Read Tunen Bɛnyɛná 9 Bible Online

Bɛnyɛná 9 - Tunen bible

Bɛnyɛná 9

¹Ɔ yɛ́ɛ́yɛ́ ikúílí yikimə, Sáwolo ayɛ́ bɛ́kɔ́lɔmɔkɔna ɔbánɔ́ ɔwá, a bɔkɔ́nɛna bá Isə́lúkú núə́kíə́, á bəə́bu ɔnɔkɔ. A ná ká mutitiəmahánɛna mɔŋɛ́ŋa kɔ́ána,

²a ná wɛɛ́ya tuəfulə batá ɔtɔ́á tɔ ndɔ wɛɛ́ya iŋgínə́ índiə ɛlɔ́áyɛ́ bisə́lúkú bɛ́ məə́bə má mabɛ́kálɛ́na má Tamásɛ, ɔkɛaka ɔwá ábá a ná bɔ́mɔtɛ́ bɛndɔ yámá, balɛ́mɛndɔ́ ata bəəndú ɔbá bá ndɔ ɛnɔ́mɛ yɛ́ Yə́susu ɔŋgɔ, á bəə́bu halɛ́ákɛ́na, á bəə́bu bálákáná ɔ Yəlúsalɛma.

³A ka báá ɔ ɛnɔ́mɛ hoóyi na Tamásɛ, həmə́tu, isəmú ɔyɛ́á yɛ́ ná húlínə́ ɔ ɔmbáŋá yɛ́ ná wɛɛ́ya ayɛ́ná na yáyɛ́á ɛsakɛsakɛ.

⁴A ná kɔ́á ɔ misí, a ná nióni ɔ́kɔ́ nɛ́ sɛ́á: «Á Sáwolo, á Sáwolo, ɛlɔ́áyɛ́ yatɛ́ ɔ ndɔ mɛaŋɔ́á təkəsinə əə́?»

⁵A ná batá a sɛ́á: «Á Isə́lúkú, aŋɔ́á ɛ́yánɛ́ əə́?» Nióni nɛ́ sɛ́á: «Mɛaŋɔ́á Yə́susu, ɔwámɛ ɔ ndɔ təkəsə.

⁶Mba, hɔalɛ́na fínə ɔ bətínə́, ɔmɔ́tɔ́yɛ́ bá ndɔ aŋɔ́á lakɛna yatɛ́ ɔyɛ́á ɔ ná hɔ́ánána ɔ ɔkɛa.»

⁷Bikindəniə ɔbá bá ná báá na Sáwolo, bá ná tɛnɛma, bá ná hoho, bá lɛ ósó ɔlaa ata mɔláŋa: Bá nióni ɔ́kɔ́kɛna, bá lɛ sinə́ ata mɔndɔ.

⁸Sáwolo a ná hɔalɛ́na ɔ misí, ata nɔ́yɛ́ ɛ́sɛ́á a ná báá na məə́sə úbúnə́tɔ́, a sa bá a ndɔ sinənə. Bɛ́áyɛ́á bikindəniə bá ná wɛɛ́ya itíə́ ɔ mɔkátá ɔ wákakana ɔ Tamásɛ.

⁹A ka súbə tunó tɔ́lálɔ́ a lɛ sinə́nə, a lɛ nɛa, a lɛ nyáá ata bɔɔ́la.

¹⁰Mɔkɔ́nɛna ɔmɔtɛ́ a ka báá ɔ Tamásɛ nɛ́áyɛ́á niínyə á Ananiásɛ; Isə́lúkú a ná wɛɛ́ya ɛ́lɛ́ákɛ́na ɔ binónó, a sɛ́á: «Á Ananiásɛ!» Ananiásɛ a sɛ́á: «Ɔ́ mɛaŋɔ́á wɔ́ɔwɔ á Isə́lúkú!»

¹¹Isə́lúkú a sɛ́á: «Káká tɔfá ɔ mɔndɔ́ŋɔ́ ɔwá bá ndɔ ɛ́lɛnɛna bá sɛ́á Wɔ́tɛ́nɛ́mátɔ, fínə ɔ miímə yɛ Yúta, batá mɔndɔ wa bɔnɔŋɔ bɔ́ Tálɛsɛ, nɛ́áyɛ́á niínyə á Sáwolo; a báka ɔmɔ́tɔ́yɛ́ isíŋáka ɔ mabɛ́kálɛ́na.

¹²A nɔ́ mɔndɔ siəkinə ɔ ɔwayɛ́ binónó, a nɔ́ fínə, a ndɔ wɛɛ́ya makátá tálɛ́na ɔkɛaka ɔwá a híáná ɔ usinənə, nɛ́áyɛ́á niínyə á Ananiásɛ.»

¹³Ananiásɛ a sɛ́á: «Á Isə́lúkú, bɛndɔ bəəŋí bá ka mɛaŋɔ́á hɔ́kɛna ɛlɔ́áyɛ́ wɛ́ɛ́yɛ́ mɔndɔ, bá ná mɛaŋɔ́á bɛkɔa bɛbɛ́á bikimə lakɛ́na ɔbɛ́á a ná kɛ́áka ɔ ɔwáwɔ bəlumininə bá Yəlúsalɛma.

¹⁴Bisə́lúkú bɛ́ bətitiəmahánɛna bá ka wɛɛ́ya iŋgínə́ índíə́ yɛ bááyɛ́ bəkimə ɔhalɛna ɔbá bá ndɔ nɛ́áwɔ́á niínyə kionono háha tɔ́na.»

¹⁵Mba, Isə́lúkú a ná Ananiásɛ lɛ́na a sɛ́á: «Káka a wɛ́ɛ́yɛ́ mɔndɔ busíə́, mɛ ka wɛɛ́ya tɛ́fa, mɛ ŋɔ wɛɛ́ya bɛ́kɛakɛ́na ɔkɛaka ɔwá a nɛ́ámɛ́á niínyə mənyə́síə́ ɔ mɔnɔŋɔ má bááyɛ́ ɔbá bá lɛ bá Bɛyútɛnɛ, ɔ bənəni na ɔ baná bá Ísilahɛ́lɛ.

¹⁶Ɔ taká, mɛaŋɔ́á bɛ́múɛ́tɛ́ mɛ ŋɔ wɛɛ́ya məsə́kə məkimə ínə́niə ɔmá a ná hɔ́ánána usinə ɛlɔ́áyɛ́ nɛ́ámɛ́á niínyə.»

¹⁷Ananiásɛ a ná ákana, a ná sə́fínə ɔ miímə, a ná wɛɛ́ya makátá talɛna, a sɛ́á: «Á wamɛ́á munísə́ á Sáwolo, Isə́lúkú á Yə́susu ɔwá a ná aŋɔ́á bínə́níə́ ɔ ɛnɔ́mɛ ɔyɛ́á ɔ ná húlínə́, wɛɛ́ya a ná mɛaŋɔ́á lɔ́má ɔkɛaka ɔwá ɔ híáná usinənə, ɔ́ bámɛ́nɛ́ná tɔ́na úndúə́tɔ́ na Umbúínyi Mɔnaŋanaŋa.»

¹⁸Ɔ umisíúmə́, ɛnyɛnya yɛ́ bɛkásɔ́ bɛ́ ná kutíkútíə́ ɔ məə́sə má Sáwolo, a ná híáná ɔ usinənə, a ná hɔalɛ́na, bá ná yɛ́ɛ́yɛ́ ikúílí wɛɛ́ya nɛsɔa índíə́;

¹⁹əlimə yɛ nɔ́yɛ́, a ná nɛaka, iŋgínə́ yɛ́ ná ndá wɛɛ́ya hiana. A ná tɛ́tɛ́á yɛ́ tunó túmbíə́ na bɔkɔ́nɛna ɔbá bá ná báá ɔ Tamásɛ.

²⁰Ɛŋaná unə́ŋə́liniə, a húlə́ nɔŋɔnaka ɔ məə́bə má mabɛ́kálɛ́na má Bɛyútɛnɛ ɔwá, Yə́susu a báka Mɔná wa Huɛlɛ́.

²¹Bááyɛ́ bəkimə ɔbá bá ná bá ndɔ wɛɛ́ya ɔ́kɔ́, bá ka báá ə́lə́mə́nə́tɔ, bá sɛ́á: «Baánɛ, táta wɛɛ́ya a ná bá a ndɔ bəlumininə təkəsə ɔ ɔyáyɛ́na ɔ Yəlúsalɛma ɔbá bá ná báá bá ndɔ niínyə nɛ́ Yə́susu kionono əə́? Tátá ɔ tɔŋɔ́ a ná ndá háha sɛ́ná ɔkɛaka ɔwá a bəə́bu halɛ́ákɛ́na, a bəə́bu ákánána ɔ busíə́ bɔ́ bisə́lúkú bɛ́ bətitiəmahánɛna əə́?»

²²Mba, Sáwolo a ka bá a ndɔ hɔ́ɔ na yɔnɛ́nɛna yikimə, Bɛyútɛnɛ ɔbá bá ná báá ɔ Tamásɛ, bá sa manya nəníə́ bá wɛɛ́ya bíhíə́níníə́ ikúílí ɔyɛ́á a ná ínə́níə́ ɔwá, Yə́susu a lɛa taká Mɛ́sia.

²³Ɛnaka tɔ́mɔtɛ́ tunó tɔ́ tɔ́mbá, Bɛyútɛnɛ bá ná bɛtɛ́nɛ́mɛ́ná ɛ́tá iŋgində́ ɔkɛaka ɔwá bá Sáwolo ɔnɔkɔ.

²⁴Mba, imbə́nú yɛ́ ná káfámá á Sáwolo məlúə́. Bá tɔkɔ́kɛ tɔ́ bətínə́ tátáka bulúə́ na buɔsɛ́ tɛ́á ɔkɛaka ɔwá mbá bá Sáwolo ɔnɔkɔ.

²⁵Nɔ́yɛ́, nəbulúə́ bɔkɔ́nɛna bá Sáwolo bá ná wɛɛ́ya háá ɔ mɔsáŋá wɔ́ ɛkana, bá ná wɛɛ́ya fə́míníə́ ɔ mukə́limə wɔ́ ɔmbambala wɔ́ bətínə́.

²⁶Ikúílí Sáwolo a ná káfámá ɔ Yəlúsalɛma, a ná bɛ́ɔ́kɔ́lɛ́na ɔ ɔbɛ́lata na ilúkunə yɛ́ bɔkɔ́nɛna; mba, bəkimə bá wɛɛ́ya kɔ́lɔ́maka bɔkɔasɛ́á, bá sa bá bá ndɔ manya ɔwá a ka híána taká mɔkɔ́nɛna.

²⁷Banábasɛ a ná yɛ́ɛ́yɛ́ ikúílí wɛɛ́ya bísúə́línə, a ná wɛɛ́ya ákánána ɔ busíə́ bɔ́ basɔ́másɔma, a ná bəə́bu nɛŋɔ́nákɛ́ná nəníə́ Sáwolo a ná Isə́lúkú síə́kínə, a ná wɛɛ́ya hɔ́kɛ́na tɔ́na ɔ ɛmbandá yɛ ɛnɔ́mɛ, nəníə́ Sáwolo a ná hɔ́ɔ́kɔ́ tɔ́na na yɔnɛ́nɛna yikimə ɔ Tamásɛ ɔ niínyə nɛ́ Yə́susu.

²⁸Ɔ botolokiə ɔ yɛ́ɛ́yɛ́ ikúílí, Sáwolo a bálaka a lɔɔkɔ ɔ Yəlúsalɛma mikimə na bəə́bu, a hɔ́ɔ́kɔ tɔ́na ɔ mianyɔ́ ɔ niínyə nɛ́ Isə́lúkú.

²⁹A ná Bɛyútɛnɛ ɛ́nyánána ɔbá bá ndɔ kɛlɛ́kɛ hɔ́ɔ́, a hɔ́ɔ́kɔ, a tə́ŋə́kəniə tɔ́na na bəə́bu; mba, bááyɛ́ bá siəkə ɔbánɔ́ ɔ ɔwayɛ́ ɔwɔ́nɔ.

³⁰Ɛnaka bənísə́ bá manyá nɔ́yɛ́, bá ná wɛɛ́ya ákánána ɔ Sɛsalɛ́, umə́ bá ná ká wɛɛ́ya bíə́síníə́ ɔ bətínə́ yɛ Tálɛsɛ.

³¹Ɔ yɛ́ɛ́yɛ́ ikúílí, ilúkunə yɛ́ bəlumininə yɛ́ ka báá yɛ́ ndɔ niŋə ɔ bumbə́nú nuúmə́ ɔ bɔnɔŋɔ bukimə bɔ́ Yútɛa, bɔ́ Kalɛ́lɛa na bɔ́ Samália; yɛ́ ɔ́nɔ́kɛna, yɛ́ kɛndaka ɔ bɔkɔ́lɔ́ma bɔ́ Isə́lúkú, yɛ́ ayaka tɔ́na nyɔnɔ na iŋgínə́ yɛ Umbúínyi Mɔnaŋanaŋa.

³²Bíə́lə a ka bá a ndɔ bɛ́káŋála ɔ bɔnɔŋɔ bukimə, buɔsɛ́ bɔ́mɔtɛ́, a ná káfámá ɔ Líta ɔ ɛbɔ́ka ɔyɛ́á bəlumininə bá ná báá bá ndɔ tuənə.

³³A ná mɔndɔ yámá umə́, nɛ́áyɛ́á niínyə á Ɛnɛ́ sianátɔ́ ɔ ɛkaálɛa, yɛ́ ndɔ ákána tuɔŋɔ tɔ́námanɛ́ ɛ́sɛ́á a lɛ́á yaáta.

³⁴Bíə́lə a ná wɛɛ́ya lɛ́na a sɛ́á: «Á Ɛnɛ́, Yə́susu Kilísitusu a nɔ́ aŋɔ́á niŋəsiə, hɔalɛ́na, tábɔ́náká yáwɔ́á ɛkaálɛa aŋɔ́á bɛ́múɛ́tɛ́.» Ɔ umisíúmə́, a ná hɔalɛ́na.

³⁵Bɛndɔ bəkimə bá bətínə́ yɛ Líta na ɔ misí yɛ tɛ́kɛ́mátɔ́ yɛ Sálɔnɔ bá siəkínə́ nɔ́yɛ́, bá ná híáná ɔ ɛsalɛ yɛ́ Isə́lúkú.

³⁶Muəndú ɔmɔtɛ́ a ka báá mulumininə ɔ Yobə́; nɛ́áyɛ́á niínyə á Tabíta, na nihókí nɛ́ Kɛlɛ́kɛ á «Tɔlɔkásɛ» ɔ́ niɔŋɔ́ sɛ́á á «Muaŋanyɛ.» A ka bá a ndɔ buɛsɛ kɛa ɛmbáta, a tɔsɔ́kánɔ́ ɔ́lɔ́kɛna tɔ́na.

³⁷Bɔ́mɔtɛ́ buɔsɛ́, a ná kɔ́á ɔ mɔɔ́mbɔ, a ná wəə. Bá ná wə́yíə́ umimə bíókóbókíə́, bá ná ká muítə fíníə́ ɔ ikuíti yɛ́ miímə yɛ ɛndɛ́ka.

³⁸Ɛ́sɛ́á Líta yɛ́ ná báá hoóyi na Yobə́, bəlumininə bá ná ɔ́kɔ́ ɔwá Bíə́lə a báka umə́, bá ná wɛɛ́ya imbə́nú lɔ́mɛ́ná ɔ bɛndɔ báfandɛ́ bá sɛ́á: «Tɔ́kɔ́lɛ, sɔ́nɔ́ tɔfá ɔ ndá bəsú kɔ́ána.»

³⁹Bíə́lə a ná hɔalɛ́ná ɔ umisíúmə́, a ná ákáná na bəə́bu. Ɛnaka á káfámá, bá ná wɛɛ́ya bálákáná ɔ ikuíti ɔyɛ́á yɛ́ ná báá ɔ miímə yɛ ɛndɛ́ka. Bilíkə́ bikimə bá ná bɛ́nyálɛ́la ɔ ɔwayɛ́ busíə́, bá lɛlaka, bá ná wɛɛ́ya bɛsɔ́tɛ na maŋgɔmba ínə́kíníə́ ɔmá Tabíta a ná tɔ́ákɛ́ná ɔ ikúílí a ná báá na bəə́bú.

⁴⁰Bíə́lə a ná bɛndɔ bəkimə fə́mə́kíə́, a ná kiníə́, a ná bɛ́kálákɛ́na; əlimə yɛ nɔ́yɛ́, a ná bɛ́kɔ́ŋɔ́ná ɔ ɛsalɛ ɔyɛ́á umimə wɔ́ ná bámɛ́nɛ́na, a sɛ́á: «Á Tabíta, hɔalɛ́na.» Tabíta a ná məə́sə ubunə, á Bíə́lə ɛ́ná, a ná bɔ́kɔ́nɔ́á, a ná tuə́nə ɔ bɔaná.

⁴¹Bíə́lə a ná wɛɛ́ya itíə́ ɔ mɔkátá, a ná wɛɛ́ya tínímíə́. A ná yɛ́ɛ́yɛ́ ikúílí bəlumininə na bilíkə́ ɛ́lɛ́ákɛ́na, a ná bəə́bu wɛɛ́ya híə́níníə́ muɔmɔ́.

⁴²Bɛndɔ bəkimə bá bɔnɔŋɔ bɔ́ Yobə́ bá ná ɔ́kɔ́kɛ́ná yatɛ́ ɔyɛ́á yɛ́ ná bɛtɔmbaka, bəəŋí bá ná lumínínə á Isə́lúkú.

⁴³Bíə́lə ka tuənə ikúílí yɛtatánɛ ɔ Yobə́, ɔ ɔmbɛ́la wɔ́ wɔmɔtɛ́ mɔndɔ á Símono, a ka báá mɔnyɔɔbɛɔfɔ.