Read Tunen Bɛnyɛná 7 Bible Online

Bɛnyɛná 7 - Tunen bible

Bɛnyɛná 7

¹Nɔ́yɛ́, Mutitiəmahánɛna mɔŋɛ́ŋa a ná wɛɛ́ya batá a sɛ́á: «Yatɛ́ ɔyɛ́á bá ndɔ laa ɛlɔ́áyɛ́ áwɔ yɛ́ lɛa taká əə́?»

²Itiənə a ná bɛ́kámɔ́sɔ́na a sɛ́á: «Á bənísə́ na bisə́, nɔ́ mɛaŋɔ́á ɔ́kɔ́ muɛsɛ, Huɛlɛ́ yɛ tuúmə a ka bínə́niə á yəsúə́ isə́ á Ábɛlaháma ikúílí a ná báá ɔ Mɛsɔbɔtamíə́, ubusíə́ ɔbɔ́á a kə́túə́nə́kínə ɔ Halána.

³A ná wɛɛ́ya lɛ́na a sɛ́á: “Tíkə́ bɔ́áwɔ́á bɔnɔŋɔ na nɛ́áwɔ́á nikúlə, káka ɔ bɔnɔŋɔ ɔbɔ́á mɛ ŋɔ aŋɔ́á ínə́niə.”

⁴Ábɛlaháma a ná yɛ́ɛ́yɛ́ ikúílí hɔ́álɛ́na ɔ bɔnɔŋɔ bɔ́ bɛndɔ bá Kalátɛ, a ná kə́túə́nə́kínə ɔ Halána. Ɔmɔ́tɔ́yɛ́, əlimə ɔwá yayɛ́á isə́ a nɔ́ wə́ə́, Huɛlɛ́ a ná wɛɛ́ya tuəníníə́ ɔ bɔ́ɔbɔ bɔnɔŋɔ ɔbɔ́á nɔ ndɔ niŋə isíŋáka.

⁵Huɛlɛ́ sa wɛɛ́ya misí tíkínə mbá ata nɛtálɛ́ná nɛ́ mɔkɔlɔ́ ɔ bɔ́táyɛ́ bɔnɔŋɔ, mba, a ka wɛɛ́ya bílíhə́niə ɔwá, a ŋɔ bɔɛ́ta índiə ɔ ɔwayɛ́ na yayɛ́á ɛndɛkɛ ɔyɛ́á yɛ́ ŋɔ báá ɔ ɔwayɛ́ əlimə. Ata nɔ́yɛ́ ɛ́sɛ́á Ábɛlaháma a sa bá na mɔná.

⁶Huɛlɛ́ a ka wɛɛ́ya lɛna náana a sɛ́á: “Yáyɛ́á ɛndɛkɛ yɛ́ ŋɔ niŋəkə ɔ bɔnɔŋɔ buinə́buinə́, ɔ ɛbɔ́ka ɔyɛ́á bá ŋɔ bəə́bu híə́niə bɛɔlɛ́, bá ŋɔ bəə́bu təkəsəkə tɔ́na ɔ bɛbɔ́ɛ́yɛa bínisə bɛ́ tuɔŋɔ.

⁷Mba, Mɛaŋɔ́á mɛ ŋɔ bɔ́ɛ́yɛ́ bɔnɔŋɔ kə́lə́səkiə ɔ ɛbɔ́ka ɔyɛ́á bá ŋɔ bəə́bu híə́nəsiə bɛɔlɛ́. Əlimə yɛ nɔ́yɛ́, bá ŋɔ fámáka, bá ŋɔ mɛaŋɔ́á bɛ́kálákɛna ɔ yɛ́ɛyɛ ɛbɔ́ka.”

⁸A ná nɛkaka hákɛ́ná na Ábɛlaháma ɔ hɛŋgɛtɛ́nɛ́á hɛ́ muandana; ɛnaka a Ísakɛ bíə́nə́, əlimə yɛ tunó tɔ́námanɛ́, a ná wɛɛ́ya anda. Hɔ́ánánátɔ́, Ísakɛ a ná ayɛ́ Yákɔbɔ anda, Yákɔbɔ tɔ́na a ná ayɛ́ niómo na báfandɛ́ nɛ́ tɔkala[14] andáka.»

⁹«Tɔkala bá ná Yɔ́sɛbɛ hɛtɛna, bá ná wɛɛ́ya sɛmá ɔkɛaka ɔwá bá wɛɛ́ya ákánána ɔ Ikíbíto. Mba, Huɛlɛ́ a ka báá na wɛɛ́ya;

¹⁰a ná wɛɛ́ya hutúnə ɔ məsə́kə məkimə, a ná wɛɛ́ya nyɔnɔ na ɛmanya índíə́ ɔ busíə́ bɔ́ Falahɔ́ŋɔ á munəni wa Ikíbíto; wɔ́ɔwɔ a ná wɛɛ́ya tínímíə́ mɔmanɛna wa wə́yíə́ ɔmbɛ́la mukimə na ɔ Ikíbíto.

¹¹Nɔ́yɛ́, mətíli má ná fínə́ ɔ Ikíbíto yikimə na ɔ bɔnɔŋɔ bɔ́ Kánahána. Məsə́kə má ka báá maŋɛ́ŋa, bíə́súə́ bisə́kúlúlúnə́ bá lɛ bɔɔ́la bɔ́ŋɔ́ tɔ́na bɔ́ ɔnɛ́á.

¹²Ɛnaka Yákɔbɔ á ɔ́kɔ́ ɔwá bɛ́labɔ́nɛ́á bɛ́ lɛa ɔ Ikíbíto, a ná bíə́súə́ bisə́ lɔ́má umə́ ɔ ikúílí yíbúsíə́.

¹³Ɔ wɔŋgɔkɔnɔ bikúílí bɛ́fandɛ́, Yɔ́sɛbɛ a ná kɛ́áka bənínyə́ bá ná wɛɛ́ya manya, Falahɔ́ŋɔ a ná hikúlə hɛ́ Yɔ́sɛbɛ manya tɔ́na.

¹⁴Əlimə yɛ nɔ́yɛ́, Yɔ́sɛbɛ a ná bɛndɔ lɔ́má ɔkɛaka ɔwá bá ká yáyɛ́á isə́ ɛ́tá na híə́yíə́ hikúlə hikimə, ɔmbana mukimə wɔ́ ka báá moómo álɛ́ndɔ́lɔ́mɔnɔ má bɛndɔ na bálánɔ.

¹⁵Yákɔbɔ a ná yɛ́ɛ́yɛ́ ikúílí lɔɔ́kɔ ɔ bɔnɔŋɔ bɔ́ Ikíbíto; wɛɛ́ya na bíə́súə́ bisə́kúlúlúnə́ bá ná kə́wə́kúnínə umə́.

¹⁶Bá ná yə́búə́ imimə tilə́nə ɔ Sikɛ́mɛ, bá ná bəə́bu nyəə́kə ɔ munyə́ ɔwá Ábɛlaháma a ná ɔ́ndɔ́ na mɔnɛ́á ɔ baná bá Ɛmɔ́lɔ, á isə́ yɛ Sikɛ́mɛ.»

¹⁷«Ɛnaka ikúílí yɛ́ bá yɛ́ ndɔ bɛ́nya ɔyɛ́á Huɛlɛ́ a ná hɔ́ánána ɔ nɛkaka uwundúsiniə ɔnɛ́á a ná hákɛ́ná na Ábɛlaháma, ilúkunə yɛ́ ná áŋánáka, yɛ́ ná bunə́ ɔ ɔyáyɛ́na ɔ Ikíbíto.

¹⁸Bɔ́mɔtɛ́ buɔsɛ́, wɔmɔtɛ́ munəni ɔwá a sa bá a ndɔ Yɔ́sɛbɛ manya, a ná nɛmanɛna ɛta.

¹⁹Wɛ́ɛ́yɛ́ munəni a ná yə́súə́ ilúkunə nimbəkə, a ná bíə́súə́ bisə́kúlúlúnə́ tə́kə́sə́kə, a ná bəə́bu íkíníə́ ɔwá bá bə́búə́ baná tíkə́ mbá bá wə́kúnə.

²⁰Ɔ́ yɛ́táyɛ́ ikúílí bá ná Mósisi biənə, a ka báá mɔná muɛsɛ, Huɛlɛ́ a wɛɛ́ya hikəkiə. Bá ka wɛɛ́ya nɛnaka miilí ɛ́lálɔ́ á yáyɛ́á isə́ ɔmbɛ́la.

²¹Əlimə yɛ ikúílí, bá ná wɛɛ́ya ombóko, mɔná muəndú wa Falahɔ́ŋɔ a ná ká wɛɛ́ya bata, a ná wɛɛ́ya bóŋgókó ɛ́sɛ́á wayɛ́á mɔná wa bɛ́múɛ́tɛ́.

²²Bá ka Mósisi ɛmanya yikimə yɛ bɛndɔ bá Ikíbíto tunəkiə, a ná híáná injiŋə yɛ mɔndɔ ɔ ɔwayɛ́ bɛtambá na ɔ ɔwayɛ́ bɛnyɛná.»

²³«Ɛnaka a hɔ́á moómo ə́nisə má tuɔŋɔ, a ná ɛfɛka kusə́nə ɔwá a ká báyɛ́á bənísə́ á baná bá Ísilahɛ́lɛ síə́línə.

²⁴Ɛnaka a káfámá umə́, a ná mɔndɔ wa Ikíbíto kɔ́áná a ndɔ wa Ísilahɛ́lɛ təkəsə. A ná bɛ́táŋɛ́lɛ́ána ɔkɛaka ɔwá á wɛ́ɛ́yɛ́ fúnə́ ɔwá bá ndɔ təkəsə, a ná wa Ikíbíto ɔnɔ.

²⁵A ka fɛka ɔwá, báyɛ́á bənísə́ bá ŋɔ manya bá sɛ́á ɔ tɔ́mbákɛna na wɛɛ́ya, Huɛlɛ́ a ŋɔ bəə́bu hutunə; mba, bənísə́ bá sa wɛɛ́ya ɔ́kɔ.

²⁶Ɔ hinó ɔhɛ́á hɛ́ ná ɔ́ŋgɔ́nɔ, a ná baná bá Ísilahɛ́lɛ yámá báfandɛ́ bá ndɔ nɔa, a ka hikəkiə ɔ bumbə́nú ɔháá ɔ uwəbú ətíə́, a sɛ́á: “Á bɛ́ámɛ́á bɛŋgɔ́áyɛ́, nɔ lɛa bənísə́, ɛlɔ́áyɛ́ yatɛ́ nɔ ndɔ nɔɛna əə́?”

²⁷Mba, wɛ́ɛ́yɛ́ ɔwá a ná báá a ndɔ munísə́ təkəsə, a ná Mósisi bɔ́há, na ɔlaa a sɛ́á: “Ɛ́yánɛ́ a ná aŋɔ́á tínímíə́ wəsúə́ mɔmanɛna na wəsúə́ mukə́lə́siə əə́?

²⁸Ɔ ndɔ siə ɔwámɛ ɔwɔ́nɔ ɛ́sɛ́á ɔ ná mɔndɔ wa Ikíbíto ɔ́nɔ́ naánɛkɔla əə́?”

²⁹Ɛnaka Mósisi a bɛ́ɛ́yɛ́ bɛtambá ɔ́kɔ́ nɔ́yɛ́, a ná tɛbákɛ́na, a ná kə́bítímə́ ɔ bɔnɔŋɔ bɔ́ Matiánɛ, ɔmɔ́tɔ́yɛ́ a ná ká báyɛ́á baná báfandɛ́ biənə.»

³⁰«Əlimə yɛ moómo ə́nisə tɔ́na má tuɔŋɔ, yɛmɔtɛ́ áŋgɛlɛ a ná wɛɛ́ya bínə́níə́ ɔ ɛmbɔ́ma hoóyi na ɔmáá wɔ́ Sináya, ɔ ətíə́ yɛ musoŋó wɔ́ hiwə ɔ ɛfakafáká ɔyɛ́á yɛ́ ná bá yɛ́ ndɔ kɔnjɔ.

³¹Mósisi a ka yɛ́táyɛ́ inónó siəkínə, a ná ə́lə́mə́nə. Ɔ ikúílí ɔyɛ́á a ná bɛ́nyálɛ́la ɔkɛaka ɔwá á siəlínə́ muɛsɛ, nióni nɛ́ Isə́lúkú nɛ́ sɛ́á:

³²“Mɛaŋɔ́á mɛ lɛ́á Huɛlɛ́ yɛ bɛ́áwɔ́á Bisə́kúlúlúnə́, Huɛlɛ́ yɛ Ábɛlaháma, yɛ Ísakɛ na yɛ Yákɔbɔ.” Na bɔndandɛma bukimə, Mósisi a sa bá a ndɔ óso tɔ́na ɔ usinə.

³³Nɔ́yɛ́, Isə́lúkú a sɛ́á: “Húlíə́ bɛtafɛ́ná ɔ ɔwáwɔ makɔlɔ́ bɔkɔasɛ́á, ɛbɔ́ka ɔyɛ́á ɔ lɛ́á tɛ́nɛ́mátɔ́ yɛ́ lɛa yɛnaŋanaŋa.

³⁴Mɛ ná siəkínə́ ɛ́sɛ́á yámɛ́á ilúkunə yɛ́ ndɔ ɛmɔ́kɛ́ nyáá ɔ Ikíbíto; mɛ ná ɔ́kɔ́kɛ́ná tɔ́na ɛ́sɛ́á bá ndɔ bɛ́kɛ́ta, nɔ́yɛ́, mɛ ná lɔɔ́kɔ ɔ uwəbú ɔ ndəhutúnə́. Káka isíŋáka, Mɛ nɔ́ aŋɔ́á lɔ́ma ɔ Ikíbíto.”»

³⁵«Yɛ́táyɛ́ Mósisi, ɔ́ ɔyɛ́á ɛndɛkɛ Ísilahɛ́lɛ bá ná bɛ́sáŋɔ́ná na ɔlaa bá sɛ́á: “Ɛ́yánɛ́ a ná aŋɔ́á bɛ́lɛ́ná isə́lúkú na mukə́lə́siə əə́?” Ɔ tɔ́mbákɛna na áŋgɛlɛ ɔwá a ná wɛɛ́ya bínə́níə́ ɔ ɛfakafáká nuúmə́, ɔ ɔwayɛ́ Huɛlɛ́ a ná lɔ́má ɛ́sɛ́á isə́lúkú na mɔsɔ́tɔ́na.

³⁶Wɛɛ́ya a ná bəə́bu fə́mə́kíə́ ɔ Ikíbíto ɔ tɔ́mbákɛna bihə́nə́síníə́ na tɔŋgɛtɛ́nɛ́á tɔ́ yələ́mənə ɔtɔ́á a ná kɛ́áká ɔ bɔ́táyɛ́ bɔnɔŋɔ, ɔ nɔmɔ́ nɛnyɔakánɔ́ na ɔ makɔ́tákɛ ɔ ətíə́ moómo ə́nisə má tuɔŋɔ.

³⁷Á Mósisi tɔ́na a ná ɛndɛkɛ Ísilahɛ́lɛ lɛ́na a sɛ́á: “Huɛlɛ́ a ŋɔ bənú mɔhɛ́nátɔtányɛ́ lɔ́mɛ́na ɛ́sɛ́á mɛaŋɔ́á, ɔwá a ŋɔ bámɛnɛna ɛláŋa yɛ́ yə́núə́ ilúkunə.”

³⁸Ikúílí yɛ́ nɛkɔta nɛ́ ɛndɛkɛ Ísilahɛ́lɛ ɔ makɔ́tákɛ, wɛɛ́ya tɔ́na a ná báá ɔ ətíə́ yɛ bíə́súə́ bisə́kúlúlúnə́ na áŋgɛlɛ ɔyɛ́á yɛ́ ná bá yɛ́ ndɔ wɛɛ́ya hɛ́na ɔ ɔmáá wɔ́ Sináya ɔmbáŋá; wɛɛ́ya a ná bɛtambá kúsə́nə ɔbɛ́á bɛ́ ndɔ buɔmɔ́ índiə ɔkɛaka ɔwá a bəsú bɛɛ́ta índíə́.

³⁹Mba, bíə́súə́ bisə́kúlúlúnə́ bá sa hikiə ɔ ɔwayɛ́ ɔwɔkɛ́na; bá ná wɛɛ́ya bɛsaŋɔna, bá bɛ́kɔ́lɔmɔkɔna ɔbánɔ́ ɔwá bá híánáka ɔ Ikíbíto.

⁴⁰Bá ná Álɔnɔ lɛ́na bá sɛ́á: “Kɛakɛ́ná bəsú bɛhuɛlɛ́ ɔbɛ́á bɛ́ kɛndáka ɔ uwəsú busíə́, ɔ taká, yɛ́ɛ́yɛ́ Mósisi ɔwá a ná bəsú fə́mə́kíə́ ɔ bɔnɔŋɔ bɔ́ Ikíbíto, tɔ lɛ ndɔ manya kásɛ nəníə́ a ná hiana.”

⁴¹Nɔ́yɛ́, bá ná mɔná ɛfɔŋɔ mɔ́mɔ́láka ɔ mátáyɛ́ mɔɔsɛ́, bá ná nɛhánɛna índíə́ ɔ yɛ́táyɛ́ ililí, bá ná ɛŋganda túmbə́kíə́ na nɛhɔnɔ ɔ buolí bɔ́ mə́búə́ makátá.

⁴²Mba, Huɛlɛ́ a ná bəə́bu əlimə túmə́, a ná bəə́bu níása ɔkɛaka ɔwá bá tundondoní tɔ́ nɔɔ́mɛná lúbúnə́kə, ɛ́sɛ́á yɛ́ lɛ́á tilə́kə́tɔ́ ɔ hiəfulə hɛ́ bɔhɛ́nátɔtányɛ́ yɛ́ sɛ́á: “Á ilúkunə yɛ́ Ísilahɛ́lɛ, baánɛ ɔ ɔwámɛ nɔ́ ná mɛnyama ɔ́nɔ́kɛ́na na bɛ́mɔtɛ́ bɛnamá ɔ makɔ́tákɛ ɔ ətíə́ yɛ moómo ə́nisə má tuɔŋɔ əə́?

⁴³Mba bóo! Nɔ ka yanda yɛ́ huɛlɛ́ á Mɔ́lɔkɔ na hindondoní hɛ́ yənúə́ Huɛlɛ́ á Lɛ́fanɛ túána, nɔ ná bɛ́ɛ́yɛ́ bililí tábɔ́náka ɔkɛaka ɔwá nɔ bɛɛ́ta lúbúnə́kə. Ɔ́ ɛlɔ́áyɛ́ nɔ́yɛ́, mɛ ŋɔ bənú ákánana ɔ ɛsɔ hata yáyɛ́ná Babílono.”»

⁴⁴«Bíə́súə́ bisə́kúlúlúnə́ bá ka báá na yanda yɛ́ nɛnyáná na Huɛlɛ́ ɔ makɔ́tákɛ. Yɛ́ ka báá tábɔ́nákátɔ́ ɛ́sɛ́á Huɛlɛ́ a ná Mósisi manɛ́na: Ɔ taká, a ka wɛɛ́ya manɛna ɔwá, a yɛɛ́ta tábɔ́náka ɔ ɛnya ɔyɛ́á á ná síə́kínə.

⁴⁵Ɛnaka bíə́súə́ bisə́kúlúlúnə́ bá yɛɛ́ta kusə́nə, bá ná yɛɛ́ta fínə́nə ɔ bɔnɔŋɔ ɔbɔ́á bá ná nɔbá ɔ makátá má balɛmanyáhuɛlɛ́, bááyɛ́ ɔbá Huɛlɛ́ a ná búlə́kə ɔ uwəbú busíə́, á Yɔ́sua a ná bəə́bu kɛndákána. Yɛ́ ka tuənə umə́ ɔkafámáká ɔ ikúíli yɛ́ Ndə́witi.

⁴⁶Ndə́witi a ná ɛkamɛla yɛ́ Huɛlɛ́ kúsə́nə. A ná wɛɛ́ya batá ɔkɛaka ɔwá a bituənínə́ falábáka ɛlɔ́áyɛ́ Huɛlɛ́ yɛ Yákɔbɔ.

⁴⁷Mba, á Salómono ɔbánɔ́ a ná wɛɛ́ya miímə falábákɛ́na.

⁴⁸Ata nɔ́yɛ́, abáka Huɛlɛ́ yɛ ɔmɔ́lɔ́mɔ́kɔndɔ a lɛ tuə́nə ɔ məə́bə ɔmá bɛndɔ bá ná fálábáka. Ɛ́sɛ́á mɔhɛ́nátɔtányɛ́ a ndɔ fə́mə́ləniə a sɛ́á:

⁴⁹“Isə́lúkú a ndɔ laa ɔwá; nɔɔ́mɛná yɛ́ lɛ́á híə́míə́ hikómo, misí tɔ́na nɛbɛ́lɛ́nɛ́ná nɛ́ mámɛ́á makɔlɔ́. Yatɛ́ miímə nɔ ŋɔ mɛaŋɔ́á falabakɛna əə́? Hə́níə́ ɛbɔ́ka yɛ́ nɛ́ámɛ́á nɛhɔtɛ́ná yɛ́ ŋɔ bámɛnɛna əə́?

⁵⁰Tátá wə́míə́ mɔkátá wɔ́ ná bɛ́ɛ́yɛ́ bɛkɔa bikimə bɔ́táká əə́?”»

⁵¹«Uwənú á bɛndɔ bá mɔlɔ́á natákátɔ́ ɔbá mɔlɛ́má na məlúə́ má lɛ́á tɛlɔ́nɛ́nátɔ́ ikúílí Huɛlɛ́ a ndɔ bənú ɛ́lɛna, nɔ ndɔ Umbúínyi Mɔnaŋanaŋa əlimə túmə́ ikúílí tɛ́á, nɔ báka hɔɛ́ ɛ́sɛ́á bíə́núə́ bisə́kúlúlúnə́.

⁵²Ɛ́yánɛ́ ɔ ətíə́ yɛ bɔhɛ́nátɔtányɛ́ bíə́núə́ bisə́kúlúlúnə́ bá sa təkəsə əə́? Bá ka bááyɛ́ ɔ́nɔ́kɔ ɔbá bá ná nɛsákɔna nɛ́ Wataká bíbúə́ nɔ́ŋɔ́náka ubusíə́ bɔ́ ikúílí, isíŋáka, ɔ ɔwayɛ́ nɔ́ ná sɛ́ma, nɔ ná wɛɛ́ya ɔ́nɔ́kɔ́ tɔ́na.

⁵³Uwənú ɔbá nɔ ná umbə́ndə́ wɔ́ Huɛlɛ́ kúsə́nə ɔ tɔ́mbákɛna na bɛáŋgɛlɛ, mba, nɔ sa muítə bɛ́kɛna.»

⁵⁴Ɛnaka bɛláŋa bɛ́ nindúmə́ nɛ́ bəkə́lə́siə bá bɛ́ɛ́yɛ́ bɛtambá ɔ́kɔ́kɛ́na, hilóbi hɛ́ ná bəə́bu tuana, bá Itiənə bɛka kótókinə.

⁵⁵Mba ɔwayɛ́, úndúə́tɔ́ na Umbúínyi Mɔnaŋanaŋa, a ná məə́sə bə́líə́ ɔ ɔmbáŋá: A ná tuúmə tɔ́ Huɛlɛ́ yámá na Yə́susu tɛ́nɛ́mátɔ́ ɔ mɔkátá wɔ́ bɛnɔ́mɛ wɔ́ Huɛlɛ́.

⁵⁶A sɛ́á: «Ə́yə́ə́, mɛ ndɔ nɔɔ́mɛná sinə úbúnə́tɔ́, Mɔná wa mɔndɔ tɛ́nɛ́mátɔ́ ɔ mɔkátá wɔ́ bɛnɔ́mɛ wɔ́ Huɛlɛ́!»

⁵⁷Nɔ́yɛ́, bá ná yə́mə́níə́ nióni nɛŋɛ́ŋa, bá ná məlúə́ bíníbə́kə. Bəkimə iŋgində́, bá ná wɛɛ́ya biɔnjɛ́na,

⁵⁸bá ná wɛɛ́ya fámáná ɔ bətínə́, bá ná tuə́nə ɔ ɔwayɛ́ ulúmə na miɔkɔ. Bəmbóŋímboŋi bá ná bíə́búə́ bɛlɛŋa tíkə́ ɔ bɛtáta ɔ ɛnjɔ́hɔkɛ yɛ́ mɔndɔ, nɛ́áyɛ́á niínyə á Sáwolo.

⁵⁹Ɛnakaka bá báá ɔ ɔwayɛ́ ulúmə na miɔkɔ, Itiənə a ayɛ́ bɛ́kálákɛna náana a sɛ́á: «Á Isə́lúkú á Yə́susu, káhá híə́míə́ hɛtányɛ́!»

⁶⁰Əlimə yɛ nɔ́yɛ́, a ná kiníə́, a ná yə́mə́ na iŋgínə́ a sɛ́á: «Á Isə́lúkú, niasɛ́ná bəə́bu bɔ́ɛ́yɛ́ bɔbɛ́á!» Əlimə yɛ bɛ́ɛ́yɛ́ bɛtambá, a ná kátɛ́á.