Read Tunen Bɛnyɛná 28 Bible Online

Bɛnyɛná 28 - Tunen bible

Bɛnyɛná 28

¹Ɛnaka tɔ́ yɛ́ɛ́yɛ́ yɛmba bɛ́ɔ́lɔ́, bá ná bəsú lɛ́na ɔwá tɔ báka ɔ iloóló yɛ́ misí ɔ Málɛtɛ.

²Bɛndɔ bá bɔnɔŋɔ bá ná bəsú káhá na mɔlɛ́má muɛsɛ. Bá ná hiwə hɛŋɛ́ŋa kɔtáka, ɛ́sɛ́á ɛmbɔŋɔ yɛ́ ná lúmə́ ɔ ɔnaa, nikə tɔ́na umə́, bá ná bəsú káhá ɔ ɛmɛ́ŋɛ́ yɛ hiwə.

³Báwolo a ná ɛtáká yɛ́ tɔkasa tíábáka ɔkɛaka ɔwá á hákɛ́na ɔ hiwə, ikúílí a ná báá ɔ tɔkasa ɔháá ɔ hiwə, mulúkúlúku wɔ́ hiwə wɔ́ ná kɛ́áka, ɛmbɛ́nɛ yɛ́ ná fámá ɔ tɔkasa nuúmə́, yɛ́ ná bíhíóŋólíə́ ɔ ɔwayɛ́ mɔkátá.

⁴Ikúílí bɛndɔ bá bɔnɔŋɔ bá ná miáhɔ yámá bíhíóŋólíə́tɔ́ ɔ mɔkátá wɔ́ Báwolo, bá ná botólíə́ ɔ ɔlaa bəə́bu na bəə́bu bá sɛ́á: «Wɔ́ɔwɔ mɔndɔ a lɛa taká muɔnɔ́bɛndɔ, ata nɔ́yɛ́ ɛ́sɛ́á a ná bɛ́ɔ́lɔ́ ɔ nɔmɔ́, Huɛlɛ́ ɔwá a lɛ́á wataká lɛ ndɔ siə ɔwá a nɔmɔ́kɔ.»

⁵Mba, Báwolo a ná mɔkátá fúkə́lə́ ɛmbɛ́nɛ yɛ́ ná kɔɛ́na ɔ hiwə, ata bɔkɔa bɔ́ sa ndá wɛɛ́ya fámɛ́na.

⁶Bɔ́mɔtɛ́ bá tátáka ɔwá bá siəkínə́ ɛ́sɛ́á ɛkasɛ wə́yíə́ mɔkátá wɔ́ nutə́kə, ata ɛkasɛ a kɔ́á iwə́wə́. Əlimə yɛ ɔtáta ikúílí yɛtatánɛ, bá ná yámá ɔwá ata bɔkɔa bɔ́ sá wɛɛ́ya kɛa. Bá ná munuə kɔ́ŋɔ́nɛ́na bá sɛ́á: «Wɔ́ɔwɔ mɔndɔ a lɛa yɛmɔtɛ́ huɛlɛ́!»

⁷Misí yɛ wɔmɔtɛ́ mukúkə mɔŋɛ́ŋa wa yɛ́táyɛ́ iloóló yɛ́ ka báá ɔ ɛmɛ́ŋɛ́, nɛ́áyɛ́á niínyə á Bubilíyusu. A ná bəsú káhá ɛ́sɛ́á bɛ́áyɛ́á bɛŋgɔ́áyɛ́, a ná bəsú tə́tə́níə́ tunó tɔ́lálɔ́ ɔ ɔwayɛ́ ɔmbɛ́la.

⁸Nɔ́yɛ́, yayɛ́á isə́ a ka báá sianátɔ́ bɔkɔasɛ́á, a ka bá a ndɔ náá ɔ nikə na hikótó hɛ́ mɔkaka. Báwolo a ná bɛ́nyálɛ́la ɔ ɔwayɛ́ mɔlɔ́á wɔ́ bɔaná, a ná bɛ́kálákɛ́na, a ná wɛɛ́ya makátá tálɛ́ná, wɛ́ɛ́yɛ́ mɔndɔ a ná niŋə.

⁹Əlimə yɛ nɔ́yɛ́, bɛ́mɔtɛ́ bɛnákɛnákɛ ɔbá bá ná báá ɔ yɛ́táyɛ́ iloóló, bá ná ndáfámáká ɔwayɛ́ busíə́, a ná bəə́bu bəkimə niŋə́sə́kíə́ tɔ́na.

¹⁰Bɛndɔ bá bɔ́táyɛ́ bɔnɔŋɔ bá ná bəsú tuúmə híə́níníə́ mɔŋɛ́ŋa. Ɔ ikúílí ɔyɛ́á tɔ ná báá ɔ ɔwákaka, bá ná bəsú índíə́ bikimə ɔbɛ́á tɔ ná bá tɔ ndɔ sɔ́ka ɛlɔ́áyɛ́ mɔkɛnda.

¹¹Tɔ ka kɛaka miilí ɛ́lálɔ́ ɔ Málɛtɛ, tɔ ná yɛmɔtɛ́ lánjɛ ɛtá ɔyɛ́á yɛ́ ná húlínə ɔ Alɛkɛsandilíə́, bá ɛ́lɛakɛnɛna bá sɛ́á: «Bɛhuɛlɛ́ ɔbɛ́á bɛ́ lɛ́á mahása.» Yɛ́táyɛ́ lánjɛ yɛ́ ka ndáfáma ubusíə́ bɔ́ ikúílí yɛ́ əmbumə ɔ iloóló yɛ́ misí.

¹²Tɔ ná káfámá ɔ bətínə́ yɛ Silakúsu, tɔ ná túmbíə́ umə́ tunó tɔ́lálɔ́.

¹³Ɔmɔ́tɔ́yɛ́, tɔ ná ɔŋgɔ́kɔ́ ɛsɛ́lɛ́ na ɛsɛ́lɛ́ ɔkɛaka ɔwá tɔ káfámá ɔ bətínə́ yɛ Lə́njio. Ɔ ɔyáyáka, umbúínyi wɔ́ ná húlínə́ ɔ makɛ́ka wɔ́ ná bəsú ɔ́lɔ, tɔ ná kɛ́áká ɔbánɔ́ tunó tɔ́fandɛ́ ɔkafámáká ɔ bətínə́ yɛ Busɔlɛ.

¹⁴Ɔ mɛ́táyɛ́ bətínə́, tɔ ná bənísə́ á bəlumininə kɔ́ána ɔbá bá ná bəsú batá ɔwá, tɔ́ túmbíə́ nitə́ nɛ́mɔtɛ́ na bəə́bu. Náana tɔ́ ná kɛ́áka mbá tɔ nɔ́ kafámá ɔ Lɔ́ma.

¹⁵Ɛnaka tɔ́ báá ɔ Busɔlɛ, bəlumininə ɔbá bá lɛ́á ɔ Lɔ́ma bá ná ɔ́kɔ́ ɔwá tɔ lɛa ɔ ɔsákɔna, bá ná fámáká ɔ ɛnɔ́mɛ ɔ uwəsú ɔ ndakaha, tɔ ná bɔ́mɔtɛ́ ɛ́nyánáná tɔ́na ɔ nioní ɔnɛ́á bá ndɔ ɛ́lɛnɛna Abiúsu, tɔ ná bɔ́mɔtɛ́ ɛ́nyánána ɔ yɛ́mɔtɛ́ ɛbɔ́ka ɔyɛ́á bá ndɔ ɛ́lɛnɛna bá sɛ́á, Məə́bə málálɔ́ má batɔ́mbátɔmba. Ɛnaka Báwolo a bənísə́ yámá, a ná Huɛlɛ́ mohóloniə híə́níníə́, a ná kánjɔ́á.

¹⁶Ikúílí tɔ ná káfámá ɔ Lɔ́ma, bá ná Báwolo iŋgínə́ índíə́ ɔwá a ayɛ́ tuənə́kínə bíbúə́, mɔkɔfɔnɛa á wɛɛ́ya tátáká tɔ́na.

¹⁷Əlimə yɛ tunó tɔ́lálɔ́, Báwolo a ná bisə́lúkú bɛ́ Bɛyútɛnɛ bɛ́ Lɔ́ma ɛ́lɛ́ákɛ́na ɔ ɔwayɛ́ ɔmbɛ́la. Ɛnaka bá kɔtákána, a ná bəə́bu lɛ́na a sɛ́á: «Á bənísə́, ɔwámɛ ɔwá mɛ lɛ bá ná hɛkɔma ɔwɔŋgɔkɔnɔ yə́súə́ ilúkunə ata bíə́súə́ bɛnɛ́ma bɛ́ bíə́súə́ bisə́kínə́, mba, bá ka mɛaŋɔ́á halɛna ɔ Yəlúsalɛma, bá ná mɛaŋɔ́á hánɛ́ná tɔ́na ɔ makátá má bɛndɔ bá Lɔ́ma.

¹⁸Ɛnaka bá mɛaŋɔ́á tíbə́kíníə́ muɛsɛ muɛsɛ, bátáyɛ́ bɛndɔ bá ka siəkə ɔ ɔwámɛ ɔniasa bɔkɔasɛ́á, bá sa hɛkɔma bɔ́ŋɔ́ ɔhɛ́á mɛ ná kɛ́áka ɔ nindínə́ ɔnɛ́á bá mɛaŋɔ́á ɔ́nɔkɔ.

¹⁹Bɛyútɛnɛ bá ná bísúmbə́níə́, mɛ ka báá bíə́kíníə́tɔ́ ɔwá mɛ ɛsáká húmbúlə́kə á káyɛsa yɛ Lɔ́ma busíə́. Mɛ sa bá na ɛfɛka ɔwá mɛ bɔ́ámɛ́á bɔnɔŋɔ sɔ́mɛ́na.

²⁰Ɔ́ hítə́yí hifílí hɛ́ ná kɛ́áka, mɛ ná batá ɔwá mɛ siəkínə́nə́ na bənú, tɔ́ ŋgamáká tɔ́na. Yííyí mɛsáŋa ɔyɛ́á mɛ lɛ́á túánátɔ́, ɔ́ ɛlɔ́áyɛ́ mɔndɔ ɔwá bɛndɔ bá Ísilahɛ́lɛ bá ndɔ táta na mɔlɛ́má úmotí.»

²¹Bá ná wɛɛ́ya bíhíə́níníə́ bá sɛ́á: «Tɔ sa əsú hiəfulə kusənə ata hímotí ɔhɛ́á hɛ́ nɔ́ húlínə ɔ Yútɛa ɔ ɔwáwɔ ɛsalɛ, ata wəsúə́ munísə́ ɔmɔtɛ́ ɔwá a ná húlínə́ umə́, a sa əsú bɔkɔa bɔbɛ́á lɛna ɔwáwɔ ɛlɔ́á.

²²Mba, tɔ hikəkiə ɔwá, ɔ́ bəsú nífúnə́kínə́ muɛsɛ aŋɔ́á bɛ́múɛ́tɛ́ yatɛ́ ɔyɛ́á yɛ́ lɛ́á ɔ ɔwáwɔ mɔlɛ́má nuúmə́ bɔkɔasɛ́á, bɛbɔ́ka ɔbánɔ́ bikimə, bá ndɔ ilúkunə ɛ́ŋɛ́mana ɔyɛ́á ɔ lɛ́á.»

²³Bá ná ikúílí bílíhə́níə́ na Báwolo, ɛnaka hinó hɛ́ ndáfámá, bá ná ndá wɛɛ́ya kɔ́áná sabɔ́á ɔ ɛbɔ́ka ɔyɛ́á a ná bá a ndɔ tuənə. Báwolo a ná botólíə́ ɔ uwəbú ɔ bɛkɔa unífúninə ɔ balakɛna siísíə́ ɔkafámáká bɛkɔlakɔ́lá, a ná bəə́bu bɛkɔa nífúnə́kínə́ ɔwɔŋgɔkɔnɔ nɛmanɛna nɛ́ nɔɔ́mɛná. Ɔkɛaka ɔwá bá Yə́susu lumínə, a ná bɛtambá bɛ́ umbə́ndə́ wɔ́ Mósisi bɛ́kɛ́ákɛ́na na bɛ́ tuəfulə tɔ́ bɔhɛ́nátɔtányɛ́.

²⁴Bɔ́mɔtɛ́ uwəbú ətíə́ bá ná ɔ́kɔ́kɛ́ná yatɛ́ ɔyɛ́á a ndɔ laa, bá ná lumínə, mba bɔ́mɔtɛ́ tɔ́na, bá ɔ́kɔ́kɛ́na bá ná kinə́ ɔ uluminə.

²⁵Nɔ́yɛ́, kɛsalɛ́á yɛ́ ná fínə́ ɔ uwəbú ətíə́ ɔ nindínə́ ɔnɛ́á, ikúílí yɛ́ usə́mbə́nəniə, bá sa bá munuə úmotí. Báwolo a ná kɔndá ɛtambá ɛ́mɔtɛ́ a sɛ́á: «Umbúínyi Mɔnaŋanaŋa wɔ́ ka bá na hifílí ɛnaka wɔ́ bíə́núə́ bisə́kínə́ hɔ́kɛ́na ɔ munuə wɔ́ mɔhɛ́nátɔtányɛ́ á Isáya.

²⁶Wɔ́ ka hɔ́ɔ́kɔ́ wɔ́ sɛ́á: “Káka yɛ́ɛ́yɛ́ ilúkunə siəlínə, ɔ́ bəə́bu lɛ́na ɔwá: Nɔ ŋɔ məlúə́ lɔ́ŋɛa muɛsɛ, mba, nɔ sa káfámá ɔwɔ́kɔ; nɔ ŋɔ məə́sə mbánjɔ́naka, nɔ lɛ sinə́nə.

²⁷Ɔ taká, bɛndɔ bá yɛ́ɛyɛ ilúkunə bá lɛa na mɔlɛ́má natákátɔ ɛ́sɛ́á muɔkɔ, bá ná məlúə́ bíníbə́kə, bá ná məə́sə fátáká ɔkɛaka ɔwá bá lɛ sinə́nə, bá lɛ ɔ́kɔ́nɔ́ ɔkɛaka ɔwá, bá lɛ bɔkɔa manyá ɔbɔ́á bá ndɔ bəə́bu lɛna, nɔ́yɛ́, bá lɛ mɔlɛ́má kɔ́ŋɔ́ná, bá ndáhíáná na Huɛlɛ́ ɔkɛaka ɔwá a bəə́bu niŋə́síə́.”

²⁸Báwolo a ná kɔndá ɔwá, nɔ́ nɔ́yɛ́ manyá nɔ sɛ́á, Huɛlɛ́ a ka mɛsɔ́ma yɛ bɛndɔ unuəniə lɔ́mɛ́na ɔ bááyɛ́ ɔbá bá lɛ bá Bɛyútɛnɛ, bəə́bu bá ŋɔ yɛɛ́ta ɔ́kɔ́kɛna.» [

²⁹Əlimə yɛ bɛ́ɛ́yɛ́ bɛtambá, Bɛyútɛnɛ bá ná tilə́ bá ndɔ húlə́ tə́ŋə́niə mɔŋɛ́ŋa bəə́bu na bəə́bu].

³⁰Báwolo a ná tuənə́kínə tuɔŋɔ tɔ́fandɛ́ húlútu ɔ miímə ɔyɛ́á a ná lɛ́ndɛ́á. A bááyɛ́ bəkimə káháka muɛsɛ ɔbá bá ndɔ nda wɛɛ́ya siəlínə.

³¹A bɛndɔ bɛkɔa hɔ́kɛna ɔwɔŋgɔkɔnɔ Nɛmanɛna nɛ́ Huɛlɛ́, a bɛndɔ úkúnəkiə tɔ́na na yɔnɛ́nɛna yikimə ɛ́yánɛ́ a lɛ́á Isə́lúkú á Yə́susu Kilísitusu, ata mɔndɔ a sa wɛɛ́ya kotiə.