Read Tunen Lɔ́ma 14 Bible Online

Lɔ́ma 14 - Tunen bible

Lɔ́ma 14

¹Nɔ́ wɛ́ɛ́yɛ́ wa ilumininə yɛ́ tɔmbɔ́kɔ́tɔ́ káhá ɔ uwənú ilúkunə, nɔ lɛ yayɛ́á ɛnya yɛ ɔ ɛfɛka kɛ́kɛ́lɛ́na.

²Ɛ́sɛ́á iŋgətí, wɔmɔtɛ́ mɔndɔ wa ilumininə a báka ɔwá a bɛɛ́la bikimə nɛ́áka, mba, wɔmɔtɛ́ wa ilumininə yɛ́ tɔmbɔ́kɔ́tɔ́ a báka ɔwá a lɛ mɛnyama nɛa.

³Wɛ́ɛ́yɛ́ ɔwá a ndɔ bɛɛ́la bikimə nɛ́á, a lɛ wɛ́ɛ́yɛ́ yə́níə́ ɔwá a lɛ ndɔ mɛnyama nɛ́á, wɛ́ɛ́yɛ́ tɔ́na ɔwá a lɛ ndɔ mɛnyama nɛ́á, a lɛ wɛ́ɛ́yɛ́ hɔ́kɛ́na ɔwá a ndɔ bikimə nɛ́á bɔkɔasɛ́á, Huɛlɛ́ a ndɔ wɛɛ́ya luminə tɔ́na.

⁴Aŋɔ́á ɛ́yánɛ́, ɔwáwɔ ɔwá ɔ ndɔ mɔnyɛna wa ɔsɔ́kɔ́ kə́lə́siə əə́? A bámɛnɛna ɔbánɔ́ kɔ́átɔ́ mbá ata tɛ́nɛ́mátɔ́, nɔ́yɛ́ yɛ́ ndɔ sinə ɔ yayɛ́á isə́lúkú. A ŋɔ ɔ́nɛ́na bɔkɔasɛ́á Isə́lúkú a báka na iŋgínə́ yɛ ɔwayɛ́ uhíkə ɔkɛaka ɔwá a lɛ kɔa.

⁵Wɔmɔtɛ́ mɔndɔ a ayɛ́ báka, a fɛkaka a sɛ́á bɔ́mɔtɛ́ buɔsɛ́ bɔ́ lɛ bɔŋɛ́ŋa yáyɛ́ná búíní, mba, wɔmɔtɛ́ a sɛ́á, mɔɔsɛ́ má báka ɛnya ɛ́mɔtɛ́. Mɔɛ́ta tɛ́á a ná hɔ́ánána ɔmanya muɛsɛ ɔ ɔwayɛ́ mɔlɛ́má nuúmə́ yatɛ́ ɔyɛ́á a ndɔ bɛ́kɔ́lɔmɔna.

⁶Wɛ́ɛ́yɛ́ ɔwá a ndɔ sinə a sɛ́á mɔɔsɛ́ má ndɔ yáyɛ́nana, a ndɔ nɔ́yɛ́ kɛa ɛlɔ́áyɛ́ Isə́lúkú ɔnyama, wɛ́ɛ́yɛ́ tɔ́na ɔwá a ndɔ nɛ́á bikimə, a ndɔ nɔ́yɛ́ kɛa ɛlɔ́áyɛ́ Isə́lúkú ɔnyama bɔkɔasɛ́á, a ndɔ Isə́lúkú mohóloniə híə́niniə ɛlɔ́áyɛ́ bɔ́labɔ́nɛ́á. Wɛ́ɛ́yɛ́ ɔwá a lɛ ndɔ bɛɛ́la nɛ́á bikimə, a ndɔ nɔ́yɛ́ kɛa ɛlɔ́áyɛ́ Isə́lúkú ɔnyama, a ndɔ Isə́lúkú mohóloniə híə́niniə tɔ́na.

⁷Ɛ́ɛ! Ata mɔndɔ ɔ uwəsú ətíə́ a lɛ ndɔ niŋinə ɛlɔ́áyɛ́ wɛɛ́ya bɛ́múɛ́tɛ́, mɔndɔ a lɛ ndɔ wínə tɔ́na ɛlɔ́áyɛ́ wɛɛ́ya bɛ́múɛ́tɛ́.

⁸Ábá tɔ ndɔ niŋə, tɔ ndɔ niŋinə ɛlɔ́áyɛ́ Isə́lúkú ɔnyama, ábá tɔ ndɔ wə́ə́, tɔ ndɔ wínə tɔ́na ɛlɔ́áyɛ́ Isə́lúkú ɔnyama. Nɔ́yɛ́, ata tɔ lɛ ɔ buɔmɔ́ mbá ata tɔ lɛ wə́ə́tɔ́, tɔ báka ɔbánɔ́ bɛndɔ bá Isə́lúkú á Yə́susu Kilísitusu.

⁹Ɔ taká, a ka wə́ə́, a ná ndáhíáná tɔ́na ɔ buɔmɔ́ ɔkɛaka ɔwá, a bámɛ́nɛ́ná Isə́lúkú yɛ bəwə́nú na yɛ bɔɔmɔ́.

¹⁰Mba ɔwáwɔ, ɛlɔ́áyɛ́ yatɛ́ ɔ ndɔ mɔnátɛ́á kə́lə́siə əə́? Ɔwáwɔ tɔ́na, ɛlɔ́áyɛ́ yatɛ́ ɔ ndɔ mɔnátɛ́á yəniə əə́? Bəsú bəkimə tɔ ŋɔ tɛ́nɛ́ma á Huɛlɛ́ busíə́ ɔkɛaka ɔwá a mɔɛ́ta tɛ́á yayɛ́á ɛmbakɔ́ hɛna.

¹¹Isə́lúkú a Huɛlɛ́ a ndɔ laa ɔ Mətilə a sɛ́á: «Mɛaŋɔ́á á Isə́lúkú mɛ́ lɛ́á ɔ buɔmɔ́, mɔsá mukimə a ŋɔ kiniə ɔwámɛ busíə́ ɔ ɔwámɛ ubə́tiə, bəkimə tɔ́na bá ŋɔ yəmbələkəniə ɔ busíə́ bɔ́ bɛndɔ ɔwá mɛaŋɔ́á mɛ́ lɛ́á Huɛlɛ́.»

¹²Nɔ́yɛ́, mɔɛ́ta tɛ́á a ŋɔ bɛ́áyɛ́á binífúnínə́ índiəkinə á Huɛlɛ́ busíə́.

¹³Nɔ́yɛ́, nɔ lɛ bɔsɔ́kɔ́ kɛ́kɛ́lɛ́na. Ɔ nifəŋə, nɔ lɛ munísə́ bɔkɔa kɛ́á ɔbɔ́á bɔ́ wɛɛ́ya ndíŋílə́kíə́, ataná, bɔ́ kɛ́áka a lɛ kɔɛ́na ɔ bɔbɛ́á.

¹⁴Isə́lúkú á Yə́susu a ka kɛaka a sɛ́á mɛ manya muɛsɛ muɛsɛ ɔwá, ikiní yɛ́ lɛ bá ata ɔ bɔ́labɔ́nɛ́á bɔ́mɔtɛ́. Mba, ábá mɔndɔ a ndɔ fɛka ɔwá bɔ́mɔtɛ́ bɔɔ́la bɔ́ lɛa bɔbɛ́á, bɔ́ lɛa bɔbɛ́á taká ɛlɔ́áyɛ́ ayɛ́.

¹⁵Ábá yatɛ́ ɔyɛ́á ɔ ndɔ nɛ́á yɛ́ ndɔ ilumininə yɛ́ mɔnátɛ́á tombosiə, yɛ́ lɛa ɔwá ikúílí ɔ ndɔ nɛ́á, ɔ lɛ ndɔ wɛɛ́ya hikiə. Ɔkɛaka ɔ sɛ́á mɔndɔ ɔwá Kilísitusu a ná wínə́ ɛlɔ́áyɛ́ ayɛ́, á nímínə́ ɛlɔ́áyɛ́ yatɛ́ ɔyɛ́á ɔ ndɔ nɛ́á.

¹⁶Nɔ lɛ kɛ́á ɔwá, yatɛ́ ɔyɛ́á yɛ́ lɛ́á yɛɛsɛ ɛlɔ́áyɛ́ yə́nu, yɛ́ híáná hɛkɔma ɔkɛaka ɔwá bɔsɔ́kɔ́ bá bənú kɛ́kɛ́lákɛ́na.

¹⁷Ɔ taká, nɛmanɛna nɛ́ Huɛlɛ́ nɛ́ lɛ ndɔ sinə ɔbánɔ́ á bɛ́labɔ́nɛ́á na məluku; ɔ nifəŋə, nɛ́ lɛa ɔwá, tɔ́ bɛ́níása Umbúínyi Mɔnaŋanaŋa wɔ́ bəsú ɔ́lɔ́ ɔ uniŋə ɔ taká, ɔ bumbə́nú, ɔ nɛhɔnɔ.

¹⁸Wɛ́ɛ́yɛ́ ɔwá a ndɔ Kilísitusu nyɛna na bɔ́táyɛ́ bɔlɔŋa, Huɛlɛ́ a ŋɔ wɛɛ́ya hikəkiə, bɛndɔ tɔ́na bá ŋɔ wɛɛ́ya bə́təkiə.

¹⁹Nɔ́yɛ́, tɔ́ siə́kə ɔkɛa á bɛkɔa ɔbɛ́á bɛ́ ndɔ bumbə́nú húlə́nə, na yatɛ́ ɔyɛ́á yɛ́ ndɔ kɛa ɔwá tɔ niŋə́kə́ iŋgində́ na ukindəniə ətíə́ yɛ ilumininə.

²⁰Ɔ lɛ buolí bɔ́ Huɛlɛ́ tɛ́ŋɛ́na ɛlɔ́áyɛ́ bɔ́labɔ́nɛ́á. Yɛ́ lɛa taká ɔwá bá óso ɔ bɛɛ́la bikimə ɔnɛ́áka, mba, yɛ́ lɛ bá muɛsɛ ɔwá, mɔndɔ a bɔ́labɔ́nɛ́á nɛ́áká ɔbɔ́á ɛkasɛ bɔ́ ɔsɔ́kɔ́ kúə́síə́ ɔ bɔbɛ́á.

²¹Yatɛ́ ɔyɛ́á yɛ́ lɛ́á yɛɛsɛ yɛ́ báka ɔwá, ɔ lɛ mɛnyama nɛa, ɔ lɛ məluku nyɛna, ɔ lɛ kɛ́á ɔ sɛ́á ɔsɔ́kɔ́ á kɔɛ́na ɔ bɔbɛ́á.

²²Yatɛ́ ɔyɛ́á ɔ ndɔ bɛ́kɔ́lɔmɔna, tə́tə́níə́ yɛɛ́ta ɔ ɔwáwɔ mɔlɛ́má nuúmə́, na aŋɔ́á na yawɔ́á Huɛlɛ́ nɔ ndɔ nɔ́yɛ́ manya. Nɛhɔnɔ na wɛ́ɛ́yɛ́ ɔwá a lɛ ndɔ bɛ́hɔ́kɛna ɔ yatɛ́ ɔyɛ́á a ná bɛ́kɔ́lɔ́mɔ́kɔ́na, a ná siəkínə́ tɔ́na ɔwá, yɛ́ lɛa muɛsɛ ɔ nɔ́yɛ́ ɔkɛa.

²³Wɛ́ɛ́yɛ́ ɔwá a ndɔ bɔɔ́la nɛ́á mbá a ndɔ manya ɔwá a lɛ ndɔ kɛa muɛsɛ, abáka Huɛlɛ́ a wɛɛ́ya hɔkɛna bɔkɔasɛ́á, a sá kɛa yatɛ́ ɔyɛ́á yáyɛ́á yɛmɛ́nɛna yɛ́ ndɔ wɛɛ́ya bata. Ábá mɔndɔ a ndɔ bɔkɔa kɛa ɔbɔ́á yáyɛ́á yɛmɛ́nɛna yɛ́ ndɔ bata, a ná bɔbɛ́á kɛ́áka.