Read Tunen Bɛnyɛná 4 Bible Online

Bɛnyɛná 4 - Tunen bible

Bɛnyɛná 4

¹Bətitiəmahánɛna, isə́lúkú yɛ batáta bá Tɛ́mbɛlɛ na Bɛsatúsia bá ná káfámá ikúílí ɔyɛ́á Bíə́lə na Yɔhánɛsɛ bá ná báá bá ndɔ ilúkunə hɛ́na.

²Bá ka busə́kə ɔ́kɔ mɔnɛ́ŋa bɔkɔasɛ́á Basɔ́másɔma bá ka báá bá ndɔ ilúkunə úkúniə, bá nɛhɔŋɔa nɛ́ bəwə́nú yəmbələkəniə tɔ́na ɔ tɔ́mbákɛna na iŋgətí yɛ Yə́susu.

³Bá ná bəə́bu halɛ́ákɛ́na, bá ná bəə́bú hɔkákɛ́na ɔkafámáká ɔyáyáka bɔkɔasɛ́á, yɛ́ ka báá bɛkɔlakɔ́lá.

⁴Nɔ́yɛ́, ətíə́ yɛ bááyɛ́ ɔbá bá ná ɛtambá yɛ́ Huɛlɛ́ ɔ́kɔ́kɛ́na, bəəŋí bá ka lumininə; bá ka báá hoóyi na tukóló tɔ́lánɔ tɔ́ bɛndɔ.

⁵Ɔyáyáka, bisə́lúkú bɛ́ Bɛyútɛnɛ, bɛnatákɛ na bətilə[8] bá ná kɔtálána ɔ ɛbɔ́ka ɛ́mɔtɛ́ ɔ Yəlúsalɛma.

⁶Bá ka báá umə́: Mutitiəmahánɛna mɔŋɛ́ŋa a Ána, Kayífi, Yɔhánɛsɛ, Alɛkɛsándɛlɛ na bɛláŋa bikimə bɛ́ məkúlə má bətitiəmahánɛna baŋɛ́ŋa.

⁷Bá ná Bíə́lə na Yɔhánɛsɛ húlə́nə́ ɔ uwəbú busíə́, bá ná lúmə́ ɔ uwəbú ɔnjɔnɔ bá sɛ́á: «Na yatɛ́ injiŋə ata na yatɛ́ niínyə nɔ́ ná nɔ́yɛ́ kɛ́áka əə́?»

⁸Nɔ́yɛ́, Bíə́lə úndúə́tɔ́ na Umbúínyi Mɔnaŋanaŋa, a ná bəə́bu lɛ́na a sɛ́á:

⁹«Á Bisə́lúkú bɛ́ ilúkunə na bɛnatákɛ, bá ndɔ bəsú njɔnɔ niɔfɛ́nɛ ɛlɔ́áyɛ́ buɛsɛ ɔbɔ́á tɔ ná kɛ́áka ɔ yaáta yɛ́ mɔndɔ, bá ndɔ bəsú bata tɔ́na ɔwá tɔ hɔ́ɔ́kɔ́ nəníə́ a ná niŋə.

¹⁰Uwənú bənú bəkimə na ilúkunə yikimə yɛ́ Ísilahɛ́lɛ, nɔ́ nɔ́yɛ́ mányá muɛsɛ ɔwá, ábá wɔ́ɔwɔ mɔndɔ a lɛa tɛ́nɛ́mátɔ́ ɔ uwənú busíə́ niŋə́tɔ́, yɛ́ lɛa ɔ tɔ́mbákɛna na niínyə nɛ́ Yə́susu Kilísitusu wa Násalɛtɛ, wɛ́ɛ́yɛ́ ɔwá nɔ ná ɔ́mɔ́kɛ́na ɔ ɔmbásá, ɔwá Huɛlɛ́ a ná huŋúə́síə́ ɔ ətíə́ yɛ bəwə́nú.

¹¹Yə́susu, ɔ́ wɛ́ɛ́yɛ́ ɔwá Mətilə má ndɔ laa má sɛ́á: “Muɔkɔ ɔwá, uwənú á bəlúmə́lumə nɔ́ ná ómbóko, wɔ́ ka híána muɔkɔ wɔ́ nihíkíli.”

¹²Nibínúə́niə nɛ́ lɛ ndɔ húlínə́ na muinə́muinə́. Wɛɛ́ya bíbúə́ a ná óso ɔ uwəsú unuəniə; ɔ taká, niínyə ninə́ninə́ nɛ lɛ bá háha ɔ misí ɔnɛ́á Huɛlɛ́ a ná índíə́ ətíə́ yɛ bɛndɔ ɔnɛ́á nɛ́ óso uwəsú unuəniə.»

¹³Bɛndɔ bá nindúmə́ nɛŋɛ́ŋa bá ka báá ə́lə́mə́nə́tɔ́ mɔŋɛ́ŋa bɔkɔasɛ́á, bá ka fununə ɔwá Bíə́lə na Yɔhánɛsɛ bá lɛa ɔ́nɛ́nátɔ́ ɔ uwəbú bɛtambá ata nɔ́yɛ́ ɛ́sɛ́á bá sa bá ɔ́kɔ́nátɔ, bá ka báá tɔ́na tuyomo tɔ́ bɛndɔ. Bá ka manya ɔwá bá lɛa bikindəniə bɛ́ Yə́susu.

¹⁴Mba, bá yaáta yɛ́ mɔndɔ siəkinə tɛ́nɛ́mátɔ́ ɔ uwəbú busíə́ niŋə́tɔ, bá sa bá tɔ́na na bɔkɔa buinə́buinə́ bɔ́ ɔlaa.

¹⁵Bá ná yɛ́ɛ́yɛ́ ikúílí mánɛ́na ɔwá bá bəə́bu fə́míə́ ɔ miímə yɛ mikə́lə́kí, bá ná tíkə́ tuənə ɔ utə́ŋə́niə bəə́bu na bəə́bu.

¹⁶Bá sɛ́á: «Yatɛ́ tɔ́ báaba bɛndɔ kɛ́áka əə́? Ɔ taká, bɛndɔ bəkimə bá Yəlúsalɛma bá ndɔ manya tə́lə́ŋu ɔwá bəə́bu bá ná isə́mə́tə́ kɛ́áka, tɔ sa ósó ɔ yɛɛ́ta ɔsáŋɔ́na.

¹⁷Mba, ɔkɛaka ɔwá bɔ́táná bɔkɔa bɔ́ lɛ yambáná mɔŋɛ́ŋa ɔ ətíə́ yɛ bɔnɔŋɔ, ɛkasɛ tɔ́ bəə́bu ɛ́nyákɛ́na ɔwá bá lɛ tíkə́ niínyə nɛ́ Yə́susu tə́nə tɔ́na ata ɔwanɛ́ busíə́.»

¹⁸Nɔ́yɛ́, bá ná bəə́bu ɛ́lɛ́ákɛ́ná tɔ́na, bá ná bəə́bu kotíə́ ɔwá iŋíkúílíə́kimə, bá lɛ tíkə́ niínyə nɛ́ Yə́susu tə́nə mbá ata nɛɛ́ta uwukúniə.

¹⁹Mba, Bíə́lə na Yɔhánɛsɛ bá ná bəə́bu bíhíə́níníə́ bá sɛ́á: «Siəkínə́nu bənú bɛ́múɛ́tɛ́ ábá yɛ́ lɛa hɔ́ánánátɔ́ ɔ busíə́ bɔ́ Huɛlɛ́ ɔwá, tɔ ɔ́kɔ́kɛ́nɛ́na ɔ uwənú alɛ́ɛ́, ɔ ɔwayɛ́ əə́? Nɔ́ bəsú lɛ́na nə́ə.

²⁰Ábá ɛlɔ́áyɛ́ əsú, tɔ sa ósó ukinə ɔ ɔhɔ́ɔ́ yatɛ́ ɔyɛ́á tɔ́ ná síə́kínə ata yatɛ́ ɔyɛ́á tɔ́ na ɔ́kɔ́kɛ́ná tɔ́na.»

²¹Bɛláŋa bɛ́ níndúmə́ bá ka manyɔ́ bəə́bú kɔ́áyákɛna, bá lɛ hɛkɔma bɔ́ŋɔ hɛ́ uwəbú ɔsɔ́kɔ́tɛa ɛlɔ́áyɛ́ ilúkunə, bá ná bəə́bu niása bɔkɔasɛ́á, bəə́bú bəkimə bá ka báá bá ndɔ Huɛlɛ́ nyama ɔ yatɛ́ ɔyɛ́á yɛ́ ná bɛ́kɛ́áka.

²²Ɔ taká, mɔndɔ ɔwá a ná isə́mə́tə́ yɛ́ iniŋəsiə kusə́nə, a ka báá na moómo ə́nisə má tuɔŋɔ tɔ́mbátɔ.

²³Ɛnaka bá bəə́bu niása, Bíə́lə na Yɔhánɛsɛ bá ná ká bíə́búə́ bikindəniə kɔ́ána, bá ná bəə́bu bɛkɔa bikimə nífúnə́kínə ɔbɛ́á bətitiəmahánɛna baŋɛ́ŋa na bɛnatákɛ bá ná bəə́bu lakɛ́na.

²⁴Əlimə yɛ bɛ́ɛ́yɛ́ bɛtambá ɔwɔ́kɔ, bəkimə mɔlɛ́má úmotí, bá ná máama mabɛ́kálɛ́na bə́líə́ á Huɛlɛ́ bá sɛ́á: «Á Isə́lúkú, aŋɔ́á ɔ ná nɔɔ́mɛná ná misí bɔta, nɔmɔ́ na bikimə ɔbɛ́á bɛ́ lɛ́á umə́.

²⁵Aŋɔ́á ɔ ná bɛ́ɛbɛ bɛtambá háá ɔ munuə wɔ́ yəsúə́ isə́kúlúlúnə́ á Ndə́witi ɔ wawɔ́á mɔnyɛna ɔ tɔ́mbákɛna na Umbúínyi Mɔnaŋanaŋa, ɔ sɛ́á: “Ɛlɔ́áyɛ́ yatɛ́ mɔnɔŋɔ[9] má ndɔ bínyukə əə́? Bilúkunə bɛ́ ndɔ tɔtɔkɔ hɛ́na, mba, ɛlɔ́áyɛ́ ndəmə.

²⁶Bənəni bá misí bá ka bɛ́tábɔ́naka ɔ ituəmə, bisə́lúkú bá ná tɔakána, bá ná isə́lúkú ɛ́ŋɛ́máná na munəni ɔwá a ná yɔ́mɔ́kɛ́na.”

²⁷Ɔ taká, Əlóto Aŋatibásɛ na Bɔ́ŋɔ́sú Bilátɛ bá ka tɔana ɔ yɛ́táyɛ́ bətínə́ na bilúkunə bɛ́ Ísilahɛ́lɛ na mɔnɔŋɔ mənə́mənə́, bá ná Yə́susu ɛ́ŋɛ́mána, ɔ wawɔ́á mɔnyɛna mɔnaŋanaŋa ɔwá ɔ ná yɔ́mɔ́kɛ́na.

²⁸Nɔ́yɛ́, bá ka kɛaka bikimə ɔbɛ́á ɔ ná híkə́kíə́, bɛtɛ́nɛ́mɛ́ná tɔ́na ɔbɛ́á ɔ ná ɛ́tá ɔ busíə́ bɔ́ ikúílí na injiŋə yikimə.

²⁹Á Isə́lúkú, isíŋáka, ɔ́kɔ́kɛ́ná yə́búə́ ɛkɛnyakɛ, kɛ́áka tɔ́na ɔwá báwɔ́á bɔnyɛna bá yáwɔ́á Ɛtambá nɔ́ŋɔ́náká na yɔnɛ́nɛna yikimə.

³⁰Sandɔ́ná wə́wúə́ mɔkátá wɔ́ injiŋə ɔkɛaka ɔwá, biniŋəsiə, tɔŋgɛtɛ́nɛ́á na bisə́mə́tə́ bɛ́ bíúndúsíníə́ ɔ tɔ́mbákɛna na niínyə nɛ́ Yə́susu ɔ wawɔ́á mɔnyɛna mɔnaŋanaŋa.»

³¹Ɛnaka bá mabɛ́kálɛ́na hɔ́á, ɛbɔ́ka ɔyɛ́á bá ná bámɛ́nɛ́na kɔtálánátɔ́ yɛ́ ná kílímə́lə: Bəkimə bá ná úndúə́ na Umbúínyi Mɔnaŋanaŋa, bá ɛtambá yɛ́ Huɛlɛ́ nɔŋɔnaka na yɔnɛ́nɛna.

³²Bɛndɔ bəkimə ɔbá bá ná lúmínínə, bá ka báá tɔanátɔ́ mɔlɛ́má úmotí na hɛtányɛ́ hímotí. Ata ɔmɔtɛ́ ɔ uwəbú ətíə́ a sa laa ɔwá, máyɛ́á maasɛ má lɛa ɛlɔ́áyɛ́ wɛɛ́ya bíbúə́; mba, bá bikimə bɛ́lɛakɛna ɛlɔ́áyɛ́ bəə́bu bəkimə.

³³Na injiŋə yikimə, Basɔ́másɔma bá ka báá bá ndɔ imbóŋi híə́niniə ɔwá, Isə́lúkú á Yə́susu a ka hɔŋɔa ɔ ətíə́ yɛ bəwə́nú; Huɛlɛ́ a ka bəkimə úndúsiə na bɛsɔ́nɔ.

³⁴Ata mɔndɔ ɔ uwəbú ətíə́ a sa bá ɔ nɛsɔ́ka: Ɔ taká, bááyɛ́ bəkimə ɔbá bá ná báá na bɛtɔbɔtɔ́bɔ́ ata məə́bə, bá bɛɛ́ta lúə́kə́, bá mukunə́ wɔ́ masɛma húlə́nə́,

³⁵bá túmbiə ɔ basɔ́másɔma, nɔ́yɛ́, mɔndɔ tɛ́á a kusənə yatɛ́ ɔyɛ́á yɛ́ ndɔ wɛɛ́ya bísiə.

³⁶Nɔ́yɛ́, Yɔ́sɛbɛ ɔwá basɔ́másɔma bá ná lɔ́áka á Banábasɛ, ɔ́ niɔŋɔ́ sɛ́á: «Mɔndɔ ɔwá a ndɔ makɛ́nda índiənə,» a ka bá na ɛtɔbɔtɔ́bɔ́, a ka bá mulə́witə, ibíə́nəkənə yɛ́ Cíbɛlɛ.

³⁷A ka yáyɛ́á ɛtɔbɔtɔ́bɔ́ sɛma, a ná mukunə́ hulənə, a ná túmbíə́ ɔ basɔ́másɔma.