Read Tunen Lɔ́ma 16 Bible Online

Lɔ́ma 16 - Tunen bible

Lɔ́ma 16

¹Mɛ ndɔ siə ɔwá nɔ́ wəsúə́ munínyə́ ɔ muəndú mányá á Fə́bə́, a lɛa ɔ buolí bɔ́ Huɛlɛ́ ɔ ilúkunə yɛ bəlumininə ɔyɛ́á yɛ́ lɛ́á ɔ Saŋakɛlɛ́sɛ.[2]

²Nɔ́ wɛɛ́ya káhá ɔ niínyə nɛ́ Isə́lúkú ɛ́sɛ́á abáka bɛláŋa bɛ́ ilúkunə yɛ́ Huɛlɛ́ bá kɛaka bəə́bu na bəə́bu, nɔ́ wɛɛ́ya ɔ́lɔ́ ɔ bɛkɔa ɔbánɔ́ bikimə ɔbɛ́á a ŋɔ báá na yə́núə́ ilókí. A ka bɛndɔ ɔ́lɔ́kɛna bəəŋí, sulusulu ɔwámɛ.

³Nɔ́ Bilísika na Akílasɛ bíhólíə́ ɔ bɛ́ámɛ́á bikindəniə bɛ́ buolí ɔbá abáka tɔ buolí bɔ́ Yə́susu Kilísitusu nyɔɔkɔ.

⁴Bá ka báá hoóyi ɔ uwə́ə́ ɔkɛaka ɔwá bá bɔ́ámɛ́á buɔmɔ́ núə́kə́níə́, tátá mɛaŋɔ́á bíbúə́ mɛ ndɔ bəə́bu hóliə. Bilúkunə bikimə bɛ́ bəlumininə ɔbá bá lɛ́á ɔ bɔnɔŋɔ bɔ́ bááyɛ́ ɔbá bá lɛ bá Bɛyútɛnɛ, bá ndɔ bəə́bú bíhólíə́ tɔ́na.

⁵Nɔ́ ilúkunə yɛ́ bəlumininə bíhólíə́ ɔyɛ́á yɛ́ ndɔ kɔtana ɔ uwəbú ətíə́. Nɔ́ yamɛ́á ɛŋgɔ́áyɛ́ mɛɛsɛ á Ɛbayinɛ́tɛ bíhólíə́, a lɛa mulumininə wəbusíə́ wa Kilísitusu ɔ misí yɛ Ásia.

⁶Nɔ́ Malɛ́á bíhólíə́ ɔwá a ná nyɔ́ɔ́kɔ́ mɔŋɛ́ŋa ɛlɔ́áyɛ́ ənú.

⁷Nɔ́ Andɔlɔnikusu na Yúniasɛ bíhólíə́, bá lɛa bɛndɔ bá bɔ́ámɛ́á bɔnɔŋɔ, bá ka báá ɔ ɛbɔka na mɛaŋɔ́á. Bá báka basɔ́másɔma baŋɛ́ŋa, bəə́bu bá ná táŋá ɔhíána bikilísitənə na mɛaŋɔ́á.

⁸Nɔ́ Amabiliátusu bíhólíə́ ɔ yamɛ́á ɛŋgɔ́áyɛ́ mɛɛsɛ əlimə yɛ Isə́lúkú.

⁹Nɔ́ Ulubɛ́nɛ bíhólíə́ ɔ yə́súə́ ikindəniə yɛ́ bɔsɔ́ma ɛlɔ́áyɛ́ Kilísitusu, na yamɛ́á ɛŋgɔ́áyɛ́ mɛɛsɛ á Sɛtakísi.

¹⁰Nɔ́ Abɛlɛ́sɛ bíhólíə́, a ka ínə́niə ɔwá a lɛa bɛ́ɔ́lɔ́kɛ́nátɔ́ á Kilísitusu. Nɔ́ bɛndɔ bá miímə yɛ Alisitɔbúlu bíhólíə́.

¹¹Nɔ́ Ɛlɔŋɔndiɔ́nɛ bíhólíə́ á mɔndɔ wa bɔ́ámɛ́á bɔnɔŋɔ. Nɔ́ bɛndɔ bəkimə bá miímə yɛ Nalasísi bíhólíə́ ɔbá bá lɛ́á bɛ́ɔ́lɔ́kɔ́kɛ́nátɔ́ á Isə́lúkú.

¹²Nɔ́ Tilifɛ́nɛ na Tilifɔ́sɛ bíhólíə́, bá ka ɛmɔ́kɛ́ nyááka ɛlɔ́áyɛ́ buolí bɔ́ Isə́lúkú. Nɔ́ wamɛ́á munínyə́ ɔ muəndú á Bɛlɛsíti bíhólíə́, a ka ɛmɔ́kɛ́ nyááka mɔŋɛ́ŋa ɛlɔ́áyɛ́ buolí bɔ́ Isə́lúkú.

¹³Nɔ́ Lufúsu bíhólíə́ á mɔnyɛna mɔŋɛ́ŋa wa Isə́lúkú, na yayɛ́á inyə́ ɔwá a lɛ́á tɔ́na ɛ́sɛ́á yamɛ.

¹⁴Nɔ́ Asiŋikilíti, Fɛlɛŋgɔ́nɔ, Hɛ́lɛ́mɛsɛ, Batɔlɔ́basɛ na Hɛ́lɛ́mɛsɛ bíhóliə, na bənísə́ ɔbá abáka bá kɔtakana ikúílí tɛ́á na bəə́bu.

¹⁵Nɔ́ Filɔlɔ́ŋgɛ na Yúlia bíhólíə́, Nə́lə́ə na wayɛ́á munínyə́ ɔ muəndú, Ɔlimibásɛ na bɛláŋa bikimə bɛ́ ilúkunə yɛ́ Huɛlɛ́ ɔbá abáka bá kɔtakana ikúílí tɛ́á na bəə́bu.

¹⁶Nɔ́ məbíhóloniə índíə́kínə́nə́, nɔ́ bíə́ŋə́lə́kə́níə́ bənú na bənú na nɛhɔnɔ nikimə. Bilúkunə bikimə bɛ́ bɛndɔ ɔbá bá ná níə́búə́ nɛkɔmba tálɛ́ná á Kilísitusu bá ndɔ bənú bíhóliə.

¹⁷Á bənísə́ tɔ́kɔ́lɛ, nɔ́ bááyɛ́ bítə́tə́kə́níə́ ɔbá bá ndɔ masalɛa húlə́nə, ɛ́sɛ́á ikúílí bá ndɔ binə́níníə́ sáŋɔ́na ɔbɛ́á nɔ́ ná ɔ́kɔ́náka, bá óso uwənú unənəsiə. Nɔ́ ákáká hata na bəə́bu.

¹⁸Bátáyɛ́ bɛndɔ bá lɛ ndɔ yəsúə́ Isə́lúkú á kilísitusu nyɛna, mba, bá bɛ́kɔ́lɔmɔkɔna ɔbánɔ́ há bɛ́labɔ́nɛ́á, na bíə́búə́ bɛtambá bɛ́ siomókótɔ, bá bɛndɔ nímbə́kə ɔbá bá ndɔ əbú luminə bɛkɔa bikimə.

¹⁹Bɛndɔ bəkimə bá ndɔ manya nəníə́ nɔ ndɔ Isə́lúkú ɔ́kɛ́na. Nɔ́yɛ́, mɛ lɛa na nɛhɔnɔ na bənú, mba, mɛ siəkə ɔwá nɔ báá na ɛmanya ɔ buɛsɛ ɔkɛa, nɔ́ bɔbɛ́á tɛbákɛ́ná tɔ́na ikúílí tɛ́á.

²⁰Ikúílí tɛ́tɛ́á ɛkasɛ Huɛlɛ́ ɔwá a ndɔ bumbə́nú índiənə á Sátana ɔkɔ́kɔ, nɔ ŋɔ kɛndakɛna tɔ́na ɔ ɔwayɛ́ mɛɛ́lɔ. Yəsúə́ Isə́lúkú a Yə́susu Kilísitusu á bənú buɛsɛ kɛ́áka!

²¹Timotíó ɔ yámɛ́á ikindəniə yɛ́ buolí, Lusíusu, Yásɔnɔ na Sɔsibatɔ́lɔsɔ á bɛndɔ bá nɛ́ámɛ́á nikúlə, bá ná bənú bíhólíə́.

²²Ɔwámɛ á Tɛlɛtiúsu ɔwá mɛ ná Báwolo ɔ́lɔ́ ɔ híihi hiəfulə utilə, mɛ ndɔ bənú məbíhóloniə lɔ́mɛ́na ɔ niínyə nɛ́ Isə́lúkú.

²³Kayíúsu ɔwá a ndɔ mɛaŋɔ́á tə́tə́niə ɔ ɔwayɛ́ ɔmbɛ́la, a ná bənú bíhólíə́. Ɔ ɔwayɛ́ ɔmbɛ́la á ilúkunə yikimə yɛ́ bəlumininə yɛ́ ndɔ kɔtana. Ɛlasátɛ á mutə́tə́níə́ məndunə́ wa bətínə́, na wəsúə́ munísə́ á Kualatúsu bá ná bənú bíhólíə́. [

²⁴Yəsúə́ Isə́lúkú á Yə́susu Kilísitusu á bənú bəkimə buɛsɛ kɛáka. Amɛna!]

²⁵Tɔ́ Huɛlɛ́ nyámáka! A báka na iŋgínə́ ɔ yə́núə́ ilumininə uwoníniə, ɛ́sɛ́á Imbə́nú Yɛɛsɛ ɔyɛ́á mɛ ndɔ bənú nɔŋɔnɛna yɛ́ ndɔ nɔ́yɛ́ laa, yɛ́táyɛ́ imbə́nú, ɔ́ ɔyɛ́á mɛ ndɔ nɔŋɔna ɔwɔŋgɔkɔnɔ Yə́susu Kilísitusu, Huɛlɛ́ a lɛa ná iŋgínə́ tɔ́na yɛ ɔkɛa ɔwá yə́núə́ ilumininə yɛ́ ɔ́mbɔkɔ, ɛ́sɛ́á ɛndɔnɔ ɔyɛ́á a ná bəsú mə́nyə́síə́ yɛ́ ndɔ nɔ́yɛ́ laa. A ka yɛ́táyɛ́ ɛndɔnɔ bítə ɔ yɛ́táyɛ́ ikúílí buɔnɔ́.

²⁶Mba, a ná yɛɛ́ta fə́mə́lə́níə́ isíŋáka ɔ mianyɔ́, ɔ tɔ́mbákɛna na tuəfulə ɔtɔ́á bɔhɛ́nátɔtányɛ́ bá ná tilə́kə. Nɔ́yɛ́, Huɛlɛ́ yɛ ikúílíə́kimə a ka laa ɔwá, bá yɛ́táyɛ́ ɛndɔnɔ mənyə́síə́ ɔ mɔnɔŋɔ má bááyɛ́ ɔbá bá lɛ bá Bɛyútɛnɛ ɔkɛaka ɔwá, bá níə́búə́ nɛkɔmba tálɛ́ná ɔ ɔwayɛ́, bá wɛɛ́ya ɔ́kɔ́kɛ́nɛ́na.

²⁷Tɔ́ Huɛlɛ́ tuúmə híə́níníə́ ɔwá a lɛ́á bíbúə́ mumənyí ɔ tɔ́mbákɛna na Yə́susu Kilísitusu ɛlɔ́áyɛ́ tɔɛya na tɔɛya! Amɛna.