ, tɔ ná káfámá ɔ Samóso, əlimə yɛ tunó tɔ́fandɛ́, tɔ ná sáhɔtɛla ɔ Tɔlɔkiliyɔ́ŋɔ, tɔ ná ká yɛ́ɛ́yɛ́ ikúílí fámá ɔ bətínə́ yɛ Milɛ́tɛ.

¹⁶Ɔ taká, Báwolo a ka báá hə́ŋíə́tɔ́ ɔkɛaka ɔwá, a lɛ tɔ́mbɛ́ná ɔ Ɛfɛ́sɛ mbá a sɔ́ ŋɔ ikúílí túmbiə ndəmə ɔ nɛkɛ́tɛ nɛ́ Ásia. A ka bá a ndɔ fáha ɔkɛaka ɔwá, ábá ɔmbáŋá a ná índíə́, a hútú kafámá ɔ Yəlúsalɛma ɔ buɔsɛ́ bɔ́ Bɛndɛkɔ́sɛtɛna. (Nitukinə nɛ́ Umbúínyi)

¹⁷Báwolo wɛɛ́ya ɔ Milɛ́tɛ, a ná fámá ɔ lánjɛ, a ná mɛsɔ́ma lɔ́má ɔ Ɛfɛ́sɛ ɔkɛaka ɔwá, bɛkámɔ bɛ́ ilúkunə yɛ́ Huɛlɛ́ bá ndá wɛ́ya siəlínə.

¹⁸Ɛnaka bá ndáfámá ɔ ɔwayɛ́ busíə́, a ná bəə́bu lɛ́na a sɛ́á: «Nɔ ndɔ manya nəníə́ mɛ́ ná bítíkə́kə́ uwənú ətíə́ ɔ botolokiə ɔ hinó ɔhɛ́á mɛ́ ná ndáfámá ɔ misí yɛ Ásia.

¹⁹Mɛ ka Isə́lúkú nyɔkɛna na nɛlɛaŋɛ nikimə, na bililíní ɔ məə́sə, Bɛyútɛnɛ bá ka mɛaŋɔ́á tɔtɔkɔ hɔ́kɛna, bá ná mɛaŋɔ́á indomí nyə́kíə́.

²⁰Mɛ sa bítə ata bɔkɔa ɔbɔ́á bɔ́ na báá buɛsɛ ɛlɔ́áyɛ́ ənú, ɔ nifəŋə, mɛ ka bənú nɔŋɔnakɛna bɛkɔa bikimə, mɛ ná bənú úkúnə́kíə́ tɔ́na ɔ nɛnáka na ɔ uwənú mambɛ́la.

²¹Bɔkɔa bɔ́mɔtɛ́ mɛ ná bá mɛ ndɔ lɛna ɔ Bɛyútɛnɛ, na bááyɛ́ ɔbá bá lɛ bá Bɛyútɛnɛ, bá mɔlɛ́má kɔ́ŋɔ́ná, bá níə́búə́ nɛkɔmba tálɛ́ná á yəsúə́ Isə́lúkú a Yə́susu.»

²²«Isíŋáka, ɔ́ wə́míə́ ɔwákaka wúuwu ɔ Yəlúsalɛma ɛ́sɛ́á Umbúínyi Mɔnaŋanaŋa wɔ́ ná mɛaŋɔ́á mánɛ́na ɔwá mɛ kɛ́áka, mɛ lɛ ndɔ manya yatɛ́ ɔyɛ́á yɛ́ ndɔ mɛaŋɔ́á táta umə́.

²³Mɛ ndɔ manya ɔbánɔ́ mɛ sɛ́á Umbúínyi Mɔnaŋanaŋa wɔ́ ndɔ mɛaŋɔ́á mənyəsiə ɔwá, ɔ bətínə́ tɛ́á, ɛbɔka na məsə́kə má ndɔ mɛaŋɔ́á táta.

²⁴Mba, bɔ́ámɛ́á buɔmɔ́ bɔ́ lɛ bá na mɔsɛ́ŋɛ́ ɔ ɔwámɛ busíə́. Mɛ lɛa na mɔsɛ́ŋɛ́ ɔ bɔsɔ́ma ɔhɔ́nala ɔbɔ́á Isə́lúkú á Yə́susu a ná mɛaŋɔ́á índíə́. Mɛ ná hɔ́ánána ɔ Imbə́nú Yɛɛsɛ uyəmbələniə na ɔlaa ɔwá, taká, Huɛlɛ́ a lɛ́á na mɔlɛ́má muɛsɛ ɛlɔ́áyɛ́ bɛndɔ.»

²⁵«Mɛ ka tɔ́mbáka ɔ ətíə́ yɛ́ bənú bəkimə, mɛ húlə́ Imbə́nú Yɛɛsɛ nɔŋɔnaka ɛlɔ́áyɛ́ Nɛmanɛna nɛ́ Huɛlɛ́, mba, isíŋáka, mɛ ndɔ manya ɔwá ata ɔmɔtɛ́ ɔ uwənú ətíə́ a sa ndá mɛaŋɔ́á sínə́ tɔ́na.

²⁶Ɔ́ ɛlɔ́áyɛ́ nɔ́yɛ́ mɛ ndɔ bənú lɛna niɔfɛ́nɛ ɔwá, ábá ɔmɔtɛ́ ɔ uwənú ətíə́ a ná nímínə́, tátá híə́míə́ hɛkɔma hííyí.

²⁷Ɔ taká, mɛ ka bə́nú lakɛna bikimə ɔbɛ́á Huɛlɛ́ a ndɔ siə ɔwá nɔ kɛ́áka, mɛ sa bítə ata bɔkɔa.

²⁸Bənú bɛ́múɛ́tɛ́ nɔ́ bítə́tə́kə́níə́, nɔ́ hiɔ́bɔ hikimə tə́tə́kə́níə́ ɔhɛ́á Umbúínyi Mɔnaŋanaŋa wɔ́ ná híə́níə́ ɔ uwənú makátá ɔwá nɔ kɛndákána: Ɔ́ niɔŋɔ́ sɛ́á á ilúkunə yɛ́ Huɛlɛ́ ɔyɛ́á a ná háŋɔ́ná ɔ tɔ́mbákɛna na máyɛ́á manɔ́ŋɔ́ má bɛ́múɛ́tɛ́.»

²⁹«Mɛ ndɔ manya muɛsɛ mɛ sɛ́á ɛnáká mɛ́ bənú tíkə́, bɛndɔ ɔ́maná ɛ́sɛ́á bɛŋgaŋgɔ́á, bá ŋɔ fíə́kinə ɔ uwənú ətíə́, bá sɔ́ ŋɔ mahana wə́ə́ ata mɔndɔ.

³⁰Ata ɔ uwənú umúlə bɛ́múɛ́tɛ́, bakanjakanja bá ŋɔ fámálakana, bá ŋɔ bɛndɔ nímbə́kə ɔkɛaka ɔwá, bəlumininə bá bəə́bu ɔŋgɔ́kɔ.

³¹Nɔ́yɛ́, nɔ́ bámɛ́nɛ́ná ɛmbɛnyɛ́, nɔ́ bɛ́kɔ́lɔ́mɔ́ná nɔ sɛ́á ɔ ətíə́ yɛ tuɔŋɔ tɔ́lálɔ́, bulúə́ na buɔsɛ́ tɛ́á, mɛ sa súkə ɔ mɔɛ́ta tɛ́á uwokósiə na bililíní ɔ məə́sə.

³²Isíŋáka, mɛ ndɔ bənú híə́niə á Huɛlɛ́ makátá ɔkɛaka ɔwá, nɔ yáyɛ́á ɛtambá bɛ́kɛ́ákɛ́na, yɛ́táyɛ́ ɛtambá yɛ́ ndɔ ínə́niə ɔwá a ndɔ bəsú hikiə. Yɛ́ lɛa na iŋgínə́ ɔkɛaka ɔwá, yə́núə́ ilumininə yɛ́ ɔ́mbɔ́kɔ, na uwənú ɔ maasɛ uwíndiə ɔmá Huɛlɛ́ a ná tə́tə́níníə́ ɔ bááyɛ́ bəkimə ɔbá bá lɛ́á báyɛ.»

³³«Mɛ sa niísə háá ɔ mɔnɛ́á, ɔ kóolo mbá ata ɔ bɔlɛŋa bɔ́ mɔndɔ.

³⁴Nɔ ndɔ manya bənú bɛ́múɛ́tɛ́ ɔwá, mɛ ka nyɔɔkɔ na mámɛ́á makátá ɔkɛaka ɔwá mɛ niŋə́kə, mɛ bɛ́ámɛ́á bikindəniə ɔ́lɔ́kɛ́na.

³⁵Mɛ ka bənú ínə́kiniə ɔ bɛkɔa bikimə ɔwá, mɔndɔ a ná hɔ́ánána ɔnyɔɔ ɔkɛaka ɔwá a tɔtɔyɔ́nɔ́ ɔ́lɔ́kɛ́na, na bɛ́ɛbɛ bɛtambá bɛ́ yəsúə́ Isə́lúkú á Yə́susu ɔbɛ́kɔ́lɔmɔna ɔbɛ́á wɛɛ́ya bɛ́muɛ́tɛ́ a ná fə́mə́lə́níə́ a sɛ́á: “Nɛhɔnɔ nɛŋɛ́ŋa nɛ́ báka ikúílí ɔ ndɔ índiənə, yáyɛ́ná ikúílí ɔ ndɔ kusənə.”»

³⁶Əlimə yɛ bɛ́ɛ́yɛ́ bɛtambá bá ná kiníə́, Báwolo a ná bɛ́kálákɛ́na.

³⁷Bɛndɔ bəkimə bá ná mə́kúnúə́ ɔ malɛlá, bá ná Báwolo bɛsɔba, bá wɛɛ́ya bíbóŋokiniə ɛlɔ́áyɛ́ mokokoniə.

³⁸Bá ka báá na busə́kə sulusulu bɔkɔasɛ́á, a ka bəə́bu lɛna ɔwá bá sɔ́ ŋɔ wɛɛ́ya sinə tɔ́na. Əlimə yɛ nɔ́yɛ́, bá ná ká wɛɛ́ya tíkə́ ɔkafámáká ɔ nifíə́kinə ɔ lánjɛ.