Read Tunen Bɛnyɛná 24 Bible Online

Bɛnyɛná 24 - Tunen bible

Bɛnyɛná 24

¹Ɛnaka tunó tɔ́lánɔ tɔ́ tɔ́mbá, Ananiásɛ á Mutitiəmahánɛna mɔŋɛ́ŋa, a ná ndáfámá ɔ Sɛsalɛ́ na bɔ́mɔtɛ́ bəkúkə, na wɔmɔtɛ́ mukə́líniə á Tɛlɛtúlusu, bá ná ndá Báwolo sɔ́mɛ́na á mɔmanɛna busíə́.

²Bá ná Báwolo ɛ́lɛ́ákɛ́na. Tɛlɛtúlusu a ná lumə́ ɔ ɔwayɛ́ ɔsɔ́mɛna a sɛ́á: «Á Ifəyí, nyɔnɔ na aŋɔ́á, bumbə́nú bɔ́ lɛa ɔ uwəsú bɔnɔŋɔ, na yáwɔ́á ɛmanya, ɔ ná bɛkɔa bikimə tábɔ́náka ɔbɛ́á bɛ́ sa bá bɛ́ ndɔ kɛnda.

³Bikúílí bikimə na ɔ bɛbɔ́ka bikimə, tɔ lɛa na mɔsɛ́ŋɛ́ ɛlɔ́áyɛ́ bɛ́ɛ́yɛ́ bɛkɔa bɛɛsɛ, tɔ ndɔ aŋɔ́á hóliə ɛlɔ́áyɛ́ nɔ́yɛ́.

⁴Ɔkɛaka ɔwá mɛ lɛ aŋɔ́á ikúílí túmbíə́, ɛkasɛ mɛ sɔ́mbá bɛkɛ́tɛ bɛ́ ɔnjɔmɔ, ɛlɔ́áyɛ́ nɔ́yɛ́ tɔ́kɔ́lɛ, na wə́wúə́ mɔlɛ́má muɛsɛ, hánɛ́ná bəsú məlúə́ tɛ́tɛ́á yɛ ikúílí.

⁵Tɔ ná bínúnə́ ɔwá wɔ́ɔwɔ mɔndɔ a lɛa hifikə, a lɛa undumbú háátɔ́ ətíə́ yɛ Bɛyútɛnɛ bikimə bɛ́ misí, a lɛa isə́lúkú yɛ ilúkunə yɛbɛ́á ɔyɛ́á bá ndɔ ɛ́lɛnɛna bá sɛ́á bɛndɔ bá Násalɛtɛ.

⁶A ka bɛ́ɔ́kɔ́lɛna ɔ Tɛ́mbɛlɛ utífílə, nɔ́yɛ́, tɔ ná wɛɛ́ya halɛ́na. [Tɔ ka hikəkiə ɔ ɔwayɛ́ ukə́lə́siə ɛ́sɛ́á wəsúə́ umbə́ndə́ wɔ́ ndɔ laa.

⁷Mba, Lísiasɛ á mɔmanɛna, a ná bísúmbə́níə́ na iŋgínə́ yikimə, a ná wɛɛ́ya kátɔ́ná ɔ uwəsú makátá.

⁸A ná bəsú lɛ́na ɔwá, báyɛ́á bɔsɔ́mɛna bá ndásá ɔwáwɔ busíə́]. Nɔ́yɛ́ á mɔmanɛna Fəlíkisi, njɔnɔ́kɔ́ wɛɛ́ya muɛsɛ muɛsɛ aŋɔ́á bɛ́múɛ́tɛ́, ɔ ndɔ manyaka ɔwá, yatɛ́ ɔyɛ́á tɔ ndɔ wɛɛ́ya sɔ́mɛnɛna yɛ́ lɛa taká.»

⁹Ɛnaka Tɛlɛtúlusu á hɔ́ɔ́kɔ́ nɔ́yɛ́, Bɛyútɛnɛ bikimə ɔbá bá ná báá ɔmɔ́tɔ́yɛ́, bá ná ɛsɔ́mɛna óníníə́ ɔwá yɛ́ báka taká.

¹⁰Mɔmanɛna a ná Báwolo iŋgínə́ índíə́ ɔwá á hɔɔkɔ, Báwolo a sɛ́á: «Mɛ ndɔ manya ɔwá ɔ tuɔŋɔ tuəŋí tɔ́ɔtɔ ɛ́sɛ́á ɔ lɛ́á mukə́lə́siə wa búə́súə́ bɔnɔŋɔ. Nɔ́yɛ́, na nɛkɔmba nikimə, ɛkasɛ mɛ bɛ́káláká ɔwáwɔ busíə́.

¹¹Yatɛ́ ɔyɛ́á ɛkasɛ mɛ láá, ɔ óso ɔ nɔ́yɛ́ utíbə́kiniə, niómo nɛ́ tunó na tɔ́fandɛ́ tɔ́ nana tɔ́mbá ɛ́sɛ́á mɛ ná ndáfámá ɔ Yəlúsalɛma á Huɛlɛ́ ubə́tiə.

¹²Ata mɔndɔ a sa mɛaŋɔ́á kɔana umə́ ɔ utə́ŋə́niə na ɔsɔ́kɔ́ ɔ Tɛ́mbɛlɛ, ata undumbú ɔháa ɔ ətíə́ yɛ́ ilúkunə, bá sa mɛaŋɔ́á sinə mɛ ndɔ bɛ́ɛ́yɛ́ bɛkɔa kɛa ɔ məə́bə má mabɛ́kálɛ́na mbá ata ɔ bətínə́.

¹³Mɛ ndɔ siə ɔlaa ɔwá, bááyɛ́ bɛndɔ bá lɛ bá hɔ́ánánátɔ́ uwinə́niə yatɛ́ ɔyɛ́á bá ndɔ mɛaŋɔ́á sɔ́mɛnɛna isíŋáka ɔwáwɔ busíə́.

¹⁴Mba, ɛ́sɛ́á mɛ lɛ́á tɛ́nɛ́mátɔ́ ɔwáwɔ busíə́, mɛ óso uluminə bɔkɔa bɔ́mɔtɛ́ ɔwá, mɛ ndɔ ɔŋgɛna ɔ ɛnɔ́mɛ ɔyɛ́á Yə́susu a ná salaka, ɛlɔ́áyɛ́ bámɛ́á bɔsɔ́mɛna, mɛ lɛa fínə́tɔ́ ɔ ilúkunə yɛbɛ́á, mɛ ndɔ Huɛlɛ́ lúbúnə ɔwá bíə́súə́ bisə́ bá ná əbú lúbúnə́kə, mɛ ndɔ lumininə tɔ́na yatɛ́ yikimə ɔyɛ́á yɛ́ lɛ́á tilə́kə́tɔ́ ɔ hiəfulə hɛ́ Umbə́ndə́, na ɔtɔ́á Bɔhɛ́nátɔtányɛ́ bá ná tílə́kə.

¹⁵Mɛ báka na bɔ́mɔtɛ́ bɔkɔa ɔbɔ́á mɛ ndɔ táta na mɔlɛ́má mukimə á Huɛlɛ́, bəə́bu tɔ́na bá ndɔ bɔ́táyɛ́ bɔkɔa táta, bɔ́ lɛa ɔwá, baasɛ na babɛ́á, Huɛlɛ́ a ŋɔ kɛaka ɔwá bá hɔŋɔakɛa ɔ ətíə́ yɛ bəwə́nú.

¹⁶Ɔ́ ɛlɔ́áyɛ́ nɔ́yɛ́ mɛaŋɔ́á bɛ́múɛ́tɛ́ mɛ ndɔ ámɛ bɛ́ɔ́kɔ́lɛna ɔkɛa ɔwá, mɛ bámɛ́nɛ́ná tɛ́nɛ́mátɔ́ á Huɛlɛ́ busíə́, na ɔ busíə́ bɔ́ bɛndɔ.»

¹⁷«Tuɔŋɔ tuəŋí tɔ́ ka tɔ́mbáka, mɛ sa bá ɔ uwəbú ətíə́, mɛ ná ndáhíáná ɔ Yəlúsalɛma ɔ mɔnɛ́á uwíndiə ɔ bɛndɔ bá bɔ́ámɛ́á bɔnɔŋɔ ɛlɔ́áyɛ́ uwəbú ɔwɔ́lɔ, na bɛnamá á Huɛlɛ́.

¹⁸Ɔ́ ɛlɔ́áyɛ́ nɔ́yɛ́ bá ná mɛaŋɔ́á kɔ́ána ɔ Tɛ́mbɛlɛ nuúmə́ mɛ lɛa ɔ ɔhɔ́ákɔna wɔ́ nɛ́ámɛ́á nibínə́ŋəsiə, ata iloŋo yɛ́ bɛndɔ yɛ́ sa bá mbá ata mayákasɛ.

¹⁹Mba, bɛ́mɔtɛ́ Bɛyútɛnɛ bá nɛkɛ́tɛ nɛ́ misí yɛ Ásia bá ka báá ɔmɔ́tɔ́yɛ́, ata bá báá na njɔmɔ ɔ ɔwámɛ ulúmə, há bəə́bu ɔbánɔ́ bá ná ndáfámá ɔwáwɔ busíə́ ɛlɔ́áyɛ́ ɔwámɛ ɔsɔ́mɛna.

²⁰Ataná, báaba bɛndɔ ɔbá bá lɛ́á háha, bá láá yatɛ́ bɔbɛ́á bɔŋɛ́ŋa mɛ́ ná kɛ́áka ikúílí bá ná mɛaŋɔ́á kə́lə́sə́kíə́ ɔ busíə́ bɔ́ bikə́lə́síníə́ bɛŋɛ́ŋa.

²¹Mɛ ndɔ fɛka mɛ sɛ́á mɛ sá kɛa ata bɔbɛ́á bɔ́mɔtɛ́, úhúlíə́ ɔ bɔ́táyɛ́ buɔsɛ́ ɔbɔ́á mɛ ná tɛ́nɛ́má ɔ uwəbú busíə́, mɛ ná laa mɛ sɛ́á: “Mɛ ndɔ lumininə ɔwá Huɛlɛ́ a ŋɔ bəwə́nú huŋuəkiə, ɔ́ ɛlɔ́áyɛ́ bɛ́táyɛ́ bɛtambá bá ndɔ mɛaŋɔ́á kə́lə́siə uwənú busíə́.”»

²²Mɔmanɛna á Fəlíkisi á ka bá a ndɔ bɛ́ɛ́yɛ́ bɛkɔa manya muɛsɛ ɔwɔŋgɔkɔnɔ ɛnɔ́mɛ yɛ́ Yə́susu, a ná ɛsáká híə́nə́kíə́ na əlimə, a sɛ́á: «Mɛ ŋɔ yə́núə́ ɛsáká kə́lə́səkiə ɛnáká Lísiasɛ á isə́lúkú yɛ bɔkɔfɔnɛa á ndáfámá háha.»

²³A ná isə́lúkú yɛ bɔkɔfɔnɛa iŋgínə́ índíə́ ɔwá, a Báwolo tə́tə́níə́ ɔ ɛbɔka, a lɛ wɛɛ́ya ɔlɔkɔ, a lɛ sáŋɔ́ná ɔwá bɛ́áyɛ́á bɛŋgɔ́áyɛ́ bá ndá wɛɛ́ya siəlínə.

²⁴Əlimə yɛ tɛ́tɛ́á yɛ tunó, mɔmanɛna á Fəlíkisi a ná ndáfámá na wayɛ́á muəndú á Tulusíli; a ka bá Mɔyútɛnɛ, a ná láá ɔwá bá Báwolo ɛ́lɛ́ákɛ́na, a ná wɛɛ́ya ɔ́kɔ́kɛ́na yatɛ́ ɔyɛ́á Báwolo a ndɔ hɛ́na ɔwɔŋgɔkɔnɔ nɛkɔmba ɔtálɛ́na á Yə́susu Kilísitusu.

²⁵Nɔ́yɛ́, ɛnaka Báwolo a botólíə́ ɔ unífúnə nəníə́ bá ná hɔ́ánáná ubítíkə tɛ́nɛ́mátɔ́ á Huɛlɛ́ busíə́, nəníə́ tɔ́na bá ná hɔ́ánána ɔ ɔbɛ́kɔ́kɛ́na, buɔsɛ́ tɔ́na bɔ́ lɛa ɔ ɔsákɔna ɔbɔ́á Huɛlɛ́ a ŋɔ bɛndɔ bəkimə kə́lə́səkiə, hɛtányɛ́ hɛ́ ná Fəlíkisi kátɛ́á, a sɛ́á: «Naŋɔ́ bísúə́lə, mɛ ŋɔ aŋɔ́á ɛ́lɛakɛna ɔ bɔhanyɛ ɔsákɔna.»

²⁶Mɔmanɛna á Fəlíkisi a ka bá a ndɔ fɛka ɔwá, Báwolo a ndɔ wɛɛ́ya mɔnɛ́á índiəkinə, ɔ́ ɛlɔ́áyɛ́ nɔ́yɛ́ a ná bá a ndɔ wɛɛ́ya ɛ́lɛna ikúílí tɛ́á ɔkɛaka ɔwá bá ŋgamáka.

²⁷Ɛnaka tuɔŋɔ tɔ́fandɛ́ tɔ́ tɔ́mbá, mɔmanɛna á Bɔlɔsiwúsu Fɛsɛtúsu a ná Fəlíkisi bɛ́hɛ́ŋɛ́na, ɛ́sɛ́á Fəlíkisi a ná bá a ndɔ hikiə ɔwá Bɛyútɛnɛ bá wɛɛ́ya siəkínə́ muɛsɛ, a ná Báwolo niása ɔ ɛbɔka.