Read Tunen Lɔ́ma 5 Bible Online

Lɔ́ma 5 - Tunen bible

Lɔ́ma 5

¹Nɔ́yɛ́, Huɛlɛ́ a ka bəsú ɛ́lɛakɛnɛna bátaká ɔ tɔ́mbákɛna na ilumininə; tɔ nɔ́yɛ́ báka ɔ bumbə́nú na wɛɛ́ya ɔ tɔ́mbákɛna na yəsúə́ Isə́lúkú á Yə́susu Kilísitusu.

²Ɔ́ yɛ́ɛ́yɛ́ Yə́susu a ná ɛnɔ́mɛ kuúnə ɔkɛaka ɔwá Huɛlɛ́ á bəsú wə́yíə́ mɔlɛ́má muɛsɛ ínə́níə́ bɔkɔasɛ́á, tɔ ka lumininə ɔ ɔwayɛ́, ɔ́ yɛ́táyɛ́ nyɔnɔ yɛ́ ndɔ bəsú óníniə. Yatɛ́ ɔyɛ́á yɛ́ ndɔ kɛa ɔwá tɔ bíbə́lə́kíə́, ɔ́ ɛnánɛna yɛ́ nioko nɛ́ tuúmə tɔ́ Huɛlɛ́ ukusənə.

³Ɔ ɔyáyɛ́na nɔ́yɛ́, tɔ ndɔ bíbə́liə ata nɔ́yɛ́ ɛ́sɛ́á bɛndɔ bá ndɔ bəsú məsə́kə índiə, na ɔmanya ɔwá məsə́kə má ndɔ húlə́nə á nitiŋiminə,

⁴nitiŋiminə yɛ́ yɔkɛ́nana húlə́kənə ətíə́ mɔkɔ́lɛna, yɔkɛ́nana yɛ́ ayɛ́ ɛnánɛna húlə́kənə.

⁵Abáka yɛ́táyɛ́ ɛnánɛna yɛ́ lɛ nímbə́nə́ bɔkɔasɛ́á, ɔ tɔ́mbákɛna na Umbúínyi Mɔnaŋanaŋa Huɛlɛ́ a ka nɛ́áyɛ́á nibo yɔkɔnɛna ɔ uwəsú mɛlɛ́má nuúmə́.

⁶Ɔ taká, ɔ yɛ́táyɛ́ ikúílí tɔ ka báá ɛŋaná iŋgínə́ ɔkɛaka ɔwá tɔ bínúə́kə́níə́ bəsú bɛ́múɛ́tɛ́, ɛnaka ikúílí yɛ́ ndáfámá ɔyɛ́á Huɛlɛ́ a ná tínímíə́, Kilísitusu a ka wínə ɛlɔ́áyɛ́ əsú á bakɛamabɛ́á.

⁷Yɛ́ booko ányákátɔ́ ɔwá, mɔndɔ á lumínə ɔ uwínə ɛlɔ́áyɛ́ ɔsɔ́kɔ́ mɔndɔ, ata nəníə́ a lɛ́á tɛ́nɛ́mátɔ. Ɔmbáŋíndíə́, wɔmɔtɛ́ a ayɛ́ óso ɔbáá na makɛ́nda ɔ uwínə ɛlɔ́áyɛ́ mɔndɔ muɛsɛ.

⁸Nɔ́yɛ́, Huɛlɛ́ a ka bəsú nindínə́ ínə́niə ɔnɛ́á a ná bəsú híkə́kíníə́: Kilísitusu a ka wínə ɛlɔ́áyɛ́ əsú mbá nɔ́yɛ́ tɔ ná báá bakɛamabɛ́á.

⁹Nɔ́yɛ́, ɔ tɔ́mbákɛna na yayɛ́á nyɛmbɛ́, Huɛlɛ́ a ka bəsú ɛ́lɛakɛnɛna bátaká, ata nəníə́, ɛnáká Huɛlɛ́ a híə́yíə́ hilóbi fə́mə́lə́níə́, Kilísitusu a ŋɔ bəsú nuəkəniə.

¹⁰Tɔ ka bá itə́níə́tɔ́ na Huɛlɛ́, mba, a ka kɛaka tɔ ná híə́nə́níə́ na wɛɛ́ya ɔ tɔ́mbákɛna na nyɛmbɛ́ yɛ wayɛ́á Mɔná, isíŋáka ɔwá tɔ lɛ́á híə́nə́níə́tɔ́ na wɛɛ́ya, yɛ́ lɛa ɛ́nánátɔ́ tə́lə́ŋu ɔwá, a ŋɔ bəsú nuəkəniə ɔ tɔ́mbákɛna na buɔmɔ́ bɔ́ Kilísitusu hɔŋɔ́átɔ.

¹¹Ɔ yáyɛ́na nɔ́yɛ́, tɔ ndɔ bíbə́liə á Huɛlɛ́ busíə́, nyɔnɔ na yəsúə́ Isə́lúkú á Yə́susu Kilísitusu ɔwá a ná kɛ́áka isíŋáka tɔ lɛa hiə́nə́níə́ na wɛɛ́ya.

¹²Bɔbɛ́á bɔ́ ka fínə ɔ misí ɔ tɔ́mbákɛna na mɔndɔ ɔmɔtɛ́, á Átama, bɔbɛ́á bɔ́ ná ayɛ́ nyɛmbɛ́ hulənə. Nyɛmbɛ́ yɛ́ ná bɛndɔ bəkimə tɔ́mbɛ́ná bɔkɔasɛ́á, bəkimə bá ka kɔa ɔ bɔbɛ́á.

¹³Ubusíə́ ɔbɔ́á Huɛlɛ́ á Mósisi umbə́ndə́ túmbíə́, bɔbɛ́á bɔ́ ka báá buɔnɔ́ ɔ misí, mba, ɛ́sɛ́á umbə́ndə́ wɔ́ sa bá, Huɛlɛ́ a sa bá a ndɔ bɔbɛ́á sinə bɔɔ́la bɔŋɛ́ŋa ɔwayɛ́ busíə́.

¹⁴Ata nɔ́yɛ́, ɔ botolokiə ɔ ikúílí yɛ́ Átama ɔ ndafámáká ɔ ikúílí yɛ́ Mósisi, bɛndɔ bá lɛ wə́kunə, ata bááyɛ́ ɔbá bá sa bɔbɛ́á kɛa ɛ́sɛ́á Átama ɔwá a sa ɔŋgɛna ɔ bɛtɛ́nɛ́mɛ́ná bɛ́ Huɛlɛ́. Nɔ́yɛ́, Átama a ka báá hɛŋgɛtɛ́nɛ́á hɛ́ wɔmɔtɛ́ mɔndɔ ɔwá a ná báá ɔ ɔsákɔna.

¹⁵Mba, iŋgətí yɛ́ lɛ bá ətíə́ na niəbə ɔnɛ́á Huɛlɛ́ a ndɔ índiənə ndəmə na hɛkɔma hɛ́ Átama. Ɔ taká, bəəŋí bá ka wə́kunə ɔ tɔ́mbákɛna na hɛkɔma hɛ́ mɔndɔ ɔmɔtɛ́; mba, mɔlɛ́má muɛsɛ wɔ́ Huɛlɛ́ wɔ́ lɛa mɔŋɛ́ŋa yáyɛ́ná hɛkɔma hɛ́ Átama, niəbə ɔnɛ́á Huɛlɛ́ a ndɔ índiənə ndəmə ɔ bɛndɔ bəkimə, nɛ́ lɛa na mukunə́ mɔŋɛ́ŋa ɔ ɔyáyɛ́na ɔ tɔ́mbákɛna na mɔndɔ ɔmɔtɛ́, á Yə́susu Kilísitusu.

¹⁶Nɔ lɛ ndɔ manya ɔwá niəbə ɔnɛ́á Huɛlɛ́ a ndɔ ídiənə ndəmə na bɔbɛ́á bɔ́ mɔndɔ, yɛ́ lɛ bá bɔkɔa bɔ́mɔtɛ́. Mɔndɔ ɔmɔtɛ́ a ka kɔa ɔ bɔbɛ́á, Huɛlɛ́ a ná wɛɛ́ya kə́lə́sə́kíə́, ɔ tɔ́mbákɛna na nɔ́yɛ́, a ná bɛndɔ bəkimə hɔkɛ́na. Mbá nɔ́yɛ́, niəbə ɔnɛ́á Huɛlɛ́ a ndɔ índiənə ndəmə nɛ́ ka kɛaka a ná bəə́bu ɛ́lɛ́ákɛ́nɛ́ná bátaká, ɛŋaná ɔmbana muiŋí wɔ́ túə́búə́ tɔkɔma ɔfanɛna.

¹⁷Ɔ taká, ɛlɔ́áyɛ́ mɔndɔ ɔmɔtɛ́, ɔ tɔ́mbákɛna na bɔbɛ́á bɔ́ mɔndɔ ɔmɔtɛ́ tɔ́na, bɛndɔ bá ndɔ wə́ə́ ɔ misí, nɔ́yɛ́ bɔndaka bɔ́ Yə́susu Kilísitusu bɔ́ ka bámɛnɛna nifəŋə; ɛlɔ́áyɛ́ ayɛ́ na wɛɛ́ya bíbúə́ á bɛndɔ bá ŋɔ buɔmɔ́ bɔ́ ikúílíə́kimə kusənə, bá ŋɔ manakɛna tɔ́na. Báyɛ́ ɔbá Huɛlɛ́ a ná wə́yíə́ mɔlɛ́má muɛsɛ ínə́níə́, a ka bəə́bu ɛ́lɛakɛnɛna bátaká.

¹⁸Nɔ́yɛ́, ɛ́sɛ́á bɔbɛ́á bɔ́ mɔndɔ ɔmɔtɛ́ bɔ́ ná kɛ́áká Huɛlɛ́ a ná bɛndɔ bəkimə hɔkɛ́na, hɔ́ánánátɔ́, bɛnyɛná bɛ́ taká bɛ́ mɔndɔ ɔmɔtɛ́ bɛ́ ka kɛaka ɔwá Huɛlɛ́ a bɛndɔ bəkimə ɛ́lɛ́ákɛ́nɛ́ná bátaká, nɔ́yɛ́ bá ŋɔ buɔmɔ́ bɔ́ ikúílíə́kimə kusənə.

¹⁹Ɔ taká, Huɛlɛ́ a ka ɔmbana muiŋí wɔ́ bɛndɔ ɛ́lɛakɛnɛna bakɛamabɛ́á, ɛlɔ́áyɛ́ mɛɔ́kɔ yɛ́ mɔndɔ ɔmɔtɛ́, hɔ́ánánátɔ́, Huɛlɛ́ a ka ɔmbana muiŋí wɔ́ bɛndɔ ɛ́lɛakɛnɛna bátaká bɔkɔasɛ́á, mɔndɔ ɔmɔtɛ́ a ka báá na yɔkɛ́nana.

²⁰Huɛlɛ́ a ka umbə́ndə́ índiə ɔkɛaka ɔwá bɛndɔ bá bɛ́mánya, búə́búə́ bɔbɛ́á bɔ́ lɛ́á áŋánákátɔ, mba, ɛbɔ́ka ɔyɛ́á bɔbɛ́á bɔ́ ná áŋánáka, mɔlɛ́má muɛsɛ wɔ́ Huɛlɛ́ wɔ́ ná ayɛ́ ayáka ɔ ɔyáyɛ́na.

²¹Nɔ́yɛ́, ɛ́sɛ́á bɔbɛ́á bɔ́ ná yayɛ́á iŋgínə́ fə́mə́lə́níə́ ɛlɔ́áyɛ́ muɔnɔ́nɔ, nɔ́yɛ́ hɔ́ánánátɔ́ á Huɛlɛ́ ndɔ iŋgínə́ yɛ wə́yíə́ mɔlɛ́má muɛsɛ fə́mə́ləniə ɛlɔ́áyɛ́ bɛndɔ ɔwɛ́lɛnɛna bátaká ɔkɛaka ɔwá, ɔ tɔ́mbákɛna na yəsúə́ Isə́lúkú á Yə́susu Kilísitusu, bá buɔmɔ́ bɔ́ ikúílíə́kimə kusə́nə.