Read Tunen Lɔ́ma 7 Bible Online

Lɔ́ma 7 - Tunen bible

Lɔ́ma 7

¹Á bənísə́, nɔ ndɔ manya muɛsɛ muɛsɛ yatɛ́ ɔyɛ́á mɛ ndɔ siə uwənú ɔlɛna, mɛ ndɔ bənú hɛ́na ɛ́sɛ́á ɔ bɛndɔ ɔbá bá ndɔ umbə́ndə́ manya. Nɔ lɛ ndɔ manya ɔwá, umbə́ndə́ wɔ́ ndɔ mɔndɔ manɛna ikúílí yikimə ɔyɛ́á muití a lɛ́á ɔ buɔmɔ́ əə́?

²Tɔ́ iŋgətí ɛ́tɛ́na ɔ muəndú wa lɔ́nɔ́tɔ; umbə́ndə́ wɔ́ wɛɛ́ya lɛa ɔ́lɔ́kɔ́kɔ́tɔ́ na yayɛ́á ibə́ hata yɛ ikúílí ɔyɛ́á a nalɛ́á ɔ buɔmɔ́. Mba, ábá yayɛ́á ibə́ a ná wə́ə́, a lɛa sɔ́ŋɔ́nátɔ́ ɔ umbə́ndə́ ɔwá wɔ́ ná wɛɛ́ya bá ɔ́lɔ́kɔ́kɛ́nátɔ́ na wɛɛ́ya.

³Ɔ́ niɔŋɔ́, ábá a ná híáná muəndú wa mɔndɔ muinə́muinə́ ɔ ikúílí yayɛ́á ibə́ a lɛ́á ɔ buɔmɔ́, bá ndɔ wɛɛ́ya ɛta ɛ́sɛ́á wənilókóno. Mba, ábá yayɛ́á ibə́ a ná wə́ə́, a lɛa kuənjə ɔwɔŋgɔkɔnɔ na umbə́ndə́, a lɛ bá tɔ́na wənilókóno ábá a ná híáná muəndú wa mɔndɔ muinə́muinə́.

⁴Á bənísə́, yɛ́ lɛa hɔ́ánánátɔ́ ɛlɔ́áyɛ́ ənú, umbə́ndə́ wɔ́ lɛ ndɔ bənú manɛna tɔ́na bɔkɔasɛ́á, ɛnaka Yə́susu a wə́ə́ ɔ ɔmbásá, uwənú ɔbá nɔ́ ná báá ɔ nɛtɔana na wɛɛ́ya, nɔ ka ənú wə́ə́ ɔwɔŋgɔkɔnɔ na umbə́ndə́. Isíŋáka, nɔ lɛa híánátɔ́ wa mɔndɔ muinə́muinə́, ɔ́ wɛ́ɛ́yɛ́ ɔwá Huɛlɛ́ a na huŋúə́síə́ ətíə́ yɛ bəwə́nú ɔkɛaka ɔwá, tɔ kɛ́áká yatɛ́ ɔyɛ́á yɛ́ lɛ́á yɛɛsɛ á Huɛlɛ́ busíə́.

⁵Ɔ taká, ikúílí búə́súə́ bɔlɔŋa bɔ́ mɔsá bɔ́ ná báá bɔ́ ndɔ bəsú kɛndana, umbə́ndə́ wɔ́ ka kɛaka ɔwá tɔ bɔbɛ́á kɛ́áka ikúílí tɛ́á, yɛ́ɛ́yɛ́ ɛnya yɛ buɔmɔ́ yɛ́ ndɔ bəsú ákakana ɔ nyɛmbɛ́.

⁶Mba isíŋáka, Huɛlɛ́ a ka kɛaka ɔwá, tɔ wə́ə ɔwɔŋgɔkɔnɔ na yatɛ́ ɔyɛ́á yɛ́ ná bəsú hɔ́kɛ́na ɔ ɛbɔka. Nɔ́yɛ́, tɔ óso á Huɛlɛ́ ɔnyɛna ɔ nindínə́ niɔ́sɔ na iŋgínə́ yɛ Umbúínyi Mɔnaŋanaŋa; mba, tátá ɔ ɛnya yɛ buɔnɔ́ na iŋgínə́ yɛ umbə́ndə́ wɔ́ Mósisi.

⁷Nəníə́ nɔ́yɛ́ yɛ́ ndɔ siə ɔlaa əə́? Umbə́ndə́ wɔ́ báka ɔbánɔ́ bɔbɛ́á əə́? Bóo! Mba, umbə́ndə́ wɔ́ ná kɛ́áka ɔwá, mɛ manyá yatɛ́ ɔyɛ́á yɛ́ lɛ́á bɔbɛ́á. Ɔ taká, ata bá lɛ tilə́ ɔ umbə́ndə́ ɔwá, ɔ lɛ məə́sə háá ɔ bɛɛ́la bɛ́ bɛndɔ, há mɛ sa manya, ɔwá məə́sə ɔháa ɔ bɛɛ́la bɛ́ bɛndɔ, bɔbɛ́á.

⁸Ɛ́sɛ́á umbə́ndə́ wɔ́ ná kɛ́áka ɔwá mɛ manyá yatɛ́ yɛ́ lɛ́á bɔbɛ́á, bɔbɛ́á bɔ́ ka kɛaka ɔwá, mɛ məə́sə háá ɔ məndínə́ məkimə má bɛɛ́la bɛ́ bɛndɔ. Ɔ taká, ata umbə́ndə́ wɔ́ lɛ bámɛ́nɛ́na, há abáka bá lɛ bɔbɛ́á manya.

⁹Ɔ buɔnɔ́, ikúílí mɛ sa bá mɛ ndɔ umbə́ndə́ manya, mɛ ka bá mɛ ndɔ niŋə ɛŋaná hɛkɔma. Mba, ɛnaka mɛ umbə́ndə́ mányá, mɛ lɛa na ilókí yikimə ɔ bɔbɛ́á ɔkɛa.

¹⁰Ɔ nindínə́ ɔnɛ́á, mɛ ámɛ óso ɔlaa tɔ́na mɛ sɛ́á mɛ lɛa wə́ə́tɔ. Nɔ́yɛ́, umbə́ndə́ ɔwá Huɛlɛ́ a ná índíə́ kɛaka ɔwá mɛ buɔmɔ́ kúsə́nə, wɔ́ ka ámɛ ónósiə ɔbánɔ́.

¹¹Ɛ́sɛ́á umbə́ndə́ wɔ́ ná kɛ́áka ɔwá mɛ bɔbɛ́á manyá, bɔ́ ka mɛaŋɔ́á nímbə, bɔ́ ná mɛaŋɔ́á ónósíə́.

¹²Nɔ́yɛ́, umbə́ndə́ wɔ́ ndɔ húlínə na Huɛlɛ́, ɔ́ niɔŋɔ́, wɔ́ lɛa ɛŋaná hɛkabalɛ, tɛ́nɛ́mátɔ́, muɛsɛ tɔ́na.

¹³Nɔ́yɛ́, baánɛ yatɛ́ ɔyɛ́á yɛ́ lɛ́á yɛɛsɛ yɛ́ ka ámɛ híánɛna ɔbánɔ́ nyɛmbɛ́ əə́? Bóo! Mba, bɔbɛ́á bɔ́ ná nɔ́yɛ́ kɛ́áka. Bɔ́ ka bítíminə ɔ yatɛ́ ɔyɛ́á yɛ́ lɛ́á yɛɛsɛ ɛlɔ́áyɛ́ ɔwámɛ uwonósiə, nɔ́yɛ́ umbə́ndə́ wɔ́ ka kɛaka ɔwá, bá manyá bá sɛ́á bɔbɛ́á bɔ́ booko bɔkɔa bɔbɛ́á ɛmbáta.

¹⁴Tɔ ndɔ manya ɔwá umbə́ndə́ wɔ́ ndɔ húlínə na Huɛlɛ́, mba ɔwámɛ, mɛ báka ɔbánɔ́ mɔndɔ wa tɔ́mbɔ́kɔ́tɔ, mɛ báka ɛ́sɛ́á yɔlɛ́ yɛ́ bɔbɛ́á.

¹⁵Mɛ lɛ ndɔ manya yatɛ́ ɔyɛ́á mɛ ndɔ kɛa bɔkɔasɛ́á, mɛ lɛ ndɔ kɛa yatɛ́ ɔyɛ́á mɛ ndɔ siə ɔkɛa, mba, mɛ kɛaka yatɛ́ ɔyɛ́á mɛ ndɔ kóyiə.

¹⁶Ɛ́sɛ́á mɛ ndɔ kɛa muɛsɛ muɛsɛ yatɛ́ ɔyɛ́á mɛ lɛ ndɔ hikiə, ɔmɔ́yɛ́ mɛ ndɔ manyɛna ɔwá, umbə́ndə́ wɔ́ lɛ́á muɛsɛ.

¹⁷Tátá mɛaŋɔ́á mɛ ndɔ nɔ́yɛ́ kɛa, mba, ɔ́ bɔbɛ́á ɔbɔ́á bɔ́ lɛ́á falábákátɔ́ ɔ ɔwámɛ mɔlɛ́má nuúmə́.

¹⁸Ɛ́ɛ! Mɛ ndɔ manya ɔwá, buɛsɛ ɔbɔ́á mɛ ndɔ siə ɔkɛa bɔ́ lɛ bá ɔ ɔwámɛ mɔlɛ́má nuúmə́. Mɛ ndɔ siə ɔlaa ɔwá, mɛ lɛa ɔbánɔ́ mɔsá. Ɔ taká, mɛ báka na ilókí yɛ́ buɛsɛ ɔkɛa, mba mɛ lɛ kafámá ɔ bɔɛ́ta uwundúsiniə.

¹⁹Buɛsɛ ɔbɔ́á mɛ ndɔ siə ɔkɛa, mɛ lɛ ndɔ kafámá ɔ bɔɛ́ta kɛa, mɛ ndɔ kɛa ɔbánɔ́ á bɔbɛ́á ɔbɔ́á mɛ lɛ ndɔ siə.

²⁰Ɛ́sɛ́á mɛ ndɔ kɛa yatɛ́ ɔyɛ́á mɛ lɛ ndɔ siə, tátá mɛaŋɔ́á mɛ ndɔ nɔ́yɛ́ kɛa, mba ɔ́ bɔbɛ́á ɔbɔ́á bɔ́ lɛ́á falábákátɔ́ ɔ ɔwámɛ mɔlɛ́má nuúmə́.

²¹Ɔwámɛ ɔwá mɛ ndɔ siə ɔ buɛsɛ ɔkɛa, mɛ ná funúnə ɔwá, bɔbɛ́á ɔbánɔ́ bɔ́ lɛ́á ndɛ́ndɛlɛ́á ɔ uwundúsiniə.

²²Mɛ ndɔ siə ɔlaa ɔwá, ɔwámɛ hata yɛ mɔlɛ́má nuúmə́, mɛ ndɔ hikiə á umbə́ndə́ ɔwá wɔ́ ndɔ húlínə na Huɛlɛ́.

²³Mba, mɛ ná nindínə́ nɛ́ bɔkɔa funúnə ɔbɔ́á bɔ́ ndɔ wúmotí wə́míə́ mɔlɛ́má nuəsiə, bɔɛ́ta bɔ́ ndɔ mɛaŋɔ́á híə́nəsiə yɔlɛ́ yɛ́ bɔbɛ́á ɔbɔ́á bɔ́ lɛ́á falábákátɔ́ ɔ ɔwámɛ mɔlɛ́má nuúmə́.

²⁴Indimisi na mɛaŋɔ́á, ɛ́yánɛ́ a ŋɔ mɛaŋɔ́á hutunə ɔ yɛ́ɛyɛ mɛɛ́lɔ ɔyɛ́á yɛ́ ndɔ ákánana ɔ nyɛmbɛ́ əə́?

²⁵Tɔ́ Huɛlɛ́ mohóloniə híə́níníə́ ɔwayɛ́ ɔwá a ŋɔ tɔ́mbɛ́na na Yə́susu Kilísitusu ɔ yəsúə́ Isə́lúkú ɔkɛaka ɔwá a mɛaŋɔ́á núə́kə́níə́. Nɔ́yɛ́, mɛ ndɔ Umbə́ndə́ wɔ́ Huɛlɛ́ luminə na wə́míə́ mɔlɛ́má mukimə, mba, ɔ wúmotí mɔlɛ́má, mɛ lɛa yɔlɛ́ yɛ́ bɔbɛ́á.