Read Tunen Bɛnyɛná 27 Bible Online

Bɛnyɛná 27 - Tunen bible

Bɛnyɛná 27

¹Ɛnaka bá bɛtɛ́nɛ́mɛ́ná ɛ́tá ɔwá tɔ fínə́ ɔ lánjɛ ɔ wákaka ɔ Itália, bá ná Báwolo na bɔ́mɔtɛ́ bɛndɔ bá ɛbɔka túmbíə́ ɔ isə́lúkú yɛ bɔkɔfɔnɛa nɛ́áyɛ́á niínyə á Yúliyusu, a ka bá ɔ mɔlɔ́á wɔ́ ɛbɔ́ɛ́yɛa yɛ́ bɔkɔfɔnɛa ɔwá bá ndɔ ɛ́lɛnɛna bá sɛ́á: «Mɔlɔ́ŋɔ́ wɔ́ banɔabilə́ wɔ́ káyɛsa.»

²Tɔ ná fíə́kínə ɔ lánjɛ ɔyɛ́á yɛ́ ná húlínə́ ɔ bətínə́ yɛ Atalamitiúmu yɛ́ ka báá ɔ ɔtɔ́mbáka ɔ bɛsɛ́lɛ́ bɛ́ məə́yi ɔ nɛkɛ́tɛ nɛ́ misí yɛ Ásia, tɔ ná kɛndá ɔ nɔmɔ́. Mɔndɔ wa Masɛtɔánɛ ɔ bətínə́ yɛ Tɛsalɔnɛ́ka a ka báá na bəsú, nɛ́áyɛ́á niínyə á Alisitákɛ.

³Ɔ ɔyáyáka, tɔ ná káfámá ɔ Sítono. Yúliyusu a ka bá a ndɔ Báwolo hikiə mɔŋɛ́ŋa, a ná wɛɛ́ya iŋgínə́ índíə́ ɔwá a ká bɛ́áyɛ́á bɛŋgɔ́áyɛ́ síə́línə ɔkɛaka ɔwá, bá wɛɛ́ya índíə́ yatɛ́ ɔyɛ́á a ná bá ɔ nɛsɔ́ka.

⁴Ɛnaka tɔ hɔalɛ́na ɔ yɛ́ɛ́yɛ́ bətínə́, tɔ ná mɔkɛnda ɛtá ɔ nɔmɔ́, umbúínyi wɔ́ ka báá wɔ́ ndɔ húlə uwəsú busíə́, wɔ́ lɛ ókótó ɔwá tɔ fáháka, tɔ ná kɛndɛ́na ɔ iloóló yɛ́ Síbili ɔyɛ́á yɛ́ ná bəsú líndíə́.

⁵Tɔ ná nɔmɔ́ bíásɛ́na, hoóyi na nɛkɛ́tɛ nɛ́ misí yɛ Silisíə́, na nɔmɔ́ ɔnɛ́á nɛ́ lɛ́á hoóyi na Bamafilíə́, tɔ ná káfámá ɔ bətínə́ yɛ Míla ɔ nɛkɛ́tɛ nɛ́ Lisíə́.

⁶Umə́, Isə́lúkú yɛ bɔkɔfɔnɛa a ná lánjɛ ɛtá ɔyɛ́á yɛ́ ná húlínə́ ɔ bətínə́ yɛ Alɛkɛsandilíə́ ɔ wákaka ɔ Itália, a ná bəsú hákɛ́na umə́.

⁷Tɔ ka kɛndaka tɛ́tɛ́á tɛ́tɛ́á mɔɔsɛ́ məəŋí, tɔ ka ánya ɔbánɔ́ mbá tɔ nɔ́ kafámá ɔ bətínə́ yɛ Kinítə. Ɛ́sɛ́á umbúínyi wɔ́ sa bá wɔ́ ndɔ ókóto ɔwá tɔ fáháka, tɔ ná bísúmbə́níə́ ɔ matá ma Kɛlɛ́tɛ ɔyɛ́á yɛ́ ná bəsú líndíə́ ɔ ɛsalɛ yɛ́ hɛŋgɔ́njɛ hɛ́ Salomə́.

⁸Tɔ ka ɛmɔ́kɛ́ nyááka mɔŋɛ́ŋa ɔkɛaka ɔwá tɔ́ kɛndáká ɛsɛ́lɛ́ na ɛsɛ́lɛ́, tɔ ná káfámá ɔ yɛ́mɔtɛ́ ɛbɔ́ka ɔyɛ́á bá ndɔ ɛ́lɛnɛna bá sɛ́á Bɛsɛ́lɛ́ bɛɛsɛ, hoóyi na bətínə́ yɛ Lasɛ́.

⁹Ubusíə́ ɔbɔ́á tɔ́ káfámá umə́, tɔ ka ikúílí túmbə́kiə mɔŋɛ́ŋa ɔ nindínə́ ɔnɛ́á yɛ́ ka báá ányákátɔ́ ɔwá tɔ́ mɔkɛnda ákánána ɔ busíə́ tɔ́na bɔkɔasɛ́á, ikiní yɛ́ ɔnɛ́á yɛ́ ka báá tɔ́mbátɔ, ɔ́ niɔŋɔ́, umbúínyi wɔ́ ka báá na iŋgínə́ ɛmbáta. Ɛlɔ́áyɛ́ nɔ́yɛ́, Báwolo a ná bɛndɔ mənyə́síə́ ɔbá bá ndɔ nyɔɔ ɔ lánjɛ a sɛ́á:

¹⁰«Á bɛ́ámɛ́á bɛŋgɔ́áyɛ́, mɛ ndɔ sinə ɔwá, ábá tɔ ná mɔkɛnda ɛtá ɔ busíə́, ɛkasɛ tɔ́ nímínə́ mɔŋɛ́ŋa, lánjɛ na malɔmɔ́ má tɛŋɛ́tɛ́ŋɛ́á, tɔ́ əsú óso uwə́kunə tɔ́na.»

¹¹Ata nɔ́yɛ́ ɛ́sɛ́á Báwolo a ná hɔ́ɔ́kɔ́, isə́lúkú yɛ bɔkɔfɔnɛa a ka bɛ́áyɛ́á bɛtambá yəniə, a ná nɛkɔmba tálɛ́ná ɔbánɔ́ ɔ bɛtambá bɛ́ munúkə na muití lánjɛ.

¹²Ɔ ɔyáyɛ́na nɔ́yɛ́, bətínə́ ɔyɛ́á tɔ ná bá ɔ ɛsɛ́lɛ́ yɛ́ nɔmɔ́ yɛ́ sa bá ɛbɔ́ka yɛɛsɛ ɔyɛ́á tɔ óso ɔ utuənə ɔ ikúílí yɛ́ əmbumə, nioko niəŋí nɛ́ bɛndɔ bá ná ihə́ŋiə ɛtá ɔwá bá hɔalɛ́na umə́ mbá bá ɔ́kɔ́lɛ́na ɔ ɔkafámá ɔ bətínə́ yɛ Fəníkísi ɔkɛaka ɔwá, tɔ tuə́nə umə́ ɔkafámáká ikúílí yɛ́ əmbumə yɛ́ tɔmba. Fəníkísi yɛ́ ka báá bətínə́ yɛ ɛsɛ́lɛ́ yɛ́ nɔmɔ́ ɔ Kɛlɛ́tɛ. Yɛ́ ka bá yɛ́ ndɔ umbúínyi sɔ́mba ɔwá wɔ́ ná bá wɔ́ ndɔ húlínə ɔ makɛ́ka mbá ata ɔ mɔkɔndɔ ɔkɛaka ɔwá, wɔ́ lɛ húkə́ ɔ nuíyi.

¹³Himbúínyímbuinyi hɛ́ ná lumə́ ɔ ɔfɛna, hɛ́ húlə́kinə ɔ makɛ́ka, bɛndɔ ɔbá bá ndɔ nyɔɔ ɔ lánjɛ bá fɛkaka ɔwá ɛkasɛ bá wə́búə́ mɔanɔ úndúsíníə́. Bá ná hɔalɛ́na, bá ná botólíə́ ɔ ɔkɛnda ɛsɛ́lɛ́ na ɛsɛ́lɛ́ yɛ́ Kɛlɛ́tɛ.

¹⁴Mba, ɔ umisíúmə́, umbúínyi mɔŋɛ́ŋa ɔwá bá ndɔ ɛ́lɛnɛna bá sɛ́á: «Ɛlakuilɔ́nɔ» wɔ́ ná húlínə́ ɔ ɛmáá yɛ́ iloóló yɛ́ misí yɛ Kɛlɛ́tɛ, wɔ́ ná bəə́bu kɔɛ́na.

¹⁵Wɔ́ ná lánjɛ ákánána, bá lɛ ósó ɔ mɛɛ́ta utínímiə, tɔ ná bɛ́níása wɔ́ ná bəsú ákánána.

¹⁶Tɔ ná tɔ́mbɛ́ná ɔ makɛ́ka má mɔná iloóló yɛ́ misí ɔyɛ́á yɛ́ ná bəsú líndíə́, bá ɛ́lɛakɛnɛna bá sɛ́á Kawúta. Na məsə́kə maŋɛ́ŋa a tɔ́ na káfámá ɔ isóyí usúə́ ɔyɛ́á yɛ́ ná báá əlimə yɛ lánjɛ ɔkɛaka ɔwá, tɔ́ bɛɛ́ta hákɛ́na ɔ lánjɛ nuúmə́.

¹⁷Ɛnaka tɔ́ yɛɛ́ta háá ɔ lánjɛ, Bənúkə bá ná lánjɛ ɔ́lɔ́kɔ́kɔ́ na mikolí. Ɛ́sɛ́á bá ná báá na bɔkɔ́lɔ́ma ɔwá ɛkasɛ yɛ́ ká bísúbə́ ɔ mɔsɛ́á ɔ ɛsɛ́lɛ́ yɛ́ Libíə́, bá ná ilimə́limə́ yɛ́ ilə́ŋú lókíə́ ɔ nuíyi ɔyɛ́á yɛ́ ná báá ɔ́lɔ́kɔ́kɛ́nátɔ́ ɔ lánjɛ ɔkɛaka ɔwá yɛ́ lɛ tɔkɔ́nɔ́á tɔfá.

¹⁸Ɔ ɔyáyáka, ɛ́sɛ́á ɛbɔ́lábɔ́lá yɛ́ ná bá yɛ́ ndɔ bəsú fúkə tɔ́na na iŋgínə́ yikimə, bá ná malɔmɔ́ ə́mbə́kínə ɔ nuíyi.

¹⁹Ɔ tunó tɔ́lálɔ́ tɔ́na, bənúkə bá ná bɛlɛŋa bɛ́ lánjɛ ombókóko ɔ nuíyi ná mə́búə́ makátá bɛ́múɛ́tɛ́.

²⁰Tɔ ka tunó túmbə́kiə tuəŋí tɔ lɛ hiɔtɔ́tɔ́ ata tusənji sínə, umbúínyi wɔ́ ka báá na iŋgínə́ ɔ ɔyáyɛ́na. Utifəkə, tɔ sa bá na ɛnánɛna tɔ́na ɔwá bá bəsú núə́kə́níə́.

²¹Bəkimə ɔbá bá ná báá ɔ lánjɛ bá ka túmbiə ikúílí yɛtatánɛ bá lɛ nɛ́á ata bɔɔ́la. Nɔ́yɛ́, Báwolo a ná tɛ́nɛ́má ɔ uwəbú busíə́, a sɛ́á: «Á bɛ́ámɛ́á bɛŋgɔ́áyɛ́, ata nɔ mɛaŋɔ́á ɔ́kɛ́na, há tɔ sa hɔalɛna ɔ Kɛlɛ́tɛ. Há tɔ́ sa lánjɛ bɔ́lɔ́nɛa na yatɛ́ yikimə ɔyɛ́á yɛ́ lɛ́á ɔ nuúmə́.

²²Mba, isíŋáka, nɔ lɛ yɔ́nɔ́á bɔkɔasɛ́á, ata ɔmɔtɛ́ ɔ uwənú ətíə́ a sɔ́ ŋɔ wə́ə́, ɔ́maná lánjɛ ɛkasɛ yɛ́ tɛŋɛ́tɛ́ŋɛ́á.

²³Mɛ ndɔ laa nɔ́yɛ́ bɔkɔasɛ́á, ɔ bɔ́ɔbɔ bulúə́ bɔ́ niɔfɛ́nɛ, Huɛlɛ́ ɔwá a lɛ́á ɔwámɛ əlimə, ɔwá mɛ ndɔ nyɛna tɔ́na, a ná yɛmɔtɛ́ áŋgɛlɛ lɔ́má ɔwámɛ busíə́, a sɛ́á:

²⁴“Á Báwolo, ɔ lɛ kɔ́lɔ́má bɔ́ányɛ, ɔ ná hɔ́ánána ɔkála á káyɛsa busíə́, ɛkasɛ Huɛlɛ́ a aŋɔ́á núə́kə́níə́ na bááyɛ́ bəkimə ɔbá bá lɛ́á ɔ lánjɛ nuúmə́!”

²⁵Nɔ́ ɔ́nɛ́ná nə́ə, Á bɛ́ámɛ́á bɛŋgɔ́áyɛ́! Nɛ́ámɛ́á nɛkɔmba nɛ́ lɛa tálɛ́nátɔ́ á Huɛlɛ́. Yɛ́ ŋɔ bɛ́kɛaka ɛ́sɛ́á a ná mɛaŋɔ́á lɛ́na.

²⁶Ɛkasɛ umbúínyi wɔ́ ká bəsú ómbóko ɔ ɛsɛ́lɛ́ yɛ́ yɛ́mɔtɛ́ iloóló yɛ́ misí.»

²⁷Yɛ́ ka báá niómo nɛ́ tunó na túnisə ɛ́sɛ́á ɛbɔ́lábɔ́lá yɛ́ ná bəsú fánjáká ɔ nɔmɔ́ nɛ́ Mɛtitɛlanɛ́; ɔ ətíə́ yɛ bulúə́, bənúkə bá ná bɛ́bɔ́ŋɔ́ ɔwá bá ndɔ bɛ́nya ɔ yɛmɔtɛ́ misí.

²⁸Nɔ́yɛ́, bá ná mulúmbə lokíə́ ɔ nuíyi nuúmə́ ɔkɛaka ɔwá bá yuúndúndə kətíə́, bá ná yámá ɔwá, nɛ́ lɛa ɔ moómo álálɔ́ má amaná na álɛ́ndɔ́lɔ́mɔnɔ. Bá manyɔ́ bɛ́nyálɛla, bá ná kətíə́, bá ná yámá moómo áfandɛ́ má amaná na ánámanɛ́ ɔ yuúndúndə.

²⁹Bá kɔ́lɔ́maka ɔwá yəsúə́ lánjɛ yɛ́ lɛ úmbúfə́nə ɔ miɔkɔ ɔyɛ́á yɛ́ lɛ́á ɔ nuíyi nuúmə́, bá ná bilimə́limə́ bɛ́ bilə́ŋú lókíə́ bínisə ɔkɛaka ɔwá lánjɛ yɛ́ lɛ tɔkɔ́nɔ́á, bá ɔyáá tátáka na məə́sə.

³⁰Mba, bənúkə́ bá ka siəkə ɔ ɔtɛbɛna, bá ná isóyí yɛ́ nibínuəniə losíə́ ɔ nuíyi, bá ná bɛndɔ nímbə́ ɔwá bá nɔ́ ákána ɔ bilíŋə́líŋə́ bɛ́ bilə́ŋú ɔ kakɔfɛ́á ɔ busíə́ bɔ́ lánjɛ.

³¹Báwolo a ná manyá, a ná isə́lúkú yɛ banɔabilə́ na bɔkɔfɔnɛa lɛ́na a sɛ́á: «Ábá nɔ sá bááyɛ́ bɛndɔ kotiə ɔwá bá lɛ fámá ɔ lánjɛ nuúmə́, nɔ sɔ́ ŋɔ bɛ́ɔ́lɔ ɔ yɛ́ɛ́yɛ́ yɛmba.»

³²Nɔ́yɛ́, bɔkɔfɔnɛa bá ná mikolí sɔ́mbáká ɔyɛ́á bá ná ɔ́lɔ́kɔ́kɛ́ná ɔ isóyí, nuíyi nɛ́ ná isóyí ákánána.

³³Ubusíə́ ɔbɔ́á ɔyáá wɔ́ yáá, Báwolo a ná bɛndɔ bəkimə kítíníə́ ɔwá bá bɔ́labɔ́nɛ́á nɛala, a sɛ́á: «Ɔ́ niómo nɛ́ tunó na túnisə tɔ́ɔtɔ nɔ nɔ́ túmbiə ɛ́sɛ́á nɔ́ lɛ́á ɔ bɔkɔ́lɔ́ma ɛŋana hiɔ́mbɛ ubíbə́liə ɔ munuə.

³⁴Mɛ ndɔ bənú bata ɔwá nɔ bɔ́labɔ́nɛ́á nɛ́álá bɔkɔasɛ́á, ábá nɔ sa nɔ́yɛ́ kɛa, nɔ sɔ́ ŋɔ bá ɔ buɔmɔ́. Nɔ lɛ kɔ́lɔ́má ata bɔkɔa. Ata hihúínyi hɛ́ mɔlɔ́á hɛ́ ɔmɔtɛ́ ɔ uwənú ətíə́ hɛ́ sɔ́ ŋɔ nyɔ́á.»

³⁵Əlimə yɛ bɛ́ɛ́yɛ́ bɛtambá, Báwolo a ná bɛlɛ́tɛ ɛtá uwəbú busíə́, a ná Huɛlɛ́ mohóloniə híə́níníə́, a ná mɛɛ́ta bísə́kə́níə́, a ná nɛaka.

³⁶Nɔ́yɛ́, bəkimə bá ná makɛ́nda ɛta, mɔɛ́ta tɛ́á a ná ayɛ́ nɛaka.

³⁷Tɔ ka bákɔna bɛbɔ́ɛ́yɛa bɛ́fandɛ́ na moómo álɛ́ndɔ́lɔ́mɔnɔ má bɛndɔ na bálɛ́ndálɔ ɔ lánjɛ nuúmə́.

³⁸Ɛnaka mɔsá mukimə bá nɛ́áká, bá ná íyəkə, bá ná mɛsáŋá yɛ́ iŋəŋə́ lósókíə́ ɔ nuíyi ɔkɛaka ɔwá lánjɛ yɛ́ həhənə.

³⁹Ɛnaka ɔyáá wɔ́ úbúnúə́, bənúkə bá sa misí lɛnda ɔyɛ́á bá ná bá bá ndɔ sinə, bá ná ká ɛsɛ́lɛ́ yámɛ́ná ɔ itúbə́ ɔ ɛbɔ́ka ɔyɛ́á mənífə́ má ndɔ bɛ́nyɔ́ta ɔ misí, na ɛfɛka ɔwá bá lánjɛ tínímíə́ umə́.

⁴⁰Bá ná bilimə́limə́ bɛ́ bilə́ŋú húmbúlə́kə ɔ lánjɛ, nuíyi nɛ́ ná bɛɛ́ta ákánána, bá ná mikolí húmbúlə́kə ɔyɛ́á yɛ́ ná báá ɔ́lɔ́kɛ́nátɔ́ ɔ ɛkáŋa. Bá ná nɛ́mɔtɛ́ nɛbata tiŋə́ ɔ busíə́ ɔkɛaka ɔwá umbúínyi wɔ́ lánjɛ nyɛkákɛ́na. Umbúínyi wɔ́ ná bəə́bu ɛtá ɔ ɛsɛ́lɛ́.

⁴¹Ikúílí tɔ́ ná báá ɔwákaka ɔ ɛsɛ́lɛ́, busíə́ bɔ́ lánjɛ bɔ́ ná nyɔ́ɛ́ná ɔ mɔsɛ́á ɔwá nuíyi nɛ́ ná nyɛ́kákɛ́na, yɛ́ ná sɔ́bɛ́ná ɔ ɔmɔ́tɔ́yɛ́ ɔ mɔsɛ́á. Nɔ́yɛ́, iŋunu yɛ́ nɔmɔ́ yɛ́ ná əlimə yɛ lánjɛ nɔkɔ́lɔ́kɔ́na.

⁴²Bɔkɔfɔnɛa bá ná ɔ́kɔ́nɔ́ ɔwá bá bɛndɔ bá ɛbɔka ɔ́nɔ́kɔ́ ɔkɛaka ɔwá mbá bá sɔ́ ŋɔ tɛbɛna ɔ mɔsata.

⁴³Mba isə́lúkú yɛ banɔabilə́ a ná ihə́ŋiə ɛtá ɔwá a Báwolo nuəkə́níə́, a ná wə́búə́ mɔanɔ saŋɔna; a ná iŋgínə́ índíə́ ɔwá, bááyɛ́ ɔbá bá ndɔ manya ɔ mɔsata bá taŋá ɔlɔɔ ɔ nuíyi, bá bíásɛ́na ɔ misí.

⁴⁴Bɔ́mɔtɛ́ bá tíkə́ bɛ́hálɛakɛna ɔ bɛbámbɔ́ ɔmbáŋá ata ɔ bɛkɛ́tɛ́kɛtɛ bɛ́ lánjɛ, bá bəə́bu ɔŋgɔ́kɔ. Ɔ́ nɔ́yɛ́ bəkimə tɔ́na bá ná bɛ́bɔ́ŋɔ́ ɔ ɛsɛ́lɛ́ ɛŋaná hɛkabalɛ ɔ mɛɛ́lɔ.