Read Tunen Lɔ́ma 2 Bible Online

Lɔ́ma 2 - Tunen bible

Lɔ́ma 2

¹Ɔwáwɔ ɔwá ɔ lɛ́á mukə́lə́siə wa bɔsɔ́kɔ́, ata ɛ́yánɛ́ ɔ lɛ́á, manyá náana ɔwá, bá sa ndá aŋɔ́á mahana wə́ə́ bɔkɔasɛ́á, ɔwáwɔ ɔwá ɔ ndɔ kə́lə́səniə, ɔ ndɔ kɛa ɛ́sɛ́á bəə́bu, nɔ́yɛ́, ɔ ndɔ bɛ́hɔ́kɛna aŋɔ́á bɛ́múɛ́tɛ́.

²Tɔ ndɔ manya bəsú bəkimə ɔwá, Huɛlɛ́ a ndɔ bááyɛ́ hɔkɛna ɔ taká ɔbá bá ndɔ yɛ́ɛ́yɛ́ ɛnya yɛ bɛkɔa bɛbɛ́á kɛa.

³Ɔwáwɔ ɔwá ɔ ndɔ bááyɛ́ kə́lə́siə ɔbá bá ndɔ yɛ́ɛ́yɛ́ ɛnya yɛ́ bɛkɔa bɛbɛ́á kɛa, aŋɔ́á tɔ́na ɔ ndɔ kɛa ɛ́sɛ́á bəə́bu, ɔ lɛ fɛká ɔ sɛ́á ɔ ŋɔ bɛ́ɔ́lɔ ɔ hilóbi hɛ́ Huɛlɛ́.

⁴Ikúílí ɔ ndɔ nɔ́yɛ́ kɛa, ɔ ndɔ Huɛlɛ́ yəniə bɔkɔasɛ́á, a lɛa na mɔlɛ́má muɛsɛ ɔyáyɛ́na, a lɛa na nisíbiniə, abáka a lɛ hútú mɔndɔ sɔ́kɔ́tɛa, ɔ lɛ ndɔ manya ɔwá a ndɔ aŋɔ́á buɛsɛ kɛa ɔkɛaka ɔwá a aŋɔ́á ikúílí índíə́ yɛ́ mɔlɛ́má ɔkɔ́ŋɔ́na əə́?

⁵Mba, ikúílí ɔ lɛ́á na mɔlɔ́á natákátɔ́, ɔ lɛ ndɔ hikiə ɔ malɔŋa usə́njiə, nɔ́yɛ́, ɔ ndɔ hilóbi hɛ́ Huɛlɛ́ bɛ́kɔ́tɛna, ɔ hinó ɔhɛ́á a ŋɔ ɛmbakɔ́ háá na taká mikimə, a ŋɔ híə́yíə́ hilóbi fə́mə́ləniə tɔ́na,

⁶ɔ hítə́yí hinó, a ŋɔ mɔɛ́ta tɛ́á sábɔ́na ɔwɔŋgɔkɔnɔ yatɛ́ ɔyɛ́á a ná kɛ́áka.

⁷A ŋɔ buɔmɔ́ bɔ́ ikúílíə́kimə índiə ɔ bááyɛ́ ɔbá bá lɛ́á ɔ́nɛ́nátɔ́ ɔ buɛsɛ ɔkɛa, ɔbá bá ndɔ tuúmə na hibə́təniə siə á Huɛlɛ́ busíə́, bəə́bu bá ŋɔ bɔ́táyɛ́ buɔmɔ́ bɔ́ ikúílíə́kimə kusənə.

⁸Mba, bááyɛ́ ɔbá bá lɛ ndɔ Huɛlɛ́ ɔ́kɛ́na, bá lɛ ndɔ ɔŋgɛna ɔ ɛnɔ́mɛ yɛ́ taká, bá ndɔ ɔŋgɔ á bɛkanja, Huɛlɛ́ a ŋɔ bəə́bu híə́yíə́ hilóbi kɔndɛna, a ŋɔ bəə́bu hɔkɛna tɔ́na.

⁹Hɛtányɛ́ hɛ́ bááyɛ́ bəkimə ɔbá bá ndɔ bɔbɛ́á kɛa, hɛ́ ŋɔ ɛmɔ́kɛ́ nyááka, hɛ́ ŋɔ məsə́kə maŋɛ́ŋa siəkinə tɔ́na; ɔ botolokiə ɔ Bɛyútɛnɛ əlimə yɛ nɔ́yɛ́, bááyɛ́ bá mɔnɔŋɔ mənə́mənə́.

¹⁰Ɔ nifəŋə, bááyɛ́ bəkimə ɔbá bá ndɔ buɛsɛ kɛa, tuúmə, hibə́təniə na bumbə́nú ɛlɔ́áyɛ́ əbú, ɔ botolokiə ɔ Bɛyútɛnɛ, əlimə yɛ nɔ́yɛ́ bááyɛ́ bá mɔnɔŋɔ mənə́mənə́.

¹¹Ɔ taká, Huɛlɛ́ a lɛ ndɔ nifəŋə háá ətíə́ yɛ bɛndɔ.

¹²Bááyɛ́ bəkimə ɔbá bá ná bɔbɛ́á kɛ́áka ɛŋaná umbə́ndə́ wɔ́ Mósisi ɔmanya, bá ŋɔ nímínə umbə́ndə́ wɔ́ Mósisi wɔ́ lɛ bəə́bu itíə́lə; mba, bááyɛ́ bəkimə ɔbá bá ndɔ kɔa ɔ bɔbɛ́á, bá umbə́ndə́ manyaka muɛsɛ, Huɛlɛ́ a ŋɔ bəə́bu kə́lə́səkiə ɔ tɔ́mbákɛna na wútə́yí umbə́ndə́.

¹³Ɔ taká, tátá ɔ́ bááyɛ́ ɔbá bá ndɔ umbə́ndə́ wɔ́ Mósisi ɔ́kɔ á Huɛlɛ́ a ŋɔ bəə́bu ɛ́lɛakɛnɛna bátaká, mba, ɔ́ bááyɛ́ ɔbá bá ndɔ muítə bɛ́kɛna.

¹⁴Bɛndɔ ɔbá bá lɛ bá Bɛyútɛnɛ, bá lɛ ndɔ umbə́ndə́ wɔ́ Mósisi manya, bəə́bu bɛ́múɛ́tɛ́ bá ndɔ muítə bɛ́kɛna, ata nɔ́yɛ́ ɛ́sɛ́á bá lɛ ndɔ umbə́ndə́ manya, ikúílí bá ndɔ nɔ́yɛ́ kɛa, bá ndɔ ínə́niə ɔwá, wɔ́ lɛa ɔ uwəbú mɔlɛ́má nuúmə́.

¹⁵Ikúílí bá ndɔ nɔ́yɛ́ kɛa, níə́búə́ nibítíkə nɛ́ ndɔ ínə́niə ɔwá, umbə́ndə́ wɔ́ lɛa kə́tə́kə́tɔ́ ɔ uwəbú mɔlɛ́má. Wə́búə́ mɔlɛ́má wɔ́ ndɔ bəə́bu nɔ́yɛ́ lɛna tɔ́na, mə́búə́ mafɛka ɔ yɛ́mɔtɛ́ ikúílí ɔmá má ndɔ bəə́bu sɔ́mɛna, má bəə́bu kə́lə́kiniə, má ndɔ bəə́bu nɔ́yɛ́ lɛna tɔ́na.

¹⁶Ɔ́ nɔ́yɛ́ Huɛlɛ́ a ŋɔ bɛkɔa bikimə kə́lə́səkiə ɔbɛ́á bɛ́ lɛ́á bítímə́tɔ́ ɔ buɔmɔ́ bɔ́ bɛndɔ ɔ tɔ́mbákɛna na Yə́susu Kilísitusu, nɔ́yɛ́ á Imbə́nú Yɛɛsɛ yɛ́ ndɔ ɛ́mɛ́nɛna ɔyɛ́á mɛ ndɔ nɔŋɔna.

¹⁷Mba, ɔwáwɔ ɔwá ɔ ndɔ bɛ́laa ɔ sɛ́á ɔ lɛ mɔyútɛnɛ, ɔ ndɔ ɔ umbə́ndə́ wɔ́ Mósisi bɛ́kɛna, ɔ ndɔ yáwɔ́á Huɛlɛ́ nɛhɔnɔ ɔ́kɛ́na.

¹⁸Ɔ ndɔ manya yatɛ́ ɔyɛ́á Huɛlɛ́ a ndɔ siə, umbə́ndə́ wɔ́ ka aŋɔ́á fə́miə ɔ ɛnɔ́mɛ ɔkɛaka ɔwá ɔ tɛ́fá yatɛ́ ɔyɛ́á yɛ́ lɛ́á yɛɛsɛ;

¹⁹ɔwáwɔ ɔwá ɔ lɛ́á mɔkɛndana bəndímə́ndímə, ɔ báka isəmú ɛlɔ́áyɛ́ bááyɛ́ ɔbá bá lɛ́á ɔ ibínə́binə,

²⁰mukúniə bááyɛ́ ɔbá bá lɛ ndɔ manya ata bɔkɔa, na baná ɔ batɛ́tɛ́á bɔkɔasɛ́á, ɔ ndɔ umbə́ndə́ wɔ́ Mósisi manya ɔwá wɔ́ ndɔ kɛa a sɛ́á ɔ taká mányá na bɛkɔa bikimə.

²¹Nɔ́yɛ́, ɔ ndɔ bɔsɔ́kɔ́ bɛkɔa úkúniə, mba, ɛlɔ́áyɛ́ yatɛ́ ɔ lɛ ndɔ bíúkúniə aŋɔ́á bɛ́múɛ́tɛ́ əə́? Ɔwáwɔ ɔwá ɔ ndɔ nɔŋɔna ɔ sɛ́á bá sá hɔ́ánana ɔ uwoóbo, ɛlɔ́áyɛ́ yatɛ́ ɔ ndɔ óbínə əə́?

²²Ɔwáwɔ ɔwá ɔ ndɔ nilókóno sáŋɔ́na, ɛlɔ́áyɛ́ yatɛ́ ɔ ndɔ lókóno əə́? Ɔwáwɔ ɔwá ɔ ndɔ bililí kóyiə, ɛlɔ́áyɛ́ yatɛ́ ɔ ndɔ bɛɛ́la óbo ɔ uwəbú bɛtɛ́mbɛlɛ əə́?

²³Ɔ ndɔ lɛaŋɛma mɔŋɛ́ŋa ɔwáwɔ ɔwá ɔ ndɔ umbə́ndə́ manya, mba, ɔ lɛ ndɔ muítə bɛ́kɛna, nɔ́yɛ́ ɔ lɛ ndɔ Huɛlɛ́ bə́tiə.

²⁴Ɛ́sɛ́á yɛ́ lɛ́á tilə́kə́tɔ́ ɔ Mətilə Manaŋanaŋa yɛ́ sɛ́á: «Bənú nɔ ndɔ kɛa ɔwá bɛndɔ bá mɔnɔŋɔ mənə́mənə́ bá Huɛlɛ́ kɔbaka.»

²⁵Ábá ɔ ndɔ umbə́ndə́ ɔŋgɔ muɛsɛ, buəndí bɔ́ aŋɔ́á báka na mɔsɛ́ŋɛ́, mba, ábá ɔ lɛ ndɔ muítə ɔŋgɔ, yɛ́ lɛa ɔ́maná ɛ́sɛ́á bá sa aŋɔ́á anda.

²⁶Ábá injuə́ yɛ mɔndɔ a ndɔ bɛtɛ́nɛ́mɛ́ná bɛ́ umbə́ndə́ bɛ́kɛna, Huɛlɛ́ a ŋɔ wɛɛ́ya siəkinə ɛ́sɛ́á miəndí yɛ mɔndɔ.

²⁷Wɛ́ɛ́yɛ́ ɔwá bá ndɔ sinə bá sɛ́á a lɛa injuə́ mbá a ndɔ umbə́ndə́ ɔŋgɔ, a ŋɔ aŋɔ́á símə́siə, ɔwáwɔ ɔwá ɔ ndɔ muítə nɔkɔ, mba, ɔ lɛa bɛ́ándátɔ.

²⁸Nɔ́yɛ́, tiísi yɛ mɔyútɛnɛ, tátá ɔ wɛ́ɛ́yɛ́ ɔwá buəndí bɔ́ ndɔ sinənə ɔ ɔwayɛ́ mɛɛ́lɔ, abáka bá lɛ miəndí mányɛ́na ɔ tɔ́mbákɛna na hɛŋgɛtɛ́nɛ́á hɛ́ mɛɛ́lɔ.

²⁹Mba, abáka bá tiísi yɛ mɔyútɛnɛ manyɛna ɔ tɔ́mbákɛna na yatɛ́ ɔyɛ́á yɛ́ lɛ́á bítímə́tɔ, tiísi yɛ buəndí ɔ́ bɔ́ mɔlɛ́má nuúmə́, ɔbɔ́á Umbúínyi Mɔnaŋanaŋa wɔ́ ná kɛ́áka, tátá ɔ tɔ́mbákɛna na umbə́ndə́. Mba, á Huɛlɛ́ abáka a yɛ́ɛ́yɛ́ ɛnya yɛ mɔndɔ nyamaka, tátá bɔsɔ́kɔ́ bɛndɔ.