Read Tunen Lɔ́ma 4 Bible Online

Lɔ́ma 4 - Tunen bible

Lɔ́ma 4

¹Tɔ́ yəsúə́ isə́kúlúlúnə́ á Ábɛlaháma bɛ́kɔ́lɔ́mɔ́na; yatɛ́ mbá mɛ láá ɛlɔ́áyɛ́ ayɛ́ əə́? Yatɛ́ a ná kúsə́nə na wɛɛ́ya bɛ́múɛ́tɛ́ əə́?

²Ábá Huɛlɛ́ a ka wɛɛ́ya ɛ́lɛnɛna wataká ɔwayɛ́ busíə́, bɔkɔasɛ́á a ka biolí bɛɛsɛ nyɔɔkɔ, ɛlɔ́áyɛ́ nɔ́yɛ́ a ná hɔ́ánána ubíbə́liə, mba, tátá á Huɛlɛ́ busíə́.

³Ɔ taká, Mətilə ma ndɔ laa má sɛ́á: «Ábɛlaháma a ka nɛ́áyɛ́á nɛkɔmba tálɛ́na á Huɛlɛ́, Huɛlɛ́ a ná wɛɛ́ya ɛ́lɛ́nɛ́ná wataká.»

⁴Wɛ́ɛ́yɛ́ ɔwá a ná buolí nyɔ́ɔ́kɔ, a ná hɔ́ánáná ɔ mɔsábɔ́náná ukusənə, mútə́yí mɔsábɔ́náná wɔ́ lɛ bá bɔɔ́la bɔ́ ndəmə, wɔ́ ná wɛɛ́ya hɔ́ánánɛ́na.

⁵Ɔ nifəŋə, wɛ́ɛ́yɛ́ ɔwá a sá buolí nyɔɔ, mba, a ná nɛ́áyɛ́á nɛkɔmba tálɛ́ná á Huɛlɛ́ ɔwá a ndɔ mɔkɛamabɛ́á ɛ́lɛnɛna wataká, Huɛlɛ́ a ŋɔ siəkinə ɔ yáyɛ́á ilumininə, a ŋɔ wɛɛ́ya ɛ́lɛnɛna wataká.

⁶Ndə́witi a ka hɔ́kɛ́na ɛlɔ́áyɛ́ uniŋə muɛsɛ wɔ́ mɔndɔ ɔwá Huɛlɛ́ a ndɔ ɛ́lɛnɛna wataká ɔwayɛ́ busíə́ ɛŋaná bɛ́áyɛ́á biolí usinə a sɛ́á:

⁷«Nyɔnɔ na bááyɛ́ ɔbá Huɛlɛ́ a ná bəə́bu mə́búə́ mabɛ́á niasɛ́na, a ná mə́búə́ mabɛ́á sɔ́tɔ́kɔ́ tɔ́na.

⁸Nyɔnɔ na wɛ́ɛ́yɛ́ mɔndɔ ɔwá Isə́lúkú a lɛ ndɔ wɛɛ́ya bɔ́áyɛ́á bɔbɛ́á fanɛna.»

⁹Nɔ́yɛ́ yɛ́ ndɔ siə ɔlaa ɔwá, ɔ́maná miəndí yɛ́ ŋɔ báá ɔ nɛhɔnɔ əə́? Bóo! Ata bá injuə́ bá ŋɔ əbú báá ɔ nɛhɔnɔ. Tɔ nɔ́ húlə ɔlaa ɔwá, Huɛlɛ́ a ka Ábɛlaháma ɛ́lɛnɛna wataká bɔkɔasɛ́á a ka nɛ́áyɛ́á nɛkɔmba tálɛ́na ɔ ɔwayɛ́.

¹⁰Nəníə́ Huɛlɛ́ a ná Ábɛlaháma ɛ́lɛ́nɛ́ná wataká əə́? Yɛ́ ka báá əlimə yɛ bɔ́áyɛ́á buəndí, ataná ubusíə́ bɔ́ buəndí əə́? Nɔ́yɛ́ yɛ́ ka bɛ́tɔ́mbáka ubusíə́ bɔ́ buəndí, mba, tátá əlimə yɛ buəndí.

¹¹Huɛlɛ́ a ka taŋa á Ábɛlaháma ɔwɛ́lɛnɛna wataká, əlimə yɛ ikúílí bá ná wɛɛ́ya anda. Nɔ́yɛ́ yɛ́ lɛa hɛŋgɛtɛ́nɛ́á ɔhɛ́á hɛ́ ndɔ ínə́niə ɔwá, a ka bá a nɔ́ nɛ́áyɛ́á nɛkɔmba tálɛ́na ɔ ɔwayɛ́. Huɛlɛ́ a ka wɛɛ́ya ɛ́lɛnɛna tɔ́na wataká ɛŋaná ɔbɛ́ánda. Ɔ ɛlɔ́áyɛ́ nɔ́yɛ́, a ná híáná isə́ yɛ bááyɛ́ bəkimə ɔbá bá ná níə́búə́ nɛkɔmba tálɛ́ná á Huɛlɛ́ ɛŋaná ɔbɛ́ánda. Huɛlɛ́ a ndɔ bəə́bu ɛ́lɛnɛna tɔ́na bátaká ɔwayɛ́ busíə́.

¹²Ábɛlaháma a báka tɔ́na isə́ yɛ bááyɛ́ bá bɛ́ándákátɔ, mba, bá ná hɔ́ánána ɔwɔŋgɛna ɔ ɔwayɛ́ ɛnɔ́mɛ, bá níə́búə́ nɛkɔmba tálɛ́ná tɔ́na á Huɛlɛ́, ɔ iŋgətí yɛ yəsúə́ isə́kínə́ ɔwá a ná lúmínínə ubusíə́ bɔ́ bɔ́áyɛ́á buəndí.

¹³Ɔ taká, Huɛlɛ́ a ka Ábɛlaháma na yayɛ́á ɛndɛkɛ bílíhə́niə ɔwá a ŋɔ misí kusənə ɛ́sɛ́á ɛhálálá, tátá bɔkɔasɛ́á a ka umbə́ndə́ bítə́tə́kəniə, mba, bɔkɔasɛ́á Huɛlɛ́ a ka wɛɛ́ya ɛ́lɛakɛnɛna wataká ɛlɔ́áyɛ́ yáyɛ́á ilumininə.

¹⁴Yɛ́ bámɛ́nɛ́ná ɔwá, ɔ́ bááyɛ́ bíbúə́ ɔbá bá ndɔ umbə́ndə́ ɔ́ŋgɔ, bá ŋɔ ɛhálálá kusənə ɔyɛ́á Huɛlɛ́ a ná bílíhə́níə́, nɔ́yɛ́, há ilumininə yɛ́ ŋɔ báá ndəmə, nɛkaka nɛ́ Huɛlɛ́ tɔ́na nɛ́ ŋɔ báá bɔɔ́la bɔ́ ndəmə.

¹⁵Abáka Huɛlɛ́ á liŋə ikúílí ɔyɛ́á mɔndɔ a ná umbə́ndə́ nɔ́kɔ; mba, ɛŋaná umbə́ndə́ bá sa ósó ɔlaa ɔwá mɔndɔ a ná muítə nɔkɔ.

¹⁶Nɔ́yɛ́, yatɛ́ ɔyɛ́á Huɛlɛ́ a ná bílíhə́níə́, a ka nɔ́yɛ́ kɛakɛna ɛlɔ́áyɛ́ bááyɛ́ ɔbá bá ná níə́búə́ nɛkɔmba tálɛ́ná ɔ ɔwayɛ́, nɛ́táyɛ́ nɛkaka nɛ́ báka niəbə nɛ́ ndəmə ɛlɔ́áyɛ́ ɛndɛkɛ yikimə yɛ Ábɛlaháma, tátá ɔ́maná ɛlɔ́áyɛ́ bááyɛ́ ɔbá bá ndɔ umbə́ndə́ bítə́tə́niə, mba, ɛlɔ́áyɛ́ bááyɛ́ ɔbá bá ná lúmínínə́ ɛ́sɛ́á Ábɛlaháma á isə́ yɛ bəsú bəkimə a ná ayɛ́ lúmínínə.

¹⁷Ɛ́sɛ́á Mətilə ma ndɔ laa ɔwá, Huɛlɛ́ a ka Ábɛlaháma lɛna a sɛ́á: «Mɛ ka aŋɔ́á híə́nəsiə isə́kúlúlúnə́ yɛ tutikə tuəŋí.» Ábɛlaháma abáka yəsúə́ Isə́ ɔ busíə́ bɔ́ Huɛlɛ́ ɔ wɛ́ɛ́yɛ́ ɔwá a ná lúmínínə. Yɛ́ɛ́yɛ́ Huɛlɛ́ ɔwá a ndɔ buɔmɔ́ índiə ɔ bəwə́nú, wɛɛ́ya tɔ́na a ná kɛáka ɔwá ɔbɔ́á bɔ́ sa bá, bɔ́ bámɛ́nɛ́na.

¹⁸Ábɛlaháma a ka nɛ́áyɛ́á nɛkɔmba tálɛ́na á Huɛlɛ́ ata ɛ́sɛ́á ətíə́ yɛ bɔ́áyɛ́á buɔmɔ́, a sa bá tɔ́na na ɛnánɛna, Huɛlɛ́ a ka wɛɛ́ya híə́nəsiə isə́kúlúlúnə́ yɛ ɔmbana muiŋí wɔ́ tutikə, ɛ́sɛ́á a ná wɛɛ́ya lɛ́na a sɛ́á: «Nɔ́yɛ́ yáwɔ́á ɛndɛkɛ yɛ́ ŋɔ bámɛnɛna hɔmɔ́nɔmɔnɔmɔ.»

¹⁹Ábɛlaháma a ka báá hoóyi na ɛbɔ́ɛ́yɛa yɛ́ tuɔŋɔ, a manyaka ɔwá a lɛa yɔ́kɔ́bɔ́nɔ́tɔ, muənyí á Salá tɔ́na a ka báá ɛlɛla, ata nɔ́yɛ́, yáyɛ́á ilumininə yɛ́ sa tɔmbɔ.

²⁰A ka bá a ndɔ manya ɔwá Huɛlɛ́ a ŋɔ nɛkaka úndúsiniə, tɔ́na a lɛ biyəbə, ɔ nifəŋə, yáyɛ́á ilumininə yɛ́ wɛɛ́ya ónókiniə, a Huɛlɛ́ nyamaka tɔ́na.

²¹A ka bá ɛ́mɛ́nɛ́nátɔ́ ɔwá, ábá Huɛlɛ́ a ná bɔkɔa bílíhə́níə́, a lɛa na iŋgínə́ yɛ bɔ́ɛ́ta úndúsiniə.

²²Ɔ́ ɛlɔ́áyɛ́ nɔ́yɛ́ Huɛlɛ́ a ná wɛɛ́ya ɛ́lɛ́ákɛ́nɛ́ná wataká ɔ ɔwayɛ́ busíə́.

²³Ikúílí tuəfulə tɔnaŋanaŋa tɔ́ ndɔ laa tɔ́ sɛ́á: «Huɛlɛ́ a ka Ábɛlaháma ɛ́lɛakɛnɛna wataká ɔ ɔwayɛ́ busíə́, bɛ́ɛ́yɛ́ bɛtambá bɛ́ lɛ bá ɛlɔ́áyɛ́ wɛɛ́ya bíbúə́.»

²⁴Bá ka nɔ́yɛ́ tiləkə tɔ́na ɛlɔ́áyɛ́ əsú. Huɛlɛ́ a ŋɔ əsú ɛ́lɛakɛnɛna bátaká bɔkɔasɛ́á, tɔ ka níə́súə́ nɛkɔmba tálɛ́na ɔ ɔwayɛ́, a ka yəsúə́ Isə́lúkú á Yə́susu huŋúə́síə́ ɔ ətíə́ yɛ bəwə́nú.

²⁵Huɛlɛ́ a ka wɛɛ́ya hánɛna ɔ nyɛmbɛ́ ɛlɔ́áyɛ́ mə́súə́ mabɛ́á, a ná wɛɛ́ya huŋúə́síə́ tɔ́na ɔ ətíə́ yɛ bəwə́nú ɔkɛaka ɔwá, ɔ tɔ́mbákɛna na nɔ́yɛ́, á bəsú ɛ́lɛ́ákɛ́nɛ́ná bátaká ɔ ɔwayɛ́ busíə́.