Read Tunen 1 Kɔlɛ́ŋɛ́tɛ 11 Bible Online

1 Kɔlɛ́ŋɛ́tɛ 11 - Tunen bible

1 Kɔlɛ́ŋɛ́tɛ 11

¹Nɔ́ iŋgətí ɛ́tɛ́na ɔ ɔwámɛ, ɛ́sɛ́á mɛ lɛ́á mɛaŋɔ́á bɛ́múɛ́tɛ́ iŋgətí yɛ Kilísitusu.

²Mɛ ndɔ bənú nyama bɔkɔasɛ́á, nɔ ndɔ mɛaŋɔ́á bɛ́kɔ́lɔmɔna ɔ ikúílí tɛ́á, nɔ ndɔ bɛ́ámɛ́á binə́níníə́ ɔ́ŋgɔ tɔ́na ɔbɛ́á mɛ ná bənú úkúnə́kíə́.

³Mba, mɛ ndɔ siə mɛ sɛ́á nɔ́ manyá ɔwá, Kilísitusu a lɛa ɔ mɔlɔ́á wɔ́ bɛndɔ bəkimə, ibə́ a báka ɔ mɔlɔ́á wɔ́ wayɛ́á muəndú, Huɛlɛ́ tɔ́na a ayɛ́ báka ɔ mɔlɔ́á wɔ́ Kilísitusu.

⁴Ábá mɛlɛ́mɛndɔ́ a lɛa ɔ mabɛ́kálɛ́na, ataná, a ndɔ imbə́nú túmbə́ləniə ɔyɛ́á yɛ́ ndɔ húlínə na Huɛlɛ́ na hɛtambá ɔ mɔlɔ́á, a lɛ ndɔ Kilísitusu bə́tiə ɔwá a lɛ́á ɔ ɔwayɛ́ mɔlɔ́á.

⁵Ɛlɔ́áyɛ́ muəndú, ikúílí a lɛ́á á Huɛlɛ́ ɔbɛ́kálɛ́na, ataná, a ndɔ imbə́nú túmbə́ləniə ɔyɛ́á yɛ́ ndɔ húlínə na Huɛlɛ́ na mɔlɔ́á ɛŋaná ubíhúə́, a lɛ ndɔ yayɛ́á ibə́ bə́tiə ɔwá a lɛ́á ɔ ɔwayɛ́ mɔlɔ́á, a báka huɛ́ ɛ́sɛ́á muəndú ɔwá a ná bɛkɛsaka.

⁶Ábá muəndú a sá mɔlɔ́á bíhúə́, a ná hɔ́ánáná ɔwá a tuhúínyi anjákɛ́na. Mba, tɔ ndɔ manya ɔwá, ábá muəndú a ná tuhúínyi anjákɛ́na, ataná, a ná mɔlɔ́á bɛ́hɔ́lɔ́na, yɛ́ lɛa ɛsɛ́má ɛlɔ́áyɛ́ ayɛ́. Nɔ́yɛ́, a ná hɔ́ánána ɔ mɔlɔ́á ubíhúə́.

⁷Mɛlɛ́mɛndɔ́ a sá hɔ́ánana ɔ mɔlɔ́á ubíhúə́ ikúílí a lɛ́á ɔ mabɛ́kálɛ́na bɔkɔasɛ́á, Huɛlɛ́ a ka wɛɛ́ya bɔ́ta ɔkɛaka ɔwá, a bámɛ́nɛ́ná ɛ́sɛ́á wɛɛ́ya, ɔ tɔ́mbákɛna na wɛɛ́ya tɔ́na bɛndɔ bá Huɛlɛ́ úmə́kiə. Mba ɛlɔ́áyɛ́ muəndú, ikúílí bá ndɔ wɛɛ́ya sinə, bá ndɔ tuúmə índiə á yayɛ́á ibə́.

⁸Ɔ taká, Huɛlɛ́ a sa mɛlɛ́mɛndɔ́ tábɔ́na na mɛɛ́lɔ yɛ muəndú, mba, a ka muəndú tábɔ́naka na yɛ́mɔtɛ́ ɛkɛ́tɛ yɛ́ mɛɛ́lɔ yɛ mɛlɛ́mɛndɔ́.

⁹Nɔ́ manyá ɔwá, Huɛlɛ́ a sa mɛlɛ́mɛndɔ́ tábɔ́na ɛlɔ́áyɛ́ muəndú, a ka muəndú tábɔ́naka ɛlɔ́áyɛ́ mɛlɛ́mɛndɔ́.

¹⁰Ɔ́ ɛlɔ́áyɛ́ nɔ́yɛ́, muəndú a ná hɔ́ánána ɔ mɔlɔ́á ubíhúə́ ɛlɔ́áyɛ́ yayɛ́á ibə́ ɔ hibə́təniə uwíndiə, na ɔkɛaka ɔwá bɛáŋgɛlɛ bá lɛ liŋə.

¹¹Bɔ́mɔtɛ́ bɔkɔa bɔ́ lɛa ɔwá, ɛlɔ́áyɛ́ əsú ɔbá tɔ́ lɛ́á ɔ nɛtɔana ná Isə́lúkú á Yə́susu, muəndú a sá hɔ́ánana ɔbáá bíbúə́, a lɛa ɔ makátá má mɛlɛ́mɛndɔ́, mɛlɛ́mɛndɔ́ tɔ́na a sá hɔ́ánana ɔbá bíbúə́, a lɛ ɔ makátá má muəndú.

¹²Ɔ taká, Huɛlɛ́ a ka muəndú tábɔ́naka na yɛ́mɔtɛ́ ɛkɛ́tɛ yɛ́ mɛɛ́lɔ yɛ mɛlɛ́mɛndɔ́. Mba, mɛlɛ́mɛndɔ́ a ndɔ ndasá ɔ misí ɔ tɔ́mbákɛna na muəndú, bikimə tɔ́na bɛ́ ndɔ húlínə na Huɛlɛ́.

¹³Nɔ́ siəkínə́ bənú bɛ́múɛ́tɛ́; yɛ́ lɛa muɛsɛ ikúílí muəndú a ndɔ Huɛlɛ́ bɛ́kálɛ́na ɔ busíə́ bɔ́ bɛndɔ ɛŋaná mɔlɔ́á ubíhúə́ əə́?

¹⁴Bɛndɔ bəkimə bá misí bá ndɔ manya ɔwá, ábá mɛlɛ́mɛndɔ́ a lɛa na tuhúínyi tɔtatánɛ, ɛsɛ́má na wɛɛ́ya.

¹⁵Yɛ́ lɛa bɔkɔa buɛsɛ ɛlɔ́áyɛ́ muəndú bɔkɔasɛ́á, Huɛlɛ́ a ka wɛɛ́ya tuhúínyi tɔtatánɛ índiə ɔkɛaka ɔwá tɔ́ wə́yíə́ mɔlɔ́á huə.

¹⁶Mba, ábá mɔndɔ a ndɔ siə ɔ utə́ŋə́niə ɔ yɛ́táyɛ́ ɛsalɛ, a ná hɔ́ánána ɔmanya ɔbánɔ́ ɔwá, nindínə́ ninə́ninə́ nɛ́ uniŋə nɛ́ lɛ bámɛ́nɛ́na, mbá ata ɔ bilúkunə bɛ́ bəlumininə bɛ́ Huɛlɛ́.

¹⁷Ɔ tɔ́mbákɛna na tubílíndíníə́ ɔtɔ́á tɔ́ ná ɔ́ŋgɔ́nɔ, mɛ lɛ ndɔ hikiə ɔ uwənú ɔnyama bɔkɔasɛ́á, manyáná ɔmá nɔ ndɔ túmbiə ɛlɔ́áyɛ́ Huɛlɛ́ ubə́tiə, bɛkɔa ɔbɛ́á nɔ ndɔ kɛa umə́ bɛ́ ndɔ bənú húlə́ninə á bɔbɛ́á yáyɛ́ná buɛsɛ.

¹⁸Wúbúsíə́, mɛ ka ɔ́kɔ́kɛna ɔwá, bitóndó bɛ́ báka uwənú ətíə́ ikúílí nɔ́ ndɔ kɔtana á Huɛlɛ́ ubə́tiə; mɛ ndɔ luminə ɔwá bɛ́mɔtɛ́ bɛkɔa bɛ́ lɛa taká.

¹⁹Yɛ́ lɛa muɛsɛ ɔwá masalɛa má ná hɔ́ánána ɔbáá ɔ uwənú ətíə́ ɔkɛaka ɔwá, bá bááyɛ́ manyá ɔbá bá lɛ ndɔ kɛsalɛ́á hikiə.

²⁰Mba, ikúílí nɔ ndɔ kɔtana, tátá nɛnɛ́á nɛ́ Isə́lúkú nɔ́ ndɔ ɛta.

²¹Ɔ taká, ikúílí yɛ́ ɔnɛ́á, mɔɛ́ta tɛ́á a ndɔ bísóbíniə ɔ bɛ́áyɛ bɛ́ bɛ́múɛ́tɛ́ ɔnɛ́á, ɔ nindínə́ ɔnɛ́á wɔ́ɔwɔ a ayɛ́ úluə mɛtaná, wə́ə́ní íyə́tɔ, híólótɔ.

²²Nɔ lɛ ənú bá na mambɛ́la ɔkɛaka ɔwá nɔ nɛ́áká, nɔ nyákɛ́na əə́? Nɔ lɛ ilúkunə yɛ́ bəlumininə yɛ́ Huɛlɛ́ yə́níə́, nɔ lɛ bááyɛ́ yómósíə́ ɔbá bá lɛ bá na bɔɔ́la. Yatɛ́ nɔ sɛ́á mɛ́ láá tɔ́na əə́? Mɛ́ níə́núə́ nibítíkə nyamáka əə́? Mba bóo! Mɛ Sa ósó ɔ uwənú ɔnyama ɔ yɛ́ɛ́yɛ́ ɛsalɛ.

²³Ɔ taká, mɛ ka bənú túmbə́ləniə yatɛ́ ɔyɛ́á mɛ ná kúsə́nə ɔyɛ́á yɛ́ ndɔ húlínə na Isə́lúkú. Mɛ ka bənú úkúnəkiə ɔwá, ɔ bɔ́táyɛ́ bulúə́ ɔbɔ́á bá ná Isə́lúkú a Yə́susu lúə́, a ka bɛlɛ́tɛ ɛta,

²⁴a ná Huɛlɛ́ mohóloniə híə́níníə́, a ná bísə́kə́níə́, a sɛ́á: «Yɛ́ɛyɛ yɛ́ lɛa yamɛ́á mɛɛ́lɔ ɔyɛ́á yɛ́ mɛ ndɔ bənú índiə. Nɔ́ kɛ́áká nɔ́yɛ́ ɔ ɔwámɛ ɔbɛ́kɔ́lɔmɔna.»

²⁵Əlimə yɛ ɔnɛ́á, a ná kɛ́áká hɔ́ánánátɔ́ na ɛnyɛ́ná, a sɛ́á: «Yɛ́ɛyɛ yɛ́ lɛa ɛnyɛ́ná yɛ́ nɛtɔana niɔ́sɔ ɔnɛ́á Huɛlɛ́ a ná kɛ́áka na mámɛ́á manɔ́ŋɔ́. Ikúílí tɛ́á ɔyɛ́á nɔ ŋɔ yɛɛ́ta nyáá, nɔ́ kɛ́áká ɛ́sɛ́á mɛ ná kɛ́áka ɔ ɔwámɛ ɔbɛ́kɔ́lɔmɔna.»

²⁶Ɔ́ niɔŋɔ́, ikúílí tɛ́á ɔyɛ́á nɔ ŋɔ bɛlɛ́tɛ nɛ́áka, nɔ ŋɔ ɛnyɛ́ná nyáá tɔ́na ɔ nɛ́táyɛ́ nindínə́, nɔ ndɔ túmbə́ləniə ɔwá Isə́lúkú á Yə́susu a ka wə́ə́ ɛlɔ́áyɛ́ uwəsú unuəniə, ɔkafámáká ɔ ikúílí ɔyɛ́á a ŋɔ ndahiana.

²⁷Ɔ́ ɛlɔ́áyɛ́ nɔ́yɛ́, wɛ́ɛ́yɛ́ ɔwá a ndɔ mɛɛ́lɔ yɛ Isə́lúkú nɛ́á, a ndɔ manɔ́ŋɔ́ má Isə́lúkú nyáá ɛŋana ɔbáá hɔ́ánánátɔ, a lɛa kɔ́átɔ́ ɔ bɔbɛ́á bɔkɔasɛ́á, a ndɔ mɛɛ́lɔ na manɔ́ŋɔ́ má Isə́lúkú yəniə.

²⁸Nɔ́yɛ́, mɔɛ́ta tɛ́á a ná hɔ́ánána ɔ ubísíə́linə ubusíə́ ɔbɔ́á a ndɔ mɛɛ́lɔ na manɔ́ŋɔ́ má Isə́lúkú ɛ́ta.

²⁹Ɔ taká, wɛ́ɛ́yɛ́ ɔwá a ndɔ bɛlɛ́tɛ nɛ́á, a ndɔ məluku nyáá ɛŋaná nɛtɔana ubúlúnə ɔwá, ɔ́ mɛɛ́lɔ na manɔ́ŋɔ́ má Isə́lúkú, a ndɔ bɛ́hɔ́kɛna wɛɛ́ya bɛ́múɛ́tɛ́.

³⁰Ɔ́ ɛlɔ́áyɛ́ nɔ́yɛ́ bɛndɔ bəəŋí ɔ uwənú ətíə́ bá lɛ́á bɛnákɛnákɛ, bɛáta tɔ́na, ɔmbana muiŋí bá ka wə́kunə.

³¹Ábá tɔ ná botólíə́ ɔ ubísinə bəsú bɛ́múɛ́tɛ́, Huɛlɛ́ a sa ndá bəsú sɔ́kɔ́tɛ́á.

³²Ikúílí Isə́lúkú a Huɛlɛ́ a ndɔ bəsú sɔ́kɔ́tɛa, ɔ́ ɔkɛaka ɔwá a bəsú bɔkɔa ínə́níə́: Ɔ buɔsɛ́ ɔbɔ́á a ŋɔ bəsú kə́lə́səkiə, a lɛ bəsú sɔ́kɔ́tɛ́á ɛ́sɛ́á bɛndɔ bá misí.

³³Nɔ́yɛ́ á bənísə́, ikúílí nɔ ná kɔtákána ɛlɔ́áyɛ́ nɛnɛ́á nɛ́ Isə́lúkú, nɔ́ tátákáná bənú na bənú.

³⁴Ábá mɛtaná yɛ́ ndɔ mɔndɔ nɔɛna, a húlə a nɔ́ nɛ́áka ɔwayɛ́ ɔmbɛ́la ɔkɛaka ɔwá, ikúílí nɔ ná kɔtákána iŋgində́, nɔ lɛ hilóbi hɛ́ Huɛlɛ́ kúə́yə́síə́. Ɛlɔ́áyɛ́ bɛkɔa ɔbɛ́á bɛ́ ná tíkə́nə́, mɛ ŋɔ sá bɛɛ́ta siəkinə ɛnáká mɛ ndásá uwənú busíə́.