Read Tunen Lɔ́ma 6 Bible Online

Lɔ́ma 6 - Tunen bible

Lɔ́ma 6

¹Nəníə́ nɔ́yɛ́ yɛ́ ndɔ siə ɔlaa əə́? Tɔ́ əsú tuə́nə ɔbánɔ́ ɔ ɔkɛa há bɔbɛ́á ɔkɛaka ɔwá Huɛlɛ́ a bəsú wə́yíə́ mɔlɛ́má muɛsɛ ínə́níə́ ɔ ɔyáyɛ́na əə́?

²Bóo! Tátá nɔ́yɛ́, tɔ ka wínə ɔ bɔbɛ́á, nəníə́ ɛ́kɛ tɔ niŋəkə tɔ́na ɔ bɔbɛ́á nuúmə́ əə́?

³Nɔ ndɔ nɔ́yɛ́ manya muɛsɛ ɔwá, bəsú bəkimə ɔbá tɔ́ ná nɛsɔa kusə́nə ɔkɛaka ɔwá tɔ báá ɔ nɛtɔana na Yə́susu Kilísitusu, tɔ ka wə́niə na wɛɛ́ya ɔ tɔ́mbákɛna na nɛ́táyɛ́ nɛsɔa.

⁴Nɔ́yɛ́, ɔ tɔ́mbákɛna na nɛsɔa tɔ ka wə́niə na wɛɛ́ya, bá ná bəsú nyə́ə́ ɔkɛaka ɔwá, ɛ́sɛ́á Huɛlɛ́ á Isə́ a ná Kilísitusu huŋúə́síə́ ɔ tɔ́mbákɛna na yayɛ́á hiyiŋə hɛŋɛ́ŋa, bəsú tɔ́na tɔ́ buɔmɔ́ buɔ́sɔ kusə́nə.

⁵Ɔ taká, ɛ́sɛ́á ikúílí tɔ ná wínə́ ɔ bɔbɛ́á ɛ́sɛ́á Yə́susu, tɔ báka ɔ bɔlatɔ́ na wɛɛ́ya, tɔ ŋɔ báá bikúílíbikimə ɔ bɔlatɔ́ na wɛɛ́ya, Huɛlɛ́ a ŋɔ əsú huŋuəsiə ɛ́sɛ́á a ná wɛɛ́ya huŋúə́síə́.

⁶Tɔ́ náana manyá muɛsɛ ɔwá, ɛnaka Yə́susu a wə́ə́ ɔ ɔmbásá, Huɛlɛ́ a ka búə́súə́ bɔlɔŋa bɔ́ buɔnɔ́ ɔ́mɔ́kɛna ɔ ɔmbásá ɔkɛaka ɔwá, a ɛfɛka katáka ɔyɛ́á yɛ́ ndɔ bəsú kuəsiə ɔ bɔbɛ́á, nɔ́yɛ́ mbá tɔ sɔ́ ŋɔ bá tɔ́na bɛɔlɛ́ bɛ́ bɔbɛ́á bɔkɔasɛ́á,

⁷bɔbɛ́á bɔ́ lɛ ndɔ wɛ́ɛ́yɛ́ manɛna tɔ́na ɔwá a lɛ́á wə́ə́tɔ.

⁸Ábá tɔ lɛa wə́ə́tɔ́ na Kilísitusu, tɔ lɛa ɛ́mɛ́nɛ́nátɔ́ ɔwá tɔ ŋɔ niŋəkə tɔ́na na wɛɛ́ya.

⁹Tɔ ndɔ manya ɔwá, ɛ́sɛ́á Huɛlɛ́ a ná Kilísitusu huŋúə́síə́ ɔ ətíə́ yɛ bəwə́nú, a sa ndə́wə́ə́ tɔ́na, nyɛmbɛ́ yɛ́ lɛ ndɔ wɛɛ́ya manɛna tɔ́na.

¹⁰Ɛnaka a wə́ə́, a ka wínə ɛlɔ́áyɛ́ bɔbɛ́á ikúílí ɛ́mɔtɛ́ ɔ mɛɛ́lɔ yɛ bikúílí bikimə; mba, isíŋáka a lɛa muɔmɔ́, a ndɔ niŋə tɔ́na á Huɛlɛ́ busíə́.

¹¹Hɔ́ánánátɔ́ bənú tɔ́na, nɔ manya ɔwá, nɔ ka wínə ɔ bɔbɛ́á, nɔ lɛa bɔɔmɔ́ á Huɛlɛ́ busíə́ bɔkɔasɛ́á, nɔ lɛa ɔ nɛtɔana na Yə́susu Kilísitusu.

¹²Nɔ́yɛ́, bɔbɛ́á bɔ́ sá hɔ́ánana ɔ yənúə́ mɛɛ́lɔ ɔmanɛna ɔyɛ́á yɛ́ ŋɔ wə́ə́ ɔ hímotí hinó, bɔ́táyɛ́ bɔbɛ́á bɔ́ lɛ kɛ́á ɔwá nɔ ɔ́ŋgɔ́kɛ́na ɔ bilókílókí bɛ́ yɛ́táyɛ́ mɛɛ́lɔ.

¹³Nɔ lɛ bɛláŋa bɛ́ yənúə́ mɛɛ́lɔ bɛ́kɛ́na ɛlɔ́áyɛ́ bɔbɛ́á ɛ́sɛ́á bikúlúmə́ bɛ́ bɔbɛ́á. Mba, nɔ́ Huɛlɛ́ nyɔ́kɛ́ná na bíə́núə́ bɛláŋa ɛ́sɛ́á bɔɔmɔ́ ɔbá bá ná kə́tílə́ ətíə́ yɛ bəwə́nú. Nɔ́ yənúə́ mɛɛ́lɔ mikimə bɛ́kɛ́ákɛ́ná ɛlɔ́áyɛ́ buolí bɔ́ Huɛlɛ́ ɔnyɔɔ.

¹⁴Nɔ́yɛ́, bɔbɛ́á bɔ́ sá hɔ́ánana ɔ uwənú manɛna tɔ́na bɔkɔasɛ́á, nɔ lɛ ndɔ umbə́ndə́ bítə́tə́niə, nɔ́ ɔ́ŋgɔ́kɔ ɔbánɔ́ á ɛnɔ́mɛ ɔyɛ́á Huɛlɛ́ a ŋɔ bənú yayɛ́á nyɔnɔ índiə.

¹⁵Mba yatɛ́ nə́ə əə́? Tɔ́ bɔbɛ́á kɛ́áka bɔkɔasɛ́á tɔ lɛ ndɔ umbə́ndə́ bítə́tə́niə, mbá ata tɔ ndɔ ɔŋgɛna ɔbánɔ́ á ɛnɔ́mɛ ɔyɛ́á Huɛlɛ́ a ŋɔ bəsú yayɛ́á nyɔnɔ índiə əə́? Bóo!

¹⁶Nɔ ndɔ náana manya muɛsɛ ɔwá, ikúílí nɔ ndɔ mɔndɔ nyɛna ɔkɛaka ɔwá nɔ wɛɛ́ya ɔ́kɔ́kɛ́nɛ́na, nɔ ndɔ híána bɛɔlɛ́ bɛ́ mɔ́táyɛ́ mɔndɔ ɔwá nɔ ndɔ ɔ́kɛ́na. Yɛ́ lɛa ɔwá, nɔ́ ɔ́kɛ́ná ɔ bɔbɛ́á ɔbɔ́á bɔ́ ndɔ bənú ɔ́nɔ, nɔ́ híáná bɛɔlɛ́ bɛ́ wɛ́ɛ́yɛ́ ɔwá nɔ ndɔ ɔ́kɛ́na, ataná, nɔ́ ɔ́kɛ́na á Huɛlɛ́, nɔ́ niŋə́kínə ɔ taká.

¹⁷Tɔ́ Huɛlɛ́ mohóloniə híə́níníə́. Nɔ ka báá buɔnɔ́ bɛɔlɛ́ bɛ́ bɔbɛ́á, mba, isíŋáka, binə́níníə́ ɔbɛ́á bá ná bənú úkúnə́kíə́, nɔ́ bɛɛ́ta ɔ́kɔ́kɛ́nɛ́na na wə́núə́ mɔlɛ́má mukimə.

¹⁸Huɛlɛ́ a ka bənú hutunə ɔ bɔbɛ́á, nɔ ná híána bɛ́áyɛ́á bɛɔlɛ́ ɔkɛaka ɔwá nɔ bɛ́kɛ́ákɛ́na á taká.

¹⁹Mɛ ndɔ bənú hɛ́na ɛ́sɛ́á bɛndɔ bá misí bɔkɔasɛ́á, nɔ lɛa tɔmbɔ́kɔ́tɔ́ ɔ ɔwɔkɔ́nɔ, hɔ́ánánátɔ́, nɔ ka yənúə́ mɛɛ́lɔ mikimə bɛ́kɛakɛna buɔnɔ́ ɛ́sɛ́á bɛɔlɛ́, ɛlɔ́áyɛ́ bɛkɔa bɛ́ nyəkə́ na bɛ́ lúbə́lubə, nɔ́yɛ́, nɔ ka kafáma á Huɛlɛ́ ɔ ɔfamɔbɔɛna. Mba isíŋáka, nɔ́ yə́núə́ mɛɛ́lɔ mikimə bɛ́kɛ́ákɛ́na ɔkɛaka ɔwá nɔ híáná bɛɔlɛ́ ɔ ɔkɛa yatɛ́ ɔyɛ́á yɛ́ lɛ́á taká. Nɔ́yɛ́, yənúə́ ɛnya yɛ buɔmɔ́ bɔ́ ŋɔ bámɛnɛna bɔnaŋanaŋa.

²⁰Nɔ sa bá bíə́kíníə́tɔ́ ɔ taká ɔbɛ́kɛna ikúílí ɔyɛ́á nɔ ná báá bɛɔlɛ́ bɛ́ bɔbɛ́á.

²¹Yatɛ́ mɔsɛ́ŋɛ́ nɔ́ ná kúsə́nə́ ɛnaka nɔ́ bɛ́ɛ́yɛ́ bɛnyɛná bɛ́kɛ́ákɛ́na ɔbɛ́á bɛ́ ndɔ bənú símə́siə niɔfɛ́nɛ əə́? Bɛ́táyɛ́ bɛnyɛná bɛ́ ndɔ ónósoniə.

²²Mba isíŋáka, Huɛlɛ́ a ná bənú hutúnə́ ɔ bɔbɛ́á, nɔ ná híáná bɛ́áyɛ́á bɛɔlɛ́. Nɔ́yɛ́, yənúə́ ɛnya yɛ buɔmɔ́ ɔbɔ́á nɔ ndɔ niŋə bɔ́ ŋɔ báá bɔnaŋanaŋa, əlimə yɛ ikúílí, nɔ ŋɔ buɔmɔ́ bɔ́ ikúílíə́kimə kusənə.

²³Ɔ taká, nyɛmbɛ́ yɛ́ lɛa mɔsábɔ́náná wɔ́ bɔbɛ́á, mba, buɔmɔ́ bɔ́ ikúílíə́kimə bɔ́ lɛa niəbə ɔnɛ́á Huɛlɛ́ a ndɔ índiənə ndəmə, ikúílí ɔyɛ́á tɔ lɛ́á ɔ nɛtɔana na yəsúə́ Isə́lúkú á Yə́susu Kilísitusu.