Read Tunen Lɔ́ma 13 Bible Online

Lɔ́ma 13 - Tunen bible

Lɔ́ma 13

¹Mɔndɔ mukimə á bamanɛna ɔ́kɔ́kɛ́nɛ́na bɔkɔasɛ́á, iŋgínə́ yɛ bááyɛ́ bəkimə ɔbá bá ndɔ manɛna yɛ́ ndɔ húlínə na Huɛlɛ́, wɛɛ́ya tɔ́na a ná bamanɛna tínímíə́.

²Nɔ́yɛ́, wɛ́ɛ́yɛ́ ɔwá a ndɔ nɛmanɛna bɛ́sáŋɔ́na, a lɛ bɛ́sáŋɔ́nátɔ́ ɔ yatɛ́ ɔyɛ́á Huɛlɛ́ a ndɔ siə, bááyɛ́ ɔbá bá ndɔ nɔ́yɛ́ kɛa, Huɛlɛ́ a ŋɔ bəə́bu hɔkakɛna.

³Ɔ taká, bááyɛ́ ɔbá bá ndɔ bítíkə tɛ́nɛ́mátɔ́, abáka bá lɛ bamanɛna kɔlɔma, úhúlíə́ ɔbá bá ndɔ bɔbɛ́á kɛa. Ábá ɔ lɛ ndɔ siə ɔ mɔmanɛna ɔkɔ́lɔ́ma, kɛndáká tɛ́nɛ́mátɔ, nɔ́yɛ́ mbá a ŋɔ aŋɔ́á úmə́kiə,

⁴bɔkɔasɛ́á mɔmanɛna a ndɔ buolí nyɔɔ ɔbɔ́á Huɛlɛ́ a ná wɛɛ́ya índíə́ ɔkɛaka ɔwá, a aŋɔ́á makɛ́nda índíə́ ɔ ɔkɛnda tɛ́nɛ́mátɔ. Mba, ábá ɔ ndɔ bɔbɛ́á kɛa, kɔ́lɔ́máká wɛɛ́ya. Tátá ɛlɔ́áyɛ́ ndəmə á mɔmanɛna a lɛ́á na iŋgínə́ yɛ bɛndɔ ɔsɔ́kɔ́tɛa, ikúílí a ndɔ nɔ́yɛ́ kɛa, a lɛa ɔ buolí bɔ́ Huɛlɛ́ ɔkɛaka ɔwá, bá hilóbi hɛ́ Huɛlɛ́ síə́kínə ɛlɔ́áyɛ́ bɛndɔ ɔbá bá ndɔ bɔbɛ́á kɛa.

⁵Ɔ́ ɛlɔ́áyɛ́ nɔ́yɛ́ yɛ́ lɛ́á muɛsɛ ɔ bamanɛna ɔwɔkɛ́na, tátá ɔ́maná ɛlɔ́áyɛ́ hilóbi hɛ́ Huɛlɛ́ ɔtɛbɛna, mba, sulusulu bɔkɔasɛ́á yə́súə́ ɛbɛ́kɔ́lɔmɔna yɛ́ ndɔ bəsú bata ɔ nɔ́yɛ́ ɔkɛa.

⁶Ɔ́ ɛlɔ́áyɛ́ nɔ́yɛ́ ɔ́ ná hɔ́ánána ɔ ɛtásɛ ɔsábɔ́na, bááyɛ́ ɔbá abáka bá bɛɛ́ta kɔtaka, á Huɛlɛ́ a ná bəə́bu tínímíə́ ɔkɛaka ɔwá bá bɔɛ́ta úndúsíníə́ hɔ́ánánátɔ.

⁷Híə́níníə́ mɔɛ́ta tɛ́á yatɛ́ ɔyɛ́á bá ná hɔ́ánána ɔ ɔwayɛ́ uwíndiə, ɔ́ niɔŋɔ́, wɛ́ɛ́yɛ́ ɔwá a ndɔ bɛtásɛ kɔta ɔ məndínə́ məkimə, índíə́ wɛɛ́ya, bə́tə́kíə́ bááyɛ́ ɔbá ɔ ná hɔ́ánána ubə́tiə, híə́níníə́ tuúmə ɔ wɛ́ɛ́yɛ́ ɔwá tuúmə tɔ́ ná wɛɛ́ya hɔ́ánánɛ́na.

⁸Mɔndɔ a sá hɔ́ánána ɔbáá na buhínə bɔ́ ɔsɔ́kɔ́, úhúlíə́ á buhínə bɔ́ uhikəniə bənú na bənú. Wɛ́ɛ́yɛ́ ɔwá a ndɔ wayɛ́á mukúlə́kulə hikiə, a ndɔ Umbə́ndə́ wɔ́ Huɛlɛ́ úndúsiniə hɔ́ánánátɔ.

⁹Ɔ taká, imbə́ndə́ ɔyɛ́á yɛ́ ndɔ laa yɛ́ sɛ́á: «Ɔ lɛ lokono, ɔ lɛ ɔnɔnɔ, ɔ lɛ obo, ɔ lɛ niísə nɛtatánɛ háá ɔ bɛɛ́la bɛ́ bɛndɔ», yííyí imbə́ndə́ na yímotí yɛ́ lɛa yikimə ɔ umbə́ndə́ úmotí ɔwá wɔ́ ndɔ laa wɔ́ sɛ́á: «Ɔ ŋɔ mukúlə́kulə hikəkiə ɛ́sɛ́á aŋɔ́á bɛ́múɛ́tɛ́.»

¹⁰Wɛ́ɛ́yɛ́ ɔwá a ndɔ hikəniə, a sa ósó á mukúlə́kulə ɔ bɔbɛ́á ɔkɛa. Ikúílí ɔ ndɔ hikəniə, ɔ ndɔ Umbə́ndə́ wɔ́ Huɛlɛ́ ɔ́kɛ́na hɔ́ánánátɔ.

¹¹Nɔ́ nɔ́yɛ́ tə́tə́níə́ muɛsɛ ɔ uwənú mɔlɛ́má nuúmə́, nɔ ndɔ manya yatɛ́ bikúílí tɔ lɛ́á isíŋáka: Ikúílí yɛ́ nɔ́ ndafámá ɔyɛ́á nɔ hɔnyɔ́á; ɔ taká, ikúílí yɛ́ lɛa hoóyi ɔyɛ́á Huɛlɛ́ a ŋɔ bəsú nuəkəniə yáyɛ́ná ɔ ikúílí ɔyɛ́á tɔ ná lúmínínə.

¹²Bulúə́ bɔ́ nɔ́ lɔɔmɔ, ɛkasɛ ɔyáá wɔ́ yaa. Nɔ́yɛ́, tɔ́ bɛkɔa bɛ́ ibínə́binə niásáka, tɔ́ bɛ́kɛ́ákɛ́na á bikúlúmə́ ɔbɛ́á abáka bá nɔakɛna ɔ ɛnjaŋɛnjaŋɛ yɛ buɔsɛ́.

¹³Tɔ́ bítíkə́kə́ tɛ́nɛ́mátɔ́ ɛ́sɛ́á abáka bááyɛ́ ɔbá bá ndɔ niŋə ɔ ɛnjaŋɛnjaŋɛ yɛ buɔsɛ́ bá bítíkə́kə, tɔ́ bɛmbátámbata bɛ́ ɔnɛ́á na ɔnyɛ́na bítə́tə́kə́níə́, ɛŋana bəəndú bá niə́lətíə́, na nilókóno, ɛŋaná bɛɔmɔ́nɔ na məə́sə matatánɛ.

¹⁴Mba, nɔ́ bɛ́kɛ́ákɛ́na á bɔlɔŋa bukimə bɔ́ Isə́lúkú á Yə́susu Kilísitusu ɛlɔ́áyɛ́ búə́núə́ buɔmɔ́ ɔfalaba, nɔ lɛ bɛkɔa lumínə ɔbɛ́á yənúə́ mɛɛ́lɔ yɛ́ ndɔ hikiə, ɛlɔ́áyɛ́ bíə́núə́ bilókílókí uwiyə́siə.