Read Tunen Bɛnyɛná 5 Bible Online

Bɛnyɛná 5 - Tunen bible

Bɛnyɛná 5

¹Mba, bɔ́mɔtɛ́ buɔsɛ́, mɔndɔ ɔmɔtɛ́ a ka báá ɔmɔ́tɔ́yɛ́ nɛ́áyɛ́á niínyə á Ananiásɛ, wayɛ́á muəndú nɛ́áyɛ́á niínyə á Safíla; munuə úmotí, bá ná yə́búə́ ɛtɔbɔtɔ́bɔ́ luə.

²Nɔ́yɛ́ bá ná ɔ́kɔ́nɔ́ na muənyí ɔwá bá mɔ́mɔtɛ́ mɔnɛ́á húlíə́, bá bitə; ɛsalɛ ɔyɛ́á yɛ́ ná tíkə́nə́, a ná ɛta, a ná kíndíə́ ɔ basɔ́másɔma.

³Nɔ́yɛ́ Bíə́lə a ná wɛɛ́ya lɛ́na a sɛ́á: «Ananiásɛ, ɛlɔ́áyɛ́ yatɛ́ ɔ ná níása ɔwá Sátana a fínə́ ɔ ɔwáwɔ mɔlɛ́má əə́? Ɔ ná Umbúínyi Mɔnaŋanaŋa nimbəkə, ɔ ná ɛsalɛ yɛ́ mɔnɛ́á bítə́ má ɛtɔbɔtɔ́bɔ́ ɔyɛ́á ɔ ná luə.

⁴Ubusíə́ ɔbɔ́á ɔ mɛɛ́ta lúə́, yɛ́ ka bámɛnɛna yáwɔ. Ikúílí ɔ ná mɛɛ́ta lúə́, tátá máwɔ́á mɔnɛ́á əə́? Mba, ɛlɔ́áyɛ́ yatɛ́ ɔ ná bɔ́táyɛ́ bɔkɔa kɛáka ɔ ɔwáwɔ mɔlɛ́má əə́? Manyá ɔ sɛ́á á Huɛlɛ́ ɔ́ ná nimbəkə, mba, tátá bɛndɔ ɔ ná nimbəkə.»

⁵Ɛnaka Ananiásɛ á bɛtambá bɛ́ Bíə́lə ɔ́kɔ́, a ná kɔa, ɔ́ uwə́kunə wííyí oo! Nɔ́yɛ́ bɔkɔ́lɔ́ma bɔ́ ná bɛndɔ bəkimə itíə́ ɔbá bá ná bɔ́táyɛ́ bɔkɔa ɔ́kɔ́kɛ́na.

⁶Bɛnɔ́kɔ́nɔkɔ bɛ́ bɛndɔ bá ná ndásá, bá ná wə́yíə́ umimə bɔŋɔ́kɛ́ná na ɔmbɔ́mɔ́, bá ná wɛɛ́ya túáná, bá ná ká wɛɛ́ya nyəə.

⁷Ɛnaka ikúílí yɛ́ tɔ́mbáká hoóyi na ɛŋgɛ́ŋɛ́ ɛ́lálɔ́, muəndú wa Ananiásɛ a ná finə, a lɛ bɔkɔa manya ɔbɔ́á bɔ́ ná bɛ́kɛ́áka.

⁸Bíə́lə a ná wɛɛ́ya ɛ́lɛ́na, a ná wɛɛ́ya batá a sɛ́á: «Lɛná mɛaŋɔ́á, ɔ́ mútə́yí mukunə́ nɔ́ ná ɛtɔbɔtɔ́bɔ́ lúə́ əə́?» A ná láá a sɛ́á: «Ɛ́ɛ! Ɔ́ mútə́yí mukunə́!»

⁹Bíə́lə a sɛ́á: «Yatɛ́ yɛ́ ná kɛ́áka ɔwá nɔ́ ɔ́kɔ́nɔ́ ɔkɛaka ɔwá nɔ Umbúínyi Mɔnaŋanaŋa wɔ́ Huɛlɛ́ líŋgə́síə́ əə́? Siəkínə: Bɛndɔ ɔbá bá nɔ́ ka yawɔ́á ibə́ nyə́ə́, ɔ́ bəə́bu bááyɛ́ ɔ busíə́ bɔ́ hɛkɔ́kɛ, ɛkasɛ bá aŋɔ́á ákánáná tɔ́na.»

¹⁰Ɔ umisíumə́, muəndú a ná kɔ́á muwə́nú ɔ busíə́ bɔ́ mɔsɔ́másɔma. Bɛnɔ́kɔ́nɔkɔ bɛ́ bɛndɔ bá fínə́, bá ná wɛɛ́ya nibə́ wə́ə́tɔ; bá ná wɛɛ́ya túánáka, bá ná ká wɛɛ́ya nyə́ə́ ɔ ɛmɛ́ŋɛ́ yɛ yayɛ́á ibə́.

¹¹Bɔkɔ́lɔ́ma bɔ́ ná bəlumininə bəkimə itíə́ ɔ ɔyáyɛ́na, na bááyɛ́ tɔ́na ɔbá bá ná yɛ́táyɛ́ imbə́nú ɔ́kɔ́kɛ́na.

¹²Basɔ́másɔma bá ka báá bá ndɔ bisə́mə́tə́ na tɔŋgɛtɛ́nɛ́á kɛa tuəŋí ɔ ətíə́ yɛ ilúkunə. Bəlumininə bəkimə na mɔlɛ́má úmotí, bá ka báá tuənə́kínə́tɔ́ ɔ Yanda yɛ́ makɔɛnɛ́ yɛ́ Salómono.

¹³Mba, ata mɔndɔ a sa óso ɔbɛ́lata na bəə́bu, nɔ́yɛ́, yəbúə́ indumə yɛ́ tɔ́mbáka ɔ bɔnɔŋɔ bukimə.

¹⁴Iloŋo yɛŋɛ́ŋa yɛ́ balɛ́mɛndɔ́ na bəəndú yɛ́ áyaka ikúílí tɛ́á, bá ka níə́búə́ nɛkɔmba tálɛ́na á Isə́lúkú.

¹⁵Bɛndɔ bá bɛnákɛnákɛ fə́mə́kiə ɔ mɛnɔ́mɛ, bá bəə́bu siənəkiniə ɔ bibúŋgə́ na bɛkaálɛa ɔkɛaka ɔwá, ɔ ikúílí Bíə́lə a ndɔ tɔ́mbákɛna ɔmɔ́tɔ́yɛ́, yáyɛ́á ilindíə́lindiə yɛ́ wɔmɔtɛ́ ɔ uwəbú ətíə́ itiələ.

¹⁶Hɔ́ánánátɔ́, iloŋo yɛ́ bɛndɔ bá tutikə tɔ́ mamɛ́ŋɛ́ ɔ Yəlúsalɛma, bá bɛndɔ bá mɛɛ́mbɔ húlə́kənə na bɔ́mɔtɛ́ ɔbá imbúínyi mɛbɛ́á yɛ́ ná báá yɛ́ ndɔ hɔ́mbɔ. Bəkimə bá niŋəkə.

¹⁷Ɛlɔ́áyɛ́ nɔ́yɛ́, Isə́lúkú mɛŋɛ́ŋa yɛ bətitiəmahánɛna, bááyɛ́ bəkimə ɔbá bá ná bá na wɛɛ́ya, ɔ́ niɔŋɔ́ á ilúkunə yɛ́ Bɛsatúsia, bá basɔ́másɔma siəkinə na məə́sə mabɛ́á. Bá ná ihə́ŋiə ɛtá ɔ uwəbú bɔbɛ́á ɔ ɔkɛa.

¹⁸Nɔ́yɛ́, bá ná basɔ́másɔma halɛ́ákɛ́na, bá ná bəə́bu hákɛ́na ɔ miímə yɛ ɛbɔka ɔ busíə́ bɔ́ bɛndɔ bəkimə.

¹⁹Mba, ətíə́ yɛ bulúə́, yɛmɔtɛ́ áŋgɛlɛ yɛ Isə́lúkú a ná tɔkɔ́kɛ tɔ́ miímə yɛ ɛbɔka kunə́kə, a ná bəə́bu fə́míə́, a sɛ́á:

²⁰«Nɔ́ ákáná ɔ tɛ́mbɛlɛ, nɔ́ bɛndɔ bəkimə bá bɔnɔŋɔ bɛ́ɛ́yɛ́ bɛtambá bɛ́ buɔmɔ́ túmbə́lə́kə́níə́ umə́.»

²¹Ɛnaka bá ɔkɔ́kɛ́ná nɔ́yɛ́, siísísísíə́, bá ná ákáná ɔ tɛ́mbɛlɛ, bá ná botólíə́ ɔ bɛndɔ uwukúniə. Ɔ yɛ́táyɛ́ siísíə́, isə́lúkú mɛŋɛ́ŋa yɛ bətitiəmahánɛna na yáyɛ́á ilúkunə yɛ́ bɛndɔ, bá ná bakɛndana bɛyútɛnɛ bá nindúmə́ nɛŋɛ́ŋa kɔtáka. Bá ná bɔkɔfɔnɛa lɔ́má ɔ basɔ́másɔma ɔkɛɛtá ɔbá bá ná hákɛ́na ɔ ɛbɔka.

²²Mba, ikúílí ɔyɛ́á bɔkɔfɔnɛa bá ná káfámá ɔ miímə yɛ ɛbɔka, bá sa basɔ́másɔma nibə. Bá ná tilə́, bá ná bɛndɔ bá nindúmə́ nɛŋɛ́ŋa lakɛ́ná bá sɛ́á:

²³«Tɔ ná nibə́ tɔkɔ́kɛ tukimə kɔɛsákátɔ́ muɛsɛ muɛsɛ, batátámiímə yɛ ɛbɔka bəkimə bá ka báá tɛ́nɛ́mákátɔ́ ɔ busíə́ bɔ́ tɔkɔ́kɛ; mba ata nɔ́yɛ́, ikúílí tɔ ná tɔkɔ́kɛ kunə́kə, tɔ sa nibə ata mɔndɔ ɔ nuúmə́.»

²⁴Ɛnaka isə́lúkú yɛ batáta tɛ́mbɛlɛ na bisə́lúkú bɛ́ bətitiəmahánɛna bá əbú ɔ́kɔ́ nɔ́yɛ́, ɛmanya yɛ́ ná bəə́bu nyɔ́áká ɔ mɛlɔ́á, bá bɛ́bátaka bá sɛ́á: «Baánɛ, yatɛ́ yɛ́ ná ndá basɔ́másɔma fámɛ́ná əə́?»

²⁵Mba, mɔndɔ ɔmɔtɛ́ a ná ndá bəə́bú lɛ́na a sɛ́á: «Nɔ́ ɔ́kɔ́kɛ́na! Bááyɛ́ bɛndɔ ɔbá nɔ́ ná hákɛ́ná ɔ ɛbɔka, bá báka hə́ə́ní ɔ tɛ́mbɛlɛ, bá ndɔ bɛndɔ bɛkɔa úkúniə.»

²⁶Isə́lúkú yɛ bətə́tə́niə tɛ́mbɛlɛ na báyɛ́á bɛndɔ, bá ná ndá basɔ́másɔma híánáná ɔ buyoyoní bɔkɔasɛ́á, bɔkɔfɔnɛa bəə́bu bɛ́múɛ́tɛ́ bá ka báá bá ndɔ kɔ́lɔ́ma ɔwá, bɛndɔ bá óso ɔ uwəbú ulúmə́kə na miɔkɔ.

²⁷Basɔ́másɔma ɔbá bá ná báá ɔ busíə́ bɔ́ nindúmə́ nɛŋɛ́ŋa nɛ́ bəkə́lə́siə bá ka siəkinə.[10] Isə́lúkú yɛ bətitiəmahánɛna a ná bəə́bu bata.

²⁸A sɛ́á: «Tɔ ka bənú sáŋɔ́nɛna ɔwá, nɔ lɛ tíkə́ niínyə nɛ́ wɛ́ɛ́yɛ́ mɔndɔ úkúniə háha, mba uwənú, nɔ ná Yəlúsalɛma úndúsíə́ na bíə́núə́ bilə́líə́! Nɔ ndɔ siə nɔ sɛ́á manɔ́ŋɔ́ má wɛ́ɛ́yɛ́ mɔndɔ má olókíníə́ ɔ uwəsú mɛɛ́lɔ əə́?»

²⁹Əlimə yɛ nɔ́yɛ́, Bíə́lə na bɔ́mɔtɛ́ basɔ́másɔma bá ná bɛ́kámɔ́sɔ́na bá sɛ́á: «Tɔ ná hɔ́ánána ɔwɔkɛ́na á Huɛlɛ́ yáyɛ́ná ɔ bɛndɔ.

³⁰Huɛlɛ́ yɛ bíə́súə́ bisə́kúlúlúnə́ a ka Yə́susu huŋuəsiə ɔwá nɔ ná ɔ́mɔ́kɛ́na ɔ ɔmbásá.

³¹A ka wɛɛ́ya bə́liə na yayɛ́á injiŋə, a ná wɛɛ́ya bɛ́lɛ́ná Munəni na Munuəniə ɔkɛaka ɔwá, ilúkunə yɛ́ Ísilahɛ́lɛ bá mɔlɛ́má kɔ́ŋɔ́ná mbá Huɛlɛ́ a bəə́bu mə́búə́ mabɛ́á niasɛ́na.

³²Bəsú na Umbúínyi Mɔnaŋanaŋa ɔwá Huɛlɛ́ a ná índíə́ ɔ bááyɛ́ ɔbá bá ndɔ wɛɛ́ya ɔ́kɛ́na, tɔ lɛa bəmbóŋímboŋi bá bɛ́táyɛ́ bɛkɔa bikimə.»

³³Ɛnaka bɛndɔ bá nindúmə́ nɛŋɛ́ŋa nɛ́ bəkə́lə́siə bá bɛ́táyɛ́ bɛkɔa ɔ́kɔ́kɛ́ná, hilóbi hɛ́ ná bəə́bu tuana; bá ná bɛtɛ́nɛ́mɛ́ná ɛ́tá ɔ basɔ́másɔma ɔwɔ́nɔ.

³⁴Mba, mɔndɔ ɔmɔtɛ́ a ka báá ɔmɔ́tɔ́yɛ́ nɛ́áyɛ́á niínyə á Kamaliɛ́lɛ. A ka báá mɔndɔ wa nindúmə́ nɛ́ Bɛfalísia, a ka báá mɔmanyumbə́ndə́, bɛndɔ bəkimə bá wɛɛ́ya bə́təkiə mɔŋɛ́ŋa; mɔ́táyɛ́ mɔndɔ a ná hɔalɛ́na mɔtɛ́nɛná ətíə́ yɛ nindúmə́ nɛŋɛ́ŋa, a ná bɔkɔfɔnɛa batá a sɛ́á bá naŋɔ́ basɔ́másɔma fámána ɔ niə́lətíə́.

³⁵Ɛnaka bá bəə́bu fə́mə́kíə́, a ná bɛndɔ bá nindúmə́ nɛŋɛ́ŋa nɛ bəkə́lə́siə lɛ́na a sɛ́á: «Uwənú á bɔamɛ bá Ísilahɛ́lɛ, nɔ́ bɛ́tátáká na bɔkɔa ɔbɔ́á nɔ ndɔ siə ɔ báaba bɛndɔ ɔkɛa.

³⁶Tɛ́tɛ́á yɛ tuɔŋɔ tɔ nɔ́ tɔ́mbáka, Tətásɛ a ka bínə́niə, a bɛ́kɔ́lɔmɔkɔna a sɛ́á a báka tiísi yɛ mɔndɔ; bɛndɔ bəəŋí bá ka wɛɛ́ya ɔŋgɔkɔ hoóyi na bɛbɔ́ɛ́yɛa bínisə. Mba, ikúílí ɔyɛ́á bɛndɔ bá ná wɛɛ́ya ɔ́nɔ́kɔ́, bɛndɔ bəkimə ɔbá bá ná wɛɛ́ya ɔŋgɔ́kɔ, bá ná sambana, ata mɔndɔ ɔmɔtɛ́ a sa tíkə́nə ɔ wútə́yí umúlə.

³⁷Ɔ ɔwayɛ́ əlimə, ɔ ikúílí yɛ́ mɔfanana, Yútasɛ mɔndɔ wa Kalɛ́lɛa a ná ayɛ́ bínə́níə́ tɔ́na, bá ná wɛɛ́ya ɔnɔkɔ, bɛndɔ bəkimə ɔbá bá ná wɛɛ́ya ɔŋgɔ́kɔ, bá ná sambana.

³⁸Ɔ́ ɛlɔ́áyɛ́ bɔ́táyɛ́ bɔkɔa, mɛ ndɔ bənú lɛna isíŋáka ɔwá, nɔ lɛ ikúílí ɛ́tá ɔ bɔkɔa bɔ́ báaba bɛndɔ; nɔ́ bəə́bu niása bá ákana, ábá mə́búə́ mafɛka na búə́búə́ buolí bɔ́ ndɔ húlínə na bɛndɔ, bɔ́ ŋɔ nímínə.

³⁹Mba, ábá bɔ́ ndɔ húlínə na Huɛlɛ́, nɔ sa ósó ɔ bɔɛ́ta unímə́siə. Nɔ́ bíkókósókíə́ muɛsɛ á Huɛlɛ́ ukumunə ɔ bilə́!» Bɛndɔ bəkimə bá ná ɛfɛka yɛ́ Kamaliɛ́lɛ lumínə.

⁴⁰Nɔyɛ́, bá ná basɔ́másɔma ɛ́lɛ́ákɛ́na, bá ná bəə́bu hɔ́ányáká muɛsɛ muɛsɛ, bá ná bəə́bu sáŋɔ́nɛ́na ɔwá bá lɛ tíkə́ niínyə nɛ́ Yə́susu bɛ́támba, bá ná bəə́bu niása.

⁴¹Basɔ́másɔma bá ná hɔalɛ́na ɔ ətíə́ yɛ nindúmə́ nɛŋɛ́ŋa, bá ná ákáná na nɛhɔnɔ ɔ mɔlɛ́má bɔkɔasɛ́á, Huɛlɛ́ a ka siəkinə ɔwá bá lɛa bifəyí ɔ ɛmɔ́kɛ́ ɔnyáá ɛlɔ́áyɛ́ niínyə nɛ́ Yə́susu.

⁴²Buɔsɛ́ tɛ́á ɔ Tɛ́mbɛlɛ ata ɔ mambɛ́la, bá húlə́ Imbə́nú Yɛɛsɛ yɛ Yə́susu á Mɛ́sia úkúnəkiə, bá yəmbələkəniə tɔ́na ɛŋaná ɔtɔmbɔ.