Read Tunen Lɔ́ma 11 Bible Online

Lɔ́ma 11 - Tunen bible

Lɔ́ma 11

¹Nɔ́yɛ́, mɛ ndɔ bata mɛ sɛ́á baánɛ, Huɛlɛ́ a ka yáyɛ́á ilúkunə omboko ɔbánɔ́ əə́? Ɔ taká, bóo! Mɛ ndɔ nɔ́yɛ́ laa bɔkɔasɛ́á, mɛaŋɔ́á tɔ́na mɔndɔ wa Ísilahɛ́lɛ ɔ nikúlə nɛ́ Ábɛlaháma, wa hitikə hɛ́ Bɛ́nyámɛna.

²Huɛlɛ́ a sa yáyɛ́á ilúkunə omboko ɔyɛ́á a ná táŋá ɔtɛ́fa. Nɔ ndɔ manya muɛsɛ yatɛ́ yɛ́mɔtɛ́ ɛsalɛ yɛ́ Mətilə má ndɔ laa ɛ́sɛ́á Əlíə́ a ndɔ ɛndɛkɛ Ísilahɛ́lɛ bísə́kə́linə á Huɛlɛ́ busíə́ a sɛ́á:

³«Á Isə́lúkú, bá ka báwɔ́á bɔhɛ́nátɔtányɛ́ ɔ́nɔ́kɔ, bá ná máwɔ́á mɔɔlɔ má mahánɛna nɔkɔ́lɔ́kɔ́na, mɛaŋɔ́á bíbúə́ mɛ lɛ́á tíkə́nə́tɔ, bá ndɔ siə tɔ́na ɔ ɔwámɛ ɔwɔ́nɔ.»

⁴Ɛnaka Ə́líə́ á Huɛlɛ́ hɔ́kɛ́ná nɔ́yɛ́, nəníə́ Huɛlɛ́ a ná wɛɛ́ya bɛ́kámɔ́sɔ́na əə́? A sɛ́á: «Mɛ ka bákɛa tukóló tɔ́lɛ́ndɔ́lɔ́mɔnɔ tɔ́ bɛndɔ ɛlɔ́áyɛ́ ámɛ, bááyɛ́ ɔbá bá sa kiniə ubusíə́ bɔ́ ililí ɔyɛ́á bá ndɔ ɛ́lɛnɛna á Báala.»

⁵Hɔ́ánánátɔ́, isíŋáka, ɔ tɔ́mbákɛna na wə́yíə́ mɔlɛ́má muɛsɛ, ɔmbana mɔtɛ́tɛ́á ɔbánɔ́ wɔ́ bɛndɔ bá lɛ́á tíkə́nə́tɔ́ ɔbá Huɛlɛ́ a ná tɛfa.

⁶A ka bəə́bu tɛ́fa ɔ tɔ́mbákɛna na wə́yíə́ mɔlɛ́má muɛsɛ, tátá ɛlɔ́áyɛ́ bíə́búə́ bɛnyɛná, ata yɛ́ báá ɔwá a bəə́bu tɛ́fá ɔ tɔ́mbákɛna na bíə́búə́ bɛnyɛná, há mɔlɛ́má muɛsɛ wɔ́ Huɛlɛ́ wɔ́ sa bá tiísi yɛ buɛsɛ.

⁷Nəníə́ nɔ́yɛ́ yɛ́ ndɔ siə ɔlaa əə́? Ɔ́ niɔŋɔ́, ilúkunə yɛ́ Ísilahɛ́lɛ yɛ́ sa kusə yatɛ́ ɔyɛ́á bá ná síə́kə, mba, bááyɛ́ bíbúə́ ɔbá Huɛlɛ́ a ná tɛ́fá, bá ka yɛɛ́ta kusənə. Ɔ bááyɛ́ bənə́bənə́, Huɛlɛ́ a ka yə́búə́ mɛlɛ́má nətəsiə,

⁸ɛ́sɛ́á Mətilə má ndɔ laa má sɛ́á: «Ɔ ndafámáká ɔ yɛ́ɛyɛ niɔfɛ́nɛ, Huɛlɛ́ a ka yə́búə́ ɛmanya húə́, a ná kɛáka ɔwá mə́búə́ məə́sə má lɛ sinə́nə, a ná mə́búə́ məlúə́ níbə́kə́ tɔ́na.»

⁹Munəni á Ndə́witi tɔ́na a sɛ́á: «Mə́búə́ manɛ́áka má bəə́bu híánɛ́ná hɛlámba, ɛkɛtɛ́ ɔyɛ́á bá ŋɔ kɔɛna, Huɛlɛ́ a bəə́bu sɔ́kɔ́tɛ́á.

¹⁰Mə́búə́ məə́sə má bɛ́lámbɛ́na ɔkɛaka ɔwá bá lɛ sinə́nə tɔ́na; Huɛlɛ́ á bəə́bu nɔkɔ́lɔ́kɔ́ná na məsə́kə ɔ nindínə́ ɔnɛ́á, bá kɛndaka úmbímə́tɔ.»

¹¹Nɔ́yɛ́, mɛ ndɔ bata ɔwá; baánɛ, ɛnaka Bɛyútɛnɛ bá úmbúfə́nə, bá ka kɔa ikúílí ɛ́mɔtɛ́ əə́? Ɔ taká, bóo! Mba, ɔ tɔ́mbákɛna na híə́búə́ hɛkɔma, Huɛlɛ́ a ka bááyɛ́ nuəkəniə ɔbá bá lɛ bá Bɛyútɛnɛ ɔkɛaka ɔwá, mɔlɛ́má wɔ́ Bɛyútɛnɛ sə́kə́kə́ ɛlɔ́áyɛ́ əbú.

¹²Ɛ́sɛ́á Bɛyútɛnɛ bá ná kɔ́á ɔ bɔbɛ́á, Huɛlɛ́ a ka kɛaka ɔwá misí mikimə bá mɔsɛ́ŋɛ́ mɔŋɛ́ŋa kúsə́nə ɔ tɔ́mbákɛna na nɔ́yɛ́. Ɛ́sɛ́á ɔmbana wɔ́ bəlumininə wɔ́ lɛ́á mɔtɛ́tɛ́á ɔ uwəbú ətíə́, ɔ tɔ́mbákɛna nɔ́yɛ́ á Huɛlɛ́ a ná mɔsɛ́ŋɛ́ mɔŋɛ́ŋa índíə́ ɔ bááyɛ́ ɔbá bá lɛ bá Bɛyútɛnɛ. Ábá bəə́bu bəkimə bá ná níə́búə́ nɛkɔmba tálɛ́ná á Yə́susu, mɔsɛ́ŋɛ́ wɔ́ ŋɔ bámɛnɛna mɔŋɛ́ŋa ɔ ɔyáyɛ́na.

¹³Isíŋáka, ɛkasɛ mɛ hɔ́kɛ́na ɔ uwənú ɔbá nɔ lɛ bá Bɛyútɛnɛ. Mɛ báka mɔsɔ́másɔma ɛlɔ́áyɛ́ bááyɛ́ ɔbá bá lɛ bá Bɛyútɛnɛ, mɛ ndɔ nɛhɔnɔ ɔ́kɔ ɔ buolí ɔbɔ́á Huɛlɛ́ a ná mɛaŋɔ́á índíə́.

¹⁴Mɛ ndɔ siə ɔ bɔ́táyɛ́ bɔsɔ́ma ɔkɛa ɔkɛaka ɔwá bɛndɔ bá yámɛ́á ilúkunə, mɛlɛ́má yɛ́ bəə́bu səkəkə. Nɔ́yɛ́ mbá Huɛlɛ́ a ŋɔ wúmotí ɔmbana wɔ́ bɛndɔ nuəkəniə ɔ uwəbú ətíə́.

¹⁵Ɔ taká, ikúílí Huɛlɛ́ a ná Bɛyútɛnɛ bákɛ́á, a ka híə́nəniə na bɛndɔ bəkimə bá misí. Ɛnáká á manyɔ́ bəə́bu bísúə́linə, yatɛ́ yɛ́ ŋɔ bɛ́tɔ́mbáka əə́? Nɔ́yɛ́ yɛ́ ŋɔ báá bɔkɔa buɛsɛ ɔ́maná ɛ́sɛ́á ikúílí ɔyɛ́á abáka mɔndɔ a wə́ə́, əlimə yɛ nɔ́yɛ́ a ndáhíáná ɔ buɔmɔ́.

¹⁶Ábá bá ná nɛ́mɔtɛ́ nioko nɛ́ bɛlɛ́tɛ índíə́ á Huɛlɛ́, ɛkɛ́tɛ yɛ́ bɛlɛ́tɛ tɔ́na ɔyɛ́á yɛ́ ná tíkə́nə́ yɛ́ lɛa yɛ́ Huɛlɛ́. Ábá bá ná mɛkaŋá yɛ́ bɔlɛ́á índíə́ á Huɛlɛ́, mɛlɛ́áfɛ tɔ́na yɛ́ bɔlɛ́á yɛ́ báka yə́ə́yi.

¹⁷Ilúkunə yɛ́ Ísilahɛ́lɛ yɛ́ báka ɛ́sɛ́á bɔlɛ́á bɔ́ Olífia ɔbɔ́á bá ndɔ tábɔ́nɛna, Huɛlɛ́ a ná yímotí mɛlɛ́áfɛ sɔ́mbáká tɔ́na; a ná yɛ́ɛ́yɛ́ ikúílí aŋɔ́á fəkə́tíə́ ɛ́sɛ́á ɛlɔakɛlɔakɛ yɛ́ bɔlɛ́á ɔ umə́, ɔwáwɔ ɔwá ɔ lɛ bá mɔndɛkɛ Ísilahɛ́lɛ, mbá nɔ́yɛ́ ɔ lɛa ɛ́sɛ́á bɔlɛ́á bɔ́ Olífia ɔbɔ́á bɔ́ lɛ́á ɔ ɛmbɔ́ma. Isíŋáka ɔ lɛa na mɔsɛ́ŋɛ́ ɔ tɔ́mbákɛna na mənífə́ ɔmá má ndɔ húlínə ɔ mɛkaŋá yɛ́ bɔ́táyɛ́ bɔlɛ́á.

¹⁸Ɛlɔ́áyɛ́ nɔ́yɛ́, ɔ sá hɔ́ánana ɔ mɛlɛ́áfɛ uyəniə ɔyɛ́á bá ná sɔmbaka, Ɛlɔ́áyɛ́ yatɛ́ ɔ ndɔ lɛaŋɛma əə́? Manyá náana ɔwá, tátá aŋɔ́á ɔ ndɔ mɛkaŋá túána, mba, mɛkaŋá ɔbánɔ́ yɛ́ ndɔ aŋɔ́á túána.

¹⁹Mɔndɔ uwənú ətíə́ a óso ɔ ɔwámɛ ɔlɛna a sɛ́á: «Huɛlɛ́ a ka mítə́yí mɛlɛ́áfɛ sɔ́mbáka ɔkɛaka ɔwá a mɛaŋɔ́á fə́kə́tíə́ umə́.»

²⁰Nɔ́yɛ́ yɛ́ lɛa taká, Huɛlɛ́ a ka miítə sɔ́mbáka bɔkɔasɛ́á, yɛ́ sa níə́búə́ nɛkɔmba tálɛ́na ɔ ɔwayɛ́, mba, ɔ báka ɔ yɛ́táyɛ́ ɛbɔ́ka ɛlɔ́áyɛ́ nɛkɔmba ɔnɛ́á ɔ ná tálɛ́ná ɔ ɔwayɛ́. Ɔ bɛ́tátáka, ɔ lɛ lɛaŋɛ́ma!

²¹Ɛ́sɛ́á Huɛlɛ́ a ná mɛlɛ́áfɛ yɛ́ bɔlɛ́á sɔ́mbáká ɔyɛ́á bá ndɔ tábɔ́nɛna, manyá ɔwá, ɔwáwɔ ɔwá ɔ lɛ́á mɔlɛ́áfɛ wɔ́ fəkə́tíə́tɔ́, ábá ɔ sá bɛ́táta, a ŋɔ aŋɔ́á sɔ́mba tɔ́na.

²²Siəlínə: Huɛlɛ́ a booko na mɔlɛ́má muɛsɛ, mba, abáka ayɛ́ kɔ́áyáka tɔ́na. A kɔ́áyáka ɛlɔ́áyɛ́ bááyɛ́ ɔbá bá ná ɛnɔ́mɛ nana. Mba, a ka báá na mɔlɛ́má muɛsɛ ɛlɔ́áyɛ́ áwɔ. Mba, manyá tɔ́na náana ɔwá, ikúílí ɔ nalɛ́á ɔ buɔmɔ́, wɛɛ́ya a ná aŋɔ́á bɔ́táyɛ́ buɛsɛ kɛáka; yɛ́ sa bá nɔ́yɛ́, a ŋɔ aŋɔ́á sɔ́mba tɔ́na ɛ́sɛ́á mɔlɛ́áfɛ.

²³Mba, bɛ́ɛ́yɛ́ Bɛyútɛnɛ ɔbá Huɛlɛ́ a ná sɔ́mbá, ábá bá ná níə́búə́ nɛkɔmba tálɛ́ná ɔ ɔwayɛ́, a lɛa na injiŋə hɔ́ánánátɔ́ ɔwá a manyɔ́ bəə́bu fəkətiə ɔ uwəbú ɛbɔ́ka.

²⁴Ɔ taká, ɔwáwɔ ɔwá ɔ lɛ bá Mɔyútɛnɛ, ɔ báka ɛ́sɛ́á mɔlɛ́áfɛ wɔ́ bɔlɛ́á bɔ́ ɛmbɔ́ma ɔbɔ́á bá ná sɔmba, bá ná kə́fə́kə́tíə́ ɔ bɔlɛ́á ɔbɔ́á bá ndɔ tábɔ́nɛna. Ábá Huɛlɛ́ a óso ɔ yɛ́táyɛ́ ɛnya yɛ bɔkɔa ɔkɛa nɔ́yɛ́, yɛ́ lɛ wɛɛ́ya bá ányɛ́nátɔ́ ɔwá, a ndá Bɛyútɛnɛ híə́níə́ ɔ ɛbɔ́ka ɔyɛ́á bá ná bámɛ́nɛ́na, uwəbú ɔbá bá lɛ́á ɛ́sɛ́á tiísi yɛ mɛlɛ́áfɛ.

²⁵Á bənísə́, mɛ ndɔ siə ɔwá, nɔ manyá yatɛ́ ɔyɛ́á Huɛlɛ́ a ná bítə́ ɔkɛaka ɔwá nɔ lɛ bísínə́ ɛ́sɛ́á bəmənyí, yɛ́ lɛa ɔwá, nɛ́mɔtɛ́ nioko nɛ́ bɛndɔ bá Isilahɛlɛ bá ka Huɛlɛ́ mɛɔ́kɔ kɛakɛna, bá ŋɔ wɛɛ́ya mɛɔ́kɔ kɛakɛna ɔkafámáká ikúílí ɔyɛ́á, a bááyɛ́ núə́kə́níə́ ɔbá a ná tɛfa, ɔbá bá sa bá bɛndɔ bá Ísilahɛ́lɛ.

²⁶Nɔ́yɛ́, Huɛlɛ́ a ŋɔ ilúkunə yikimə yɛ́ Ísilahɛ́lɛ nuəkəniə, ɛ́sɛ́á Mətilə má ndɔ laa má sɛ́á: «Mɔsɔ́ŋɔ́na a ŋɔ húlínə ɔ bətínə́ yɛ Síyono, a ŋɔ mabɛ́á má ɛndɛkɛ Yákɔbɔ sɔ́tɔ́kɔ.

²⁷Ɔ́ nɛ́ámɛ́á nɛtɔana nɛ́ɛ́yɛ́ ɔnɛ́á nɛ́ ŋɔ bámɛnɛna na bəə́bu ɔ ikúílí ɔyɛ́á mɛ ŋɔ mə́búə́ mabɛ́á sɔ́tɔ́kɔ.»

²⁸Ɛ́sɛ́á bá ná Imbə́nú Yɛɛsɛ bɛ́sáŋɔ́na, bá ka híána bəbəniə bá Huɛlɛ́, nɔ ná ənú mɔsɛ́ŋɛ́ kúsə́nə. Mba, ábá tɔ ná siəkínə ɔwá Huɛlɛ́ a ka bəə́bu tɛ́fa, a ndɔ bəə́bu hikiə ɛlɔ́áyɛ́ bíə́búə́ bisə́kínə́.

²⁹Ɔ taká, abáka Huɛlɛ́ a lɛ bɔɔ́la kátɔ́ná ɔbɔ́á a na índíə́ ɔ mɔndɔ, ata yáyɛ́á ɛfɛka uwuŋúnəniə ɛlɔ́áyɛ́ bááyɛ́ ɔbá a ná ɛ́lɛ́ákɛ́na.

³⁰Ɔ yɛ́táyɛ́ ikúílí buɔnɔ́, nɔ ka Huɛlɛ́ bɛ́sáŋɔ́na, mba isíŋáka, a ná bənú mahana wə́ə́ bɔkɔasɛ́á, Bɛyútɛnɛ bá ka wɛɛ́ya bɛ́sáŋɔ́na.

³¹Hɔ́ánánátɔ́, bəə́bu tɔ́na bá ná bɛ́sáŋɔ́ná isíŋáka bɔkɔasɛ́á, Huɛlɛ́ a ka bənú mahana wə́ə́ ɔkɛaka ɔwá, Huɛlɛ́ á bəə́bu mahana wə́ə́ tɔ́na.

³²Nɔ́yɛ́, Huɛlɛ́ a ka kɛaka ɔwá, mɔsá mukimə a wɛɛ́ya bɛ́sáŋɔ́ná ɔkɛaka ɔwá mbá a bəə́bu bəkimə mɛɛ́luwə́.

³³Ɛ́ɛ! Huɛlɛ́ a lɛa taká na mɔlɛ́má muɛsɛ ɛlɔ́áyɛ́ bɛndɔ, yayɛ́á ɛmanya yɛ́ ná bikimə yayɛna. A ndɔ manya tɔ́na ɛ́sɛ́á bɛkɔa bikimə bɛ́ ndɔ kɛnda. Ata mɔndɔ a sa ósó ɔwɔ́kɔ nəníə́ a ndɔ yáyɛ́á ihə́ŋiə ɛta, ata mɔndɔ a sa ósó ɔ ɔwayɛ́ mɔanɔ ɔwɔ́kɔ.

³⁴Ɛ́sɛ́á Mətilə manaŋanaŋa má ndɔ laa má sɛ́á: «Ɛ́yánɛ́ a ndɔ ɛfɛka yɛ́ Isə́lúkú á Huɛlɛ́ manya əə́? Ataná, ɛ́yánɛ́ a óso ɔbáá wayɛ́á mɔlɛ́ha əə́?

³⁵Ɛ́yánɛ́ a ná táŋá ɔ ɔwayɛ́ ɔ bɔɔ́la uwíndiə mbá a ndɔ táta ɔwá, a wɛɛ́ya híə́níníə́ əə́?»

³⁶Ɛ́ɛ! Bikimə bɛ́ ndɔ húlínə na wɛɛ́ya, wɛɛ́ya a ná bikimə tábɔ́náka, bikimə bɛ́ lɛa ɛlɔ́áyɛ́ ayɛ́. Tuúmə tɔ́ bámɛ́nɛ́ná na wɛɛ́ya ɔ bikúílí bikimə. Amɛna!