Read Tunen Lɔ́ma 9 Bible Online

Lɔ́ma 9 - Tunen bible

Lɔ́ma 9

¹Yatɛ́ ɔyɛ́á ɛkasɛ mɛ hɔ́ɔ́kɔ́, yɛ́ lɛa taká, mɛ lɛ ndɔ kanja bɔkɔasɛ́á, mɛ lɛa wa Kilísitusu; Umbúínyi mɔnaŋanaŋa ɔwá wɔ́ ndɔ nɛ́ámɛ́á nibíkə́lə́siə kɛndana, wɔ́ ndɔ luminə ɔwá taká mɛ ndɔ hɔ́ɔ́.

²Wə́míə́ mɔlɛ́má wɔ́ lɛa úndúə́tɔ́ na isíóŋoli yɛŋɛ́ŋa, na məsə́kə má ɛŋaná iŋgətí.

³Mɛ hikəkiə ɔwá há Huɛlɛ́ a ka mɛaŋɔ́á tikisiə, a mɛaŋɔ́á álɔ́ná na Kilísitusu ɛlɔ́áyɛ́ buɛsɛ bɔ́ bámɛ́á bənísə́ á Bɛyútɛnɛ.

⁴Bá lɛa bɛláŋa bɛ́ ilúkunə yɛ́ Ísilahɛ́lɛ, Huɛlɛ́ a ka bəə́bu tɛ́fa ɔkɛaka ɔwá bá bámɛ́nɛ́ná báyɛ́á baná, a ka báá na bəə́bu, a ná bəə́bu tɔ́áyɛ́á tuúmə ínə́níə́, a ná nɛtɔana hákɛ́ná na bəə́bu, a ná bəə́bu Umbə́ndə́ índíə́, a ná bəə́bu ínə́kíníə́ ɛ́sɛ́á bá wɛɛ́ya bə́tə́kíə́, a ná bəə́bu bɛkɔa biəŋí bílíhə́níə́.

⁵Bá báka ɔ ɛndɛkɛ yɛ tɔkala, ɔ uwəbú hikúlə á Kilísitusu a ná bibiənə, ɔwayɛ́ ɔwá a lɛ́á ɔ mɔlɔ́á wɔ́ bikimə, ɔ iŋíkúílíə́kimə, bá Huɛlɛ́ nyamáka. Amɛna.

⁶Nɔ́yɛ́ lɛ ndɔ siə ɔlaa ɔwá, yatɛ́ ɔyɛ́á Huɛlɛ́ a ná bílíhə́níə́ yɛ́ lɛa ndəmə. Ɔ taká, ɛndɛkɛ Ísilahɛ́lɛ bá lɛ bá bəkimə tiísi yɛ ilúkunə yɛ́ Huɛlɛ́.

⁷Ɛndɛkɛ Ábɛlaháma tɔ́na bá lɛ bá bəkimə tiísi yɛ baná bá Ábɛlaháma bɔkɔasɛ́á, Huɛlɛ́ a ka wɛɛ́ya lɛna a sɛ́á: «Ɔ tɔ́mbákɛna na Ísakɛ ɔ ŋɔ baná kusənə ɔbá mɛ ná aŋɔ́á bílíhə́níə́.»

⁸Nɔ́yɛ́ yɛ́ ndɔ siə ɔlaa ɔwá, ətíə́ yɛ baná bəkimə ɔbá Ábɛlaháma a ná híkə́kíə́ ubíə́nə, táta bəə́bu bəkimə bá lɛ́á tiísi yɛ baná bá Huɛlɛ́. Ɔ́maná baná ɔbá a ná biə́nə́kə ɔwɔŋgɔkɔnɔ na nɛkaka nɛ́ Huɛlɛ́, bá lɛ́á tiísi yɛ báyɛ́á baná.

⁹Ɔ taká, Huɛlɛ́ a ka Ábɛlaháma bílíhə́níə́ náana a sɛ́á: «Ɔ hiɔŋɔ ɔ ɔsákɔna, ɛnáká mɛ ndáhíáná ɔ yɛ́tana ikúílí, Salá a ŋɔ báá na mɔná mɛlɛ́mɛndɔ́.»

¹⁰Tátá ɔ́maná á Salá bíbúə́, Lɛbɛ́ka tɔ́na á muəndú wa yəsúə́ isə́kínə́ á Ísakɛ, a ka ɛmbɔ́ásalɛ́ bíə́nəkə.

¹¹Báyɛ́á baná bá sa bá bíə́nə́tɔ, bá sa bá bá nɔ́ buɛsɛ kɛa mbá ata bɔbɛ́á. Abáka Huɛlɛ́ a bɛkɔa kɛaka ɛ́sɛ́á a ndɔ ayɛ́ bɛ́kɔ́lɔmɔna, a kɛaka tɔ́na ɛ́sɛ́á a ndɔ siə.

¹²Tátá ɔwɔŋgɔkɔnɔ bɛnyɛná bɛ́ mɔndɔ a ndɔ wɛɛ́ya bɛkɔa kɛna, mba, na wə́yíə́ uhikiə wɔ́ bɛ́muɛ́tɛ́, ɔwayɛ́ ɔwá a ndɔ mɔndɔ ɛ́lɛna. A ka Lɛbɛ́ka lɛna a sɛ́á: «Wəbusíə́ a ŋɔ wəlimə nyɔkɛna.»

¹³Ɔ Mətilə, Huɛlɛ́ a ndɔ laa a sɛ́á: «Ɔwámɛ mɛ ka Yákɔbɔ hikəkiə, mɛ ná Ɛsawú bákɛ́á.»

¹⁴Nəníə́ nɔ́yɛ́ yɛ́ ndɔ siə ɔlaa əə́? Huɛlɛ́ a lɛ ndɔ bɛkɔa kɛa tɛ́nɛ́mátɔ́ əə́? Bóo, yɛ́ lɛ bá nɔ́yɛ́!

¹⁵Ɔ taká, a ka Mósisi lɛna a sɛ́á: «Mɛ ŋɔ mɛɛ́luwə́ ɔ wɛ́ɛ́yɛ́ ɔwá mɛ ndɔ siə ɔ mɛɛ́luwə́, mɛ ŋɔ mahana wə́ə́ tɔ́na ɔ wɛ́ɛ́yɛ́ ɔwá mɛ ndɔ siə ɔ mahana uwə́ə́.»

¹⁶Nɔ́yɛ́ yɛ́ ndɔ ínə́niə ɔwá, ubusíə́ ɔbɔ́á Huɛlɛ́ a mɔndɔ tɛ́fá, nɔ́yɛ́ yɛ́ lɛ ndɔ húlínə na usiə wɔ́ mɔndɔ ata yáyɛ́á ibíə́nyiə, mba, bɔkɔasɛ́á Huɛlɛ́ a lɛa na iwə́mɛɛ́lɔ.

¹⁷Huɛlɛ́ a ka Falahɔ́ŋɔ á munəni wa Ikíbíto lɛna ɔ Mətilə a sɛ́á: «Mɛ ka aŋɔ́á tínímiə munəni ɔkɛaka ɔwá, ɔ tɔ́mbákɛna na aŋɔ́á mɛ bɛndɔ bəkimə yamɛ́á injiŋə ínə́níə́, ɔkɛaka tɔ́na ɔwá bɛndɔ bəkimə bá misí bá nɛ́ámɛ́á niínyə yəmbə́lə́níə́.»

¹⁸Nɔ́yɛ́, tɔ ndɔ sinə ɔwá, Huɛlɛ́ a ndɔ mɛɛ́luwə́ ɔ wɛ́ɛ́yɛ́ ɔwá a ndɔ siə. A ndɔ híə́nəsiə tɔ́na wamɛɔ́kɔ ɔ wɛ́ɛ́yɛ́ ɔwá a ndɔ siə.

¹⁹Mɔndɔ a óso ɔwámɛ ɔbata ɔ sɛ́á: «Ɛlɔ́áyɛ́ yatɛ́ Huɛlɛ́ a ndɔ bɛndɔ kɛ́kɛ́lɛna tɔ́na əə́? Ɛ́yánɛ́ a óso ɔŋáŋɛ́ma ɔ yatɛ́ ɔyɛ́á Huɛlɛ́ a ndɔ siə əə́?»

²⁰Mba, ɔwáwɔ á mɔndɔ, aŋɔ́á ɛ́yánɛ́ nə́ə ɔwá ɔ ndɔ sáŋɔ́na yatɛ́ ɔyɛ́á Huɛlɛ́ ndɔ siə əə́? Ibokó yɛ́ ɔmɛtá yɛ́ ŋɔ mɔmaa bata yɛ́ sɛ́á: «Ɛlɔ́áyɛ́ yatɛ́ ɔ ná mɛaŋɔ́á mákɛ́ná náana əə́?»

²¹Mɔmaa a óso ɔ ɔmɛtá ɔbɛ́kɛakɛna ɛ́sɛ́á a ndɔ hikiə; na wútə́yí ɔmɛtá, a ibokó yɛ́ mukunə́ mɔŋɛ́ŋa maaka, a yɛ́ itə́mbí maaka tɔ́na.

²²Huɛlɛ́ a ka siəkə ɔ ɔwayɛ́ hilóbi uwinə́niə, a ka siəkə ɔwá bá yayɛ́á injiŋə siəkínə. Mba, a ka ísə́biniə na nitiŋiminə nikimə, bááyɛ́ ɔbá bá lɛ́á ɛ́sɛ́á bibokó ɔkɛaka ɔwá a híə́yíə́ hilóbi kɔ́ndáká, a bəə́bu nímə́síə́ tɔ́na.

²³Huɛlɛ́ a ka siəkə ɔ uwinə́niə nəníə́ tɔ́áyɛ́á tuúmə tɔ́ lɛ́á tɔŋɛ́ŋa, ɔ bááyɛ́ ɔbá bá lɛ́á ɛ́sɛ́á bibokó ɔbɛ́á a ná mahana wəə, a ka bɛ́táyɛ́ bibokó taŋá ɔtábɔ́na ɔkɛaka ɔwá, bɛ́ tɔ́áyɛ́á tuúmə kusə́nə.

²⁴Bəsú tɔ́ lɛ́á bɛndɔ ɔbá a ná mahana wəə, a ka əsú ɛ́lɛakɛna tɔ́na ɔ ətíə́ yɛ Bɛyútɛnɛ, ata ətíə́ yɛ bááyɛ́ ɔbá bá lɛ bá Bɛyútɛnɛ.

²⁵Ɔ́ nɔ́yɛ́ a ná hɔ́ɔ́kɔ́ ɔ hiəfulə hɛ́ wayɛ́á mɔhɛ́nátɔtányɛ́ á Ɔsə́ a sɛ́á: «Bɛndɔ ɔbá bá sa bá buɔnɔ́ bá yámɛ́á ilúkunə, mɛ ŋɔ bəə́bu ɛ́lɛakɛnɛna bá yámɛ́á Ilúkunə. Bɛndɔ ɔbá mɛ sa bá mɛ ndɔ hikiə, mɛ ŋɔ bəə́bu ɛ́lɛakɛnɛna bámɛ búhikiə.

²⁶Ɔ ɛbɔ́ka tɔ́na ɔyɛ́á bá ná bəə́bu lɛná bá sɛ́á: “Nɔ lɛ bá bɛndɔ bá yámɛ́á ilúkunə, bá ŋɔ bənú ɛ́lɛakɛnɛna umə́, baná bá Huɛlɛ́ yɛ bɔnɔmɔ.”»

²⁷Mɔhɛ́nátɔtányɛ́ á Isáya a ka hɔ́kɛna tɔ́na ɔ ɛsalɛ yɛ́ ilúkunə yɛ́ Ísilahɛ́lɛ a sɛ́á: «Ata baná bá Ísilahɛ́lɛ bá lɛa bunə́tɔ́ ɛ́sɛ́á mɔsɛ́á wɔ́ ɛsɛ́lɛ́ yɛ́ nɔmɔ́, ɔmbana mɔtɛ́tɛ́á ɔbánɔ́ Huɛlɛ́ a ŋɔ nuəkəniə.

²⁸Ɔ taká, yatɛ́ ɔyɛ́á Isə́lúkú á Huɛlɛ́ a ná láá, a sɔ́ ŋɔ nə́ŋə́liniə ɔ nɔ́yɛ́ ɔkɛa, a ŋɔ yɛɛ́ta úndúsiniə ɔ misí ɔkafámáká ɔ nisúki.»

²⁹Ɛ́sɛ́á mɔhɛ́nátɔtányɛ́ á Isáya a ná láá tɔ́na a sɛ́á: «Ata Isə́lúkú yɛ bɔɛ́na a lɛ nɛ́mɔtɛ́ nioko nɛ́ yəsúə́ ɛndɛkɛ hóyíə́, há tɔ ka wə́kunə ɛ́sɛ́á bɛndɔ bá bətínə́ yɛ Sótomo, tɔ nímə́ tɔ́na ɛ́sɛ́á bɛndɔ bá bətínə́ yɛ Kɔmɔ́lɔ.»

³⁰Nəníə́ nɔ́yɛ́ yɛ́ ndɔ siə ɔlaa əə́? Ɔ́ niɔŋɔ́, bɛndɔ ɔbá bá lɛ bá Bɛyútɛnɛ bá sa siə ɔwá bá bámɛ́nɛ́ná tɛ́nɛ́mátɔ́ a Huɛlɛ́ busíə́, mba isíŋáka, a ka bəə́bu ɛ́lɛakɛnɛna bátaká bɔkɔasɛ́á bá ka níə́búə́ nɛkɔmba tálɛ́na á Yə́susu.

³¹Bɛyútɛnɛ uwəbú, bá ka əbú hikəkiə á umbə́ndə́ ɔkɛaka ɔwá, bá bámɛ́nɛ́ná bátaká a Huɛlɛ́ busíə́, nɔ́yɛ́, bá ka nanaka.

³²Nəníə́ bá ná nánáka əə́? Bɔkɔasɛ́á bá ka báá bá ndɔ fɛka ɔwá, bá ŋɔ bámɛnɛna bátaká ɔ tɔ́mbákɛna na bíə́búə́ bɛnyɛná, bá sa níə́búə́ nɛkɔmba tálɛ́na á Yə́susu. Ɛnaka bá nɔ́yɛ́ kɛ́áka, bá ka úmbúfənə ɔ muɔkɔ ɔwá abáka wɔ́ bɛndɔ kuəsəkiə.

³³Ɛ́sɛ́á Huɛlɛ́ a ndɔ laa ɔ Mətilə a sɛ́á: «Siəkínə́nu! Mɛ nɔ́ muɔkɔ mɔŋɛ́ŋa bɛ́lɛna ɔ bətínə́ yɛ Síyono ɔwá wɔ́ ndɔ bɛndɔ kuəsiə, Ata ɛ́yánɛ́ ɔwá a ŋɔ nɛ́áyɛ́á nɛkɔmba tálɛ́na ɔ mútə́yí muɔkɔ, a sa ndásɛma.»