Read Tunen Lɔ́ma 10 Bible Online

Lɔ́ma 10 - Tunen bible

Lɔ́ma 10

¹Á bənísə́, yatɛ́ ɔyɛ́á mɛ lɛ́á na ilókí yikimə ɔ ɔwámɛ mɔlɛ́má, mɛ ndɔ bɛ́kálɛ́na ɛlɔ́áyɛ́ Bɛyútɛnɛ ɔkɛaka ɔwá, Huɛlɛ́ a bəə́bu nuəkə́níə́.

²Ɔ taká, mɛ ná siəkínə ɔwá, bá ndɔ siə á Huɛlɛ́ ɔnyɛna, mba, bá lɛ ndɔ manya nəníə́ bá wɛɛ́ya nyɔkɛ́na.

³Bá sa kafáma ɔwɔ́kɔ nəníə́ abáka Huɛlɛ́ á bɛndɔ ɛ́lɛakɛnɛna bátaká ɔ ɔwayɛ́ busíə́, bá ɛnɔ́mɛ siəkə bəə́bu bɛ́múɛ́tɛ́ ɔkɛaka ɔwá, bá bámɛ́nɛ́na bátaká á Huɛlɛ́ busíə́. Nɔ́yɛ́, bá ná kinə́ ɔwɔŋgɛna ɔ ɛnɔ́mɛ ɔyɛ́á Huɛlɛ́ a ndɔ bɛndɔ ɛ́lɛnɛna bátaká ɔ ɔwayɛ́ busíə́.

⁴Ɔ taká, iŋgínə́ yɛ umbə́ndə́ wɔ́ Mósisi yɛ́ ka úndə ɔ ikúílí Kilísitusu a ná ndáfámá ɔkɛaka ɔwá, bááyɛ́ bəkimə ɔbá bá ná níə́búə́ nɛkɔmba tálɛ́ná ɔ ɔwayɛ́, Huɛlɛ́ á bəə́bu ɛ́lɛ́ákɛ́nɛ́ná bátaká.

⁵Mósisi bɛ́múɛ́tɛ́ a ka tiləkə nəníə́ abáka mɔndɔ a híána wataká ɔ tɔ́mbákɛna na umbə́ndə́ a sɛ́á: «Ata ɛ́yánɛ́ ɔwá a ndɔ umbə́ndə́ bɛ́kɛna, a ŋɔ niŋəkinə ɔ tɔ́mbákɛna na muítə.»

⁶Mba, Mətilə ma ndɔ hɛ́na ɛlɔ́áyɛ́ ɔbáá wɔ́ wataká ɔ tɔ́mbákɛna na ilumininə má sɛ́á: «Ɔ lɛa bɛ́láá ɔwá, ɛ́yánɛ́ a ŋɔ bálaka ɔ nɔɔ́mɛná əə́? Ɔ́ niɔŋɔ́ sɛ́á, ɛ́yánɛ́ a ŋɔ ka Kilísitusu ɛ́lɛ́ákɛ́na ɔkɛaka ɔwá a tukínə.»

⁷Nɔ lɛ láá tɔ́na nɔ sɛ́á: «Ɛ́yánɛ́ a ŋɔ tukinə ɔ ɛbɔ́ka yɛ́ bəwə́nú əə́? Ɔ́ niɔŋɔ́ sɛ́á, ɛ́yánɛ́ a ŋɔ ka Kilísitusu ɛ́lɛ́ákɛ́na umə́ ɔkɛaka ɔwá a ndáhiana.»

⁸Yatɛ́ Mətilə má ndɔ laa nə́ə əə́? Má ndɔ laa náana má sɛ́á: «Ɛtambá yɛ́ Huɛlɛ́ yɛ́ lɛa hoóyi na aŋɔ́á, yɛ́ lɛa ɔ ɔwáwɔ munuə, yɛ́ lɛa tɔ́na ɔ ɔwáwɔ mɔlɛ́má nuúmə́.» Yɛ́ɛ́yɛ́ ɛtambá yɛ́ lɛa imbə́nú yɛɛsɛ ɔyɛ́á tɔ ndɔ nɔŋɔna ɔwá, bá ná hɔ́ánána ɔ nɛkɔmba ɔtálɛ́na á Huɛlɛ́.

⁹Ábá ɔ ndɔ fə́mə́ləniə na wə́wúə́ munuə ɔ busíə́ bɔ́ bɛndɔ bəkimə ɔwá, Yə́susu a lɛa Isə́lúkú, ábá ɔ ndɔ luminə ɔ ɔwáwɔ mɔlɛ́má nuúmə́ ɔwá, Huɛlɛ́ a ka wɛɛ́ya huŋuəsiə ɔ ətíə́ yɛ bəwə́nú, Huɛlɛ́ a ŋɔ aŋɔ́á nuəkəniə.

¹⁰Ɔ taká, ikúílí mɔndɔ a ná nɛ́áyɛ́á nɛkɔmba tálɛ́ná á Yə́susu Kilísitusu, Huɛlɛ́ a ndɔ wɛɛ́ya ɛ́lɛnɛna wataká; ikúílí mɔndɔ a ndɔ fə́mə́ləniə na wə́yíə́ munuə ɔ busíə́ bɔ́ bɛndɔ ɔwá, Yə́susu a lɛa Isə́lúkú, abáka Huɛlɛ́ a muití nuəkəniə.

¹¹Ɔ taká, Mətilə má ndɔ laa má sɛ́á: «Ata ɛ́yánɛ́ ɔwá a ná nɛ́áyɛ́á nɛkɔmba tálɛ́ná á Yə́susu, a sa ndásɛma.»

¹²Nɔ́yɛ́, nifəŋə nɛ́ lɛ bá ətíə́ na Bɛyútɛnɛ na bááyɛ́ ɔbá bá lɛ bá Bɛyútɛnɛ; bəkimə bá lɛa na Isə́lúkú ɛ́mɔtɛ́ ɔwá a ndɔ bɛɛ́la bɛɛsɛ índiə ɔ bááyɛ́ bəkimə ɔbá bá ndɔ wɛɛ́ya lɛlɛna.

¹³Ɔ taká, nɔ́yɛ́ ɛ́sɛ́á Mətilə má ndɔ laa má sɛ́á: «Ata ɛ́yánɛ́ ɔwá a ŋɔ Isə́lúkú ɛ́lɛakɛna, Isə́lúkú a ŋɔ wɛɛ́ya nuəkəniə.»

¹⁴Mba, nəníə́ mɔndɔ a ŋɔ Isə́lúkú ɛ́lɛakɛna ɛŋaná nɛ́áyɛ́á nɛkɔmba ɔtálɛ́na ɔ ɔwayɛ́ əə́? Nəníə́ tɔ́na mɔndɔ a ŋɔ nɛ́áyɛ́á nɛkɔmba tálɛ́na ɔ ɔwayɛ́ ɛŋaná ɔwɔ́kɔ bá ndɔ hɛ́na ɛlɔ́áyɛ́ ayɛ́ əə́? Nəníə́ tɔ́na mɔndɔ a ŋɔ ɔ́kɔ́kɛna bá ndɔ hɛ́na ɛlɔ́áyɛ́ ayɛ́ ábá bá sa ndá wɛɛ́ya yáyɛ́á ɛtambá nɔŋɔnɛna əə́?

¹⁵Nəníə́ mɔndɔ a ŋɔ yáyɛ́á ɛtambá nɔŋɔnaka ábá bá sá wɛɛ́ya lɔ́ma əə́? Nɔ́yɛ́ ɛ́sɛ́á bá ná hɔ́ɔ́kɔ́ ɔ Mətilə tɔ́na bá sɛ́á: «Yɛ́ lɛa muɛsɛ ɔ bááyɛ́ usinə ɔbá bá nɔ ndasá ɔ Imbə́nú Yɛɛsɛ ɔnɔŋɔna.»

¹⁶Mba, bəkimə bá sa Imbə́nú Yɛɛsɛ luminə. Ɛ́sɛ́á mɔhɛ́nátɔtányɛ́ á Isáya a ná láá a sɛ́á: «Á Isə́lúkú, ɛ́yánɛ́ a ná Imbə́nú Yɛɛsɛ lumínə ɔyɛ́á tɔ ndɔ húlə́ nɔŋɔna əə́?»

¹⁷Abáka mɔndɔ a nɛ́áyɛ́á nɛkɔmba tálɛ́na á Kilísitusu ikúílí a ná imbə́nú ɔ́kɔ́kɛ́na, yɛ́táyɛ́ imbə́nú tɔ́na, ɔ́ ɛtambá yɛ́ Kilísitusu.

¹⁸Mɛ ndɔ bata náana ɔwá; baánɛ Bɛyútɛnɛ bá sa yɛ́táyɛ́ Imbə́nú Yɛɛsɛ ɔ́kɔ ɔbánɔ́ əə́? Mba, ɛ́ɛ! Bá ka yɛɛ́ta ɔ́kɔ́kɛna muɛsɛ muɛsɛ. Nɔ́yɛ́, bá ndɔ laa ɔ Mətilə bá sɛ́á: «Nióni nɛ́ bɔhɛ́nátɔtányɛ́ nɛ́ ka yambana ɔ Misí ɔbánɔ́ mikimə, bá ka bíə́búə́ bɛtambá ɔ́kɔ́kɛna ɔ makásá məkimə má misí.»

¹⁹Mɛ ndɔ bata tɔ́na ɔwá; Ilúkunə yɛ́ Ísilahɛ́lɛ bá sa ɔ́kɔ ɔbánɔ́ ɛ́sɛ́á yɛ́táyɛ́ imbə́nú yɛ́ ndɔ siə ɔlaa əə́? Bá sa siə ɔwɔ́kɔ. Huɛlɛ́ a ka hɔ́kɛna ɔ munuə wɔ́ Mósisi a sɛ́á: «Mɛ ŋɔ kɛaka ɔwá, nɔ ilúkunə kóyókíə́ ɔyɛ́á yɛ́ lɛ bá yámɛ, mɛ ŋɔ kɛaka nɔ́ híə́núə́ hilóbi kɔ́ndáká ɛlɔ́áyɛ́ ilúkunə yɛ́ ɛŋaná ɛmanya.»

²⁰Huɛlɛ́ a ka hɔ́kɛna tɔ́na ɔ munuə wɔ́ Mɔhɛ́nátɔtányɛ́ á Isáya a sɛ́á: «Bááyɛ́ ɔbá bá sa bá bá ndɔ mɛaŋɔ́á siə, bá ka mɛaŋɔ́á bɔ́ŋɔ, mɛ ka kɛaka ɔwá bááyɛ́ ɔbá bá sa mɛaŋɔ́á bata ata bɔkɔa, bá mɛaŋɔ́á mánya.»

²¹Mba, ɔwɔŋgɔkɔnɔ Ilúkunə yɛ́ Ísilahɛ́lɛ, a ná láá a sɛ́á: «Ɔ buɔsɛ́ ɔbánɔ́ bukimə, mɛ ka makátá nandɛa ɔ ilúkunə yɛ́ mɛɔ́kɔ na bəcəŋə.»