Read Tunen Bɛnyɛná 23 Bible Online

Bɛnyɛná 23 - Tunen bible

Bɛnyɛná 23

¹Báwolo á məə́sə tálá ɔ nindúmə́ nɛŋɛ́ŋa nɛ́ bəkə́lə́siə, a ná bəə́bu lɛ́na a sɛ́á: «Á bənísə́, mɛ ná bítíkə́kə́ muɛsɛ á Huɛlɛ́ busíə́, híə́míə́ hɛtányɛ́ hɛ́ ndɔ mɛaŋɔ́á kə́lə́siə ɔ ndafámáká ɔ híihi hinó.»

²Mba Mutitiəmahánɛna mɔŋɛ́ŋa á Ananiásɛ a ná báyɛ́á bakamɛla manɛ́na ɔwá, bááyɛ́ ɔbá bá lɛ́á á Báwolo ɛmɛ́ŋɛ́ bá wɛɛ́ya súbə́ ɔ munuə.

³Nɔ́yɛ́, Báwolo a ná wɛɛ́ya lɛ́na a sɛ́á: «Ɔ ɔwáwɔ ɛkasɛ Huɛlɛ́ á subə, ɔwáwɔ ɔwá ɔ lɛ́á munímbə́nə! Ɔ lɛa hɔ́yɛ́ tuənə́tɔ́ ɔ ɔwámɛ ukə́lə́siə ɛ́sɛ́á Umbə́ndə́ wɔ́ ndɔ laa, mba, ɔ ndɔ wútə́yí Umbə́ndə́ nɔkɔ ikúílí ɔ ndɔ manɛna ɔwá bá mɛaŋɔ́á subəkə.»

⁴Bááyɛ́ ɔbá bá ná báá ɔ ɛmɛ́ŋɛ́ yɛ Báwolo bá ná láá bá sɛ́á: «Mutitiəmahánɛna mɔŋɛ́ŋa wa Huɛlɛ́ ɔ ndɔ kɔ́ba nɔ́yɛ́.»

⁵Báwolo a sɛ́á: «Á bənísə́, mɛ sa bá mɛ ndɔ manya ɔwá á Mutitiəmahánɛna mɔŋɛ́ŋa, ɔ taká Mətilə má ndɔ laa má sɛ́á: “Ɔ sa ndá isə́lúkú yɛ bɔ́áwɔ́á bɔnɔŋɔ kɔba.”»

⁶Báwolo a ka bá a ndɔ manya ɔwá ilúkunə yɛ́ ka báá bɛsalɛ bɛ́fandɛ́: Ɔ yɛ́ɛyɛ á ɛsalɛ, Bɛfalísia; ɔ yííní Bɛsatúsia. Ɔ́ ɛlɔ́áyɛ́ nɔ́yɛ́ a ná láá nióni nɛŋɛ́ŋa a sɛ́á: «Á bənísə́, mɛaŋɔ́á Mɔfalísia, mɛaŋɔ́á tɔ́na mɔná wa Mɔfalísia. Mɛ ndɔ hinó táta na mɔlɛ́má mukimə ɔhɛ́á Huɛlɛ́ a ŋɔ bəwə́nú huŋuəkiə, ɔ́ ɛ́lɔ́áyɛ́ nɔ́yɛ́ bá ndɔ mɛaŋɔ́á kə́lə́siə.»

⁷A sa bá a nɔ́ hɔ́nala ɔ ɔhɔ́ɔ́, mitə́ŋí yɛ́ ná fínə́ ətíə́ yɛ Bɛfalísia na Bɛsatúsia, kɛsalɛ́á yɛ́ ná fínə́ ɔ uwəbú ətíə́.

⁸Bá ka báá bá ndɔ tə́ŋə́niə nɔ́yɛ́ bɔkɔasɛ́á, Bɛsatúsia bá ndɔ ɛ́mɛ́nɛna ɔwá, bəwə́nú bá sa ndáhɔ́ŋɔ́á, bɛáŋgɛlɛ mbá ata imbúínyi bɛ́ lɛ boóko, Bɛfalísia uwəbú, bá ndɔ bikimə luminə.

⁹Undumbú wɔ́ ka báá mɔŋɛ́ŋa ɔ ilúkunə. Bɔ́mɔtɛ́ bamanyumbə́ndə́ ɔ ətíə́ yɛ ilúkunə yɛ́ Bɛfalísia bá ná hɔalɛ́na, bá ná sáŋɔ́ná na iŋgínə́ bá sɛ́á: «Tɔ sá hɛkɔma bɔ́ŋɔ ata hímotí ɔ wɔ́ɔwɔ mɔndɔ. Yɛ́ óso ɔbáá ɔwá, yɛmɔtɛ́ áŋgɛlɛ mbá ata umbúínyi wɔ́ ná wɛɛ́ya hɔ́kɛ́na.»

¹⁰Mitə́ŋí yɛ́ ná áŋánáka ɔ nindínə́ ɔnɛ́á, bɔkɔ́lɔ́ma bɔ́ ná mɔmanɛna wa banɔabilə́ itíə́, a fɛkaka ɔwá ɛkasɛ bá Báwolo yɛ́lɔ́lɔ́kɔ́na, a ná bɔkɔfɔnɛa iŋgínə́ índíə́ ɔwá bá wɛɛ́ya húlíə́ ɔ uwəbú ɔ ətíə́ yɛ ilúkunə, bá ndá wɛɛ́ya híánáná ɔ miímə yɛ bɔkɔfɔnɛa.

¹¹Ɔ bulúə́ ɔbɔ́á bɔ́ ná ɔ́ŋgɔ́nɔ, Isə́lúkú a ná ndá Báwolo bínə́níə́, a ná wɛɛ́ya lɛ́na a sɛ́á: «Ányɔ́wánya! Ɔ ka ndasá háha ɔ Yəlúsalɛma ɔkɛaka ɔwá, ɔ bɛndɔ lakɛ́ná ɛ́yánɛ́ á lɛ́á mɛaŋɔ́á, ɔ ná hɔ́ánáná ɔ nɔ́yɛ́ ɔlɛna tɔ́na ɔ bɛndɔ bá Lɔ́ma.»

¹²Ɔ ɔyáyáka, bɛ́mɔtɛ́ Bɛyútɛnɛ bá ná Báwolo hɛtɔkɔ hɔ́kɛ́na, bá ná bɛ́yɔ́mɔ́kɔ ɔwá, ubusíə́ ɔbɔ́á bá wɛɛ́ya ɔ́nɔ́kɔ́, mɔndɔ a lɛ bɔɔ́la nɛ́á mbá ata ɔnyɛ́na.

¹³Bááyɛ́ ɔbá bá ná fíə́kínə ɔ hɛtɔkɔ, bá ka báá yáyɛ́ná moómo ə́nisə má bɛndɔ.

¹⁴Bá ná ákáná ɔ busíə́ bɔ́ bətitiəmahánɛna baŋɛ́ŋa na ɔ bɛnatákɛ bɛ́ bɔnɔŋɔ bá sɛ́á: «Tɔ ná yɔmɔ́kɔ ɔwá, tɔ sɔ́ ŋɔ nɛ́á ata bɔɔ́la ubusíə́ ɔbɔ́á bá Báwolo ɔnɔkɔ.

¹⁵Nɔ́yɛ́, isíŋáka ɔ uwənú ɛsalɛ, nɔ́ ká nindúmə́ nɛŋɛ́ŋa siəlínə, nɔ́ ɔ́kɔ́nɔ́ na mɔmanɛna wa banɔabilə́, nɔ́ wɛɛ́ya nímbə́ ɔwá nɔ ndɔ siə ɔ ɛsáká yɛ́ Báwolo utíbíniə hoóyíhoóyi, bá wɛ́ya húlə́nə́ uwənú busíə́. Ɛlɔ́áyɛ́ əsú, tɔ ná hə́ŋíə́ ɔwá tɔ wɛɛ́ya nímə́síə́ ubusíə́ ɔbɔ́á a ndáfámá háha.»

¹⁶Mba, wə́yíə́ umbíə́nyi, mɔná wa munínyə́ ɔ muəndú wa Báwolo a ná hítə́yí hɛtɔkɔ ɔ́kɔ́kɛ́na. A ná ákáná ɔ miímə yɛ bɔkɔfɔnɛa, á fínə́, a ná Báwolo mənyə́síə́.

¹⁷Nɔ́yɛ́, Báwolo a ná yɛmɔtɛ́ isə́lúkú yɛ bɔkɔfɔnɛa ɛ́lɛ́na, a sɛ́á: «Káka yɛ́ɛ́yɛ́ ɛnɔ́kɔ́nɔkɔ yɛ́ mɔndɔ tíkə́ á mɔmanɛna wa bɔkɔfɔnɛa busíə́, a lɛa na bɔkɔa bɔ́ ɔwayɛ́ ɔlɛna.»

¹⁸Isə́lúkú yɛ bɔkɔfɔnɛa a ná yɛ́ɛ́yɛ́ ikúílí wɛɛ́ya ɛtá ɔ busíə́ bɔ́ mɔmanɛna, a sɛ́á: «Báwolo á mɔndɔ wa ɛbɔka a ná mɛaŋɔ́á ɛ́lɛ́ákɛ́na, a ná batá ɔwá mɛ yɛ́ɛyɛ ɛnɔ́kɔ́nɔkɔ húlə́nə́ ɔ ɔwáwɔ busíə́, a lɛa na bɔkɔa bɔ́ ɔwáwɔ ɔlɛna.»

¹⁹Mɔmanɛna wa banɔabilə́ a ná wɛɛ́ya itíə́ ɔ mɔkátá, bá ná bakɛma, a ná wɛɛ́ya batá a sɛ́á: «Yatɛ́ ɔ ndɔ siə ɔ ɔwámɛ ɔlɛna əə́?»

²⁰Ɛnɔ́kɔ́nɔkɔ yɛ́ mɔndɔ a sɛ́á: «Bɛ́mɔtɛ́ Bɛyútɛnɛ bá ná ɔ́kɔ́nɔ́ ɔwá, ɛkasɛ bá nda aŋɔ́á nímbə́kə́ ɔkɛaka ɔwá, Báwolo á sɔ́nɔ ɔ busíə́ bɔ́ nindúmə́ nɛŋɛ́ŋa nɛ́ bəkə́lə́siə, mbá bá yáyɛ́á ɛsáká tíbə́kíníə́ hoóyíhoóyi.

²¹Mba, sulusulu, ɔ lɛ bíə́búə́ bɛtambá lúmínə́ bɔkɔasɛ́á, bá báka yáyɛ́ná moómo ə́nisə má bɛndɔ ɔbá bá ná wɛɛ́ya lámbá, bá ná yɔmɔ́kɔ́ ɔwá bá lɛ nɛ́á ata bɔɔ́la mbá ata ɔnyɛ́na ubusíə́ ɔbɔ́á bá wɛɛ́ya ɔnɔkɔ, bá lɛa hə́ŋíə́tɔ, yáwɔ́á yɛmɛ́nɛna bá ndɔ táta.»

²²Mɔmanɛna wa banɔabilə́ á ɔ́kɔ́ nɔ́yɛ́, a ná wɛɛ́ya lɛ́na ɔwá, a lɛ mɔndɔ bíkə́tíniə́ ata ɔmɔtɛ́ yatɛ́ ɔyɛ́á a nɔ́ húlə ɔ ɔwayɛ́ ɔnɔŋɔnɛna, a ná wɛɛ́ya tilə́síə́.

²³Əlimə yɛ nɔ́yɛ́, mɔmanɛna a ná bɔ́mɔtɛ́ báyɛ́á bisə́lúkú bɛ́ bɔkɔfɔnɛa ɛ́lɛ́ákɛ́ná báfandɛ́, a sɛ́á: «Nɔ́ kɔtáká bɛbɔ́ɛ́yɛa bɛ́fandɛ́ bɛ́ banɔabilə́, moómo álɛ́ndɔ́lɔ́mɔnɔ má bakɛndana bɛhɔ́sɛ, bɛbɔ́ɛ́yɛa bɛ́fandɛ́ bɛ́ bɛndɔ na mɔkɔŋɔ́ itíə́kə́tɔ́ ɔ makátá, nɔ́ bɛ́tábɔ́náka ɔ ɔwákaka ɔ Sɛsalɛ́ ɔ ɛŋgɛ́ŋɛ́ ibo yɛ́ bɛkɔlakɔ́lá.

²⁴Nɔ́ bɛ́mɔtɛ́ bɛhɔ́sɛ tábɔ́náka ɔbɛ́á bɛ́ ndɔ Báwolo túánaka ɔ ɔwákakana á mɔmanɛna Fəlíkisi busíə́, ɛŋaná yɔmɔ́ ɔ mɛɛ́lɔ.»

²⁵Ɛnaka á hɔ́ɔ́kɔ́ nɔ́yɛ́, a ná hiəfulə tilə́kə ɔhɛ́á hɛ́ ndɔ laa hɛ́ sɛ́á:

²⁶«Mɛaŋɔ́á Kolóto Lísiasɛ, mɛ ndɔ tilinə á Isə́lúkú a mɔmanɛna Fəlíkisi, á Ifəyí, mɛ ndɔ aŋɔ́á məbíhóloniə maŋɛ́ŋa lɔ́mɛ́na!

²⁷Bɛyútɛnɛ bá ka wɔ́ɔwɔ mɔndɔ halɛna ɔwá mɛ nɔ́ aŋɔ́á lɔ́mɛ́na, bá ka bá bá sɛ́á bá wɛɛ́ya ɔnɔkɔ, ɛnaka mɛ ɔ́kɔ́ ɔwá a lɛa ifəyí yɛ́ Lɔ́ma, mɛ ná bísúmbə́níə́ na bámɛ́á bɔkɔfɔnɛa, mɛ ná wɛɛ́ya hutúnə.

²⁸Mɛ ka siəkə ɔwá mɛ manyá yatɛ́ Bɛyútɛnɛ bá ná wɛɛ́ya sɔ́mɛ́nɛ́na, mɛ ná wɛɛ́ya ákánána ɔ uwəbú bəkə́lə́siə baŋɛ́ŋa.

²⁹Mɛ ná funúnə ɔwá, bá ndɔ wɛɛ́ya sɔ́mɛna ɔ tɔkɔakɔ́á tɔ́ wə́búə́ umbə́ndə́, mba, mɛ sa hɛkɔma bɔ́ŋɔ ata hímotí ɔhɛ́á a ná kɛ́áka ɔ nindínə́ ɔnɛ́á bá wɛɛ́ya ɔ́nɔ́kɔ́ mbá ata bá wɛɛ́ya háá ɔ ɛbɔka.

³⁰Nɔ́yɛ́, bá ná mɛaŋɔ́á mə́nyə́síə́ ɔwá, Bɛyútɛnɛ bá ná wɛɛ́ya hɛtɔkɔ hɔ́kɛ́na. Ɔ umisíúmə́, mɛ ná ihə́ŋiə ɛtá ɔwá mɛ wɛɛ́ya lɔ́má ɔwáwɔ busíə́, mɛ ná báyɛ́á bɔsɔ́mɛna batá tɔ́na ɔwá, bá yə́búə́ ɛsɔ́mɛna húlə́nə́ ɔwáwɔ busíə́.»

³¹Bɔkɔfɔnɛa bá ná kɛ́áká yatɛ́ ɔyɛ́á mɔmanɛna a ná bəə́bu bata. Bá ná Báwolo ákánáná nəbulúə́ ɔkafámáká ɔ bətínə́ yɛ Aŋatibátilísi.

³²Ɔ ɔyáyáka, bɔkɔfɔnɛa ɔbá bá ná ákána ɔ makɔlɔ́, bá ná tilə́ ɔ miímə yɛ bɔkɔfɔnɛa, babálábɛhɔ́sɛ bá ná əbú ákáná na Báwolo.

³³Ɛnaka bá káfámá ɔ bətínə́ yɛ Sɛsalɛ́, babálábɛhɔ́sɛ bá ná hiəfulə túmbíə́ á mɔmanɛna á Fəlíkisi, bá ná wɛɛ́ya Báwolo túmbíə́.

³⁴Ɛnaka Mɔmanɛna á hiəfulə fanáka, a ná Báwolo batá ɔ́ uníə́níə́ nɛkɛ́tɛ nɛ́ misí yɛ Lɔ́ma á nɔ́ húlínə. A ná wɛ́ya lɛ́na ɔwá a lɛa wa Silisíə́.

³⁵A ná Báwolo lɛ́na a sɛ́á: «Mɛ ŋɔ yáwɔ́á ɛsáká tíbə́kiniə ɛnáká báwɔ́á bɔsɔ́mɛna bá ndáfama.» Ɛnaka á hɔ́ɔ́kɔ́ nɔyɛ́, a ná iŋgínə́ indíə́ ɔwá, bá Báwolo fíníə́ ɔ miímə yɛ munəni á Əlóto bá wɛɛ́ya tə́tə́níə́.