Read Tunen Bɛnyɛná 22 Bible Online

Bɛnyɛná 22 - Tunen bible

Bɛnyɛná 22

¹«Á bənísə́ na bisə́, nɔ́ ɔ́kɔ́kɛ́na isíŋáka yatɛ́ ɔyɛ́á mɛ ndɔ siə ɔ uwənú ɔlɛna ɛlɔ́áyɛ́ nɛ́ámɛ́á nɛbɛ́kála.»

²Ɛnaka bá ɔ́kɔ́ ɔwá Báwolo a ndɔ bəə́bu hɛ́na na nihókí nɛ́ Bɛyútɛnɛ, ɛmbɔ́kɔ yɛ́ ná náyá míɔ́ŋɛ. Nɔ́yɛ́, Báwolo a ná fə́mə́lə́níə́ a sɛ́á:

³«Mɛaŋɔ́á Mɔyútɛnɛ, bá ka mɛaŋɔ́á bíə́nə ɔ Tálɛsɛ, ɔ nɛkɛ́tɛ nɛ́ misí yɛ Silisíə́, mba, háha ɔ yɛ́ɛyɛ bətínə́ mɛ́ ná ɔ́mbɔ́kɛ́na, wamɛ́á mulə́liə á Kamaliɛ́lɛ, wɛɛ́ya a ná mɛaŋɔ́á ínə́kíníə́ nəníə́ mɛ umbə́ndə́ wɔ́ bíə́súə́ bisə́kínə́ ɔ́ŋgɔ́kɔ́ muɛsɛ muɛsɛ. Mɛ ka bá mɛ ndɔ Huɛlɛ́ hikiə mɔŋɛ́ŋa ɛ́sɛ́á bənú niɔfɛ́nɛ.

⁴Mɛ ka bááyɛ́ ɔbá bá ndɔ ɔŋgɛna ɔ ɛnɔ́mɛ yɛ́ Isə́lúkú indomí índiəkinə ɔ ɔyáyɛ́na, mɛ ka siəkə ɔ uwəbú ɔwɔ́nɔ. Mɛ bəəndú na balɛ́mɛndɔ́ halɛakɛna, mɛ bəə́bu hákɛna ɔ ɛbɔka.

⁵Mutitiəmahánɛna mɔŋɛ́ŋa na bɛkámɔ bikimə bɛ́ ilúkunə bá óso ɔ imbóŋi ufə́mə́ləniə ɔwá, taká mɛ ndɔ laa. Bəə́bu bá ná mɛaŋɔ́á hiəfulə índíə́ ɔkɛaka ɔwá mɛ ákáná ɔ bətínə́ yɛ Tamásɛ, mɛ ka bə́súə́ bənísə́ halɛ́ákɛ́na ɔbá bá ndɔ ɔŋgɛna ɔ ɛnɔ́mɛ yɛ́ Isə́lúkú, mɛ ndá bəə́bu híánána ɔ Yəlúsalɛma ɔkɛaka ɔwá bá bəə́bu sɔkɔ́tɛ́á.»

⁶«Mɛ ka báá ɔ ɛmbandá yɛ ɛnɔ́mɛ ɔ wákaka umə́, ɛnaka mɛ báá hoóyi na Tamásɛ, ɔ kɔɔsɔ, həmə́tu, isəmú yɛŋɛ́ŋa yɛ́ ná húlínə́ ɔ ɔmbáŋá, yɛ́ ná mɛaŋɔ́á húə́ na yáyɛ́á ɛsakɛsakɛ.

⁷Mɛ ná kɔ́á ɔ misí, mɛ ná nióni ɔ́kɔ́ nɛ́ ndɔ mɛaŋɔ́á lɛna nɛ́ sɛ́á: “Á Sáwolo, á Sáwolo, ɛlɔ́áyɛ́ yatɛ́ ɔ ndɔ mɛaŋɔ́á təkəsinə əə́?”

⁸Mɛ ná batá mɛ sɛ́á: “Á Isə́lúkú, aŋɔ́á ɛ́yánɛ́ əə́?” Nióni nɛ́ sɛ́á: “Mɛaŋɔ́á Yə́susu wa Násalɛtɛ, wɛ́ɛ́yɛ́ ɔwá ɔ ndɔ təkəsə.”

⁹Bɛ́ámɛ́á bikindəniə bá ka isəmú siəkinə muɛsɛ, mba, bá sa nióni ɔ́kɔ ɔnɛ́á nɛ́ ná bá nɛ́ ndɔ mɛaŋɔ́á hɛ́na.

¹⁰Mɛ ná batá mɛ sɛ́á: “Á Isə́lúkú, nəníə́ mɛ́ kɛ́áka əə́?” Isə́lúkú a ná mɛaŋɔ́á lɛ́na a sɛ́á: “Hɔalɛ́na, káka ɔ bətínə́ yɛ Tamásɛ ɛkasɛ bá aŋɔ́á lákɛ́ná yatɛ́ ɔyɛ́á Huɛlɛ́ a ndɔ hikiə ɔwá ɔ ná hɔ́ánána ɔkɛa.”

¹¹Mba, ɛ́sɛ́á ɛsakɛsakɛ yɛ́ yɛ́ɛ́yɛ́ isəmú yɛ́ ná mɛaŋɔ́á indímə́ lúmə́, bɛ́ámɛ́á bikindəniə bá ná mɛaŋɔ́á itíə́ ɔ mɔkátá ɔkɛaka ɔwá mɛ káfámá ɔ Tamásɛ.»

¹²«Wɔmɔtɛ́ mɔndɔ a ka báá ɔmɔ́tɔ́yɛ́, nɛ́áyɛ́á niínyə á Ananiásɛ, a niŋəkə ɛ́sɛ́á Huɛlɛ́ a ndɔ siə, a wə́súə́ Umbə́ndə́ ɔ́kɔ́kɛnɛna tɔ́na, Bɛyútɛnɛ bikimə bɛ́ Tamásɛ bá wɛɛ́ya hikəkiə.

¹³A ná ndáfámá ɔwámɛ busíə́, nɔ́yɛ́, a ná mɛaŋɔ́á lɛ́na a sɛ́á: “Á Sáwolo, á munísə́, híána usinənə!” Ɔ umisíúmə́, məə́sə má ná mɛaŋɔ́á yaa, mɛ ná wɛɛ́ya bɔŋɔ.

¹⁴A ná mɛaŋɔ́á lɛ́na a sɛ́á: “Huɛlɛ́ yɛ bíə́súə́ bisə́kínə́ a ka aŋɔ́á tɛ́fa ubusíə́ bɔ́ ikúílí ɔkɛaka ɔwá ɔ wə́yíə́ usiə manya, ɔ́ wɛ́ɛ́yɛ́ síə́kínə ɔwá a lɛ́á bíbúə́ Wataká, ɔ́ nɛ́áyɛ́á nióni nɛ́ bɛ́múɛ́tɛ́ ɔ́kɔ́kɛ́na tɔ́na.

¹⁵Ɔ taká, ɔ ná hɔ́ánáná ɔbáá wayɛ́á mumbóŋímboŋi ɔkɛaka ɔwá, ɔ bɛndɔ bəkimə nɔŋɔ́nákɛ́na yatɛ́ yikimə ɔyɛ́á ɔ́ ná síə́kínə, ɔ́ ná ɔ́kɔ́kɛ́ná tɔ́na.

¹⁶Isíŋáka, yatɛ́ ɔ ndɔ táta tɔ́na əə́? Hɔalɛ́na, bɛ́kálákɛ́ná wɛɛ́ya, ɔ́ nɛsɔa kusə́nə, Huɛlɛ́ á aŋɔ́á máwɔ́á mabɛ́á niasɛna.”»

¹⁷Báwolo a ná láá tɔ́na a sɛ́á: «Mɛ ná híánáka ɔ Yəlúsalɛma, bɔ́mɔtɛ́ buɔsɛ́ mɛaŋɔ́á ɔ mabɛ́kálɛ́na ɔ Tɛ́mbɛlɛ nuúmə́, mɛ ná kɔ́á ɔ binónó.

¹⁸Mɛ ná Isə́lúkú yámá a ndɔ mɛaŋɔ́á lɛna a sɛ́á: “Ɔ lɛ yɛ́ná bɔ́ányɛ, hɔalɛ́ná tɔfá ɔ Yəlúsalɛma bɔkɔasɛ́á, bɛndɔ bá sɔ́ ŋɔ imbóŋi luminə ɔyɛ́á ɔ ndɔ híə́nəkiniə ɔ ɔwámɛ ɛlɔ́á.”

¹⁹Mɛ ná bíhíə́níníə́ mɛ sɛ́á: “Á Isə́lúkú, bá ndɔ manya muɛsɛ ɔwá, mɛaŋɔ́á mɛ́ lɛ ákaka ɔ məə́bə má mabɛ́kálɛ́na ɔkɛaka ɔwá, mɛ bááyɛ́ bəkimə hákɛ́na ɔ ɛbɔka ɔbá bá ná níə́búə́ nɛkɔmba tálɛ́ná ɔ ɔwáwɔ, mɛ́ manɛ́na ɔwá bá bəə́bu hɔ́ányáká tɔ́na.

²⁰Ɔ ikúílí bá ná wawɔ́á mumbóŋímboŋi á Itiənə ɔ́nɔ́kɔ́, mɛ ka ámɛ báá tɔ́na umə́, mɛ ka báá əlimə yɛ bááyɛ́ ɔbá bá ná wɛɛ́ya ɔnɔkɔ, mɛ ná bíə́búə́ bɛlɛŋa tə́tə́níə́.”

²¹Mba, Isə́lúkú a sɛ́á: “Káka! Mɛaŋɔ́á ɛkasɛ mɛ aŋɔ́á lɔ́má hata ɔ mɔnɔŋɔ má bááyɛ́ ɔbá bá lɛ bá Bɛyútɛnɛ.”»

²²Nɔ́yɛ́, ɛnaka Bɛyútɛnɛ bá bɛ́ɛ́yɛ́ bɛtambá bɛ́ Báwolo ɔ́kɔ́kɛ́na, bá ná lúmə́ ɔ uyə́mə bá sɛ́á: «Nɔ́ wɛ́ɛ́yɛ́ mɔndɔ ɔnɔ! Á sá hɔ́ánana ɔbáá muɔmɔ́ háha ɔ misí!»

²³Bá yə́mə́kə mɔŋɛ́ŋa, bá bɛlɛŋa bɛ́kátáka, bá umbunə́ huələkiniə ɔ ɔmbáŋá.

²⁴Mɔmanɛna wa mɔlɔ́ŋɔ́ wɔ́ bilə́ a ná iŋgínə́ índíə́ ɔwá, bá Báwolo fínə́nə ɔ miímə yɛ bɔkɔfɔnɛa, bá wɛɛ́ya hɔ́ányáká muɛsɛ ɔkɛaka ɔwá, a hɔ́ɔ́kɔ́ mbá bá hɛkɔma funúnə ɔhɛ́á ilúkunə yɛ́ ndɔ yə́mínə.

²⁵Mba, ikúílí bá ná wɛɛ́ya ɔ́lɔ́kɔ́kɔ ɔkɛaka ɔwá bá wɛɛ́ya hɔ́ányáka, Báwolo a ná isə́lúkú yɛ bɔkɔfɔnɛa lɛ́na a sɛ́á: «Baánɛ, nɔ lɛa na kuənjə ɔ ifəyí yɛ́ Lɔ́ma ɔhɔ́ánya ɛŋaná ɔwayɛ́ ukə́lə́siə əə́?»

²⁶Ɛnaka á bɛ́ɛ́yɛ́ bɛtambá ɔ́kɔ́, isə́lúkú yɛ bɔkɔfɔnɛa a ná ká yɛ banɔabilə́ mbóŋíə́ a sɛ́á: «Nəníə́ ɔ ná bá ɔ sɛ́á ɔ́ hɔ́yɛ́ kɛ́áka əə́? Wɛ́ɛ́yɛ́ mɔndɔ a lɛa ifəyí yɛ́ Lɔ́ma!»

²⁷Mɔmanɛna wa banɔabilə́ á ɔ́kɔ́ nɔ́yɛ́, a ná tɔ́mbálɛ́la á Báwolo busíə́, a sɛ́á: «Lɛná mɛaŋɔ́á, aŋɔ́á ifəyí taká yɛ́ Lɔ́ma əə́?» Báwolo a sɛ́á: «Ɛ́ɛ!»

²⁸Mɔmanɛna wa banɔabilə́ a sɛ́á: «Mɛ ka bɛ́ɔ́ndɔ́kɔ na mukunə́ mɔŋɛ́ŋa ɔkɛaka ɔwá mɛ híáná ifəyí yɛ́ Lɔ́ma.» Báwolo a sɛ́á: «Bá ka mɛaŋɔ́á bíə́nə ifəyí.»

²⁹Bááyɛ́ ɔbá bá ná síə́kə ɔ ɔwayɛ́ ɔhɔ́ánya ɔkɛaka ɔwá a hɔ́ɔ́kɔ́, bá ná sə́mbə́nə́níə́ ɔ umisíúmə́, bɔkɔ́lɔ́ma bɔ́ ná mɔmanɛna wa banɔabilə́ itíə́ ɛnaka a funúnə ɔwá, ifəyí yɛ́ Lɔ́ma á ná tə́tə́níə́ ɔ́lɔ́kɔ́kɔ́tɔ́ ɔ mɛsáŋa.

³⁰Mɔmanɛna wa banɔabilə́ a ka hikəkiə ɔmanya muɛsɛ yatɛ́ Bɛyútɛnɛ bá ndɔ Báwolo sɔ́mɛnɛna. Ɔ ɔyáyáka, a ná iŋgínə́ índíə́ ɔwá bá wɛɛ́ya mɛsáŋa humbúlə́kə, əlimə yɛ nɔ́yɛ́, a ná bisə́lúkú bɛ́ bətitiəmahánɛna na bɛláŋa bɛ́ nindúmə́ nɛŋɛ́ŋa nɛ́ bəkə́lə́siə kɔtáka. A ná Báwolo ɛ́lɛ́ákɛ́na ɔkɛaka ɔwá bá wɛɛ́ya kə́lə́sə́kíə́ uwəbú busíə́.