Read Tunen Bɛnyɛná 21 Bible Online

Bɛnyɛná 21 - Tunen bible

Bɛnyɛná 21

¹Ɛnaka bəsú na Báwolo tɔ bɛndɔ bá Ɛfɛ́sɛ tíkə́, tɔ ná lánjɛ ɛtá ɔ wákaka ɔ Kɔɔsɔ, ɔyáyáka, tɔ ná ákáná ɔ Lɔ́tɛsɛ, ɔmɔ́tɔ́yɛ́ tɔ́ ná hɔ́álɛ́nɛ́na ɔ ɔwákaka ɔ bətínə́ yɛ Batala.

²Ɛnaka tɔ káfámá umə́, Tɔ ná lánjɛ kɔ́ána ɔyɛ́á yɛ́ ndɔ ákána ɔ nɛkɛ́tɛ nɛ́ misí yɛ Finisíə́, tɔ ná finə, tɔ ná ákana.

³Tɔ ná lúmə́ ɔ ɔbɛ́nya tɔ ka bɔnɔŋɔ bɔ́ Síbili siəkínə́ hata, tɔ ná tɔ́mbɛ́ná ɔ matá má yɛ́táyɛ́ iloóló yɛ́ misí, tɔ ná mɔkɛnda ɛtá nuíyi ná nuíyi ɔ wákaka ɔ nɛkɛ́tɛ nɛ́ Silíə́, tɔ ná ákáná ɔ bətínə́ yɛ Tííli, ɔmɔ́tɔ́yɛ́ á lánjɛ yɛ́ ná malɔmɔ́ túkə́kíníə́.

⁴Tɔ ná hiamáka, tɔ ná ká bəlumininə kɔ́ána umə́, tɔ ná tuə́nə́ nitə́ nikimə na bəə́bu. Umbúínyi Mɔnaŋanaŋa wɔ́ ná bəə́bu ɛmanya ubunə, bá ná Báwolo lɛ́na ɔwá, a lɛ ákáná ɔ Yəlúsalɛma.

⁵Ɛnaka nitə́ nɛ́ tɔ́mbá, tɔ ná mɔkɛnda ákánána ɔ busíə́, bəə́bu bəkimə, bə́búə́ bəəndú na baná, bá ná ká bəsú tíkə́ ɔ fámálakana ɔ bətínə́, ɔ tanɛ́ yɛ nɔmɔ́. Tɔ ná kiníə́ ɔ ɛsɛ́lɛ́ yɛ́ nɔmɔ́, tɔ ná bɛ́kálákɛ́na.

⁶Əlimə yɛ bɛtambá bɛ́ mokokoniə, tɔ ná fíə́kínə ɔ lánjɛ, bá ná əbú tilə́ ɔ́ uwəbú mambɛ́la.

⁷Tɔ ná hɔalɛ́na ɔ Tííli, ɔ wákaka ɔ Botolə́mayísi. Tɔ ná tukínə ɔ lánjɛ, tɔ ná bənísə́ bá yɛ́táyɛ́ bətínə́ síə́kə, tɔ́ ná húlə́ bəə́bu bíhólokiə, tɔ ná túmbíə́ hinó hímotí na bəə́bu.

⁸Tɔ ná hɔalɛ́na ɔ ɔyáyáka, tɔ ná káfámá ɔ bətínə́ yɛ Sɛsalɛ́, bəsú ɔmɔ́tɔ́yɛ́, tɔ ná ákáná á Filíbo ɔmbɛ́la a Mɔnɔŋɔna, a ka báá ɔmɔtɛ́ wa bálɛ́ndɔ́lɔ́mɔnɔ ɔbá bá ná tɛ́fáká ɔ Yəlúsalɛma, tɔ ná tuənə́kínə na wɛɛ́ya.

⁹A ka bá na bɛkɔ́njɛ́ bɛ́ baná bəəndú bínisə ɔbá bá ná báá bá ndɔ mɛsɔ́ma nɔŋɔna ɔyɛ́á Huɛlɛ́ a ná bá a ndɔ bəə́bu lɛna.

¹⁰Tɔ ka mɔŋala umə́ tɛ́tɛ́á yɛ tunó, wɔmɔtɛ́ mɔhɛ́nátɔtányɛ́ a ná húlínə́ ɔ Yútɛa, nɛ́áyɛ́á niínyə á Akabúsu, a ná ndáfámá ɔ ɔmbɛ́la ɔ ɛbɔ́ka ɔyɛ́á tɔ ná bámɛ́nɛ́na.

¹¹Ɛnaka a ndáfámá uwəsú busíə́, a ná hɛlɔ́ŋa hɛ́ Báwolo tuŋúnə, a ná makɔlɔ́ bɛ́ɔ́lɔ́kɔ́kɔ́ na makátá, a sɛ́á: «Umbúínyi Mɔnaŋanaŋa wɔ́ ndɔ fə́mə́ləniə ɔwá, náana Bɛyútɛnɛ bá ŋɔ mɔndɔ wa híihi hɛlɔ́ŋa ɔ́lɔ́kɔkɔ ɔ Yəlúsalɛma, əlimə yɛ nɔ́yɛ́, bá wɛɛ́ya hánɛ́na ɔ bááyɛ́ ɔbá bá lɛ bá Bɛyútɛnɛ!»

¹²Ɛnaka tɔ bɛ́ɛ́yɛ́ bɛtambá ɔ́kɔ́kɛ́na, bəsú bɛ́múɛ́tɛ́ na bənísə́ bá Sɛsalɛ́, tɔ ná Báwolo bɛ́táŋɔ́náka ɔwá a lɛ ákáná ɔ Yəlúsalɛma.

¹³Mba, a ná bɛ́kámɔ́sɔ́na a sɛ́á: «Ɛlɔ́áyɛ́ yatɛ́ nɔ ndɔ lɛlɛna, nɔ ndɔ siə tɔ́na ɔ ɔwámɛ utombiə əə́? Ɔwámɛ, mɛ lɛa hoóyi, tátá ɔwá bá mɛaŋɔ́á ɔ́lɔ́kɔ́kɔ ɔbánɔ́, mba, ɔ uwínə ɔ Yəlúsalɛma ɛlɔ́áyɛ́ Isə́lúkú a Yə́susu.»

¹⁴Ata nɔ́yɛ́ ɛ́sɛ́á tɔ ná wɛɛ́ya ɔtɛ́na ɔwá a lumínə, a ná ŋaŋɛma, tɔ ná əsú niása, tɔ sɛ́á: «Isə́lúkú á wə́yíə́ usiə úndúsíníə́.»

¹⁵Ɛnaka yɛ́táyɛ́ tɛ́tɛ́á yɛ tunó yɛ tɔ́mbá, tɔ ná bɛ́tábɔ́náka, ɔ ɔwákaka ɔ Yəlúsalɛma.

¹⁶Bɔ́mɔtɛ́ bəlumininə bá Sɛsalɛ́ bá ná ká bəsú tíkə́ umə́, bá ná bəsú ákánána ɔ wɔmɔtɛ́ mɔndɔ ɔwá yɛ́ ná báá ɔwá á bəsú tə́tə́níə́, nɛ́áyɛ́á niínyə á Manasɔ́nɔ, mɔndɔ wa bɔnɔŋɔ bɔ́ Síbili, a ka bá a nɔ́ mɔŋaka ɛ́sɛ́á a ná lúmínínə.

¹⁷Ikúílí tɔ ná káfámá ɔ Yəlúsalɛma, bənísə́ bá ná ndá bəsú káhá na nɛhɔnɔ.

¹⁸Ɔ ɔyáyáka, tɔ ná ə́kə́nə́níə́ na Báwolo á Yákɔbɔ ɔmbɛ́la ɔhá bɛkámɔ bɛ́ ilúkunə bá ná báá kɔtálánátɔ.

¹⁹Báwolo a ná bəə́bu bíhólíə́, a ná bəə́bu bɛkɔa bikimə nɛŋɔ́nákɛ́ná hoóyi hoóyi ɔbɛ́á Huɛlɛ́, a ná úndúsíníə́ ɔ tɔ́mbákɛna na wɛɛ́ya ətíə́ yɛ bááyɛ́ ɔbá bá lɛ bá Bɛyútɛnɛ.

²⁰Ɛnaka bá bɛ́ɛ́yɛ́ bɛtambá ɔ́kɔ́kɛ́na, bá ná Huɛlɛ́ tɔnyamáná híə́níníə́, bá ná Báwolo lɛná bá sɛ́á: «Á munísə́, ɔ ná síə́kínə, Bɛyútɛnɛ biəŋí bá ná híáná bəlumininə, bəə́bu bəkimə bá ndɔ umbə́ndə́ bítə́tə́niə ɔwá Mósisi a ná úkúnə́kíə́.

²¹Mba, bá ka bəə́bu lɛna ɔwá, ɔ ndɔ Bɛyútɛnɛ bikimə lɛ́ha ɔbá bá lɛ́á ɔ mɔnɔŋɔ mənə́mənə́ uwukúniə ɔwá, ba lɛ umbə́ndə́ wɔ́ Mósisi bɛ́kɛ́na. Yɛ́ lɛa tɔ́na ɔwá, bá lɛ bə́búə́ baná ánda, bá lɛ bɛnɛ́ma bɛ́ Bɛyútɛnɛ ɔŋgɔ́ tɔ́na.

²²Nəníə́ tɔ́ kɛáka əə́? Bá ndɔ ɔ́kɔ́kɛna muɛsɛ muɛsɛ ɔwá ɔ ná ndáfama háha.

²³Ɛ́sɛ́á bɔ́ lɛ́á nɔ́yɛ́, kɛ́áka ɔbánɔ́ yatɛ́ ɔyɛ́á ɛkasɛ tɔ́ aŋɔ́á lákɛ́na. Bɛndɔ bə́nisə bá lɛa háha ɔbá bá ná nɛkaka hákɛ́na na Huɛlɛ́.

²⁴Ákánáná bəə́bu, nɔ́ nibínə́ŋəsiə túmbə́kíə́ na bəə́bu, sábɔ́na yatɛ́ ɔyɛ́á bá ná hɔ́ánána ɔbɛ́tɛ́ŋɛna ɛlɔ́áyɛ́ nɛhánɛna uwíndiə, əlimə yɛ nɔ́yɛ́ mbá bá bənú mɔlɔ́á kɛsaka. Nɔ́yɛ́, bɛndɔ bəkimə bá ŋɔ manya ɔwá, bikimə ɔbɛ́á bá ná hɔ́ɔ́kɔ́ ɔ ɔwáwɔ́ ɛsalɛ, bɛ́ lɛ bá taká, mba, aŋɔ́á tɔ́na ɔ ndɔ umbə́ndə́ wɔ́ Mósisi bɛ́kɛna.

²⁵Ɛlɔ́áyɛ́ bááyɛ́ ɔbá bá lɛ bá Bɛyútɛnɛ, ɔbá bá ná híáná bəlumininə, tɔ ka bəə́bu bíə́súə́ bɛtɛ́nɛ́mɛ́ná tiləkinə ɔwá: Bá sá hɔ́ánana ɔ mɛnyama yɛ́ bisíə́kí ɔnɛ́á ata manɔ́ŋɔ́, mɛnyama ɔnɛ́á ɔyɛ́á bá sá sɛkala mbá ata bɛkɔa bɛ́ nilókóno.»

²⁶Báwolo a ná nɔ́yɛ́ ɔ́kɔ, ɔyáyáka, a ná bááyɛ́ bɛndɔ bə́nisə ákánána, a ná nibínə́ŋəsiə botólíə́, a ná ákáná ɔ Tɛ́mbɛlɛ ɔkɛaka ɔwá a ikúílí tínímíə́ ɔyɛ́á, ábá nibínə́ŋəsiə nɛ́ ná tɔ́mbá, bá nɛhánɛna índíə́ á Huɛlɛ́ ɛlɔ́áyɛ́ mɔɛ́ta tɛ́á.

²⁷Tunó tɔ́lɛ́ndɔ́lɔ́mɔnɔ tɔ́ nibínə́ŋəsiə tɔ́ ka báá ɔ ɔhɔ́ákɔna, bɛ́mɔtɛ́ Bɛyútɛnɛ bá ka húlínə ɔ nɛkɛ́tɛ nɛ́ misí yɛ Asia, bá Báwolo yámá ɔ Tɛ́mbɛlɛ, bá ná iloŋo yikimə kúə́yə́síə́, bá ná Báwolo biɔnjɛ́na.

²⁸Bá yə́mə́kə bá sɛ́á: «Á bɛndɔ bá Ísilahɛ́lɛ, nɔ́ ndá bəsú ɔ́lɔ́ oo! Ɔ́ mɔndɔ wɔ́ɔwɔ ɔwá a ndɔ yə́súə́ ilúkunə nuəsiə na umbə́ndə́ wɔ́ Mósisi, a ndɔ bilə́líə́ úkúniə ɔ bɛbɔ́ka bikimə ɔwá, yɛ́ɛ́yɛ́ Tɛ́mbɛlɛ yɛ́ lɛa bɔɔ́la bɔ́ ndəmə, a ndɔ fínə umə́ na bááyɛ́ ɔbá bá bá lɛ bá Bɛyútɛnɛ, nɔ́yɛ́ a ndɔ ɛbɔ́ka yɛnaŋanaŋa tífílə.»

²⁹Bá ka hɔ́ɔ́kɔ́ nɔ́yɛ́ bɔkɔasɛ́á, bá ka taŋa á Báwolo usinə na Tɔlɔfímə á mɔndɔ wa Ɛfɛ́sɛ ɔ bətínə́, bá fɛkaka ɔwá a ka wɛɛ́ya fínənə ɔ Tɛ́mbɛlɛ.

³⁰Undumbú wɔ́ ná fínə́ ɔ bətínə́ mikimə, bɛndɔ bá bɔnɔŋɔ bá ná fə́mə́kə́níə́ ɔ bɛátɛ bikimə. Bá ná Báwolo halɛ́na, bá ná wɛɛ́ya túlúlə́kə́ hata na Tɛ́mbɛlɛ, ɔ umisíúmə́ bá ná tɔkɔ́kɛ fanjáka.

³¹Bá ka siəkə ɔ ɔwayɛ́ ɔwɔ́nɔ. Bá ná ká mɔmanɛna wa mɔlɔ́ŋɔ́ wɔ́ bilə́ wa Lɔ́ma lɛ́na ɔwá Yəlúsalɛma yikimə yɛ́ ndɔ nyɛŋa.

³²Ɔ umisíúmə́, mɔmanɛna wa banɔabilə́ a ná bisə́lúkú bɛ́ bɔkɔfɔnɛa na bɔkɔfɔnɛa kɔtáka, bá ná ákáná ɔ ɛbɔ́ka ɔyɛ́á ilúkunə yɛ́ ná bámɛ́nɛ́na. Ɛnaka ilúkunə yɛ́ bəə́bu yámá, bá ná Báwolo niása, bá lɛ wɛɛ́ya súbə́ tɔ́na.

³³Nɔ́yɛ́, mɔmanɛna wa mɔlɔ́ŋɔ́ a ná tɔ́mbálɛ́la ɔwayɛ́ busíə́, a ná iŋgínə́ índíə́ ɔwá, bá wɛɛ́ya bandáká na mɛsáŋa ífəndí; a ná bɛndɔ batá a sɛ́á baánɛ, ɛ́yánɛ́ mɔndɔ mɔ́tána, yatɛ́ a ná kɛ́áka əə́?

³⁴Mba, ɔ ətíə́ yɛ iloŋo, kɛsalɛ́á yɛ́ ná finə, báaba bá yə́mə́kinə ɔ bɔ́ɔbɔ á bɔkɔa, bə́ə́ní bá əbú yə́mə́kinə ɔ búíní á bɔkɔa, ɛ́sɛ́á mɔmanɛna wa mɔlɔ́ŋɔ́ a sa ɔ́kɔ ata bɔkɔa ətíə́ yɛ mayákasɛ, a ná iŋgínə́ índíə́ ɔwá bá Báwolo bálákáná á munəni ɔ ɔmbɛ́la.

³⁵Ɛnaka Báwolo a ndáfámá ɔ bɔkɔ́lá, bɔkɔfɔnɛa bá ná wɛɛ́ya túánáká bɔkɔasɛ́á, iloŋo yɛ́ ka báá yɛ́ ndɔ wɛɛ́ya híóŋiə mɔbɛ́á.

³⁶Nɔ́yɛ́, ilúkunə yikimə yɛ́ ka bá yɛ́ ndɔ wɛɛ́ya oŋgoniə, bá yə́mə́kə bá sɛ́á: «A ná hɔ́ánána á wəə.»

³⁷Ɔ ikúílí ɔyɛ́á bá ná báá ɔwá bá Báwolo fínə́nə ɔ miímə yɛ bɔkɔfɔnɛa, a ná mɔmanɛna wa banɔabilə́ lɛ́na a sɛ́á: «Baánɛ, mɛ óso ɔ ɔwáwɔ ɔ bɔkɔa ɔlɛna əə́?» mɔmanɛna wa banɔabilə́ a sɛ́á: «Ɔ ndɔ manya ɔ Kɛlɛ́kɛ ɔhɔ́ɔ́ əə́?

³⁸Tátá aŋɔ́á wɛ́ɛ́yɛ́ mɔndɔ wa Ikíbíto ɔwá, a nana mɔŋá, a nɔ́ undumbú háá ɔ bɔnɔŋɔ, a ná tukóló túnisə tɔ́ bɛndɔ bá ɛmbɔ́ma ákáná tɔ́na ɔ makɔ́tákɛ əə́?»

³⁹Báwolo a sɛ́á: «Baánɛ, ɔwámɛ əə́? Mɛaŋɔ́á Mɔyútɛnɛ, bá ka mɛaŋɔ́á bíə́nə ɔ Tálɛsɛ, ɔ nɛkɛ́tɛ nɛ́ misí yɛ Silisíə́, ifəyí yɛ yɛ́ɛyɛ bətínə́ ɔyɛ́á yɛ́ ndɔ úmə. Tɔ́kɔ́lɛ, índíə́ mɛaŋɔ́á iŋgínə́ ɔwá mɛ yɛ́ɛyɛ ilúkunə hɔ́kɛ́na.»

⁴⁰Mɔmanɛna wa banɔabilə́ a ná wɛɛ́ya iŋgínə́ índíə́, Báwolo a ná tɛ́nɛ́má ɔ bɔkɔ́lá, a ná ilúkunə nə́yíə́ na mɔkátá. Bɛndɔ bəkimə bá ná nə́yə́níə́ yə́ə́bu, Báwolo a ná ɛtambá ɛ́tá na nihókí nɛ́ Bɛyútɛnɛ,[20] a sɛ́á: