Read Tunen Bɛnyɛná 26 Bible Online

Bɛnyɛná 26 - Tunen bible

Bɛnyɛná 26

¹Munəni á Akilibá a ná Báwolo lɛ́na a sɛ́á: «Ɔ lɛa na kuənjə ɔ ɔhɔ́ɔ́ ɛlɔ́áyɛ́ nɛ́áwɔ́á nibínuəniə.» Nɔ́yɛ́ Báwolo a ná mɔkátá húə́líníə́ a ná botólíə́ ɔ ɔbɛ́kála, a sɛ́á:

²«Mɛ lɛa na nɛhɔnɔ ɔ ɛtambá ɔwɛta ɔ busíə́ bɔ́ munəni á Akilibá ɔkɛaka ɔwá, mɛ bínúə́kə́níə́ ɔwɔŋgɔkɔnɔ bɛsɔ́mɛna bɛ́ Bɛyútɛnɛ.

³Nɔ́yɛ́, ɔ ndɔ bihílí bikimə bɛ́ Bɛyútɛnɛ manya, ɔ ndɔ manya muɛsɛ yatɛ́ abáka bá tə́ŋə́kəniə. Tɔ́kɔ́lɛ básɛ́á məlúə́ ɔ ɔwámɛ ɔwɔ́kɔ na buyoyoní bukimə.»

⁴«Bɛyútɛnɛ bikimə bá ndɔ bɔ́ámɛ́á buɔmɔ́ manya bukimə ɔ balakɛna ɔ ɔwámɛ bɔlɔ́matɔ́, bá ndɔ manya nəníə́ mɛ ná níŋə́kə́ ɔ ɔwámɛ bɔnɔŋɔ na ɔ bətínə́ ɔ Yəlúsalɛma.

⁵Bá ndɔ mɛaŋɔ́á manya hata yɛ ikúílí, ábá bá ndɔ hikiə, bá óso á munəni ɔlɛna ɔwá, mɛ ka báá ɛláŋa yɛŋɛ́ŋa ɔ nɛkɔta yɛ́ Bɛfalísia, nɛkɔta ɔnɛ́á mɛ báá bɛ́ɔ́lɔ́kɔ́kɛ́nátɔ́ ɔ imbə́ndə́ yɛ́ yə́súə́ ilumininə.

⁶Ɔ niɔfɛ́nɛ, bá ndɔ mɛaŋɔ́á kə́lə́siə bɔkɔasɛ́á, mɛ ndɔ táta na mɔlɛ́má mukimə yatɛ́ ɔyɛ́á Huɛlɛ́ a ná bíə́súə́ bisə́kúlúlúnə́ bílíhə́níə́ yɛ́ bíúndúsíníə́.

⁷Niómo nɛ́ tutikə na tɔ́fandɛ́ tɔ́ yə́súə́ ilúkunə bá lɛa na ɛnánɛna ɔwá, Huɛlɛ́ a ŋɔ nɛ́táyɛ́ nɛkaka úndúsiniə. Tɔ́táyɛ́ tutikə tɔ ndɔ Huɛlɛ́ nyama na iŋgínə́ yikimə bulúə́ na buɔsɛ́ tɛ́á ɔ nɛ́táyɛ́ nɛkaka ɔ ɔtáta. Ə́ə́! Á munəni, mɛaŋɔ́á tɔ́na mɛ ndɔ nɛ́táyɛ́ nɛkaka táta, ɔ́ ɛlɔ́áyɛ́ nɔ́yɛ́ Bɛyútɛnɛ bá ndɔ mɛaŋɔ́á sɔ́mɛnɛna.

⁸Uwənú á Bɛyútɛnɛ nɔ lɛ ndɔ luminə ɔwá Huɛlɛ́ a ndɔ bəwə́nú huŋuəsiə, ɛlɔ́áyɛ́ yatɛ́ nɔ́yɛ́ əə́?»

⁹«Mɛaŋɔ́á bɛ́múɛ́tɛ́ mɛ ka fɛkaka ɔwá, mɛ niínyə nɛ́ Yə́susu á mɔndɔ wa Násalɛtɛ nuəkíə́ ɔ məndínə́ ɔbánɔ́ məkimə.

¹⁰Nɔ́yɛ́ mɛ ná kɛ́áká ɔ Yəlúsalɛma, bisə́lúkú bɛ́ bətitiəmahánɛna bá ka mɛaŋɔ́á mɔtɔ́nɔnɔ wɔ́ iŋgínə́ índiə, bəlumininə bəəŋí mɛ ná hákɛ́na ɔ ɛbɔka; ikúílí yɛ́ ná báá ɔwá bá bá bəə́bu ɔ́nɔ́kɔ́, mɛ ámɛ luminə.

¹¹Ɔ bɛ́mɔtɛ́ bikúílí, mɛ ka bá mɛ ndɔ tɔ́mbɛ́na ɔ məə́bə má mabɛ́kálɛ́na, mɛ kɛaka ɔwá bá bəə́bu sɔ́kɔ́tɛ́á, mɛ siəkə ɔwá bá yə́búə́ ilumininə bɛ́sáŋɔ́ná ɔ yəə́kə ɔmbáŋá. Hilóbi hɛ́ ka mɛaŋɔ́á ɛta ɔ nindínə́ ɔnɛ́á, mɛ húlə́ bəə́bu təkəsəkə ɔ bətínə́ bənə́bənə́.»

¹²Báwolo a ná ɛtambá ákánána ɔ busíə́ a sɛ́á: «Ɔ́ nɔ́yɛ́, hinó hímotí, mɛ ná mɔkɛnda ɛtá ɔ wákaka ɔ bətínə́ yɛ Tamásɛ na tuəfulə ɔtɔ́á bisə́lúkú bɛ́ bətitiəmahánɛna bá ná mɛaŋɔ́á índíə́, na bɔndaka bɔ́ ɔwákaka umə́.

¹³Mɛ ka báá ɔ ɛnɔ́mɛ á munəni Akilibá, yɛ́ ka báá kɔɔsɔ, mɛ ná isəmú yámá yɛ́ nɔ́ húlínə ɔ ɔmbáŋá, yɛ́ nɔmaka yáyɛ́ná yɛ́ hiɔtɔ́tɔ́, yɛ́ mɛaŋɔ́á nɔmakɛna na bááyɛ́ ɔbá bá ná mɛaŋɔ́á ɔ́ŋgɔ́kɔ.

¹⁴Bəsú bəkimə tɔ ná kɔ́á imbúbiə ɔ misí, mɛ ná nióni ɔ́kɔ́ nɛ́ ndɔ mɛaŋɔ́á lɛna na nihókí nɛ́ Bɛyútɛnɛ nɛ́ sɛ́á: “Á Sáwolo, á Sáwolo ɛlɔ́áyɛ́ yatɛ́ ɔ ndɔ mɛaŋɔ́á təkəsinə əə́? Ɛlɔ́áyɛ́ yatɛ́ ɔ lɛ́á ná nɛfama ɛ́sɛ́á ɛmɔ́á ɔyɛ́á isə́lúkú a ná súbə́ na ɔmbɔ́ŋɔ́ əə́? Ɔ lɛ háŋá itə́mbí.”

¹⁵Mɛ ná batá mɛ sɛ́á: “Á Ifəyí aŋɔ́á ɛ́yánɛ́ əə́?” A ná bɛ́kámɔ́sɔ́ná a sɛ́á: “Mɛaŋɔ́á Yə́susu ɔwá ɔ ndɔ təkəsə.

¹⁶Mba, isíŋáka hɔalɛ́na, tɛ́nɛ́ma mɔtɛ́nɛná! Mɛ ná aŋɔ́á bínə́níə́ ɔkɛaka ɔwá, mɛ aŋɔ́á híə́nə́síə́ wamɛ́á mɔnyɛna; ɔ ŋɔ báá wamɛ́á mumbóŋímboŋi ɔkɛaka ɔwá, ɔ húlə́ nɔŋɔnaka ɛ́sɛ́á mɛ ná kɛ́áka, ɔ nɔ́ mɛaŋɔ́á siəkinə niɔfɛ́nɛ, na bɛkɔa ɔbɛ́á mɛ ŋɔ aŋɔ́á mənyəsiə ɔ binónó.

¹⁷Mɛ ŋɔ aŋɔ́á hóyokiə ɔ busíə́ bɔ́ bilúkunə bɛ́ Bɛyútɛnɛ na bilúkunə binə́binə́ ɔhá mɛ ŋɔ aŋɔ́á lɔ́ma.

¹⁸Mɛ ŋɔ aŋɔ́á lɔ́ma ɔkɛaka ɔwá ɔ bəə́bu məə́sə ubunə, ɔ́ bəə́bu húlíə́ ɔ ibínə́binə ɔkɛaka ɔwá bá fínə́ ɔ isəmú, bá hɛ́kɛ́á ɔ nɛmanɛna nɛ́ Sátana, bá bɛ́níása Huɛlɛ́ a bəə́bu manákɛ́na ɔkɛaka ɔwá, bá níə́búə́ nɛkɔmba tálɛ́ná ɔ ɔwámɛ, Huɛlɛ́ á bəə́bu mə́búə́ mabɛ́á niasɛ́na, bá nioko ɛtá ɔ ətíə́ yɛ bɛndɔ ɔbá bá lɛ́á báyɛ.”»

¹⁹Nɔ́yɛ́ tɔ́na, á munəni á Akilibá, mɛ sa inónó bɛ́sáŋɔ́na ɔyɛ́á Huɛlɛ́ a ná mɛaŋɔ́á ínə́níə́ ɔ nindínə́ ɔnɛ́á,

²⁰mɛ ka taŋa ɔnɔŋɔnɛna ɔ bɛndɔ bá Tamásɛ, bá Yəlúsalɛma, ɔ bɛndɔ bəkimə bá Yútɛa na bá mɔnɔŋɔ mənə́mənə́ ɔkɛaka ɔwá bá mɔlɛ́má kɔŋɔna, bá híáná á Huɛlɛ́ ɛsalɛ, bá taká yɛ nɛ́ɛ́yɛ́ nɛbɛ́kɔ́ŋɔ́na ínə́níə́ ɔ tɔ́mbákɛna na bíə́búə́ bɛnyɛná bɛɛsɛ.

²¹Ɔ́ ɛlɔ́áyɛ́ hííyí hɛkɔma á Bɛyútɛnɛ bá ná mɛaŋɔ́á hálɛ́lɛ́na ɔ Tɛ́mbɛlɛ, bá ka siəkə tɔ́na ɔ ɔwámɛ ɔwɔ́nɔ.

²²Mba, Huɛlɛ́ a ka mɛaŋɔ́á tátáka, ɔ ndafámáká ɔ buɔsɛ́ bɔ́ niɔfɛ́nɛ, mɛ nabáka ɔ ɔlɛna ɔ bɛndɔ bəkimə yatɛ́ ɔyɛ́á mɛ ndɔ manya ɛlɔ́áyɛ́ Yə́susu, ɔ tɔlɔ́matɔ́ ɛ́sɛ́á ɔ bɛkámɔ. Mɛ lɛ ndɔ bɔkɔa buinə́buinə́ kɔnda yáyɛ́ná yatɛ́ ɔyɛ́á bɔhɛ́nátɔtányɛ́ na Mósisi bá ná fə́mə́lə́níə́ ɔwá, nɔ́yɛ́ yɛ́ ná hɔ́ánána ɔndafama.

²³Bá ka hɔ́ɔ́kɔ bá sɛ́á: «Mɛ́sia a ná hɔ́ánána ɔ ɛmɔ́kɛ́ ɔnyáá, á wəə, Huɛlɛ́ a kɛ́áka ɔwá á hɔŋɔ́á ətíə́ yɛ bəwə́nú, á bámɛ́nɛ́ná wəbusíə́ ɔ ɔhɔŋɔa ɔ ətíə́ yɛ bəwə́nú, wɛɛ́ya a ná hɔ́ánáná ɔ Imbə́nú Yɛɛsɛ ɔnɔŋɔna ɔyɛ́á yɛ́ lɛ́á isəmú yɛ́ Huɛlɛ́ ɔ Bɛyútɛnɛ, na mɔnɔŋɔ mənə́mənə́.»

²⁴Báwolo a sa bá a nɔ́ nɛ́áyɛ́á nɛbɛ́kála hɔ́nala, Fɛsɛtúsu a ná yə́mə́ nióni nɛŋɛ́ŋa a sɛ́á: «Á Báwolo, ɔ lɛa tɔtɔ́átɔ! Ɔ ka ɔ́kɔ́naka mɔŋɛ́ŋa, isíŋáka yatɛ́ ɔyɛ́á ɔ ná ɔ́kɔ́náka yɛ́ nɔ aŋɔ́á ɔmbamɔ́ ítiəsiə.»

²⁵Mba, Báwolo a sɛ́á: «Á ifəyí á Fɛsɛtúsu, mɛ lɛ bá famɔ́nɔ́átɔ, bɛtambá ɔbɛ́á mɛ ndɔ fə́mə́ləniə bɛ́ lɛa taká, mɛ ndɔ manya yatɛ́ ɔyɛ́á mɛ ndɔ laa.

²⁶Ata á munəni á Akilibá ɔwá mɛ ndɔ bɛ́ɛbɛ bɛtambá bɛ́ yɛmɛ́nɛna lɛna, a ndɔ bɛ́táná bɛkɔa bikimə manya, a lɛ ndɔ fəliə ata bɔ́mɔtɛ́ bɔkɔasɛ́á, táta ɔ nibítə á bɛ́táyɛ́ bɛyɔŋɔlɛ bɛ́ ná bɛtɔmbaka.

²⁷Á munəni á Akilibá ɔ ndɔ luminə yatɛ́ ɔyɛ́á bɔhɛ́nátɔtányɛ́ bá ná nɔ́ŋɔ́náka əə́? Mɛ ndɔ manya ɔwá ɔ yɛɛ́ta lɛa lumínə́tɔ.»

²⁸Nɔ́yɛ́, Akilibá a ná Báwolo lɛ́na a sɛ́á: «Ɔ ndɔ fɛka ɔwá ɔ tɛ́tɛ́á yɛ ikúílí ɛkasɛ ɔ́ kɛ́áka mɛ híáná kilísitənə əə́?»

²⁹Báwolo a sɛ́á: «Yɛ́ báá ɔbánɔ́ tɛ́tɛ́á yɛ ikúílí mbá ata ikúílí yɛtatánɛ, mɛ ndɔ Huɛlɛ́ bɛ́kálɛ́na ɔwá táta aŋɔ́á bíbúə́, mba bənú bəkimə ɔbá nɔ ndɔ mɛaŋɔ́á ɔ́kɔ niɔfɛ́nɛ, nɔ́ híáná ɛ́sɛ́á mɛ ámɛ lɛ́á; úhúlíə́ ɔ yííyí mɛsáŋa ɔyɛ́á bá ná mɛaŋɔ́á ɔ́lɔ́kɔ́kɔ!»

³⁰Ɛnaka á hɔ́ɔ́kɔ́ nɔ́yɛ́, hɔasábɔ! Munəni á Akilibá, mɔmanɛna á Fɛsɛtúsu, Bələnísi na bááyɛ́ bəkimə ɔbá bá ná bá na bəə́bu bá ná huəlínə́níə́, bá ná famaka.

³¹Ikúílí bá ná bísúə́lə́, bá ná hɔ́lɔ́ bəə́bu na bəə́bu bá sɛ́á: «Wɔ́ɔwɔ mɔndɔ a lɛ bá na bɔbɛ́á ɔbɔ́á bá ná hɔ́ánána ɔ ɔwayɛ́ ɔwɔ́nɔ, ata ɔ ɔwayɛ́ ɔháá ɔ ɛbɔka.»

³²Akilibá a ná Fɛsɛtúsu lɛ́na a sɛ́á: «Ata wɔ́ɔwɔ mɔndɔ a lɛ láá ɔwá, káyɛsa yɛ Lɔ́ma á yáyɛ́á ɛsáká kə́lə́sə́kíə́, há ɔ nɔ́ wɛɛ́ya niasa.»