Read Tunen Lɔ́ma 8 Bible Online

Lɔ́ma 8 - Tunen bible

Lɔ́ma 8

¹Nɔyɛ́, Isíŋáka, bááyɛ́ ɔbá bá lɛ́á ɔ nɛtɔana na Yə́susu Kilísitusu bá lɛ bá tɔ́na hɔkɛ́nátɔ.

²Ɔ taká, iŋgínə́ yɛ Umbúínyi Mɔnaŋanaŋa ɔwá wɔ́ ndɔ buɔmɔ́ índiənə ɔ tɔ́mbákɛna na Yə́susu Kilísitusu, wɔ́ ka mɛaŋɔ́á hutunə ɔ iŋgínə́ ɔyɛ́á yɛ́ ndɔ mɛaŋɔ́á ákánana ɔ bɔbɛ́á na ɔ nyɛmbɛ́.

³Yatɛ́ ɔyɛ́á yɛ́ lɛ́á ányákátɔ́ ɛlɔ́áyɛ́ umbə́ndə́ wɔ́ Mósisi, Huɛlɛ́ a ka yɛɛ́ta úndúsiniə bɔkɔasɛ́á, bɔtɔmbɔ́ bɔ́ mɔsá bɔ́ ka muítə yosiə. Ɛnaka Huɛlɛ́ a mɔndɔ hutúnə ɔ bɔbɛ́á, a ka wayɛ́á mɔná lɔ́má ɔkɛaka ɔwá, a mɛɛ́lɔ ɛtá ɛ́sɛ́á yɛ mɔsá, á bakɛamabɛ́á. A ka tɔ́mbɛ́na ɔ yɛ́táyɛ́ mɛɛ́lɔ ɔkɛaka ɔwá a bɔbɛ́á bɔ́ mɔsá sɔtɔkɔ.

⁴A ka nɔ́yɛ́ kɛaka ɔkɛaka ɔwá, tɔ báá hɔ́ánánátɔ́ ɔ uniŋə ɛ́sɛ́á umbə́ndə́ wɔ́ ndɔ siə, tátá ɛ́sɛ́á búə́súə́ bɔlɔŋa bɔ́ ndɔ kɛa ɔwá tɔ niŋə́kə, mba, ɛ́sɛ́á Umbúínyi Mɔnaŋanaŋa wɔ́ ndɔ siə.

⁵Ɔ taká, bááyɛ́ ɔbá bá ndɔ niŋə ɛ́sɛ́á yəbúə́ mɛɛ́lɔ yɛ́ ndɔ siə, bá ndɔ ɔ́kɛ́na ɔ yatɛ́ ɔyɛ́á yəbúə́ mɛɛ́lɔ yɛ́ ndɔ bata, mba, ɔbá bá ndɔ niŋə ɛ́sɛ́á Umbúínyi Mɔnaŋanaŋa wɔ́ ndɔ siə, bá ndɔ kɛa yatɛ́ ɔyɛ́á Umbúínyi wɔ́ ndɔ bata.

⁶Ata ɛ́yánɛ́ ɔwá a ndɔ ɔŋgɔ ɛ́sɛ́á yayɛ́á mɛɛ́lɔ yɛ́ ndɔ wɛɛ́ya kɛndana, a ndɔ ɛnɔ́mɛ ɔŋgɔ ɔyɛ́á yɛ́ ndɔ wɛɛ́ya ákánana ɔ nyɛmbɛ́. Mba, wɛ́ɛ́yɛ́ ɔwá a ndɔ ɔŋgɔ ɛ́sɛ́á Umbúínyi Mɔnaŋanaŋa wɔ́ ndɔ siə, a ndɔ ɛta á ɛnɔ́mɛ ɔyɛ́á Huɛlɛ́ a ŋɔ wɛɛ́ya nuəkəniə, ɔ ɛbɔ́ka ɔyɛ́á a ŋɔ báá ɔ bumbə́nú.

⁷Bááyɛ́ ɔbá ba ndɔ kɛnda ɛ́sɛ́á yəbúə́ mɛɛ́lɔ yɛ́ ndɔ siə, bá lɛa bəbəniə bá Huɛlɛ́, bá lɛ ndɔ ɔŋgɛna ɔ umbə́ndə́ wɔ́ Huɛlɛ́; bá sa ósó ɔ nɔ́yɛ́ ɔkɛa.

⁸Bááyɛ́ ɔbá bá ndɔ kɛa yatɛ́ ɔyɛ́á yəbúə́ mɛɛ́lɔ yɛ́ ndɔ hikiə, bá sa ósó ɔkɛa yatɛ́ ɔyɛ́á Huɛlɛ́ a ndɔ hikiə.

⁹Mba uwənú, nɔ lɛ ndɔ kɛa yatɛ́ ɔyɛ́á yənúə́ mɛɛ́lɔ yɛ́ ndɔ hikiə, ɔ nifəŋə, nɔ ndɔ niŋə ɛ́sɛ́á Umbúínyi Mɔnaŋanaŋa wɔ́ ndɔ siə bɔkɔasɛ́á, Umbúínyi wɔ́ Huɛlɛ́ wɔ́ ndɔ tuənə ɔ uwənú mɛlɛ́má nuúmə́. Wɛ́ɛ́yɛ́ ɔwá a lɛ bá na Umbúínyi wɔ́ Kilísitusu, a lɛ bá wa Kilísitusu.

¹⁰Mba, ábá Kilísitusu a lɛa ɔ uwənú mɛlɛ́má nuúmə́, yɛ́ lɛa taká ɔwá nɔ ŋɔ wə́kunə bɔkɔasɛ́á nɔ ka kɔa ɔ bɔbɛ́á, Umbúínyi wɔ́ ŋɔ bənú buɔmɔ́ índiə bɔkɔasɛ́á, Huɛlɛ́ a ka bənú ɛ́lɛakɛnɛna bátaká.

¹¹Ábá Umbúínyi wɔ́ wɛ́ɛ́yɛ́ ɔwá a ná Yə́susu huŋúə́síə́ ɔ ətíə́ yɛ bəwə́nú wɔ́ ndɔ tuənə ɔ uwənú mɛlɛ́má nuúmə́, wɛ́ɛ́yɛ́ ɔwá a ná Yə́susu huŋúə́síə́ ɔ ətíə́ yɛ bəwə́nú, a ŋɔ buɔmɔ́ índiə ɔ uwənú mɛɛ́lɔ ɔyɛ́á yɛ́ ná hɔ́ánána uwə́ə́, ɔ tɔ́mbákɛna na wə́yíə́ Umbúínyi ɔwá wɔ́ lɛ́á ɔ uwənú mɛlɛ́má nuúmə́.

¹²Nɔ́yɛ́, á bənísə́, tɔ báka na buhínə, mba, tátá ɔwɔŋgɔkɔnɔ na mɛɛ́lɔ, ɔ nindínə́ ɔnɛ́á tɔ kɛndáká ɛ́sɛ́á yəsúə́ mɛɛ́lɔ yɛ́ ndɔ bəsú bata.

¹³Ɔ taká, ábá nɔ ndɔ kɛnda ɛ́sɛ́á yənúə́ mɛɛ́lɔ yɛ́ ndɔ hikiə, nɔ ŋɔ wə́kunə: Mba, ábá nɔ ndɔ kɛnda ɛ́sɛ́á Umbúínyi Mɔnaŋanaŋa wɔ́ ndɔ siə, nɔ ndɔ bɔbɛ́á ɔ́nɔ ɔbɔ́á bɔ́ lɛ́á ɔ uwənú mɔlɛ́má nuúmə́, Huɛlɛ́ tɔ́na a ŋɔ kɛaka ɔwá nɔ bámɛ́nɛ́na ɔ buɔmɔ́.

¹⁴Bááyɛ́ bəkimə ɔbá bá ndɔ bɛ́niasa ɔwá Umbúínyi wɔ́ Huɛlɛ́ wɔ́ bəə́bu kɛndákána, bá lɛa baná bá Huɛlɛ́.

¹⁵Ɔ taká, Umbúínyi ɔwá wɔ́ ná fínə́ ɔ uwənú mɛlɛ́má, wɔ́ lɛ ndɔ bənú híə́nəsiə bɛɔlɛ́ ɔ nindínə́ ɔnɛ́á nɔ báá ɔ bɔkɔ́lɔ́ma. Wútə́yí Umbúínyi wɔ́ ndɔ kɛa ɔwá nɔ híáná baná bá Huɛlɛ́, wɔ́ ndɔ kɛa tɔ́na ɔwá tɔ Huɛlɛ́ yə́mə́kínə tɔ sɛ́á: «Á Ába! Ɔ́ niɔŋɔ́, á Isə́.»

¹⁶Umbúínyi wɔ́ Huɛlɛ́ bɛ́múɛ́tɛ́ wɔ́ ndɔ kɛa wɔ́ sɛ́á, tɔ manyá muɛsɛ ɔ uwəsú mɔlɛ́má ɔwá, tɔ báka baná bá Huɛlɛ́.

¹⁷Nɔ́yɛ́, ɛ́sɛ́á tɔ lɛ́á baná bá Huɛlɛ́, tɔ ŋɔ əsú nioko nɛ́ maasɛ kusənə ɔnɛ́á a ná bəsú tə́tə́níníə́, tɔ ŋɔ maáta kusənə na Kilísitusu bɔkɔasɛ́á, ɛ́sɛ́á ikúílí tɔ ndɔ ɛmɔ́kɛ́ nyáá ɛ́sɛ́á wɛɛ́ya ubusíə́ ɔbɔ́á a fínə́ ɔ ɔwayɛ́ tuúmə, tɔ ŋɔ bámɛnɛna tɔ́na na wɛɛ́ya ətíə́ yɛ tɔ́áyɛ́á tuúmə.

¹⁸Mɛ ndɔ manya ɔwá iŋgətí yɛ́ lɛ bá na mə́súə́ məsə́kə má isíŋáka, na tuúmə ɔtɔ́á Huɛlɛ́ a ŋɔ bəsú índiə.

¹⁹Ɔ taká, bɛɛ́la bikimə ɔbɛ́á Huɛlɛ́ a ná bɔ́táká, bɛ́ ndɔ buɔsɛ́ táta na ilókí yikimə ɔyɛ́á a ŋɔ yáyɛ́á isəmú ínə́niə ɔ ɔwayɛ́ baná.

²⁰Bɛɛ́la ɔbɛ́á Huɛlɛ́ a ná bɔ́táká bɛ́ ka híána bɛ́ ndəmə, tátá bɛɛ́ta bɛ́ ná nɔ́yɛ́ hikə́kíə́, mba, á Huɛlɛ́ a ná nɔ́yɛ́ kɛ́áka. Ata nɔ́yɛ́, bɛ́ báka na yɔnɛ́nɛna bɔkɔasɛ́á,

²¹a ŋɔ bɛɛ́ta hutunə ɔ bɔ́mɔtɛ́ buɔsɛ́, bɛ́ sɔ́ ŋɔ bá tɔ́na ɛ́sɛ́á bɛɔlɛ́, bɛ́ sɔ́ ŋɔ fɔnɔ tɔ́na, bɛ́ ŋɔ bámɛnɛna ɔ bukuənjə, bɛ́ ŋɔ əbú tuúmə kusənə ɛ́sɛ́á baná bá Huɛlɛ́.

²²Ɔ taká, tɔ ndɔ manya muɛsɛ ɔwá, bɛbɔ́tɛ́ná bikimə bɛ́ nabáka usə́kə́mənə isíŋáka tɔ́na, bɛ́ ndɔ məsə́kə ɔ́kɔ ɛ́sɛ́á muəndú ɔwá a lɛ́á ɔ ubíə́nəkə.

²³Mááyɛ́ məsə́kə má lɛ bá ɛlɔ́áyɛ́ bɛbɔ́tɛ́ná bíbúə́, uwəsú tɔ́na ɔbá Huɛlɛ́ a ná Umbúínyi índiə ɛ́sɛ́á bɔɔ́la bɔ́ busíə́, tɔ ndɔ əsú sə́kə́mənə ɔ uwəsú mɛlɛ́má nuúmə́, tɔ ndɔ táta na ilókí yikimə ɔwá, a kɛáka tɔ əsú híáná báyɛ́á baná, á məsə́kə húə́síə́ ɔ uwəsú mɛɛ́lɔ.

²⁴Ɔ taká, Huɛlɛ́ a ka bəsú nuəkəniə, mba, tɔ nana kusə́nə́ bɛkɔa bikimə bɔkɔasɛ́á, ikúílí mɔndɔ a lɛ́á na yatɛ́ ɔyɛ́á a lɛ́á na ilókí, a lɛ bá tɔ́na na ilókí yɛ́ bɔ́táyɛ́ bɔɔ́la. Nəníə́ ɛ́kɛ yɛ́ kɛaka ɔwá, mɔndɔ a lɛa na bɔɔ́la itíə́nə́tɔ́, a bámɛnɛna tɔ́na na yɛ́táyɛ́ ilókí əə́?

²⁵Mba, ikúílí tɔ ndɔ bɔkɔa nánɛna na ilókí yikimə ɔbɔ́á tɔ lɛ bá itíə́nə́tɔ́, abáka tɔ bɔɛ́ta tátáka ɛŋaná ɔtɔmbɔ.

²⁶Nɔ́yɛ́ tɔ́na, ikúílí tɔ lɛ́á tɔmbɔ́kɔ́tɔ́, abáka Umbúínyi Mɔnaŋanaŋa wɔ́ nda bəsú kámɛ́la. Ɔ taká, tɔ lɛ ndɔ manya ɔbɛ́kálɛ́na ɛ́sɛ́á yɛ́ lɛ́á hɔ́ánánátɔ. Mba, abáka Umbúínyi bɛ́muɛ́tɛ́ wɔ́ kálákɛna ɛlɔ́áyɛ́ əsú ɔ tɔ́mbákɛna na bɛtambá ɔbɛ́á mɔsá a sa ósó ɔhɔ́ɔ́.

²⁷Huɛlɛ́ tɔ́na ɔwá a ndɔ sinə bikimə ɔbɛ́á bɛ́ lɛ́á ɔ mɔlɛ́má wɔ́ mɔndɔ, a ndɔ manya yatɛ́ ɔyɛ́á Umbúínyi wɔ́ ndɔ bata, a ndɔ manya ɔwá, wɔ́ ndɔ kálɛ́na uwəsú ɛlɔ́á ɛ́sɛ́á Huɛlɛ́ a ndɔ hikiə.

²⁸Tɔ ndɔ manya ɔwá Huɛlɛ́ a ndɔ kɛa a sɛ́á bɛkɔa bikimə bɛ́ kɛndáká bikúílí bikimə muɛsɛ ɛlɔ́áyɛ́ bááyɛ́ ɔbá bá ndɔ wɛɛ́ya hikiə, ɔ́ niɔŋɔ́, bááyɛ́ ɔbá a ná híkə́kíə́ ɔwɛ́lɛna ɔkɛaka ɔwá bá híáná báyɛ.

²⁹Huɛlɛ́ a ka taŋa ɔ uwəbú ɔ tɛ́fa, a ná bɛtɛ́nɛ́mɛ́ná ɛ́tá tɔ́na ubusíə́ bɔ́ ikúílí ɔwá, bá bámɛ́nɛ́ná bɛhɔ́ánakana bɛ́ wayɛ́á Mɔná ɔkɛaka ɔwá, wɔ́ɔwɔ áyɛ́ híáná wəbusíə́ wa ɔmbana muiŋí wɔ́ báyɛ́á baná.

³⁰Ɛlɔ́áyɛ́ bááyɛ́ ɔbá Huɛlɛ́ a ná táŋá ɔ bɛtɛ́nɛ́mɛ́ná ɔwɛtɛna ɔkɛaka ɔwá, bá bámɛ́nɛ́ná bɛhɔ́ánakana bɛ́ wayɛ́á Mɔná, a ka bəə́bu ɛ́lɛakɛna ɔkɛaka ɔwá bá híáná báyɛ, ɔ bááyɛ́ ɔbá a ná ɛ́lɛ́ákɛ́na, a ná bəə́bu ɛ́lɛakɛnɛna bátaká ɔwayɛ́ busíə́, ɔ bááyɛ́ ɔbá a ná ɛ́lɛakɛnɛna bátaká, a ka bəə́bu tɔ́áyɛ́á tuúmə índiə.

³¹Yatɛ́ tɔ óso ɔlaa tɔ́na əə́? Ɛ́sɛ́á Huɛlɛ́ a lɛ́á ɛlɔ́áyɛ́ əsú, ɛ́yánɛ́ a ŋɔ bəsú ɛ́ŋɛ́mana əə́?

³²A sa wayɛ́á Mɔná suŋəniə, a ka luminə ɔwá, a wə́ə́ ɔkɛaka ɔ sɛ́á á bəsú bəkimə haŋɔna: Ɛ́sɛ́á a ná bəsú wayɛ́á Mɔná índíə́, nəníə́ a sa ósó uwəsú ɔ bɛɛ́la binə́binə́ uwíndiə əə́?

³³Ɛ́yánɛ́ a ŋɔ bááyɛ́ sɔ́mɛna ɔbá Huɛlɛ́ a ná tɛ́fá əə́? Ata mɔndɔ, ɔ taká, á Huɛlɛ́ a ndɔ bəkimə ɛ́lɛnɛna bátaká.

³⁴Mba, ɛ́yánɛ́ a ŋɔ bəə́bu hɔkɛna əə́? Ata mɔndɔ, ɔ taká, á Yə́susu Kilísitusu, wɛ́ɛ́yɛ́ ɔwá a ná wəə, ɔ ɔyáyɛ́na nɔ́yɛ́, Huɛlɛ́ a ka kɛaka a ná hɔŋɔ́á, a lɛa tuənə́tɔ́ ɔ mɔkátá wɔ́ bɛnɔ́mɛ wɔ́ Huɛlɛ́ á Isə́, a ndɔ bísúmbə́niə ɛlɔ́áyɛ́ əsú.

³⁵Yatɛ́ yɛ́ óso ɔ uwəsú álɔ́na na nibo ɔnɛ́á Yə́susu Kilísitusu a ndɔ bəsú hikiə əə́? Indomí, isə́hísə́hí, ɛmɔ́kɛ́, mɛtaná, nɛsɔ́ka, yɛmba, ata nyɛmbɛ́ əə́?

³⁶Ikúílí tɔ ndɔ ɛmɔ́kɛ́ nyáá, Mətilə má ndɔ laa ɛlɔ́áyɛ́ nɔ́yɛ́ má sɛ́á: «Ɔ ɛlɔ́áyɛ́ áwɔ, bá ndɔ siə ikúílí tɛ́á ɔ uwəsú ɔwɔ́nɔ, bɛndɔ bá ndɔ bəsú sinə ɛ́sɛ́á ɛndɔ́mbá ɔyɛ́á bá nɔ́ ákánana ɔ niɔnɔ́mɛnyama.»

³⁷Mba ətíə́ yɛ bɛ́ɛ́yɛ́ bɛkɔa bikimə ɔbɛ́á bɛ́ ndɔ nda bəsú fámɛ́ná, bəsú tɔ lɛ́á nɔbátɔ, nyɔnɔ na wɛ́ɛ́yɛ́ ɔwá a ná bəsú híkə́kíə́.

³⁸Ɛ́ɛ! Mɛ lɛa ɛ́mɛ́nɛ́nátɔ́ ɔwá, ata bɔkɔa bɔ́mɔtɛ́ bɔ́ sa ósó ɔ uwəsú ɔwalɔ́na na nibo ɔnɛ́á Huɛlɛ́ a ndɔ bəsú hikiə. Ata nyɛmbɛ́ ata buɔmɔ́, ata bɛáŋgɛlɛ, ata bɛkɔa ɔbɛ́á bɛ́ ndɔ misí manɛna, ata bɛkɔa bɛ́ niɔfɛ́nɛ ata bɛ́ ɔsákɔna, ata mənjiŋə,

³⁹ata məŋgínə́ má bɛlɔndɔ́ nuúmə́, ata má misí nuúmə́, ata ɛbɔ́tɛ́ná ɛ́mɔtɛ́. Ata bɔɔ́la bɔ́mɔtɛ́ bɔ́ sa ósó uwəsú ɔwalɔ́na na nibo ɔnɛ́á Huɛlɛ́ a ndɔ bəsú hikiə. A ka tɔ́mbɛ́na na yəsúə́ Isə́lúkú á Yə́susu Kilísitusu ɔkɛaka ɔwá a nɛ́táyɛ́ nibo ínə́níə́.