Read Tunen Lɔ́ma 15 Bible Online

Lɔ́ma 15 - Tunen bible

Lɔ́ma 15

¹Uwəsú ɔbá tɔ lɛ́á ɔ́nɛ́nátɔ́ ɔ ilumininə, tɔ lɛa bíə́kíníə́tɔ́ ɔ bááyɛ́ uhíkə ɔbá bá lɛ́á tɔmbɔ́kɔ́tɔ́ ɔ ilumininə. Ikúílí tɔ ndɔ nɔ́yɛ́ kɛa, tɔ sá hɔ́ánana usiə yatɛ́ ɔyɛ́á tɔ ndɔ hikiə.

²Mɔɛ́ta tɛ́á ɔ uwəsú ətíə́ a ná hɔ́ánána usiə ɔwá, a kɛ́áká yatɛ́ ɔyɛ́á mukúlə́kulə a ndɔ hikiə, na yatɛ́ ɔyɛ́á yɛ́ lɛ́á yɛɛsɛ ɛlɔ́áyɛ́ ayɛ́, ɔkɛaka ɔwá a ayɛ́ ɔ́nɛ́ná ɔ ilumininə.

³Ɔ taká, Yə́susu a sa siə yatɛ́ ɔyɛ́á a ndɔ hikiə, ɔ nifəŋə, bá ka tiləkə ɛlɔ́áyɛ́ ayɛ́ ɔ Mətilə bá sɛ́á: «Bɛkɔ́bálɛ́ bɛ́ bááyɛ́ ɔbá bá ná báá bá ndɔ aŋɔ́á kɔ́ba, bɛ́ ka kɔɛnɛna ɔ ɔwámɛ.»

⁴Nɔ́yɛ́, bikimə ɔbɛ́á bá ná tílə́kə ɔ Mətilə Manaŋanaŋa ɔ yítə́ní ikúílí, bá ka bɛɛ́ta tiləkə ɛlɔ́áyɛ́ uwəsú ɔlɛ́ha ɔkɛaka ɔwá, ɔ tɔ́mbákɛna na nitiŋiminə, na mokokoliniə ɔmá mátáyɛ́ Mətilə má ndɔ bəsú húlə́ninə, tɔ́ tátáká yatɛ́ ɔyɛ́á tɔ lɛ́á na ilókí, na ɛnánɛna yɛ́ yɛɛ́ta ukusənə.

⁵Huɛlɛ́ ɔwá a ndɔ nitiŋiminə índiənə na mokokoliniə á kɛ́áka ɔwá, nɔ bá ɛ́mɛ́nɛ́nátɔ́ bənú na bənú ɛ́sɛ́á Yə́susu Kilísitusu a ndɔ siə.

⁶Nɔ́yɛ́, na mɔlɛ́má úmotí, na munuə úmotí, bənú bəkimə iŋgində́ mbá nɔ ŋɔ Huɛlɛ́ tuúmə híə́niniə, á Isə́ yɛ yəsúə́ Isə́lúkú á Yə́susu Kilísitusu.

⁷Nɔ́ káhákáná tɔ́na bənú na bənú ɛ́sɛ́á Kilísitusu a ná bənú kaha. Nɔ́ kɛ́áká nɔ́yɛ́ ɔkɛaka ɔ sɛ́á bɛndɔ bá Huɛlɛ́ nyámáka.

⁸Taká mɛ ndɔ bənú lɛna ɔwá, Yə́susu Kilísitusu a ka híána mɔnyɛna wa Bɛyútɛnɛ ɔkɛaka ɔwá, Huɛlɛ́ a makaka úndúsíníə́ ɔmá a ná hákɛ́ná na bíə́súə́ bisə́kínə́, ɔ uwinə́niə tɔ́na ɔwá Huɛlɛ́ a lɛa na yɔkɛ́nana.

⁹A ka ndasá tɔ́na ɔkɛaka ɔwá, bááyɛ́ ɔbá bá lɛ bá Bɛyútɛnɛ bá Huɛlɛ́ tuúmə híə́níníə́ ɛlɔ́áyɛ́ yáyɛ́á iwə́mɛɛ́lɔ, ɛ́sɛ́á Mətilə ma ndɔ laa má sɛ́á: «Ɔ́ ɛlɔ́áyɛ́ nɔ́yɛ́ mɛ ŋɔ aŋɔ́á nyamaka ətíə́ yɛ bááyɛ́ ɔbá bá lɛ bá Bɛyútɛnɛ, mɛ́ maŋana ósóko tɔ́na ɛlɔ́áyɛ́ ɔwáwɔ ɔnyama.»

¹⁰Mətilə má ndɔ laa tɔ́na má sɛ́á: «Uwənú á bɛndɔ ɔbá nɔ lɛ bá Bɛyútɛnɛ, nɔ́ bílə́nə́kə́ ná ilúkunə yɛ́ Isə́lúkú á Huɛlɛ́.»

¹¹Má ndɔ laa tɔ́na má sɛ́á: «Uwənú á bɛndɔ bəkimə ɔbá nɔ́ lɛ bá Bɛyútɛnɛ, nɔ́ Isə́lúkú á Huɛlɛ́ úmə́kíə́, uwənú á bilúkunə bikimə, nɔ́ tɔ́áyɛ́á tɔnyamáná ósoko.»

¹²Mɔhɛ́nátɔtányɛ́ á Isáya a ka laa tɔ́na a sɛ́á: «Mɔndɛkɛ Yə́sə́ a ŋɔ ndafama, a ŋɔ tɛ́nɛ́ma ɔkɛaka ɔwá a bilúkunə manákɛ́na ɔbɛ́á bɛ́ lɛ bá Bɛyútɛnɛ, bɛ́ɛ́yɛ́ bilúkunə bɛ́ ŋɔ yə́búə́ ɛnánɛna yikimə tálɛ́na ɔ ɔwayɛ́.»

¹³Huɛlɛ́ ɔwá tɔ ndɔ bikimə tátɛ́na ɔ ɔwayɛ́, á bənú úndúsíə́ na nɛhɔnɔ, na bumbə́nú bɔ́ hɔ́ánánátɔ́ bɔkɔasɛ́á, nɔ ka níə́núə́ nɛkɔmba tálɛ́na á Kilísitusu. Á kɛ́áka ɔwá nɔ niŋə́kə́ nɔ́yɛ́ ɔkɛaka ɔwá, injiŋə yɛ Umbúínyi Mɔnaŋanaŋa yɛ́ kɛ́áka nɔ tátáká muɛsɛ yatɛ́ ɔyɛ́á Huɛlɛ́ a ná bənú bílíhə́níə́.

¹⁴Á bámɛ́á bənísə́, mɛaŋɔ́á bɛ́múɛ́tɛ́, mɛ ndɔ bɔkɔa manya ɛlɔ́áyɛ́ ənú, yɛ́ lɛa ɔwá bənú bɛ́múɛ́tɛ́, nɔ báka úndúə́tɔ́ na bɛtɛ́nɛ́mɛ́ná bɛɛsɛ, nɔ ndɔ manya bikimə ɔbɛ́á nɔ ná hɔ́ánána ɔmanya, nɔ lɛa na iŋgínə́ yɛ ɔlɛ́hána tɔ́na bənú na bənú.

¹⁵Mba, ɔ híihi hiəfulə nuúmə ɔhɛ́á mɛ ná tilə́kə, mɛ ka bɛ́mɔtɛ́ bɛkɔa hɔ́ɔ́kɔ tə́lə́ŋu ɔkɛaka ɔwá, mɛ bənú bɛ́kɔ́lɔ́mɔ́nɛ́ná yatɛ́ ɔyɛ́á nɔ ná ɔ́kɔ́náká buɔnɔ́. Mɛ ka hɔ́ɔ́kɔ nɔ́yɛ́ na iŋgínə́ yikimə bɔkɔasɛ́á Huɛlɛ́ a ka mɛaŋɔ́á buɛsɛ kɛaka.

¹⁶Yɛ́ lɛa ɔwá, a ka kɛaka mɛ ná híáná mɔnyɛna wa Yə́susu Kilísitusu ɛlɔ́áyɛ́ bááyɛ́ ɔbá bá lɛ bá Bɛyútɛnɛ. A ka mɛaŋɔ́á tínímiə ɔkɛaka ɔwá mɛ Imbə́nú Yɛɛsɛ yɛ Huɛlɛ́ nɔ́ŋɔ́náka, Umbúínyi Mɔnaŋanaŋa wɔ́ kɛ́áka ɔwá, bááyɛ́ ɔbá bá lɛ bá Bɛyútɛnɛ bá híáná ɛ́sɛ́á nɛhánɛna ɔnɛ́á bá ná índíə́ á Huɛlɛ́, ɔnɛ́á a ndɔ hikiə.

¹⁷Nɔ́yɛ́, ɛ́sɛ́á mɛ lɛ́á ɔ nɛtɔana na Yə́susu Kilísitusu, mɛ báka na nɛhɔnɔ ɛlɔ́áyɛ́ buolí bɔ́ Huɛlɛ́ ɔbɔ́á mɛ ndɔ úndúsiniə.

¹⁸Ɔ taká, ábá mɛ ndɔ munuə bɔ́kɔ́na, ɔ́maná ɛlɔ́áyɛ́ ɔlaa yatɛ́ ɔyɛ́á Kilísitusu a ná kɛ́áka ɔ tɔ́mbákɛna na mɛaŋɔ́á ɔkɛaka ɔwá, bááyɛ́ ɔbá bá lɛ bá Bɛyútɛnɛ bá Huɛlɛ́ ɔ́kɔ́kɛ́nɛ́na. A ka nɔ́yɛ́ kɛaka ɔ tɔ́mbákɛna na bɛ́ámɛ́á bɛtambá na bɛkɔa ɔbɛ́á mɛ ná kɛ́áka,

¹⁹ɔ tɔ́mbákɛna na tɔŋgɛtɛ́nɛ́á na bisə́mə́tə́, ɔbɛ́á injiŋə yɛ Umbúínyi wɔ́ Huɛlɛ́ wɔ́ ná báá wɔ́ ndɔ mɛaŋɔ́á kɛndana ɔ nɔ́yɛ́ ɔkɛa, nɔ́yɛ́, mɛ ka Imbə́nú Yɛɛsɛ yɛ Yə́susu Kilísitusu nɔŋɔnaka hɔ́ánánátɔ́ ɔ botolokiə ɔ Yəlúsalɛma ɔkafámáká ɔ misí yɛ́ Ililíə́.

²⁰Mba, mɛ ka hikəkiə mɔŋɛ́ŋa ɔ Imbə́nú Yɛɛsɛ ɔnɔŋɔna ɔ bɛbɔ́ka ɔbɛ́á bá sa bá bá nɔ́ Kilísitusu manya ɔkɛaka ɔwá, mɛ lɛ falába ɔ bɛtɛ́kɛ́ná bɛ́ mɔndɔ muinə́muinə́.

²¹Mɛ nɔ́yɛ́ kɛakɛna ɔwɔŋgɔkɔnɔ ɛ́sɛ́á Mətilə má ndɔ laa má sɛ́á: «Bááyɛ́ ɔbá bá sa bəə́bu Yə́susu nɔŋɔnɛna, bá ŋɔ wɛɛ́ya siəkinə, bááyɛ́ tɔ́na ɔbá bá sa ɔ́kɔ bá ndɔ hɛ́na ɔ ɔwayɛ́ ɛlɔ́á, bá ŋɔ ɔ́kɔ́kɛna.»

²²Nɔ́yɛ́ yɛ́ ná bá yɛ́ ndɔ mɛaŋɔ́á kotiə ɔwá, ikúílí tɛ́á mɛ lɛ ndafámá uwənú busíə́.[1]

²³Mba isíŋáka, mɛ ná bɔ́ámɛ́á buolí hɔ́nála ɔ nɛ́táyɛ́ nɛkɛ́tɛ nɛ́ misí. Ɔ́ miilí miəŋí yííyí, mɛ ndɔ siə ɔ ndasá uwənú busíə́,

²⁴mɛ ŋɔ sá bənú siəlinə ɛnáká mɛ bá ɔwákaka ɔ bɔnɔŋɔ bɔ́ Banyá. Ɛ́ɛ! Mɛ ndɔ nánɛna ɔwá mɛ sá bənú siəlinə ɛnáká mɛ báá ɔ ɔwákaka umə́ mbá nɔ́ mɛaŋɔ́á ɔ́lɔ́ ɔkɛaka ɔwá, mɛ káfámá ɔ bɔ́táyɛ́ bɔnɔŋɔ, mɛ ŋɔ báá ɔ nɛhɔnɔ na bənú ɔ yɛ́táyɛ́ tɛ́tɛ́á yɛ ikúílí.

²⁵Mba isíŋáka, mɛ nɔ ákána ɔ Yəlúsalɛma ɛlɔ́áyɛ́ bɛláŋa bɛ́ ilúkunə yɛ́ Huɛlɛ́ ɔwɔ́lɔ.

²⁶Ɔ taká, bəlumininə bá misí yɛ́ Masɛtɔánɛ na yɛ Akáyɛ, bá ka ihə́ŋiə ɛta ɔ mahánɛna ɔkɔta ɛlɔ́áyɛ́ tɔtɔyɔ́nɔ́ tɔ́ ilúkunə yɛ́ Yəlúsalɛma.

²⁷Bəə́bu bɛ́múɛ́tɛ́ bá ná nɔ́yɛ́ ihə́ŋiə ɛta; ɔ taká, yɛ́ ka báá buhínə ɛlɔ́áyɛ́ əbú ɔ nɔ́yɛ́ ɔkɛa bɔkɔasɛ́á, bəlumininə ɔbá bá lɛ́á Bɛyútɛnɛ bá ka bəə́bu ɔ́lɔ́ ɔ bɛkɔa bɛ́ Huɛlɛ́ ɔmanya, yɛ́ ka bá ɔwá bá bəə́bu ɔ́lɔ́ tɔ́na na tɛ́tɛ́á yɛ bɔɔ́la.

²⁸Nɔ́yɛ́, ɛnáká mɛ hítə́yí hɛkɔma súmbə́níə́, mɛ ká bəə́bu índíə́ tɔ́na yatɛ́ ɔyɛ́á bá ná kɔ́táka, mɛ ŋɔ tɔ́mbɛ́na ɔ uwənú busíə́ ɔwákaka ɔ Banyá.

²⁹Mɛ ndɔ manya muɛsɛ ɔwá, ikúílí mɛ ŋɔ ndafámá uwənú busíə́, Kilísitusu a ŋɔ bənú sana mɔŋɛ́ŋa bɔkɔasɛ́á, mɛ ná ndá bənú síə́línə.

³⁰Á bənísə́, mɛ ndɔ tɔ́mbɛ́na əlimə yɛ yəsúə́ Isə́lúkú á Yə́susu Kilísitusu, na yɛ nibo ɔnɛ́á nɛ́ ndɔ húlínə na Umbúínyi Mɔnaŋanaŋa, ɔ uwənú ɔbata ɔwá, nɔ́ Huɛlɛ́ bɛ́kálákɛ́na ɛlɔ́áyɛ́ ámɛ, nɔ́yɛ́ mbá tɔ ŋɔ ituəmə nɔaka iŋgində́.

³¹Nɔ́ bɛ́kálákɛ́na ɔkɛaka ɔwá, ɛnáká mɛ káfámá ɔ bɔnɔŋɔ bɔ́ Yútɛa, bɛndɔ ɔbá bá lɛ ndɔ Yə́susu kilísitusu manya, bá lɛ mɛaŋɔ́á bɔbɛ́á kɛa. Nɔ́ bɛ́kálákɛ́ná tɔ́na ɔwá, bɛláŋa bɛ́ ilúkunə yɛ́ Huɛlɛ́ ɔbá bá lɛ́á ɔ Yəlúsalɛma, bá ɛkamɛla káhá na mɔlɛ́má úmotí ɔyɛ́á mɛ nɔ́ húlə́nə.

³²Nɔ́yɛ́, ábá Huɛlɛ́ a ná hikə́kíə́, mɛ ŋɔ ndafámá uwənú busíə́ na nɛhɔnɔ nikimə, mɛ́ hɔtɔ́kɔ́ tɔ́na muɛsɛ uwənú ətíə́.

³³Huɛlɛ́ ɔwá a ndɔ bumbə́nú índiənə á bámɛ́nɛ́ná na bənú bəkimə. Amɛna!