Read Tunen 1 Kɔlɛ́ŋɛ́tɛ 10 Bible Online

1 Kɔlɛ́ŋɛ́tɛ 10 - Tunen bible

1 Kɔlɛ́ŋɛ́tɛ 10

¹Á bənísə́, mɛ ndɔ siə ɔwá nɔ bɛ́kɔ́lɔ́mɔ́ná yatɛ́ ɔyɛ́á yɛ́ ná nda bíə́súə́ bisə́kínə́ fámɛ́ná ɔ ikúílí yɛ́ Mósisi. Huɛlɛ́ a ka bəə́bu bəkimə húə́ na muləlí wɔ́ ɛlɔndɔ́, bəkimə bá ka nɔmɔ́ nɛnyɔakánɔ́ bíásakɛna ɔ misí kɔ́tákátɔ.

²Nɔ́yɛ́, yɛ́ ndɔ ínə́niə ɔwá, Huɛlɛ́ a ka bəə́bu bəkimə nɛsɔa índiəkinə ɔ nɔmɔ́ na ɔ muləlí wɔ́ ɛlɔndɔ́ ɔkɛaka ɔwá, na Mósisi bá bámɛ́nɛ́ná tɔanátɔ.

³Bəkimə bá ka bílúkə́kə na bɛ́labɔ́nɛ́á ɔbɛ́á bɛ́ ná húlínə́ na Huɛlɛ́;

⁴bəkimə bá ka mənífə́ nyááka tɔ́na ɔmá má ná húlínə́ na Huɛlɛ́, mááyɛ́ mənífə́ má ka bá má ndɔ fáma ɔ mɔsálábándá ɔwá Huɛlɛ́ a ná bəə́bu índíə́, wɔ́ bəə́bu ɔŋgɔkɔ, wútə́yí mɔsálábándá, á Kilísitusu.

⁵Ata nɔ́yɛ́ ɛ́sɛ́á bá ná bɛ́ɛ́yɛ́ bɛkɔa bɛ́ yələ́mənə siəkínə, bəəŋí bá sa kɛa yatɛ́ ɔyɛ́á Huɛlɛ́ a ndɔ hikiə, ɔ́ ɛlɔ́áyɛ́ nɔ́yɛ́ bá ná wə́kúnə ɔ misí yɛ makɔ́tákɛ.

⁶Bɛ́ɛ́yɛ́ bɛyɔŋɔlɛ bikimə bɛ́ ka bɛ́tɔ́mbáka ɛlɔ́áyɛ́ iŋgətí uwəsú uwinə́niə ɔkɛaka ɔwá, tɔ lɛ kɔɛ́na ɔ bɔbɛ́á ɛ́sɛ́á bíə́súə́ bisə́kínə́.

⁷Nɔ lɛ bililí lúbúnə́ tɔ́na ɔ́maná ɛ́sɛ́á bɔ́mɔtɛ́ ɔ uwəbú ətíə́ bá ná kɛ́áka. Yɛ́ lɛa tilə́kə́tɔ́ ɔ hiəfulə hɛ́ Huɛlɛ́ yɛ́ sɛ́á: «Bɛndɔ bá ka bɛ́mbátɛ́na ɔ misí ɛlɔ́áyɛ́ ɔnɛ́á na ɔnyɛ́na, nɔ́yɛ́, bá ná hɔalákɛ́na ɔ məbínə́ ɔ busíə́ bɔ́ bililí.»

⁸Bɔ́mɔtɛ́ ɔ uwəbú ətíə́ bá ka niŋəkə ɔ nɛbambɛa, nɔ́yɛ́, moómo áfandɛ́ má tukóló na tɔ́lálɔ́ tɔ́ bɛndɔ bá ka kɔa tɔ́na wə́kúnə́tɔ́ ɔ buɔsɛ́ bɔ́mɔtɛ́. Tɔ lɛ əsú kɛ́á ɛ́sɛ́á bəə́bu.

⁹Bɔ́mɔtɛ́ ɔ uwəbú ətíə́ bá ka Isə́lúkú a Huɛlɛ́ ɔ́kɔ́lɛna, miáhɔ yɛ́ ka bəə́bu nɔ́máka, bá ka wə́kunə tɔ́na, tɔ lɛ Isə́lúkú ɔ́kɔ́lɛ́ná bɔ́ányɛ ɛ́sɛ́á bəə́bu.

¹⁰Bɔ́mɔtɛ́ ɔ uwənú ətíə́ bá ka Isə́lúkú a Huɛlɛ́ bílúlə́kinə, Áŋgɛlɛ yɛ Huɛlɛ́ ɔwá a ndɔ bɛndɔ ɔ́nɔ, a ka bəə́bu nímə́siə, nɔ lɛ Isə́lúkú a Huɛlɛ́ bilúlínə́ tɔ́na ɛ́sɛ́á bəə́bu.

¹¹Bɛ́ɛ́yɛ́ bɛyɔŋɔlɛ bɛ́ ka bíə́súə́ bisə́kínə́ bɛ́kɛaka ɔkɛaka ɔwá, bá bənə́bənə́ mə́nyə́síə́, bá ka bɛ́táyɛ́ bɛkɔa tiləkə tɔ́na ɛlɔ́áyɛ́ uwəsú umənyəsiə. Uwəsú ɔbá tɔ ndɔ niŋə ɔ bikúílí bɛ́ nitifə́.

¹²Ɛlɔ́áyɛ́ nɔ́yɛ́, wɛ́ɛ́yɛ́ ɔwá a ndɔ bɛ́manya a sɛ́á a báka tɛ́nɛ́mátɔ́, a manyaka, a lɛ kɔ́á bɔ́ányɛ.

¹³Mɔkɔ́lɛna ɔmá má ndɔ nda bənú fámɛ́ná, ɔ́ ɔmá abáka má ndafámɛ́ná ata ɔwanɛ́ mɔndɔ. Huɛlɛ́ ɔwayɛ́, a lɛa na yɔkɛ́nana, a sa ósó ɔniasa ɔwá, mɔkɔ́lɛna má ndá bənú fámɛ́ná ɔmá má ná yənúə́ iŋgínə́ yayɛna. Mba, ikúílí mɔkɔ́lɛna má nɔ ndá bənú fámɛ́ná, a ŋɔ bənú bɛhámbálɛ́ índiə ɔkɛaka ɔwá nɔ maáta ísíbíníə́, nɔ maáta nɔbá tɔ́na.

¹⁴Á bənísə́ bá nibo, ɛlɔ́áyɛ́ nɔ́yɛ́, nɔ́ əlimə túmə́ ɔ bililí.

¹⁵Mɛ ndɔ bənú hɛ́na ɛ́sɛ́á ɔ bɛndɔ bá mɔsiɔŋɛ́, bənú bɛ́múɛ́tɛ́ nɔ́ nɔ́yɛ́ tíbə́kíníə́ muɛsɛ muɛsɛ, ábá yatɛ́ ɔyɛ́á mɛ ndɔ laa yɛ́ lɛa taká.

¹⁶Ikúílí tɔ lɛ́á kɔtálánátɔ́ ɔ nɛnɛ́á nɛ́ Isə́lúkú, tɔ ndɔ ɛnyɛ́ná yɛ́ məluku nyáá ɛlɔ́áyɛ́ Huɛlɛ́ ɔ mohóloniə uhíə́niniə, tátá tɔ ndɔ nioko ɛta ɔ manɔ́ŋɔ́ má Kilísitusu əə́? Ikúílí tɔ ndɔ bɛlɛ́tɛ afana, tɔ mɛɛ́ta nɛ́áka, tátá tɔ ndɔ nioko ɛta ɔ mɛɛ́lɔ yɛ Kilísitusu əə́?

¹⁷Bɛlɛ́tɛ yɛ́ lɛa ɔbánɔ́ ɛ́mɔtɛ́, bəsú bəkimə ɔbá tɔ́ ndɔ mɛɛ́ta nɛ́á, tɔ lɛa bəsú bəəŋí, nɔ́yɛ́ yɛ́ ndɔ ínə́niə ɔwá tɔ lɛa mɛɛ́lɔ ɛ́mɔtɛ́.

¹⁸Nɔ́ baná bá Ísilahɛ́lɛ bílúmíníə́, abáka bá bilúkə́ ɔ́nɔ́kɔ ɔ bɛfɔná ɔhánɛna á Huɛlɛ́. Bááyɛ́ ɔbá bá ndɔ mɛ́táyɛ́ mɛnyama nɛ́á, bá lɛa tɔanátɔ́ na Huɛlɛ́

¹⁹Yatɛ́ mɛ ndɔ siə ɔ nɔ́yɛ́ ɔlaa əə́? Mɛnyama yɛ́ hánɛ́nátɔ́ ɔ bililí mbá ata bililí bɛ́muɛ́tɛ́ bɛ́ lɛa na mɔsɛ́ŋɛ́ əə́?

²⁰Mba, bóo! Ikúílí balɛmanyáhuɛlɛ́ bá ndɔ mahánɛna índiə, bá ndɔ maáta índiə ɔ imbúínyi mɛbɛ́á, tátá á Huɛlɛ́, mɛ lɛ ndɔ siə ɔwá nɔ báá iŋgində́ na imbúínyi mɛbɛ́á.

²¹Nɔ sa ósó ɔ ɔnyáá ikúílí ɛ́mɔtɛ́ ɔ ɛnyɛ́ná yɛ́ Isə́lúkú na ɔ ɛnyɛ́ná yɛ́ imbúínyi mɛbɛ́á, nɔ sa ósó ɔ ɔnɛ́á tɔ́na ikúílí ɛ́mɔtɛ́ ɔ ɛtáka yɛ́ Isə́lúkú na ɔ miímə yɛ́ imbúínyi mɛbɛ́á.

²²Tɔ lɛ nɔ́yɛ́ kɛ́á bɔ́ányɛ ɔkɛaka ɔwá tɔ Isə́lúkú líŋgə́síə́. Nɔ ndɔ ənú fɛka ɔwá tɔ lɛa na iŋgínə́ yáyɛ́ná wɛɛ́ya əə́?

²³Bɔ́mɔtɛ́ ɔ uwənú ətíə́ bá ndɔ laa bá sɛ́á: «Bá lɛa na kuənjə yɛ ɔkɛa yatɛ́ ɔyɛ́á bá ndɔ siə.» Mbá nɔ́yɛ́, abáka bikimə bɛ́ lɛ ɔ́lɔnɔ. «Bá lɛa na kuənjə yɛ ɔkɛa yatɛ́ ɔyɛ́á bá ndɔ siə.» Nɔ́yɛ́ yɛ́ lɛa taká, mba, abáka bɛkɔa bikimə bɛ́ lɛ ɔ́lɔ́nɔ́ ɔ nɛkɔmba ɔtálɛ́na á Huɛlɛ́.

²⁴Mɔɛ́ta tɛ́á á síə́kə ɔkɛa yatɛ́ ɔyɛ́á yɛ́ ndɔ mukúlə́kulə ɔ́lɔ, mba, tátá ɛlɔ́áyɛ́ wɛɛ́ya bɛ́múɛ́tɛ́.

²⁵Yatɛ́ yikimə ɔyɛ́á bá ndɔ sɛma ɔ nioní, nɔ́ yɛɛ́ta ɔ́ndɔ́, nɔ́ nɛ́áká ɛŋaná ɛmbataka, hɛtányɛ́ hɛ́ lɛ bənú kátɛ́á.

²⁶Mɛ ndɔ hɔ́ɔ́ nɔ́yɛ́ bɔkɔasɛ́á, Mətilə má ndɔ laa má sɛ́á: «Misí na bɛ́áyɛ́á bɛɛ́la bikimə, bɛ́ lɛa ɔ mɔkátá wɔ́ Isə́lúkú.»

²⁷Ábá mɔlɛmanyáhuɛlɛ́ a ná bənú ɛ́lɛ́ákɛ́na ɔ nɛnɛ́á mbá nɔ ná lumínə́ ɔ ɔwakána umə́, nɔ́ nɛ́áká yatɛ́ yikimə ɔyɛ́á a ná bənú índíə́ ɛŋaná ɛmbataka, hɛtányɛ́ hɛ́ lɛ bənú kátɛ́á.

²⁸Mba, ikúílí ɔ lɛ́á ɔ ɔnɛ́á, ábá mɔndɔ a ná aŋɔ́á lɛ́na a sɛ́á yɛ́ɛ́yɛ́ mɛnyama yɛ́ lɛa hánɛ́nátɔ́ ɔ bililí, ɔ lɛ mɛɛ́ta nɛ́á tɔ́na. Ɔkɛaka ɔwá mbá ɔ sɔ́ ŋɔ mɔlɛ́má wɔ́ wɛ́ɛ́yɛ́ tuŋulə ɔwá a ná aŋɔ́á mə́nyə́síə́, hɛtányɛ́ hɛ́ lɛ wɛɛ́ya kátɛ́á.

²⁹Mɛ ndɔ hɛ́na ɔ hɛtányɛ́ hɛ́ mɔndɔ ɔwá a ná aŋɔ́á mə́nyə́síə́ ɔwá, hɛ́ wɛɛ́ya kátɛ́á, tátá ɔ híə́wu. Ɔ taká, tátá mɔndɔ muinə́muinə́ a ná hɔ́ánána ɔ ɔwámɛ ɔlɛna yatɛ́ ɔyɛ́á ɛkasɛ mɛ nɛ́áká na bukuənjə bukimə.

³⁰Ábá mɛ ndɔ Huɛlɛ́ mohóloniə híə́niniə ɔ bɔɔ́la ɔbɔ́á mɛ ndɔ nɛ́á, ɛlɔ́áyɛ́ yatɛ́ mɔndɔ muinə́muinə́ a mɛaŋɔ́á kɛ́kɛ́lákɛ́na ɔwɔŋgɔkɔnɔ bɔ́ɛ́yɛ́ bɔ́labɔ́nɛ́á ɔbɔ́á, ikúílí mɛ ndɔ bɔɛ́ta nɛ́á, mɛ laa mɛ sɛ́á mɛ ná hólíə́ əə́?

³¹Yatɛ́ yikimə ɔyɛ́á nɔ ndɔ kɛa: Ɔnɛ́á, ɔnyɛ́na mbá ata yatɛ́ bɔkɔa buinə́buinə́, nɔ́ nɔ́yɛ́ kɛ́ákɛ́na ɔkɛaka ɔwá bɛndɔ bá Huɛlɛ́ nyámáka.

³²Nɔ lɛ bɔkɔa kɛ́á ɔbɔ́á bɔ́ óso ɔ mɔndɔ ukuəsiə, ata ɔ Bɛyútɛnɛ, ata ɔ bááyɛ́ ɔbá bá lɛ bá Bɛyútɛnɛ mbá ata ɔ Ilúkunə yɛ́ bəlumininə yɛ́ Huɛlɛ́.

³³Nɔ́ kɛ́áká ɛ́sɛ́á mɛaŋɔ́á: Ata ɔ uyə́níə́ ikúílí, mɛ ndɔ ánya ɔ ɔkɛa yatɛ́ ɔyɛ́á bɛndɔ bəkimə bá ndɔ hikiə; mɛ lɛ ndɔ mɔsɛ́ŋɛ́ siə wɔ́ mɛaŋɔ́á bɛ́múɛ́tɛ́, mba, wɔ́ ɔmbana muiŋí wɔ́ bɛndɔ ɔkɛaka ɔwá, Huɛlɛ́ a bəə́bu bəkimə nuəkə́níə́.