Read Tunen Bɛnyɛná 3 Bible Online

Bɛnyɛná 3 - Tunen bible

Bɛnyɛná 3

¹Hinó hímotí, Bíə́lə na Yɔhánɛsɛ bá ka bálaka ɔ wákaka ɔ Tɛ́mbɛlɛ[7] ɔ mabɛ́kálɛ́na má ɛŋgɛ́ŋɛ́ ɛ́lálɔ́ yɛ́ bɛkɔlakɔ́lá.

²Mɔndɔ ɔmɔtɛ́ a ka báá ɔmɔ́tɔ́yɛ́ bíbíə́nə́tɔ́ ɛkátá, buɔsɛ́ tɛ́á bá nda wɛɛ́ya bɛ́lɛ́na ɔ hɛkɔ́kɛ hɛ́ Tɛ́mbɛlɛ ɔhɛ́á bá ndɔ ɛ́lɛnɛna bá sɛ́á Hɛkɔ́kɛ Hɛmbányɛ, ɛlɔ́áyɛ́ mahánɛna ɔbata ɔ bɛndɔ ɔbá bá ná báá bá ndɔ fínə ɔ Tɛ́mbɛlɛ.

³Ɛnaka mɔ́táyɛ́ mɔndɔ á Bíə́lə na Yɔhánɛsɛ ɛ́ná ɔ ufíə́kinə ɔ umə́, a ná bəə́bu nɛhánɛna kɔŋɛ́na.

⁴Bá ná wɛɛ́ya məə́sə tala, Bíə́lə a sɛ́á: «Siəkínə́ bəsú!»

⁵Nɔ́yɛ́, a ná bəə́bu məə́sə tala, a fɛkaka ɔwá ɛkasɛ bá wɛɛ́ya bɔɔ́la índíə́.

⁶Mba, Bíə́lə a sɛ́á: «Ata ɛcácɔ́, ata kóolo yɛ́ lɛ ámɛ bá iŋísíə́kimə; yatɛ́ ɔyɛ́á yɛ́ mɛaŋɔ́á lɛ́á, ɛkasɛ mɛ aŋɔ́á índíə́: Ɔ niínyə nɛ́ Yə́susu Kilísitusu á mɔndɔ wa Násalɛtɛ, hɔalɛ́na, kɛndáka!»

⁷Nɔ́yɛ́, a ná wɛɛ́ya itíə́ ɔ mɔkátá wɔ́ bɛnɔ́mɛ, a ná wɛɛ́ya huəlíníə́; ɔ umisíúmə́, máyɛ́á makɔlɔ́ na tɔ́áyɛ́á tɔbáŋa tɔ́ ná ɔ́nɛna.

⁸Fɛnjáŋɛ! A ná hɔalɛ́na, a ná həmə, a ná lúmə́ ɔ ɔkɛnda. A ná fínə́ ɔ Tɛ́mbɛlɛ na bəə́bu; a kɛndaka, a silibəkinə, a Huɛlɛ́ nyamaka.

⁹Iloŋo yikimə yɛ́ wɛɛ́ya siəkinə, a kɛndaka, a Huɛlɛ́ nyamaka.

¹⁰Ɛnaka bá manyá ɔwá, ɔ́ wɛ́ɛ́yɛ́ mɔndɔlɔndɔ́lɔ́ ɔwá a ná báá ɔ hɛkɔ́kɛ Hɛmbányɛ ɔ Tɛ́mbɛlɛ, bá ná hoho, bá ná ə́lə́mə́nə́ mɔŋɛ́ŋa ɔ yatɛ́ ɔyɛ́á yɛ́ ná wɛɛ́ya bɛ́kɛ́áka.

¹¹Ɛ́sɛ́á wɛ́ɛ́yɛ́ mɔndɔ a ná Bíə́lə na Yɔhánɛsɛ bɛ́ɔ́lɔ́kɔ́kɛ́na, ilúkunə yikimə yɛ́ ka ndásákɔna ə́lə́mə́nə́tɔ́ uwəbú busíə́ ɔ yanda ɔyɛ́á bá ndɔ ɛ́lɛnɛna bá sɛ́á: «Yanda yɛ́ makɔɛnɛ́ yɛ́ Salómono.»

¹²Ɛnaka Bíə́lə a siəkínə́ nɔ́yɛ́, a ná ilúkunə yɛ́ bɛndɔ lɛ́na a sɛ́á: «Uwənú, á bɛndɔ bá Ísilahɛ́lɛ, ɛlɔ́áyɛ́ yatɛ́ nɔ́ ná ə́lə́mə́nə́ mɔŋɛ́ŋa ɔ bɔ́táná bɔkɔa əə́? Nɔ́ ndɔ bəsú bítíbíniə ɔ bɔkɔa ɔbɔ́á tɔ nɔ́ yɛ́ɛyɛ ɛkátá yɛ́ mɔndɔ kindəsəkiə, ɛ́sɛ́á na yəsúə́ injiŋə yɛ bəsú bɛ́muɛ́tɛ́, ataná, ɔ tɔ́mbákɛna na yə́súə́ yɔkɛ́nana á Huɛlɛ́ tɔ ná nɔ́yɛ́ kɛ́áka əə́?»

¹³«Huɛlɛ́ yɛ bíə́súə́ bisə́kúlúlúnə́: Ábɛlaháma, Ísakɛ, na Yákɔbɔ, a ka wayɛ́á mɔnyɛna á Yə́susu úmə́kiə, ɔwá, uwənú, nɔ ka wɛɛ́ya fíɔ́tɔ ɔ makátá má bamanɛna, nɔ ná wɛɛ́ya bɛ́sáŋɔ́ná ɔ busíə́ bɔ́ Bilátɛ ɔwá a ná híkə́kíə́ ɔ ɔwayɛ́ ɔniasa.

¹⁴Nɔ ka Mɔnaŋanaŋa na wataká bɛ́sáŋɔ́na, mba, nɔ ná batá ɔwá bá muɔnɔ́bɛndɔ mɛɛ́lɔ wəə.

¹⁵Nɔ́yɛ́, nɔ ka munəni ɔ́nɔ́kɔ ɔwá a ndɔ buɔmɔ́ índiənə. Mba, Huɛlɛ́ a ka wɛɛ́ya huŋuəsiə ɔ ətíə́ yɛ bəwə́nú, tɔ nɔ́yɛ́ lɛa bəmbóŋímboŋi.

¹⁶Nyɔnɔ na ilumininə ɔ niínyə nɛ́ Yə́susu, ɔ́ nɛ́táyɛ́ niínyə nɛ́ nɔ húlə ɔ wɔ́ɔwɔ mɔndɔ ɔ uwoníniə ɔwá nɔ ndɔ sinə, ɔwá nɔ ndɔ manya tɔ́na, yɛ́ɛ́yɛ́ ilumininə ɔyɛ́á yɛ́ ndɔ húlínə na Yə́susu yɛ́ ná wɛ́ɛ́yɛ́ mɔndɔ yáyɛ́á iniŋəsiə yikimə híə́níníə́ ɔ busíə́ bɔ́ bənú bəkimə.»

¹⁷«Isíŋáka, á bámɛ́á bənísə́, mɛ ndɔ manya ɔwá bənú na bíə́núə́ bisə́lúkú, nɔ ka nɔ́yɛ́ kɛaka ɔ bɔlɛmanyá.

¹⁸Huɛlɛ́ ɔwayɛ́, a ka hɔ́ɔ́kɔ ubusíə́ bɔ́ ikúílí ɔ tɔ́mbákɛna na munuə wɔ́ bɔhɛ́nátɔtányɛ́ bəkimə ɔwá, yayɛ́á Mɛ́sia a ŋɔ ɛmɔ́kɛ́ nyááka, a ná nɔ́yɛ́ úndúsíníə́ tɔ́ná.

¹⁹Nɔ́ mɛlɛ́má kɔ́ŋɔ́náka nə́ə, nɔ́ ndáhíáná na Huɛlɛ́ ɔkɛaka ɔwá a mə́núə́ mabɛ́á sɔáka.

²⁰Nɔ́yɛ́, ikúílí yɛ́ buhuhə yɛ́ ŋɔ ndafámá ɔyɛ́á Huɛlɛ́ a ŋɔ Yə́susu á Mɛ́sia lɔ́ma ɔwá a ná tɛ́fá ɛlɔ́áyɛ́ ənú.

²¹Mba isíŋáka, Yə́susu a ná hɔ́ánána ɔ utuənə ɔ nɔɔ́mɛná ɔkafámáká ɔ ikúílí ɔyɛ́á Huɛlɛ́ a ŋɔ bikimə híə́nuluniə, ɛ́sɛ́á a ná hɔ́kɛ́na ɔ ɔwayɛ́ banaŋanaŋa á bɔhɛ́nátɔtányɛ́ bá yɛ́táyɛ́ ikúílí.

²²Ɔ taká, Mósisi a ka taŋa ɔlaa a sɛ́á: “Isə́lúkú ɔ yənúə́ Huɛlɛ́ a ŋɔ wɔmɔtɛ́ mɔhɛ́nátɔtányɛ́ lɔ́ma ɔ uwənú ətíə́ ɛ́sɛ́á mɛaŋɔ́á, ɔwá a ŋɔ bámɛnɛna ɛláŋa yɛ́ yə́núə́ ilúkunə. Nɔ ŋɔ ɔ́kɔ́kɛnɛna bikimə ɔbɛ́á a ŋɔ bənú lakɛna.

²³Mɔndɔ mukimə ɔwá a sɔ́ ŋɔ wɛ́ɛ́yɛ́ Mɔhɛ́nátɔtányɛ́ ɔ́kɛ́na, Huɛlɛ́ a ŋɔ wɛɛ́ya húliə ətíə́ yɛ ilúkunə, a ŋɔ wɛɛ́ya nímə́siə tɔ́na.”

²⁴Bɔhɛ́nátɔtányɛ́ bəkimə, ɔ ulúmə́kinə á Sámuɛlɛ, na bááyɛ́ ɔbá bá ná tíkə́ húlə́kə ɔwayɛ́ əlimə, bəə́bu tɔ́ná bá ka nɔŋɔnaka yatɛ́ ɔyɛ́á tɔ́ ndɔ niŋə ɔ tɔ́ɔtɔ tunó.

²⁵Bənú nɔ́ lɛ́á baná bá bɔhɛ́nátɔtányɛ́ na bá nɛtɔana ɔnɛ́á Huɛlɛ́ a ná hákɛ́ná na bíə́núə́ bisə́kínə́ ikúílí a ná Ábɛlaháma lɛ́na a sɛ́á: “Mɛ ŋɔ məkúlə məkimə má misí sana ɔ tɔ́mbákɛna na yáwɔ́á ɛndɛkɛ.”

²⁶Ɛlɔ́áyɛ́ ənú á Huɛlɛ́ a ná taŋá ɔ wayɛ́á mɔnyɛna ufə́mə́ləniə. A ná wɛɛ́ya lɔ́má tɔ́na ɛlɔ́áyɛ́ uwə́nú ɔsana ɔkɛaka ɔwá, a malɔŋa mabɛ́á má mɔɛ́ta tɛ́á kɔŋɔna.»