Read Tunen Bɛnyɛná 8 Bible Online

Bɛnyɛná 8 - Tunen bible

Bɛnyɛná 8

¹Sáwolo a ka báá ɛ́mɛ́nɛ́nátɔ́ na bááyɛ́ ɔbá bá ná Itiənə ɔnɔkɔ. Ɔ bɔ́táyɛ́ buɔsɛ́, bá ná botólíə́ ɔ ilúkunə yɛ́ bəlumininə bá Yəlúsalɛma utəkəsə mɔŋɛ́ŋa. Bəlumininə bəkimə bá ná sámbáná ɔ mɔnɔŋɔ má Yútɛa na má Samália úhúlíə́ á basɔ́másɔma.

²Bɛndɔ bá yɔkɛ́nana yɛ́ Huɛlɛ́ bá ná Itiənə nyəə, bá ná wɛɛ́ya lɛláká mɔŋɛ́ŋa.

³Mba, Sáwolo ɔwayɛ́, a ná ayɛ́ ányá ɔ ilúkunə yɛ́ bəlumininə ɔsakata, a húlə́ balɛ́mɛndɔ́ na bəəndú húlə́kiə ɔ miímə na miímə tɛ́á, a bəə́bu hákɛna ɔ ɛbɔka.

⁴Bəlumininə ɔbá bá ná sámbáná, bá ná ákáná ɔ bɛátɛ bikimə bɛ́ bɔnɔŋɔ ɔ Imbə́nú Yɛɛsɛ ɔ húlə́ nɔŋɔna.

⁵Filíbo a ná ákáná ɔ yɛ́mɔtɛ́ bətínə́ yɛ Samália, a ná tuə́nə ɔ Mɛ́sia ɔ ɔnɔŋɔnɛna ɔ bɛndɔ bá bɔnɔŋɔ.

⁶Bilúkunə bikimə bá ka báá məlúə́ básɛ́átɔ́ ɔ bɛtambá bɛ́ Filíbo bɔkɔasɛ́á, bá ka bisə́mə́tə́ ɔ́kɔ́kɛ́ná ɔbɛ́á a ndɔ kɛa, bá ná bɛɛ́ta siəkínə́ tɔ́na.

⁷Ɔ taká, imbúínyi mɛbɛ́á yɛ́ ka báá yɛ́ ndɔ fáma ɔ bɛnákɛnákɛ biəŋí, yɛ́ yə́mə́kə mɔnɛ́ŋa, bɛáta na bɛkátá biəŋí bá ka niŋəkə tɔ́na.

⁸Nɔ́yɛ́, nɛhɔnɔ nɛŋɛ́ŋa nɛ́ ka báá ɔ yɛ́táyɛ́ bətínə́ yɛ bɔnɔŋɔ bɔ́ Samália.

⁹Mɔndɔ ɔmɔtɛ́ a ka taŋa ɔbáá ɔ yɛ́táyɛ́ bətínə́, nɛ́áyɛ́á niínyə á Símono, a mabɔ́á kɛaka, a bɛndɔ bá bətínə́ yɛ Samália ə́lə́mənəsəkiə. A ka bá a ndɔ bísinə mɔndɔ mɔŋɛ́ŋa,

¹⁰bəkimə tɔ́na, ɔ botolokiə ɔ tɔlɔ́matɔ́ ɔkafámáká ɔ bɛkámɔ, bá wɛɛ́ya bə́təkiə, bá sɛ́á: «Wɔ́ɔwɔ mɔndɔ wɔ́ɔwɔ a lɛa injiŋə yɛ Huɛlɛ́, yɛ́ɛ́yɛ́ ɔyɛ́á bá ndɔ ɛ́lɛnɛna bá sɛ́á: “Injiŋə yɛŋɛ́ŋa.”»

¹¹Hata yɛ ikúílí, Símono a ka bá a ndɔ bɛndɔ bəəŋí ə́lə́mənəsiə na máyɛ́á mabɔ́á, ɔ́ ɛ́lɔ́áyɛ́ nɔ́yɛ́ bá ná báá bá ndɔ wɛɛ́ya ɔ́kɛ́na mɔŋɛ́ŋa.

¹²Mba, ɛnaka bá lumínínə ɔ Imbə́nú Yɛɛsɛ ɔyɛ́á Filíbo a ná bá a ndɔ nɔŋɔna ɔ wɔŋgɔkɔnɔ Nɛmanɛna nɛ́ Huɛlɛ́ na niínyə nɛ́ Yə́susu Kilísitusu, bəkimə, balɛ́mɛndɔ́ na bəəndú, bá ná nɛsɔa kusə́nə.

¹³Símono wɛɛ́ya bɛ́múɛ́tɛ́ a ná híáná mulumininə, a ná nɛsɔa kusə́nə, a lɛ Filíbo yɛ́lɛ́á, a ka báá ə́lə́mə́nə́tɔ́ mɔŋɛ́ŋa ɛ́sɛ́á a ná bá a ndɔ bisə́mə́tə́ na bihə́nə́síníə́ sinə bɛ́ ndɔ bíúndúsiniə.

¹⁴Ɛnaka basɔ́másɔma ɔbá bá ná báá Yəlúsalɛma bá ɔ́kɔ́kɛ́ná ɔwá, bɛndɔ bá Samália bá ná ɛtambá yɛ́ Huɛlɛ́ kúsə́nə, bá ná bəə́bu Bíə́lə na Yɔhánɛsɛ lɔmɛna.

¹⁵Ikúílí báaba bá ná káfámá umə́, bá ná bɛndɔ bá Samália bɛ́kálákɛ́nɛ́na ɔkɛaka ɔwá, bá Umbúínyi Mɔnaŋanaŋa kusə́nə.

¹⁶Ɔ taká, Umbúínyi Mɔnaŋanaŋa wɔ́ sa bá wɔ́ nɔ́ tukinə ata ɔ mɔndɔ ɔmɔtɛ́ uwəbú ətíə́; bá ka nɛsɔa kusənə ɔbánɔ́ ɔ niínyə nɛ́ Isə́lúkú á Yə́susu Kilísitusu.

¹⁷Bíə́lə na Yɔhánɛsɛ bá ná yɛ́ɛ́yɛ́ ikúílí bəə́bu makátá tálákɛ́na, bá ná Umbúínyi Mɔnaŋanaŋa kusə́nə.

¹⁸Ikúílí Símono a ná síə́kínə ɔwá, bəlumininə bá ka Umbúínyi kusənə ɛnaka basɔ́másɔma bá bəə́bu makátá tálákɛ́na, a ná bəə́bu mɔnɛ́á húlə́nínə, a sɛ́á:

¹⁹«Nɔ́ ámɛ yɛ́táyɛ́ iŋgínə́ índíə́ ɔkɛaka ɔwá, bááyɛ́ ɔbá mɛ ŋɔ makátá tálákɛna, bá Umbúínyi Mɔnaŋanaŋa kusə́nə.»

²⁰Mba, Bíə́lə a ná wɛɛ́ya bíhíə́níníə́ a sɛ́á: «Ɛ́sɛ́á ikúílí ɔ ná fɛká ɔwá, bá óso ɔ niəbə ɔwɔ́ndɔ na mɔnɛ́á ɔnɛ́á Huɛlɛ́ a ndɔ índiənə ndəmə, bunímə́ na aŋɔ́á na máwɔ́á mɔnɛ́á!

²¹Ɔ lɛ bá ata na nioko mbá ata ɛhálálá ɔ yatɛ́ ɔyɛ́á yɛ́ ndɔ bɛ́tɔ́mba háha, ɔ taká, wə́wúə́ mɔlɛ́má wɔ́ lɛ bá tɛ́nɛ́mátɔ́ muɛsɛ á Huɛlɛ́ busíə́.

²²Ombókó bɛ́áwɔ́á bɛfɛka bɛbɛ́á nə́ə, bɛ́kálákɛ́ná Isə́lúkú tɔ́na, ɔmbáŋíndíə́, a óso ɔ ɔwáwɔ ɔ yɛ́ɛ́yɛ́ ɛfɛka ɔnɛasɛna ɔyɛ́á yɛ́ ndɔ húlínə ɔ ɔwáwɔ mɔlɛ́má.

²³Mɛ ná yámá ɔwá, wə́wúə́ mɔlɛ́má wɔ́ lɛa úndúə́tɔ́ na ɛhɔ́tɔ́hɔ́tɔ, bɔbɛ́á tɔ́na bɔ́ aŋɔ́á báka bɛ́ɔ́lɔ́kɔ́kɛ́nátɔ.»

²⁴Símono a sɛ́á: «Bənú bɛ́múɛ́tɛ́, nɔ́ Isə́lúkú bɛ́kálákɛ́na ɛlɔ́áyɛ́ ámɛ ɔkɛaka ɔwá yatɛ́ ɔyɛ́á nɔ ná láá, yɛ́ lɛ ndá mɛaŋɔ́á famɛna.»

²⁵Əlimə yɛ imbóŋi uhíə́niniə na ɔnɔŋɔna wɔ́ Ɛtambá yɛ́ Isə́lúkú, Bíə́lə na Yɔhánɛsɛ bá ná tilə́ ɔ Yəlúsalɛma; bá húlə́ Imbə́nú Yɛɛsɛ nɔŋɔnaka ɔ tutikə tuəŋí tɔ́ Samália.

²⁶Áŋgɛlɛ yɛ Isə́lúkú a ná Filíbo lɛ́na a sɛ́á: «Hɔalɛ́na, káka ɔ ɛsalɛ yɛ́ makɛ́ka, ɔ mɔndɔ́ŋɔ́ ɔwá wɔ́ lɛ́á ɔ lɔɔkɔ ɔ Yəlúsalɛma ɔ wákaka ɔ Kása. Ata mɔndɔ a sa bá ɔ wútə́yí mɔndɔ́ŋɔ́.»

²⁷Ɔ umisíúmə́, Filíbo a ná ákana. A ná mɔndɔ ɛ́nyánána ɔ ɛnɔ́mɛ, hiaka hɛ́ mɔndɔ: A ka bá mɔnyɛna mɔŋɛ́ŋa wa bɔnɔŋɔ bɔ́ Ətióbia, wɛɛ́ya a ná bá mɔtɛ́ka mɔŋɛ́ŋa wa məndunə́ məkimə má kandáŋɛ́sɛ,[15] ɔ́ niɔŋɔ́ sɛ́á á munəni ɔ muəndú wa bɔnɔŋɔ bɔ́ Ətióbia; a ka ndasá ɔ Yəlúsalɛma á Huɛlɛ́ ɔ ubə́tiə.

²⁸A ka bá ɔ ɔkahíánáka ɔ ɔwáyɛ́ ɔmbɛ́la, tálɛ́mátɔ́ ɔ ɔwayɛ́ ibuŋuluəki ɔyɛ́á ɛhɔ́sɛ yɛ́ ndɔ súə́, a ndɔ hiəfulə hɛ́ mɔhɛ́nátɔtányɛ́ á Isáya fana.

²⁹Umbúínyi Mɔnaŋanaŋa wɔ́ ná Filíbo lɛná wɔ́ sɛ́á: «Káka yɛ́ɛ́yɛ́ ibuŋuluəki kɔ́ána.»

³⁰Filíbo a ná tɛbálɛ́na, a ná ɔ́kɔ́ mɔndɔ wa Ətióbia a ndɔ hiəfulə hɛ́ mɔhɛ́nátɔtányɛ́ á Isáya fana nióni nɛŋɛ́ŋa. A ná wɛɛ́ya batá a sɛ́á: «Ɔ ndɔ hɔ́yɛ́ ɔ́kɔ muɛsɛ yatɛ́ ɔyɛ́á ɔ ndɔ fana əə́?»

³¹Mɔndɔ a ná bíhíə́níníə́ sɛ́á: «Nəníə́ ɛ́kɛ mɛ óso ɔ maáta ɔwɔ́kɔ ábá mɛ lɛ bá na mɔndɔ ɔwá a mɛaŋɔ́á nífúnə́kínə əə́?» A ná Filíbo ɛ́lɛ́ná a sɛ́á a tálɛ́má ɔ ɔwayɛ́ ibuŋuluəki ɔkɛaka ɔwá, a tuə́nə ɔ ɔwayɛ́ ɛmɛ́ŋɛ́.

³²Ɔ́ ɛsalɛ yɛ́ Mətilə yɛ́ɛyɛ ɔyɛ́á a ná bá a ndɔ fana: «A ka báá ɛ́sɛ́á ɔndɔ́mbá ɔwá bá nɔ́ ákánana ɔ niɔnɔ́mɛnyama, ɛ́sɛ́á imúkú yɛ mɔnándɔ́mbá ɔ busíə́ bɔ́ wɛ́ɛ́yɛ́ ɔwá a ndɔ wɛɛ́ya kɛ́sa. A sa munuə bɔ́kɔ́na.

³³Bá ka wɛɛ́ya yomosiə, bá sa wɛɛ́ya ɛmbakɔ́ hɛ́na. Ɛ́yánɛ́ a ŋɔ tíkə́ hɔ́kɛna ɛlɔ́áyɛ́ báyɛ́á baná əə́?» Ɛ́sɛ́á ikúílí bá ná bɔ́áyɛ́á buɔmɔ́ húə́síə́ ɔ misí.

³⁴Mɔndɔ a ná Filíbo batá a sɛ́á: «Tɔ́kɔ́lɛ ɔbánɔ́ lɛná mɛaŋɔ́á, ɔ ɔwanɛ́ mɔhɛ́nátɔtányɛ́ a ndɔ nɔ́yɛ́ hɛ́na əə́? Baánɛ, ɔ ɔwayɛ́ bɛ́múɛ́tɛ́ ataná, ɔ mɔndɔ muinə́muinə́ əə́?»

³⁵Filíbo a ná ɛtambá ɛta, ɔ botolokiə ɔ mátáyɛ́ mafana, a ná wɛɛ́ya Imbə́nú Yɛɛsɛ yɛ Yə́susu nɔŋɔ́nákɛ́na.

³⁶Bá ná ɛnɔ́mɛ ɛta, bá ná káfámá ɔ ɛbɔ́ka ɔyɛ́á mənífə́ má ná bámɛ́nɛ́na. Mɔndɔ a ná yɛ́ɛ́yɛ́ ikúílí láá a sɛ́á: «Ɔ́ mənífə́ máama, yatɛ́ yɛ́ ndɔ kotiə ɔwá mɛ lɛ nɛsɔa kusə́nə əə́?»

³⁷Filíbo a sɛ́á: «Ábá ɔ ná lumínínə́ na wə́wúə́ mɔlɛ́má mukimə, ɔ óso ɔ nɛsɔa ukusənə.» Mɔndɔ a ná bíhíə́níníə́ a sɛ́á: «Mɛ ndɔ lumininə ɔwá Yə́susu Kilísitusu a báka Mɔná wa Huɛlɛ́.»

³⁸Əlimə yɛ nɔ́yɛ́, a ná manɛ́na ɔwá mukindiə á ibuŋuluəki tínímíə́; bəə́bu bəkimə báfandɛ́, bá ná tukínə ɔ nuíyi, Filíbo a ná wɛɛ́ya nɛsɔa índíə́.

³⁹Ɛnaka bá fámá ɔ nuíyi, Umbúínyi wɔ́ Isə́lúkú wɔ́ ná Filíbo ákánána, mɔndɔ a lɛ wɛɛ́ya sinə́ tɔ́na, mba, a ná mɔkɛnda ákánána ɔ busíə́ na nɛhɔnɔ nikimə.

⁴⁰Filíbo a ná kábɛ́bɔ́ŋɔ́ ɔ Asɔ́tɔ, a húlə́ Imbə́nú Yɛɛsɛ nɔŋɔnaka ɔ bətínə́ bəkimə ɔbá a ná báá a ndɔ tɔ́mbɛ́na, ɔkafámáká ɔ Sɛsalɛ́.