Read Tunen Bɛnyɛná 25 Bible Online

Bɛnyɛná 25 - Tunen bible

Bɛnyɛná 25

¹Fɛsɛtúsu a ka bá a nɔ́ túmbiə tunó tɔ́lálɔ́ ɔ ɔwayɛ́ nɛkɛ́tɛ nɛ́ misí, a ná hɔalɛ́na ɔ Sɛsalɛ́ ɔ bálaka ɔ Yəlúsalɛma.

²Ɛnaka a káfámá umə́, Bisə́lúkú bɛ́ bətitiəmahánɛna na bɛkámɔ bɛ́ Bɛyútɛnɛ bá ná ndáfama, bá ná Báwolo sɔ́mɛ́na ɔwayɛ́ busíə́. Bá ná wɛɛ́ya batá na ɔwɛmbɛ́na ɔwá,

³á lumínə́ yatɛ́ ɔyɛ́á ɛkasɛ bá wɛɛ́ya bata, á manɛ́na ɔwá bá ndá Báwolo híánáná ɔ Yəlúsalɛma. Ɔ taká, bá ka wɛɛ́ya hɛtɔkɔ hɔ́kɛna ɔkɛaka ɔwá mbá bá sá wɛɛ́ya ɔ́nɔ́kɔ ɔ ɛnɔ́mɛ.

⁴Mba, Fɛsɛtúsu a ná bíhíə́níníə́ a sɛ́á: «Báwolo a lɛa ɔ ɛbɔka ɔ Sɛsalɛ́, mɛaŋɔ́á bɛ́múɛ́tɛ́ ɛkasɛ a hútú bálaka umə́.

⁵Nɔ́yɛ́ ábá mɔ́táyɛ́ mɔndɔ a lɛa bɔbɛ́á kɛ́ákátɔ́, bɔ́mɔtɛ́ ɔbá bá ndɔ bənú kɛndana bá bɛ́látá na mɛaŋɔ́á ɔkɛaka ɔwá, bá wɛɛ́ya sɔ́mɛ́na ɔ Sɛsalɛ́ ɔwámɛ busíə́.»

⁶Ɛnaka Fɛsɛtúsu á hɔ́ɔ́kɔ́ nɔ́yɛ́, a ná kɛ́áká ətíə́ yɛ tunó tɔ́námanɛ́ ɔkafámáká niómo ɔ Yəlúsalɛma, əlimə yɛ ikúílí, a ná tilə́ ɔ Sɛsalɛ́, ɔ ɔyáyáka, a ná fínə́ ɔ miímə yɛ bikə́lə́síníə́, a ná iŋgínə́ índíə́ ɔwá bá Báwolo hulənə.

⁷Ɛnaka bá wɛɛ́ya fámáná, Bɛyútɛnɛ ɔbá bá ná húlə́kə́ ɔ Yəlúsalɛma bá ná wɛɛ́ya nɛŋɛ́lɛ́na, bá wɛɛ́ya sɔ́mɔkɛna ɔwá a ka bɛkɔa bɛbɛ́á kɛaka ɛmbáta, mba, bá lɛ káfámá ɔ ubínífúnə muɛsɛ.

⁸Báwolo a ayɛ́ bɛ́káláka a sɛ́á: «Mɛ lɛ bá na hɛkɔma ata hímotí, ata ɛsalɛ yɛ́ umbə́ndə́ wɔ́ Bɛyútɛnɛ, ata ɛsalɛ yɛ́ Tɛ́mbɛlɛ mbá ata ɛsalɛ yɛ́ káyɛsa wa Lɔ́ma.»

⁹Fɛsɛtúsu a ka hikəkiə ɔwá Bɛyútɛnɛ bá wɛɛ́ya siəkínə́ muɛsɛ, nɔ́yɛ́, a ná Báwolo batá a sɛ́á: «Ɔ ná lumínə ɔwá ɔ báláka ɔ Yəlúsalɛma ɔkɛaka ɔwá bá yáwɔ́á ɛsáká kə́lə́sə́kíə́ ɔwámɛ busíə́ əə́?»

¹⁰Mba, Báwolo a sɛ́á: «Mɛ lɛa tɛ́nɛ́mátɔ́ ɔ busíə́ bɔ́ bikə́lə́síníə́ bɛ́ káyɛsa yɛ Lɔ́ma, háha bá ná hɔ́ánáná ɔ ɔwámɛ ukə́lə́siə. Ɔ ndɔ manya muɛsɛ aŋɔ́á bɛ́múɛ́tɛ́ ɔwá, mɛ sa Bɛyútɛnɛ bɔkɔa bɔbɛ́á kɛa.

¹¹Ábá mɛaŋɔ́á mɛ lɛ́á tɛŋákɛ́nátɔ́, ábá mɛ lɛa na hɛkɔma ɔhɛ́á hɛ́ ndɔ ínə́niə ɔwá bá mɛaŋɔ́á ɔ́nɔ́kɔ́, mɛ lɛ ndɔ kɔ́lɔ́ma ɔ uwə́ə́. Mba, ábá tiísi yɛ hɛkɔma hɛ́ lɛ bá ɔhɛ́á bááyɛ́ bɛndɔ bá ndɔ mɛaŋɔ́á sɔ́mɛnɛna, ata mɔndɔ a lɛ bá na iŋgínə́ ɔwá a mɛaŋɔ́á hánɛ́na ɔ uwəbú makátá. Ɛ́sɛ́á bɔ́ lɛ́á nɔ́yɛ́, mɛ ndɔ bata ɔwá, káyɛsa á mɛaŋɔ́á kə́lə́sə́kíə́ wɛɛ́ya bɛ́múɛ́tɛ́.»

¹²Ɛnaka Fɛsɛtúsu á ɔ́kɔ́ nɔ́yɛ́, bá ná ákáná ɔ hɛtɔkɔ na báyɛ́á balɛ́ha, a ná Báwolo lɛ́na a sɛ́á: «Ɛ́sɛ́á ɔ ndɔ bata, ɔwá káyɛsa a aŋɔ́á kə́lə́sə́kíə́ wɛɛ́ya bɛ́múɛ́tɛ́: Ɔ ŋɔ ákána ɔwayɛ́ busíə́.»

¹³Tɛ́tɛ́á yɛ tunó tɔ́ tɔ́mbáká, munəni á Akilibá na munínyə́ ɔ muəndú á Bələnísi bá ná ndásá ɔ Sɛsalɛ́ á mɔmanɛna Fɛsɛtúsu ɔ ndəbíhólíə́.

¹⁴Ɛ́sɛ́á bá ná báá na tunó tuəŋí ɔ utúmbiə umə́, Fɛsɛtúsu a ná munəni ɛsáká yɛ́ Báwolo nífúnə́kínə, a sɛ́á: «Mɔndɔ a báka háha ɔwá Fəlíkisi a ná tíkə́ ɔ ɛbɔka.

¹⁵Ɛnaka mɛ báláka ɔ Yəlúsalɛma, bisə́lúkú bɛ́ bətitiəmahánɛna na bɛkámɔ bɛ́ Bɛyútɛnɛ bá ná ndá wɛɛ́ya sɔ́mɛ́na, bá ná batá ɔwá mɛ wɛɛ́ya hɔkɛ́na.

¹⁶Mɛ ka bəə́bu bɛ́kámɔsɔna ɔwá, uwəsú á bɛndɔ bá Lɔ́ma, tɔ lɛ bá na ihílí ɔ mɔndɔ ɔhɔkɛna ubusíə́ ɔbɔ́á bá wɛɛ́ya kə́lə́sə́kíə́ ná bááyɛ́ ɔbá bá ná wɛɛ́ya sɔ́mɛ́na ɔkɛaka ɔwá, a ayɛ́ bɛ́káláká ɔ yatɛ́ ɔyɛ́á bá ná wɛɛ́ya sɔ́mɛ́nɛ́na.

¹⁷Nɔ́yɛ́, bá ná ndáfámá háha na mɛaŋɔ́á, ɛŋaná unə́ŋə́liniə, mɛ ná tuə́nə ɔ miímə yɛ bikə́lə́síníə́ ɔ ɔyáyáka, mɛ ná iŋgínə́ índíə́ ɔwá bá mɔ́táyɛ́ mɔndɔ hulənə.

¹⁸Mba, ikúílí báyɛ́á bokóyíkoyi bá ná ndáfámá, bá ná wɛɛ́ya sɔ́mɛ́na, mɛ sa hɛkɔma hɛ́ iŋgínə́ yáma ɔhɛ́á hɛ́ ndɔ wɛɛ́ya hɔkɛna ɛ́sɛ́á mɛ ná bá mɛ ndɔ fɛka.

¹⁹Bá ka báá ɔbánɔ́ na mitə́ŋí ɔwɔŋgɔkɔnɔ níə́búə́ nilúbúnə na wɔmɔtɛ́ mɔndɔ ɔwá bá ndɔ ɛ́lɛnana á Yə́susu ɔwá a ná wəə, mba, ɔwá Báwolo a ndɔ luminə a sɛ́á a báka bikúílí bikimə ɔ buɔmɔ́.

²⁰Ɛ́sɛ́á ikúílí mɛ sa manya nəníə́ mbá mɛ bɔ́táyɛ́ bɔkɔa súmbə́níə́, ɔ́ ɛlɔ́áyɛ́ nɔ́yɛ́ mɛ ná Báwolo batá ɔwá, ábá a ndɔ hikiə ɔbála ɔ Yəlúsalɛma ɔkɛaka ɔwá, bá yáyɛ́á ɛsáká kə́lə́sə́kíə́ umə́.

²¹Mba, Báwolo a ná saŋɔna, a ná ɛsáká húmbúlə́kə, a ná batá ɔwá, á káyɛsa yɛ Lɔ́ma a ná hɔ́ánána ɔ ɛmbakɔ́ ɔháá. Nɔ́yɛ́, mɛ ná iŋgínə́ índíə́ ɔwá, bá wɛɛ́ya tə́tə́níə́ ɔ ɛbɔka ɔkafámáká ɔ ikúílí ɔyɛ́á mɛ ŋɔ wɛɛ́ya lɔ́ma á káyɛsa busíə́.»

²²Akilibá a ná Fɛsɛtúsu lɛ́na a sɛ́á: «Mɛ hikəkiə tɔ́na ɔwá, mɛ wɛ́ɛ́yɛ́ mɔndɔ ɔ́kɔ́kɛ́ná muɛsɛ mɛaŋɔ́á bɛ́múɛ́tɛ́.» Fɛsɛtúsu a sɛ́á: «Ɔ ŋɔ wɛɛ́ya ɔ́kɔ́kɛna bulílə́.»

²³Ɔ ɔyáyáka, Akilibá na Bələnísi bá ná ndáfámáká na mɔlɔ́ŋɔ́ wɔ́ bɛndɔ baŋɛ́ŋa na tuúmə tukimə, bá ná fíə́kínə ɔ yanda yɛ́ bikə́lə́síníə́, na bisə́lúkú bɛ́ bɔkɔfɔnɛa na bəkúkə bá bətínə́. Fɛsɛtúsu a ná iŋgínə́ índíə́, bá ná Báwolo hulənə.

²⁴Fɛsɛtúsu a sɛ́á: «Á munəni á Akilibá na bənú bəkimə ɔbá nɔ lɛ́á háha ɔ uwəsú ətíə́, nɔ́ wɔ́ɔwɔ mɔndɔ siəlínə: Bɛyútɛnɛ bikimə bá ka ndáfáma ɔwámɛ busíə́, bá wɛɛ́ya sɔ́mɔkɛna ɔ botolokiə ɔ Yəlúsalɛma ɔ ndafámáká háha, bá húlə́ yə́mə́kə bá sɛ́á a lɛ bá hɔ́ánánátɔ́ ɔwá a báá ɔ buɔmɔ́.

²⁵Ɛlɔ́áyɛ́ ámɛ, mɛ sá hɛkɔma bɔ́ŋɔ ɔhɛ́á hɛ́ ndɔ wɛɛ́ya hɔkɛna ɔ nyɛmbɛ́: Mba, ɛ́sɛ́á a ná ɛsáká húmbúlə́kə á káyɛsa yɛ Lɔ́ma busíə́, mɛ ná ihə́ŋiə ɛtá ɔwá mɛ yɛ́tana ɛsáká wɛɛ́ya lɔmɛna.

²⁶Ata nɔ́yɛ́, mɛ lɛ bá na binífúnínə́ bɛɛsɛ ɔbɛ́á mbá mɛ káyɛsa tilə́kínə ɔ ɔwayɛ́ ɛsalɛ, ɔ́ ɛlɔ́áyɛ́ nɔ́yɛ́ mɛ ná wɛɛ́ya fámáná ɔ uwənú busíə́, sulusulu á munəni Akilibá busíə́ ɔkɛaka ɔwá, ɛ́sɛ́á ɔ ná ɔ́kɔ́kɛ́na, ɔ wɛɛ́ya tilə́kínə́ aŋɔ́á bɛ́múɛ́tɛ́ əlimə yɛ́ yííyí mikə́lə́kí.

²⁷Ɔ taká, mɛ ndɔ fɛka ɔwá, yɛ́ lɛ bá hɔ́ánánátɔ́ ɔ mɔndɔ wa ɛbɔka ɔlɔ́ma á káyɛsa busíə́ ɔ Lɔ́ma ɛŋaná tɔkɔma ufə́mə́ləniə ɔtɔ́á tɔ́ ndɔ wɛɛ́ya lɛmɛna.»