Read Tunen Lɔ́ma 12 Bible Online

Lɔ́ma 12 - Tunen bible

Lɔ́ma 12

¹Á bənísə́, mɛ ndɔ bənú bɛ́tɔ́kɔ́lɛna, ɛ́sɛ́á ikúíli Huɛlɛ́ a ná bəsú mahana wə́ə́, nɔ́ yənúə́ mɛɛ́lɔ yɛ bɛ́múɛ́tɛ́ índíə́ ɔkɛaka ɔwá, búə́núə́ buɔmɔ́ bɔ́ bámɛ́nɛ́ná ɛ́sɛ́á nɛhánɛna ɔnɛ́á bá ndɔ índiə á Huɛlɛ́, nɛ́ lɛa nikimə nɛ́áyɛ, abáka a yɛ́ɛ́yɛ́ ɛnya yɛ nɛhánɛna hikəkiə, ɔ́ nindínə́ nɛɛsɛ nɛ́ɛ́yɛ́ nɛ́ Huɛlɛ́ ubə́tiə.

²Nɔ lɛ ɔŋgɔ́ á iŋgətí yɛ bɛndɔ bá yɛ́ɛyɛ misí, mba, nɔ niása Huɛlɛ́ a wə́núə́ mɔlɛ́má kɔŋɔna, a bənú ɛŋgɛ́lɛ́ miɔ́sɔ índíə́. Nɔ́yɛ́ mbá nɔ ŋɔ manya yatɛ́ ɔyɛ́á Huɛlɛ́ a ndɔ siə ɔwá bá kɛ́áka, yatɛ́ ɔyɛ́á yɛ́ lɛ́á yɛɛsɛ, ɔyɛ́á yɛ́ lɛ́á yɛmbányɛ, ɔyɛ́á yɛ́ lɛ́á hɔ́ánánátɔ.

³Ɔ tɔ́mbákɛna na nyɔnɔ ɔyɛ́á Huɛlɛ́ a ná mɛaŋɔ́á índíə́, mɛ ndɔ hɛ́na ɔ mɔɛ́ta tɛ́á ɔ uwənú ətíə́ ɔwá nɔ lɛ bíbə́líə́, nɔ́ manyá ɔbánɔ́ ɔ taká nəníə́ nɔ lɛ́á, nɔ́ məəbə siəkínə ɔmá Huɛlɛ́ a ná bənú índíə́kínə ɔkɛaka ɔwá, mbá nɔ ɔ́kɔ́ muɛsɛ ɔ ɛbɔ́ka ɔyɛ́á nɔ lɛ́á.

⁴Ɔ taká, tɔ lɛ́á na mɛɛ́lɔ ɛ́mɔtɛ́ ɔyɛ́á yɛ́ lɛ́á na bɛláŋa biəŋí, bɛ́ɛ́yɛ́ bɛláŋa bɛ́ lɛ ndɔ nyɔɔ bɔkɔa bɔ́mɔtɛ́.

⁵Hɔ́ánánátɔ́, tɔ lɛa bunə́tɔ́, mba, tɔ lɛa ɔ mɛɛ́lɔ ɛ́mɔtɛ́ bɔkɔasɛ́á tɔ́ lɛa ɔ nɛtɔana na Kilísitusu, tɔ báka bəkimə tɔanátɔ́ ɔ mɔndɔ ɔmɔtɛ́, ɛ́sɛ́á bɛláŋa bɛ́ booko tɔanátɔ́ ɔ mɛɛ́lɔ yɛ mɔndɔ.

⁶Huɛlɛ́, ɔ tɔ́mbákɛna na wə́yíə́ mɔlɛ́má muɛsɛ, a ka mɔɛ́ta tɛ́á nɛ́áyɛ́á niəbə índiə nifəŋə ɔkɛaka ɔwá a bɔ́áyɛ́á buolí nyɔ́ɔ́kɔ. Ábá niəbə nɛ́ bimənyí á Huɛlɛ́ a ná aŋɔ́á índíə́, bɛ́kɛ́ákɛ́ná nɛɛ́ta ɛ́sɛ́á yáwɔ́á ilumininə yɛ́ ndɔ aŋɔ́á bata.

⁷Ábá nɛ́ bɔsɔ́kɔ́ ɔ ɔnyɛna, ɔ nyɔkɛna, ábá nɛ́ uwukúniə, ɔ úkúnəkiə.

⁸Ábá nɛ́ makɛ́nda uwíndiənə, ɔ maáta índiəkinənə. Ábá nɛ́ uhə́lə́bəniə, ɔ hə́lə́bəkəniə ɛŋaná mɔsɔŋgɛ́á. Ábá nɛ́ bɔsɔ́kɔ́ ɔkɛndana, ɔ bəə́bu kɛndakana muɛsɛ, ábá nɛ́ iwə́mɛɛ́lɔ, ɔ nɔ́yɛ́ kɛaka na nɛhɔnɔ nikimə.

⁹Nɔ́ hikə́kə́níə́ na mɔlɛ́má úmotí. Nɔ́ bɔbɛ́á banyaka, nɔ́ kɛ́áká há buɛsɛ.

¹⁰Nɔ́ hikə́kə́níə́ mɔlɛ́má úmotí bənú na bənú, ɛ́sɛ́á baná bá ninyə́. Nɔ́ báá ná ilókí yɛŋɛ́ŋa yɛ́ ubə́təniə bənú na bənú.

¹¹Nɔ́ nyɔ́ɔ́kɔ́ na iŋgínə́, nɔ lɛ híáná bɔtɔmbɔ́, nɔ́ Isə́lúkú á Yə́susu nyɔ́kɛ́ná na mɔlɛ́má mukimə.

¹²Nɔ́ bɔkɔa tátáká na nɛhɔnɔ nikimə ɔbɔ́á nɔ ndɔ manya ɔwá, Huɛlɛ́ a ŋɔ bənú bɔɛ́ta índiə, nɔ́ məsə́kə ísə́bíníə́, nɔ́ báá ndíŋímə́tɔ́ ɔ mabɛ́kálɛ́na.

¹³Nɔ́ bənísə́ á bəlumininə ɔ́lɔ́kɛ́na ɔbá bá lɛ́á ɔ nɛsɔ́ka, nɔ́ bəkiníə́nú káháká muɛsɛ ɔ uwənú ɔmbɛ́la.

¹⁴Nɔ́ Huɛlɛ́ bɛ́kálákɛ́na ɔkɛaka ɔwá a bááyɛ́ sáná ɔbá bá ndɔ bənú təkəsə, á bəə́bu saná, a lɛ bəə́bu tikísíə́ bɔ́ányɛ.

¹⁵Nɔ́ bílə́nə́kə́ na bááyɛ́ ɔbá bá ndɔ bílə́nə, nɔ́ lɛláká na bááyɛ́ ɔbá bá ndɔ lɛla.

¹⁶Nɔ́ niŋə́kə́ ətíə́ yɛ bumbə́nú bənú na bənú, nɔ́ lɛ niə́mə kɛa, nɔ́ buolí nyɔ́ɔ́kɔ ɔbɔ́á bɔ́ ndɔ níə́núə́ nɛlɛaŋɛ ínə́niə, nɔ lɛ fɛká ɔwá bənú nɔ lɛ́á na ɛmanya.

¹⁷Nɔ lɛ bɔbɛ́á híə́níníə́ ɔ mɛɛ́lɔ yɛ bɔbɛ́á, nɔ́ ányá ɔ ɔkɛa há buɛsɛ ɔ bɛndɔ bəkimə.

¹⁸Ábá ɔ ná ósó, mbá ɔ ná ihə́lí yámá, kɛáka ɔwá ɛlɔ́áyɛ́ áwɔ, ɔ́ niŋə́kə́ ɔ bumbə́nú na bɛndɔ bəkimə.

¹⁹Á bənísə́ bá nibo, bənú bɛ́múɛ́tɛ́ nɔ lɛ bífúnə, mba, nɔ niása Huɛlɛ́ á híə́yíə́ hilóbi fə́mə́lə́níə́ bɔkɔasɛ́á, nɔ́yɛ́ Isə́lúkú á Huɛlɛ́ a ndɔ laa ɔ Mətilə, a sɛ́á: «Mɛaŋɔ́á mɛ ŋɔ imbunə híə́nəkiniə, mɛaŋɔ́á mɛ ŋɔ mɔɛ́ta tɛ́á mɔsábɔ́náná índiə ɛ́sɛ́á a ná nyɔ́ɔ́kɔ.»

²⁰A ndɔ laa tɔ́na ɔ Mətilə a sɛ́á: «Ábá wawɔ́á mubəniə a lɛ mɛtaná, índíə́ wɛɛ́ya bɔ́labɔ́nɛ́á, ábá a lɛa na nimótí, nyə́síə́ wɛɛ́ya, nɔ́yɛ́ ɛsɛ́má yɛ́ ŋɔ wɛɛ́ya itiə, a ŋɔ mɔlɛ́má kɔ́ŋɔ́na.»

²¹Ɔ lɛ bɛ́níása ɔwá bɔbɛ́á bɔ́ aŋɔ́á yayɛna, ɔ nifəŋə, kɛáka ɔbánɔ́ há buɛsɛ ɔkɛaka ɔwá ɔ bɔbɛ́á nɔba.